Utshovঅধ্যায় 70
70.1
সংজয় উবাচ
অথ রাজন্মহাবাহুঃ সাত্যকির্যুদ্ধদুর্মদঃ
বিকৃষ্য চাপং সমরে ভারসাধনমুত্তমম্
70.2
প্রামুঞ্চত্পুঙ্খসংয়ুক্তাঞ্শরানাশীবিষোপমান্
প্রকাশং লঘু চিত্রং চ দর্শয়ন্নস্ত্রলাঘবম্
70.3
তস্য বিক্ষিপতশ্চাপং শরানন্যাংশ্চ মুঞ্চতঃ
আদদানস্য ভূয়শ্চ সংদধানস্য চাপরান্
70.4
ক্ষিপতশ্চ শরানস্য রণে শত্রূন্বিনিঘ্নতঃ
দদৃশে রূপমত্যর্থং মেঘস্যেব প্রবর্ষতঃ
70.5
তমুদীর্যন্তমালোক্য রাজা দুর্যোধনস্ততঃ
রথানাময়ুতং তস্য প্রেষয়ামাস ভারত
70.6
তাংস্তু সর্বান্মহেষ্বাসান্সাত্যকিঃ সত্যবিক্রমঃ
জঘান পরমেষ্বাসো দিব্যেনাস্ত্রেণ বীর্যবান্
70.7
স কৃত্বা দারুণং কর্ম প্রগৃহীতশরাসনঃ
আসসাদ ততো বীরো ভূরিশ্রবসমাহবে
70.8
স হি সংদৃশ্য সেনাং তাং যুয়ুধানেন পাতিতাম্
অভ্যধাবত সংক্রুদ্ধঃ কুরূণাং কীর্তিবর্ধনঃ
70.9
ইন্দ্রায়ুধসবর্ণং তত্স বিস্ফার্য মহদ্ধনুঃ
ব্যসৃজদ্বজ্রসংকাশাঞ্শরানাশীবিষোপমান্
সহস্রশো মহারাজ দর্শয়ন্পাণিলাঘবম্
70.10
শরাংস্তান্মৃত্যুসংস্পর্শান্সাত্যকেস্তু পদানুগাঃ
ন বিষেহুস্তদা রাজন্দুদ্রুবুস্তে সমন্ততঃ
বিহায় সমরে রাজন্সাত্যকিং যুদ্ধদুর্মদম্
70.11
তং দৃষ্ট্বা যুয়ুধানস্য সুতা দশ মহাবলাঃ
মহারথাঃ সমাখ্যাতাশ্চিত্রবর্মায়ুধধ্বজাঃ
70.12
সমাসাদ্য মহেষ্বাসং ভূরিশ্রবসমাহবে
ঊচুঃ সর্বে সুসংরব্ধা যূপকেতুং মহারণে
70.13
ভো ভো কৌরবদায়াদ সহাস্মাভির্মহাবল
এহি যুধ্যস্ব সংগ্রামে সমস্তৈঃ পৃথগেব বা
70.14
অস্মান্বা ত্বং পরাজিত্য যশঃ প্রাপ্নুহি সংয়ুগে
বয়ং বা ত্বাং পরাজিত্য প্রীতিং দাস্যামহে পিতুঃ
70.15
এবমুক্তস্তদা শূরৈস্তানুবাচ মহাবলঃ
বীর্যশ্লাঘী নরশ্রেষ্ঠস্তান্দৃষ্ট্বা সমুপস্থিতান্
70.16
সাধ্বিদং কথ্যতে বীরা যদেবং মতিরদ্য বঃ
যুধ্যধ্বং সহিতা যত্তা নিহনিষ্যামি বো রণে
70.17
এবমুক্তা মহেষ্বাসাস্তে বীরাঃ ক্ষিপ্রকারিণঃ
মহতা শরবর্ষেণ অভ্যবর্ষন্নরিংদমম্
70.18
অপরাহ্ণে মহারাজ সংগ্রামস্তুমুলোঽভবৎ
একস্য চ বহূনাং চ সমেতানাং রণাজিরে
70.19
তমেকং রথিনাং শ্রেষ্ঠং শরবর্ষৈরবাকিরন্
প্রাবৃষীব মহাশৈলং সিষিচুর্জলদা নৃপ
70.20
তৈস্তু মুক্তাঞ্শরৌঘাংস্তান্যমদণ্ডাশনিপ্রভান্
অসংপ্রাপ্তানসংপ্রাপ্তাংশ্চিচ্ছেদাশু মহারথঃ
70.21
তত্রাদ্ভুতমপশ্যাম সৌমদত্তেঃ পরাক্রমম্
যদেকো বহুভির্যুদ্ধে সমসজ্জদভীতবৎ
70.22
বিসৃজ্য শরবৃষ্টিং তাং দশ রাজন্মহারথাঃ
পরিবার্য মহাবাহুং নিহন্তুমুপচক্রমুঃ
70.23
সৌমদত্তিস্ততঃ ক্রুদ্ধস্তেষাং চাপানি ভারত
চিচ্ছেদ দশভির্বাণৈর্নিমেষেণ মহারথঃ
70.24
অথৈষাং ছিন্নধনুষাং ভল্লৈঃ সংনতপর্বভিঃ
চিচ্ছেদ সমরে রাজঞ্শিরাংসি নিশিতৈঃ শরৈঃ
তে হতা ন্যপতন্ভূমৌ বজ্রভগ্না ইব দ্রুমাঃ
70.25
তান্দৃষ্ট্বা নিহতান্বীরান্রণে পুত্রান্মহাবলান্
বার্ষ্ণেয়ো বিনদন্রাজন্ভূরিশ্রবসমভ্যয়াৎ
70.26
রথং রথেন সমরে পীডয়িত্বা মহাবলৌ
তাবন্যোন্যস্য সমরে নিহত্য রথবাজিনঃ
বিরথাবভিবল্গন্তৌ সমেয়াতাং মহারথৌ
70.27
প্রগৃহীতমহাখড্গৌ তৌ চর্মবরধারিণৌ
শুশুভাতে নরব্যাঘ্রৌ যুদ্ধায় সমবস্থিতৌ
70.28
ততঃ সাত্যকিমভ্যেত্য নিস্ত্রিংশবরধারিণম্
ভীমসেনস্ত্বরন্রাজন্রথমারোপয়ত্তদা
70.29
তবাপি তনয়ো রাজন্ভূরিশ্রবসমাহবে
আরোপয়দ্রথং তূর্ণং পশ্যতাং সর্বধন্বিনাম্
70.30
তস্মিংস্তথা বর্তমানে রণে ভীষ্মং মহারথম্
অয়োধয়ন্ত সংরব্ধাঃ পাণ্ডবা ভরতর্ষভ
70.31
লোহিতায়তি চাদিত্যে ত্বরমাণো ধনংজয়ঃ
পঞ্চবিংশতিসাহস্রান্নিজঘান মহারথান্
70.32
তে হি দুর্যোধনাদিষ্টাস্তদা পার্থনিবর্হণে
সংপ্রাপ্যৈব গতা নাশং শলভা ইব পাবকম্
70.33
ততো মত্স্যাঃ কেকয়াশ্চ ধনুর্বেদবিশারদাঃ
পরিবব্রুস্তদা পার্থং সহপুত্রং মহারথম্
70.34
এতস্মিন্নেব কালে তু সূর্যেঽস্তমুপগচ্ছতি
সর্বেষামেব সৈন্যানাং প্রমোহঃ সমজায়ত
70.35
অবহারং ততশ্চক্রে পিতা দেবব্রতস্তব
সংধ্যাকালে মহারাজ সৈন্যানাং শ্রান্তবাহনঃ
70.36
পাণ্ডবানাং কুরূণাং চ পরস্পরসমাগমে
তে সেনে ভৃশসংবিগ্নে যয়তুঃ স্বং নিবেশনম্
70.37
ততঃ স্বশিবিরং গত্বা ন্যবিশংস্তত্র ভারত
পাণ্ডবাঃ সৃঞ্জয়ৈঃ সার্ধং কুরবশ্চ যথাবিধি