Utshovঅধ্যায় 69
69.1
সংজয় উবাচ
বিরাটোঽথ ত্রিভির্বাণৈর্ভীষ্মমার্ছন্মহারথম্
বিব্যাধ তুরগাংশ্চাস্য ত্রিভির্বাণৈর্মহারথঃ
69.2
তং প্রত্যবিধ্যদ্দশভির্ভীষ্মঃ শাংতনবঃ শরৈঃ
রুক্মপুঙ্খৈর্মহেষ্বাসঃ কৃতহস্তো মহাবলঃ
69.3
দ্রৌণির্গাণ্ডীবধন্বানং ভীমধন্বা মহারথঃ
অবিধ্যদিষুভিঃ ষড্ভির্দৃঢহস্তঃ স্তনান্তরে
69.4
কার্মুকং তস্য চিচ্ছেদ ফল্গুনঃ পরবীরহা
অবিধ্যচ্চ ভৃশং তীক্ষ্ণৈঃ পত্রিভিঃ শত্রুকর্শনঃ
69.5
সোঽন্যত্কার্মুকমাদায় বেগবত্ক্রোধমূর্ছিতঃ
অমৃষ্যমাণঃ পার্থেন কার্মুকচ্ছেদমাহবে
69.6
অবিধ্যত্ফল্গুনং রাজন্নবত্যা নিশিতৈঃ শরৈঃ
বাসুদেবং চ সপ্তত্যা বিব্যাধ পরমেষুভিঃ
69.7
ততঃ ক্রোধাভিতাম্রাক্ষঃ সহ কৃষ্ণেন ফল্গুনঃ
দীর্ঘমুষ্ণং চ নিঃশ্বস্য চিন্তয়িত্বা মুহুর্মুহুঃ
69.8
ধনুঃ প্রপীড্য বামেন করেণামিত্রকর্শনঃ
গাণ্ডীবধন্বা সংক্রুদ্ধঃ শিতান্সংনতপর্বণঃ
জীবিতান্তকরান্ঘোরান্সমাদত্ত শিলীমুখান্
69.9
তৈস্তূর্ণং সমরেঽবিধ্যদ্দ্রৌণিং বলবতাং বরম্
তস্য তে কবচং ভিত্ত্বা পপুঃ শোণিতমাহবে
69.10
ন বিব্যথে চ নির্ভিন্নো দ্রৌণির্গাণ্ডীবধন্বনা
তথৈব শরবর্ষাণি প্রতিমুঞ্চন্নবিহ্বলঃ
তস্থৌ স সমরে রাজংস্ত্রাতুমিচ্ছন্মহাব্রতম্
69.11
তস্য তত্সুমহত্কর্ম শশংসুঃ পুরুষর্ষভাঃ
যত্কৃষ্ণাভ্যাং সমেতাভ্যাং নাপত্রপত সংয়ুগে
69.12
স হি নিত্যমনীকেষু যুধ্যতেঽভয়মাস্থিতঃ
অস্ত্রগ্রামং সসংহারং দ্রোণাত্প্রাপ্য সুদুর্লভম্
69.13
মমায়মাচার্যসুতো দ্রোণস্যাতিপ্রিয়ঃ সুতঃ
ব্রাহ্মণশ্চ বিশেষেণ মাননীয়ো মমেতি চ
69.14
সমাস্থায় মতিং বীরো বীভত্সুঃ শত্রুতাপনঃ
কৃপাং চক্রে রথশ্রেষ্ঠো ভারদ্বাজসুতং প্রতি
69.15
দ্রৌণিং ত্যক্ত্বা ততো যুদ্ধে কৌন্তেয়ঃ শত্রুতাপনঃ
যুয়ুধে তাবকান্নিঘ্নংস্ত্বরমাণঃ পরাক্রমী
69.16
দুর্যোধনস্তু দশভির্গার্ধ্রপত্রৈঃ শিলাশিতৈঃ
ভীমসেনং মহেষ্বাসং রুক্মপুঙ্খৈঃ সমর্পয়ৎ
69.17
ভীমসেনস্তু সংক্রুদ্ধঃ পরাসুকরণং দৃঢম্
চিত্রং কার্মুকমাদত্ত শরাংশ্চ নিশিতান্দশ
69.18
আকর্ণপ্রহিতৈস্তীক্ষ্ণৈর্বেগিতৈস্তিগ্মতেজনৈঃ
অবিধ্যত্তূর্ণমব্যগ্রঃ কুরুরাজং মহোরসি
69.19
তস্য কাঞ্চনসূত্রস্তু শরৈঃ পরিবৃতো মণিঃ
ররাজোরসি বৈ সূর্যো গ্রহৈরিব সমাবৃতঃ
69.20
পুত্রস্তু তব তেজস্বী ভীমসেনেন তাডিতঃ
নামৃষ্যত যথা নাগস্তলশব্দং সমীরিতম্
69.21
ততঃ শরৈর্মহারাজ রুক্মপুঙ্খৈঃ শিলাশিতৈঃ
ভীমং বিব্যাধ সংক্রুদ্ধস্ত্রাসয়ানো বরূথিনীম্
69.22
তৌ যুধ্যমানৌ সমরে ভৃশমন্যোন্যবিক্ষতৌ
পুত্রৌ তে দেবসংকাশৌ ব্যরোচেতাং মহাবলৌ
69.23
চিত্রসেনং নরব্যাঘ্রং সৌভদ্রঃ পরবীরহা
অবিধ্যদ্দশভির্বাণৈঃ পুরুমিত্রং চ সপ্তভিঃ
69.24
সত্যব্রতং চ সপ্তত্যা বিদ্ধ্বা শক্রসমো যুধি
নৃত্যন্নিব রণে বীর আর্তিং নঃ সমজীজনৎ
69.25
তং প্রত্যবিদ্যদ্দশভিশ্চিত্রসেনঃ শিলীমুখৈঃ
সত্যব্রতশ্চ নবভিঃ পুরুমিত্রশ্চ সপ্তভিঃ
69.26
স বিদ্ধো বিক্ষরন্রক্তং শত্রুসংবারণং মহৎ
চিচ্ছেদ চিত্রসেনস্য চিত্রং কার্মুকমার্জুনিঃ
ভিত্ত্বা চাস্য তনুত্রাণং শরেণোরস্যতাডয়ৎ
69.27
ততস্তে তাবকা বীরা রাজপুত্রা মহারথাঃ
সমেত্য যুধি সংরব্ধা বিব্যধুর্নিশিতৈঃ শরৈঃ
তাংশ্চ সর্বাঞ্শরৈস্তীক্ষ্ণৈর্জঘান পরমাস্ত্রবিৎ
69.28
তস্য দৃষ্ট্বা তু তত্কর্ম পরিবব্রুঃ সুতাস্তব
দহন্তং সমরে সৈন্যং তব কক্ষং যথোল্বণম্
69.29
অপেতশিশিরে কালে সমিদ্ধমিব পাবকঃ
অত্যরোচত সৌভদ্রস্তব সৈন্যানি শাতয়ন্
69.30
তত্তস্য চরিতং দৃষ্ট্বা পৌত্রস্তব বিশাং পতে
লক্ষ্মণোঽভ্যপতত্তূর্ণং সাত্বতীপুত্রমাহবে
69.31
অভিমন্যুস্তু সংক্রুদ্ধো লক্ষ্মণং শুভলক্ষণম্
বিব্যাধ বিশিখৈঃ ষড্ভিঃ সারথিং চ ত্রিভিঃ শরৈঃ
69.32
তথৈব লক্ষ্মণো রাজন্সৌভদ্রং নিশিতৈঃ শরৈঃ
অবিধ্যত মহারাজ তদদ্ভুতমিবাভবৎ
69.33
তস্যাশ্বাংশ্চতুরো হত্বা সারথিং চ মহাবলঃ
অভ্যদ্রবত সৌভদ্রো লক্ষ্মণং নিশিতৈঃ শরৈঃ
69.34
হতাশ্বে তু রথে তিষ্ঠঁল্লক্ষ্মণঃ পরবীরহা
শক্তিং চিক্ষেপ সংক্রুদ্ধঃ সৌভদ্রস্য রথং প্রতি
69.35
তামাপতন্তীং সহসা ঘোররূপাং দুরাসদাম্
অভিমন্যুঃ শরৈস্তীক্ষ্ণৈশ্চিচ্ছেদ ভুজগোপমাম্
69.36
ততঃ স্বরথমারোপ্য লক্ষ্মণং গৌতমস্তদা
অপোবাহ রথেনাজৌ সর্বসৈন্যস্য পশ্যতঃ
69.37
ততঃ সমাকুলে তস্মিন্বর্তমানে মহাভয়ে
অভ্যদ্রবঞ্জিঘাংসন্তঃ পরস্পরবধৈষিণঃ
69.38
তাবকাশ্চ মহেষ্বাসাঃ পাণ্ডবাশ্চ মহারথাঃ
জুহ্বন্তঃ সমরে প্রাণান্নিজঘ্নুরিতরেতরম্
69.39
মুক্তকেশা বিকবচা বিরথাশ্ছিন্নকার্মুকাঃ
বাহুভিঃ সময়ুধ্যন্ত সৃঞ্জয়াঃ কুরুভিঃ সহ
69.40
ততো ভীষ্মো মহাবাহুঃ পাণ্ডবানাং মহাত্মনাম্
সেনাং জঘান সংক্রুদ্ধো দিব্যৈরস্ত্রৈর্মহাবলঃ
69.41
হতেশ্বরৈর্গজৈস্তত্র নরৈরশ্বৈশ্চ পাতিতৈঃ
রথিভিঃ সাদিভিশ্চৈব সমাস্তীর্যত মেদিনী