Utshovঅধ্যায় 74
74.1
সংজয় উবাচ
ততো দুর্যোধনো রাজা মোহাত্প্রত্যাগতস্তদা
শরবর্ষৈঃ পুনর্ভীমং প্রত্যবারয়দচ্যুতম্
74.2
একীভূতাঃ পুনশ্চৈব তব পুত্রা মহারথাঃ
সমেত্য সমরে ভীমং যোধয়ামাসুরুদ্যতাঃ
74.3
ভীমসেনোঽপি সমরে সংপ্রাপ্য স্বরথং পুনঃ
সমারুহ্য মহাবাহুর্যয়ৌ যেন তবাত্মজঃ
74.4
প্রগৃহ্য চ মহাবেগং পরাসুকরণং দৃঢম্
চিত্রং শরাসনং সংখ্যে শরৈর্বিব্যাধ তে সুতান্
74.5
ততো দুর্যোধনো রাজা ভীমসেনং মহাবলম্
নারাচেন সুতীক্ষ্ণেন ভৃশং মর্মণ্যতাডয়ৎ
74.6
সোঽতিবিদ্ধো মহেষ্বাসস্তব পুত্রেণ ধন্বিনা
ক্রোধসংরক্তনয়নো বেগেনোত্ক্ষিপ্য কার্মুকম্
74.7
দুর্যোধনং ত্রিভির্বাণৈর্বাহ্বোরুরসি চার্পয়ৎ
স তথাভিহতো রাজা নাচলদ্গিরিরাডিব
74.8
তৌ দৃষ্ট্বা সমরে ক্রুদ্ধৌ বিনিঘ্নন্তৌ পরস্পরম্
দুর্যোধনানুজাঃ সর্বে শূরাঃ সংত্যক্তজীবিতাঃ
74.9
সংস্মৃত্য মন্ত্রিতং পূর্বং নিগ্রহে ভীমকর্মণঃ
নিশ্চয়ং মনসা কৃত্বা নিগ্রহীতুং প্রচক্রমুঃ
74.10
তানাপতত এবাজৌ ভীমসেনো মহাবলঃ
প্রত্যুদ্যয়ৌ মহারাজ গজঃ প্রতিগজানিব
74.11
ভৃশং ক্রুদ্ধশ্চ তেজস্বী নারাচেন সমর্পয়ৎ
চিত্রসেনং মহারাজ তব পুত্রং মহায়শাঃ
74.12
তথেতরাংস্তব সুতাংস্তাডয়ামাস ভারত
শরৈর্বহুবিধৈঃ সংখ্যে রুক্মপুঙ্খৈঃ সুবেগিতৈঃ
74.13
ততঃ সংস্থাপ্য সমরে স্বান্যনীকানি সর্বশঃ
অভিমন্যুপ্রভৃতয়স্তে দ্বাদশ মহারথাঃ
74.14
প্রেষিতা ধর্মরাজেন ভীমসেনপদানুগাঃ
প্রত্যুদ্যয়ুর্মহারাজ তব পুত্রান্মহাবলান্
74.15
দৃষ্ট্বা রথস্থাংস্তাঞ্শূরান্সূর্যাগ্নিসমতেজসঃ
সর্বানেব মহেষ্বাসান্ভ্রাজমানাঞ্শ্রিয়া বৃতান্
74.16
মহাহবে দীপ্যমানান্সুবর্ণকবচোজ্জ্বলান্
তত্যজুঃ সমরে ভীমং তব পুত্রা মহাবলাঃ
74.17
তান্নামৃষ্যত কৌন্তেয়ো জীবমানা গতা ইতি
অন্বীয় চ পুনঃ সর্বাংস্তব পুত্রানপীডয়ৎ
74.18
অথাভিমন্যুং সমরে ভীমসেনেন সংগতম্
পার্ষতেন চ সংপ্রেক্ষ্য তব সৈন্যে মহারথাঃ
74.19
দুর্যোধনপ্রভৃতয়ঃ প্রগৃহীতশরাসনাঃ
ভৃশমশ্বৈঃ প্রজবিতৈঃ প্রয়য়ুর্যত্র তে রথাঃ
74.20
অপরাহ্ণে ততো রাজন্প্রাবর্তত মহান্রণঃ
তাবকানাং চ বলিনাং পরেষাং চৈব ভারত
74.21
অভিমন্যুর্বিকর্ণস্য হয়ান্হত্বা মহাজবান্
অথৈনং পঞ্চবিংশত্যা ক্ষুদ্রকাণাং সমাচিনোৎ
74.22
হতাশ্বং রথমুত্সৃজ্য বিকর্ণস্তু মহারথঃ
আরুরোহ রথং রাজংশ্চিত্রসেনস্য ভাস্বরম্
74.23
স্থিতাবেকরথে তৌ তু ভ্রাতরৌ কুরুবর্ধনৌ
আর্জুনিঃ শরজালেন ছাদয়ামাস ভারত
74.24
দুর্জয়োঽথ বিকর্ণশ্চ কার্ষ্ণিং পঞ্চভিরায়সৈঃ
বিব্যধাতে ন চাকম্পত্কার্ষ্ণির্মেরুরিবাচলঃ
74.25
দুঃশাসনস্তু সমরে কেকয়ান্পঞ্চ মারিষ
যোধয়ামাস রাজেন্দ্র তদদ্ভুতমিবাভবৎ
74.26
দ্রৌপদেয়া রণে ক্রুদ্ধা দুর্যোধনমবারয়ন্
একৈকস্ত্রিভিরানর্ছত্পুত্রং তব বিশাং পতে
74.27
পুত্রোঽপি তব দুর্ধর্ষো দ্রৌপদ্যাস্তনয়ান্রণে
সায়কৈর্নিশিতৈ রাজন্নাজঘান পৃথক্পৃথক্
74.28
তৈশ্চাপি বিদ্ধঃ শুশুভে রুধিরেণ সমুক্ষিতঃ
গিরিপ্রস্রবণৈর্যদ্বদ্গিরির্ধাতুবিমিশ্রিতৈঃ
74.29
ভীষ্মোঽপি সমরে রাজন্পাণ্ডবানামনীকিনীম্
কালয়ামাস বলবান্পালঃ পশুগণানিব
74.30
ততো গাণ্ডীবনির্ঘোষঃ প্রাদুরাসীদ্বিশাং পতে
দক্ষিণেন বরূথিন্যাঃ পার্থস্যারীন্বিনিঘ্নতঃ
74.31
উত্তস্থুঃ সমরে তত্র কবন্ধানি সমন্ততঃ
কুরূণাং চাপি সৈন্যেষু পাণ্ডবানাং চ ভারত
74.32
শোণিতোদং রথাবর্তং গজদ্বীপং হয়োর্মিণম্
রথনৌভির্নরব্যাঘ্রাঃ প্রতেরুঃ সৈন্যসাগরম্
74.33
ছিন্নহস্তা বিকবচা বিদেহাশ্চ নরোত্তমাঃ
পতিতাস্তত্র দৃশ্যন্তে শতশোঽথ সহস্রশঃ
74.34
নিহতৈর্মত্তমাতঙ্গৈঃ শোণিতৌঘপরিপ্লুতৈঃ
ভূর্ভাতি ভরতশ্রেষ্ঠ পর্বতৈরাচিতা যথা
74.35
তত্রাদ্ভুতমপশ্যাম তব তেষাং চ ভারত
ন তত্রাসীত্পুমান্কশ্চিদ্যো যোদ্ধুং নাভিকাঙ্ক্ষতি
74.36
এবং যুয়ুধিরে বীরাঃ প্রার্থয়ানা মহদ্যশঃ
তাবকাঃ পাণ্ডবৈঃ সার্ধং কাঙ্ক্ষমাণা জয়ং যুধি