Utshovঅধ্যায় 73
73.1
সংজয় উবাচ
আত্মদোষাত্ত্বয়া রাজন্প্রাপ্তং ব্যসনমীদৃশম্
ন হি দুর্যোধনস্তানি পশ্যতে ভরতর্ষভ
যানি ত্বং দৃষ্টবান্রাজন্ধর্মসংকরকারিতে
73.2
তব দোষাত্পুরা বৃত্তং দ্যূতমেতদ্বিশাং পতে
তব দোষেণ যুদ্ধং চ প্রবৃত্তং সহ পাণ্ডবৈঃ
ত্বমেবাদ্য ফলং ভুঙ্ক্ষ্ব কৃত্বা কিল্বিষমাত্মনা
73.3
আত্মনা হি কৃতং কর্ম আত্মনৈবোপভুজ্যতে
ইহ বা প্রেত্য বা রাজংস্ত্বয়া প্রাপ্তং যথাতথম্
73.4
তস্মাদ্রাজন্স্থিরো ভূত্বা প্রাপ্যেদং ব্যসনং মহৎ
শৃণু যুদ্ধং যথাবৃত্তং শংসতো মম মারিষ
73.5
ভীমসেনস্তু নিশিতৈর্বাণৈর্ভিত্ত্বা মহাচমূম্
আসসাদ ততো বীরঃ সর্বান্দুর্যোধনানুজান্
73.6
দুঃশাসনং দুর্বিষহং দুঃসহং দুর্মদং জয়ম্
জয়ত্সেনং বিকর্ণং চ চিত্রসেনং সুদর্শনম্
73.7
চারুচিত্রং সুবর্মাণং দুষ্কর্ণং কর্ণমেব চ
এতানন্যাংশ্চ সুবহূন্সমীপস্থান্মহারথান্
73.8
ধার্তরাষ্ট্রান্সুসংক্রুদ্ধান্দৃষ্ট্বা ভীমো মহাবলঃ
ভীষ্মেণ সমরে গুপ্তাং প্রবিবেশ মহাচমূম্
73.9
অথাহ্বয়ন্ত তেঽন্যোন্যময়ং প্রাপ্তো বৃকোদরঃ
জীবগ্রাহং নিগৃহ্ণীমো বয়মেনং নরাধিপাঃ
73.10
স তৈঃ পরিবৃতঃ পার্থো ভ্রাতৃভিঃ কৃতনিশ্চয়ৈঃ
প্রজাসংহরণে সূর্যঃ ক্রূরৈরিব মহাগ্রহৈঃ
73.11
সংপ্রাপ্য মধ্যং ব্যূহস্য ন ভীঃ পাণ্ডবমাবিশৎ
যথা দেবাসুরে যুদ্ধে মহেন্দ্রঃ প্রাপ্য দানবান্
73.12
ততঃ শতসহস্রাণি রথিনাং সর্বশঃ প্রভো
ছাদয়ানং শরৈর্ঘোরৈস্তমেকমনুবব্রিরে
73.13
স তেষাং প্রবরান্যোধান্হস্ত্যশ্বরথসাদিনঃ
জঘান সমরে শূরো ধার্তরাষ্ট্রানচিন্তয়ন্
73.14
তেষাং ব্যবসিতং জ্ঞাত্বা ভীমসেনো জিঘৃক্ষতাম্
সমস্তানাং বধে রাজন্মতিং চক্রে মহামনাঃ
73.15
ততো রথং সমুত্সৃজ্য গদামাদায় পাণ্ডবঃ
জঘান ধার্তরাষ্ট্রাণাং তং বলৌঘমহার্ণবম্
73.16
ভীমসেনে প্রবিষ্টে তু ধৃষ্টদ্যুম্নোঽপি পার্ষতঃ
দ্রোণমুত্সৃজ্য তরসা প্রয়য়ৌ যত্র সৌবলঃ
73.17
বিদার্য মহতীং সেনাং তাবকানাং নরর্ষভঃ
আসসাদ রথং শূন্যং ভীমসেনস্য সংয়ুগে
73.18
দৃষ্ট্বা বিশোকং সমরে ভীমসেনস্য সারথিম্
ধৃষ্টদ্যুম্নো মহারাজ দুর্মনা গতচেতনঃ
73.19
অপৃচ্ছদ্বাষ্পসংরুদ্ধো নিস্বনাং বাচমীরয়ন্
মম প্রাণৈঃ প্রিয়তমঃ ক্ব ভীম ইতি দুঃখিতঃ
73.20
বিশোকস্তমুবাচেদং ধৃষ্টদ্যুম্নং কৃতাঞ্জলিঃ
সংস্থাপ্য মামিহ বলী পাণ্ডবেয়ঃ প্রতাপবান্
73.21
প্রবিষ্টো ধার্তরাষ্ট্রাণামেতদ্বলমহার্ণবম্
মামুক্ত্বা পুরুষব্যাঘ্র প্রীতিয়ুক্তমিদং বচঃ
73.22
প্রতিপালয় মাং সূত নিয়ম্যাশ্বান্মুহূর্তকম্
যাবদেতান্নিহন্ম্যাশু য ইমে মদ্বধোদ্যতাঃ
73.23
ততো দৃষ্ট্বা গদাহস্তং প্রধাবন্তং মহাবলম্
সর্বেষামেব সৈন্যানাং সংঘর্ষঃ সমজায়ত
73.24
তস্মিংস্তু তুমুলে যুদ্ধে বর্তমানে ভয়ানকে
ভিত্ত্বা রাজন্মহাব্যূহং প্রবিবেশ সখা তব
73.25
বিশোকস্য বচঃ শ্রুত্বা ধৃষ্টদ্যুম্নোঽপি পার্ষতঃ
প্রত্যুবাচ ততঃ সূতং রণমধ্যে মহাবলঃ
73.26
ন হি মে বিদ্যতে সূত জীবিতেঽদ্য প্রয়োজনম্
ভীমসেনং রণে হিত্বা স্নেহমুত্সৃজ্য পাণ্ডবৈঃ
73.27
যদি যামি বিনা ভীমং কিং মাং ক্ষত্রং বদিষ্যতি
একায়নগতে ভীমে ময়ি চাবস্থিতে যুধি
73.28
অস্বস্তি তস্য কুর্বন্তি দেবাঃ সাগ্নিপুরোগমাঃ
যঃ সহায়ান্পরিত্যজ্য স্বস্তিমানাব্রজেদ্গৃহান্
73.29
মম ভীমঃ সখা চৈব সংবন্ধী চ মহাবলঃ
ভক্তোঽস্মান্ভক্তিমাংশ্চাহং তমপ্যরিনিষূদনম্
73.30
সোঽহং তত্র গমিষ্যামি যত্র যাতো বৃকোদরঃ
নিঘ্নন্তং মামরীন্পশ্য দানবানিব বাসবম্
73.31
এবমুক্ত্বা ততো বীরো যয়ৌ মধ্যেন ভারতীম্
ভীমসেনস্য মার্গেষু গদাপ্রমথিতৈর্গজৈঃ
73.32
স দদর্শ ততো ভীমং দহন্তং রিপুবাহিনীম্
বাতং বৃক্ষানিব বলাত্প্রভঞ্জন্তং রণে নৃপান্
73.33
তে হন্যমানাঃ সমরে রথিনঃ সাদিনস্তথা
পাদাতা দন্তিনশ্চৈব চক্রুরার্তস্বরং মহৎ
73.34
হাহাকারশ্চ সংজজ্ঞে তব সৈন্যস্য মারিষ
বধ্যতো ভীমসেনেন কৃতিনা চিত্রয়োধিনা
73.35
ততঃ কৃতাস্ত্রাস্তে সর্বে পরিবার্য বৃকোদরম্
অভীতাঃ সমবর্তন্ত শস্ত্রবৃষ্ট্যা সমন্ততঃ
73.36
অভিদ্রুতং শস্ত্রভৃতাং বরিষ্ঠং; সমন্ততঃ পাণ্ডবং লোকবীরৈঃ
সৈন্যেন ঘোরেণ সুসংগতেন; দৃষ্ট্বা বলী পার্ষতো ভীমসেনম্
73.37
অথোপগচ্ছচ্ছরবিক্ষতাঙ্গং; পদাতিনং ক্রোধবিষং বমন্তম্
আশ্বাসয়ন্পার্ষতো ভীমসেনং; গদাহস্তং কালমিবান্তকালে
73.38
নিঃশল্যমেনং চ চকার তূর্ণ;মারোপয়চ্চাত্মরথং মহাত্মা
ভৃশং পরিষ্বজ্য চ ভীমসেন;মাশ্বাসয়ামাস চ শত্রুমধ্যে
73.39
ভ্রাতৄনথোপেত্য তবাপি পুত্র;স্তস্মিন্বিমর্দে মহতি প্রবৃত্তে
অয়ং দুরাত্মা দ্রুপদস্য পুত্রঃ; সমাগতো ভীমসেনেন সার্ধম্
তং যাত সর্বে সহিতা নিহন্তুং; মা বো রিপুঃ প্রার্থয়তামনীকম্
73.40
শ্রুত্বা তু বাক্যং তমমৃষ্যমাণা; জ্যেষ্ঠাজ্ঞয়া চোদিতা ধার্তরাষ্ট্রাঃ
বধায় নিষ্পেতুরুদায়ুধাস্তে; যুগক্ষয়ে কেতবো যদ্বদুগ্রাঃ
73.41
প্রগৃহ্য চিত্রাণি ধনূংষি বীরা; জ্যানেমিঘোষৈঃ প্রবিকম্পয়ন্তঃ
শরৈরবর্ষন্দ্রুপদস্য পুত্রং; যথাম্বুদা ভূধরং বারিজালৈঃ
নিহত্য তাংশ্চাপি শরৈঃ সুতীক্ষ্ণৈ;র্ন বিব্যথে সমরে চিত্রয়োধী
73.42
সমভ্যুদীর্ণাংশ্চ তবাত্মজাংস্তথা; নিশাম্য বীরানভিতঃ স্থিতান্রণে
জিঘাংসুরুগ্রং দ্রুপদাত্মজো যুবা; প্রমোহনাস্ত্রং যুয়ুজে মহারথঃ
ক্রুদ্ধো ভৃশং তব পুত্রেষু রাজ;ন্দৈত্যেষু যদ্বত্সমরে মহেন্দ্রঃ
73.43
ততো ব্যমুহ্যন্ত রণে নৃবীরাঃ; প্রমোহনাস্ত্রাহতবুদ্ধিসত্ত্বাঃ
প্রদুদ্রুবুঃ কুরবশ্চৈব সর্বে; সবাজিনাগাঃ সরথাঃ সমন্তাৎ
পরীতকালানিব নষ্টসংজ্ঞা;ন্মোহোপেতাংস্তব পুত্রান্নিশম্য
73.44
এতস্মিন্নেব কালে তু দ্রোণঃ শস্ত্রভৃতাং বরঃ
দ্রুপদং ত্রিভিরাসাদ্য শরৈর্বিব্যাধ দারুণৈঃ
73.45
সোঽতিবিদ্ধস্তদা রাজন্রণে দ্রোণেন পার্থিবঃ
অপায়াদ্দ্রুপদো রাজন্পূর্ববৈরমনুস্মরন্
73.46
জিত্বা তু দ্রুপদং দ্রোণঃ শঙ্খং দধ্মৌ প্রতাপবান্
তস্য শঙ্খস্বনং শ্রুত্বা বিত্রেসুঃ সর্বসোমকাঃ
73.47
অথ শুশ্রাব তেজস্বী দ্রোণঃ শস্ত্রভৃতাং বরঃ
প্রমোহনাস্ত্রেণ রণে মোহিতানাত্মজাংস্তব
73.48
ততো দ্রোণো রাজগৃদ্ধী ত্বরিতোঽভিয়য়ৌ রণাৎ
তত্রাপশ্যন্মহেষ্বাসো ভারদ্বাজঃ প্রতাপবান্
ধৃষ্টদ্যুম্নং চ ভীমং চ বিচরন্তৌ মহারণে
73.49
মোহাবিষ্টাংশ্চ তে পুত্রানপশ্যত্স মহারথঃ
ততঃ প্রজ্ঞাস্ত্রমাদায় মোহনাস্ত্রং ব্যশাতয়ৎ
73.50
অথ প্রত্যাগতপ্রাণাস্তব পুত্রা মহারথাঃ
পুনর্যুদ্ধায় সমরে প্রয়য়ুর্ভীমপার্ষতৌ
73.51
ততো যুধিষ্ঠিরঃ প্রাহ সমাহূয় স্বসৈনিকান্
গচ্ছন্তু পদবীং শক্ত্যা ভীমপার্ষতয়োর্যুধি
73.52
সৌভদ্রপ্রমুখা বীরা রথা দ্বাদশ দংশিতাঃ
প্রবৃত্তিমধিগচ্ছন্তু ন হি শুধ্যতি মে মনঃ
73.53
ত এবং সমনুজ্ঞাতাঃ শূরা বিক্রান্তয়োধিনঃ
বাঢমিত্যেবমুক্ত্বা তু সর্বে পুরুষমানিনঃ
মধ্যংদিনগতে সূর্যে প্রয়য়ুঃ সর্ব এব হি
73.54
কেকয়া দ্রৌপদেয়াশ্চ ধৃষ্টকেতুশ্চ বীর্যবান্
অভিমন্যুং পুরস্কৃত্য মহত্যা সেনয়া বৃতাঃ
73.55
তে কৃত্বা সমরে ব্যূহং সূচীমুখমরিংদমাঃ
বিভিদুর্ধার্তরাষ্ট্রাণাং তদ্রথানীকমাহবে
73.56
তান্প্রয়াতান্মহেষ্বাসানভিমন্যুপুরোগমান্
ভীমসেনভয়াবিষ্টা ধৃষ্টদ্যুম্নবিমোহিতা
73.57
ন সংধারয়িতুং শক্তা তব সেনা জনাধিপ
মদমূর্ছান্বিতাত্মানং প্রমদেবাধ্বনি স্থিতা
73.58
তেঽভিয়াতা মহেষ্বাসাঃ সুবর্ণবিকৃতধ্বজাঃ
পরীপ্সন্তোঽভ্যধাবন্ত ধৃষ্টদ্যুম্নবৃকোদরৌ
73.59
তৌ চ দৃষ্ট্বা মহেষ্বাসানভিমন্যুপুরোগমান্
বভূবতুর্মুদা যুক্তৌ নিঘ্নন্তৌ তব বাহিনীম্
73.60
দৃষ্ট্বা চ সহসায়ান্তং পাঞ্চাল্যো গুরুমাত্মনঃ
নাশংসত বধং বীরঃ পুত্রাণাং তব পার্ষতঃ
73.61
ততো রথং সমারোপ্য কেকয়স্য বৃকোদরম্
অভ্যধাবত্সুসংক্রুদ্ধো দ্রোণমিষ্বস্ত্রপারগম্
73.62
তস্যাভিপততস্তূর্ণং ভারদ্বাজঃ প্রতাপবান্
ক্রুদ্ধশ্চিচ্ছেদ ভল্লেন ধনুঃ শত্রুনিষূদনঃ
73.63
অন্যাংশ্চ শতশো বাণান্প্রেষয়ামাস পার্ষতে
দুর্যোধনহিতার্থায় ভর্তৃপিণ্ডমনুস্মরন্
73.64
অথান্যদ্ধনুরাদায় পার্ষতঃ পরবীরহা
দ্রোণং বিব্যাধ সপ্তত্যা রুক্মপুঙ্খৈঃ শিলাশিতৈঃ
73.65
তস্য দ্রোণঃ পুনশ্চাপং চিচ্ছেদামিত্রকর্শনঃ
হয়াংশ্চ চতুরস্তূর্ণং চতুর্ভিঃ সায়কোত্তমৈঃ
73.66
বৈবস্বতক্ষয়ং ঘোরং প্রেষয়ামাস বীর্যবান্
সারথিং চাস্য ভল্লেন প্রেষয়ামাস মৃত্যবে
73.67
হতাশ্বাত্স রথাত্তূর্ণমবপ্লুত্য মহারথঃ
আরুরোহ মহাবাহুরভিমন্যোর্মহারথম্
73.68
ততঃ সরথনাগাশ্বা সমকম্পত বাহিনী
পশ্যতো ভীমসেনস্য পার্ষতস্য চ পশ্যতঃ
73.69
তত্প্রভগ্নং বলং দৃষ্ট্বা দ্রোণেনামিততেজসা
নাশক্নুবন্বারয়িতুং সমস্তাস্তে মহারথাঃ
73.70
বধ্যমানং তু তত্সৈন্যং দ্রোণেন নিশিতৈঃ শরৈঃ
ব্যভ্রমত্তত্র তত্রৈব ক্ষোভ্যমাণ ইবার্ণবঃ
73.71
তথা দৃষ্ট্বা চ তত্সৈন্যং জহৃষে চ বলং তব
দৃষ্ট্বাচার্যং চ সংক্রুদ্ধং দহন্তং রিপুবাহিনীম্
চুক্রুশুঃ সর্বতো যোধাঃ সাধু সাধ্বিতি ভারত