Utshovঅধ্যায় 71
71.1
সংজয় উবাচ
বিহৃত্য চ ততো রাজন্সহিতাঃ কুরুপাণ্ডবাঃ
ব্যতীতায়াং তু শর্বর্যাং পুনর্যুদ্ধায় নির্যয়ুঃ
71.2
তত্র শব্দো মহানাসীত্তব তেষাং চ ভারত
যুজ্যতাং রথমুখ্যানাং কল্প্যতাং চৈব দন্তিনাম্
71.3
সংনহ্যতাং পদাতীনাং হয়ানাং চৈব ভারত
শঙ্খদুন্দুভিনাদশ্চ তুমুলঃ সর্বতোঽভবৎ
71.4
ততো যুধিষ্ঠিরো রাজা ধৃষ্টদ্যুম্নমভাষত
ব্যূহং ব্যূহ মহাবাহো মকরং শত্রুতাপনম্
71.5
এবমুক্তস্তু পার্থেন ধৃষ্টদ্যুম্নো মহারথঃ
ব্যাদিদেশ মহারাজ রথিনো রথিনাং বরঃ
71.6
শিরোঽভূদ্দ্রুপদস্তস্য পাণ্ডবশ্চ ধনংজয়ঃ
চক্ষুষী সহদেবশ্চ নকুলশ্চ মহারথঃ
তুণ্ডমাসীন্মহারাজ ভীমসেনো মহাবলঃ
71.7
সৌভদ্রো দ্রৌপদেয়াশ্চ রাক্ষসশ্চ ঘটোত্কচঃ
সাত্যকির্ধর্মরাজশ্চ ব্যূহগ্রীবাং সমাস্থিতাঃ
71.8
পৃষ্ঠমাসীন্মহারাজ বিরাটো বাহিনীপতিঃ
ধৃষ্টদ্যুম্নেন সহিতো মহত্যা সেনয়া বৃতঃ
71.9
কেকয়া ভ্রাতরঃ পঞ্চ বামং পার্শ্বং সমাশ্রিতাঃ
ধৃষ্টকেতুর্নরব্যাঘ্রঃ করকর্ষশ্চ বীর্যবান্
দক্ষিণং পক্ষমাশ্রিত্য স্থিতা ব্যূহস্য রক্ষণে
71.10
পাদয়োস্তু মহারাজ স্থিতঃ শ্রীমান্মহারথঃ
কুন্তিভোজঃ শতানীকো মহত্যা সেনয়া বৃতঃ
71.11
শিখণ্ডী তু মহেষ্বাসঃ সোমকৈঃ সংবৃতো বলী
ইরাবাংশ্চ ততঃ পুচ্ছে মকরস্য ব্যবস্থিতৌ
71.12
এবমেতন্মহাব্যূহং ব্যূহ্য ভারত পাণ্ডবাঃ
সূর্যোদয়ে মহারাজ পুনর্যুদ্ধায় দংশিতাঃ
71.13
কৌরবানভ্যয়ুস্তূর্ণং হস্ত্যশ্বরথপত্তিভিঃ
সমুচ্ছ্রিতৈর্ধ্বজৈশ্চিত্রৈঃ শস্ত্রৈশ্চ বিমলৈঃ শিতৈঃ
71.14
ব্যূহং দৃষ্ট্বা তু তত্সৈন্যং পিতা দেবব্রতস্তব
ক্রৌঞ্চেন মহতা রাজন্প্রত্যব্যূহত বাহিনীম্
71.15
তস্য তুণ্ডে মহেষ্বাসো ভারদ্বাজো ব্যরোচত
অশ্বত্থামা কৃপশ্চৈব চক্ষুরাস্তাং নরেশ্বর
71.16
কৃতবর্মা তু সহিতঃ কাম্বোজারট্টবাহ্লিকৈঃ
শিরস্যাসীন্নরশ্রেষ্ঠঃ শ্রেষ্ঠঃ সর্বধনুষ্মতাম্
71.17
গ্রীবায়াং শূরসেনস্তু তব পুত্রশ্চ মারিষ
দুর্যোধনো মহারাজ রাজভির্বহুভির্বৃতঃ
71.18
প্রাগ্জ্যোতিষস্তু সহিতঃ মদ্রসৌবীরকেকয়ৈঃ
উরস্যভূন্নরশ্রেষ্ঠ মহত্যা সেনয়া বৃতঃ
71.19
স্বসেনয়া চ সহিতঃ সুশর্মা প্রস্থলাধিপঃ
বামং পক্ষং সমাশ্রিত্য দংশিতঃ সমবস্থিতঃ
71.20
তুষারা যবনাশ্চৈব শকাশ্চ সহ চূচুপৈঃ
দক্ষিণং পক্ষমাশ্রিত্য স্থিতা ব্যূহস্য ভারত
71.21
শ্রুতায়ুশ্চ শতায়ুশ্চ সৌমদত্তিশ্চ মারিষ
ব্যূহস্য জঘনে তস্থূ রক্ষমাণাঃ পরস্পরম্
71.22
ততো যুদ্ধায় সংজগ্মুঃ পাণ্ডবাঃ কৌরবৈঃ সহ
সূর্যোদয়ে মহারাজ ততো যুদ্ধমভূন্মহৎ
71.23
প্রতীয়ূ রথিনো নাগান্নাগাশ্চ রথিনো যয়ুঃ
হয়ারোহা হয়ারোহান্রথিনশ্চাপি সাদিনঃ
71.24
সারথিং চ রথী রাজন্কুঞ্জরাংশ্চ মহারণে
হস্ত্যারোহা রথারোহান্রথিনশ্চাপি সাদিনঃ
71.25
রথিনঃ পত্তিভিঃ সার্ধং সাদিনশ্চাপি পত্তিভিঃ
অন্যোন্যং সমরে রাজন্প্রত্যধাবন্নমর্ষিতাঃ
71.26
ভীমসেনার্জুনয়মৈর্গুপ্তা চান্যৈর্মহারথৈঃ
শুশুভে পাণ্ডবী সেনা নক্ষত্রৈরিব শর্বরী
71.27
তথা ভীষ্মকৃপদ্রোণশল্যদুর্যোধনাদিভিঃ
তবাপি বিবভৌ সেনা গ্রহৈর্দ্যৌরিব সংবৃতা
71.28
ভীমসেনস্তু কৌন্তেয়ো দ্রোণং দৃষ্ট্বা পরাক্রমী
অভ্যয়াজ্জবনৈরশ্বৈর্ভারদ্বাজস্য বাহিনীম্
71.29
দ্রোণস্তু সমরে ক্রুদ্ধো ভীমং নবভিরায়সৈঃ
বিব্যাধ সমরে রাজন্মর্মাণ্যুদ্দিশ্য বীর্যবান্
71.30
দৃঢাহতস্ততো ভীমো ভারদ্বাজস্য সংয়ুগে
সারথিং প্রেষয়ামাস যমস্য সদনং প্রতি
71.31
স সংগৃহ্য স্বয়ং বাহান্ভারদ্বাজঃ প্রতাপবান্
ব্যধমত্পাণ্ডবীং সেনাং তূলরাশিমিবানলঃ
71.32
তে বধ্যমানা দ্রোণেন ভীষ্মেণ চ নরোত্তম
সৃঞ্জয়াঃ কেকয়ৈঃ সার্ধং পলায়নপরাভবন্
71.33
তথৈব তাবকং সৈন্যং ভীমার্জুনপরিক্ষতম্
মুহ্যতে তত্র তত্রৈব সমদেব বরাঙ্গনা
71.34
অভিদ্যেতাং ততো ব্যূহৌ তস্মিন্বীরবরক্ষয়ে
আসীদ্ব্যতিকরো ঘোরস্তব তেষাং চ ভারত
71.35
তদদ্ভুতমপশ্যাম তাবকানাং পরৈঃ সহ
একায়নগতাঃ সর্বে যদয়ুধ্যন্ত ভারত
71.36
প্রতিসংবার্য চাস্ত্রাণি তেঽন্যোন্যস্য বিশাং পতে
যুয়ুধুঃ পাণ্ডবাশ্চৈব কৌরবাশ্চ মহারথাঃ