Utshovঅধ্যায় 72
72.1
ধৃতরাষ্ট্র উবাচ
এবং বহুগুণং সৈন্যমেবং বহুবিধং পরম্
ব্যূঢমেবং যথাশাস্ত্রমমোঘং চৈব সংজয়
72.2
পুষ্টমস্মাকমত্যন্তমভিকামং চ নঃ সদা
প্রহ্বমব্যসনোপেতং পুরস্তাদ্দৃষ্টবিক্রমম্
72.3
নাতিবৃদ্ধমবালং চ ন কৃশং ন চ পীবরম্
লঘুবৃত্তায়তপ্রায়ং সারগাত্রমনাময়ম্
72.4
আত্তসংনাহশস্ত্রং চ বহুশস্ত্রপরিগ্রহম্
অসিয়ুদ্ধে নিয়ুদ্ধে চ গদায়ুদ্ধে চ কোবিদম্
72.5
প্রাসর্ষ্টিতোমরেষ্বাজৌ পরিঘেষ্বায়সেষু চ
ভিণ্ডিপালেষু শক্তীষু মুসলেষু চ সর্বশঃ
72.6
কম্পনেষু চ চাপেষু কণপেষু চ সর্বশঃ
ক্ষেপণীষু চ চিত্রাসু মুষ্টিয়ুদ্ধেষু কোবিদম্
72.7
অপরোক্ষং চ বিদ্যাসু ব্যায়ামেষু কৃতশ্রমম্
শস্ত্রগ্রহণবিদ্যাসু সর্বাসু পরিনিষ্ঠিতম্
72.8
আরোহে পর্যবস্কন্দে সরণে সান্তরপ্লুতে
সম্যক্প্রহরণে যানে ব্যপয়ানে চ কোবিদম্
72.9
নাগাশ্বরথয়ানেষু বহুশঃ সুপরীক্ষিতম্
পরীক্ষ্য চ যথান্যায়ং বেতনেনোপপাদিতম্
72.10
ন গোষ্ঠ্যা নোপচারেণ ন চ বন্ধুনিমিত্ততঃ
ন সৌহৃদবলৈশ্চাপি নাকুলীনপরিগ্রহৈঃ
72.11
সমৃদ্ধজনমার্যং চ তুষ্টসত্কৃতবান্ধবম্
কৃতোপকারভূয়িষ্ঠং যশস্বি চ মনস্বি চ
72.12
সজয়ৈশ্চ নরৈর্মুখ্যৈর্বহুশো মুখ্যকর্মভিঃ
লোকপালোপমৈস্তাত পালিতং লোকবিশ্রুতৈঃ
72.13
বহুভিঃ ক্ষত্রিয়ৈর্গুপ্তং পৃথিব্যাং লোকসংমতৈঃ
অস্মানভিগতৈঃ কামাত্সবলৈঃ সপদানুগৈঃ
72.14
মহোদধিমিবাপূর্ণমাপগাভিঃ সমন্ততঃ
অপক্ষৈঃ পক্ষসংকাশৈ রথৈর্নাগৈশ্চ সংবৃতম্
72.15
নানায়োধজলং ভীমং বাহনোর্মিতরঙ্গিণম্
ক্ষেপণ্যসিগদাশক্তিশরপ্রাসসমাকুলম্
72.16
ধ্বজভূষণসংবাধং রত্নপট্টেন সংচিতম্
বাহনৈঃ পরিসর্পদ্ভির্বায়ুবেগবিকম্পিতম্
72.17
অপারমিব গর্জন্তং সাগরপ্রতিমং মহৎ
দ্রোণভীষ্মাভিসংগুপ্তং গুপ্তং চ কৃতবর্মণা
72.18
কৃপদুঃশাসনাভ্যাং চ জয়দ্রথমুখৈস্তথা
ভগদত্তবিকর্ণাভ্যাং দ্রৌণিসৌবলবাহ্লিকৈঃ
72.19
গুপ্তং প্রবীরৈর্লোকস্য সারবদ্ভির্মহাত্মভিঃ
যদহন্যত সংগ্রামে দিষ্টমেতত্পুরাতনম্
72.20
নৈতাদৃশং সমুদ্যোগং দৃষ্টবন্তোঽথ মানুষাঃ
ঋষয়ো বা মহাভাগাঃ পুরাণা ভুবি সংজয়
72.21
ঈদৃশো হি বলৌঘস্তু যুক্তঃ শস্ত্রাস্ত্রসংপদা
বধ্যতে যত্র সংগ্রামে কিমন্যদ্ভাগধেয়তঃ
72.22
বিপরীতমিদং সর্বং প্রতিভাতি স্ম সংজয়
যত্রেদৃশং বলং ঘোরং নাতরদ্যুধি পাণ্ডবান্
72.23
অথ বা পাণ্ডবার্থায় দেবাস্তত্র সমাগতাঃ
যুধ্যন্তে মামকং সৈন্যং যদবধ্যন্ত সংজয়
72.24
উক্তো হি বিদুরেণেহ হিতং পথ্যং চ সংজয়
ন চ গৃহ্ণাতি তন্মন্দঃ পুত্রো দুর্যোধনো মম
72.25
তস্য মন্যে মতিঃ পূর্বং সর্বজ্ঞস্য মহাত্মনঃ
আসীদ্যথাগতং তাত যেন দৃষ্টমিদং পুরা
72.26
অথ বা ভাব্যমেবং হি সংজয়ৈতেন সর্বথা
পুরা ধাত্রা যথা সৃষ্টং তত্তথা ন তদন্যথা