Utshovঅধ্যায় 68
68.1
সংজয় উবাচ
শিখণ্ডী সহ মত্স্যেন বিরাটেন বিশাং পতে
ভীষ্মমাশু মহেষ্বাসমাসসাদ সুদুর্জয়ম্
68.2
দ্রোণং কৃপং বিকর্ণং চ মহেষ্বাসান্মহাবলান্
রাজ্ঞশ্চান্যান্রণে শূরান্বহূনার্ছদ্ধনংজয়ঃ
68.3
সৈন্ধবং চ মহেষ্বাসং সামাত্যং সহ বন্ধুভিঃ
প্রাচ্যাংশ্চ দাক্ষিণাত্যাংশ্চ ভূমিপান্ভূমিপর্ষভ
68.4
পুত্রং চ তে মহেষ্বাসং দুর্যোধনমমর্ষণম্
দুঃসহং চৈব সমরে ভীমসেনোঽভ্যবর্তত
68.5
সহদেবস্তু শকুনিমুলূকং চ মহারথম্
পিতাপুত্রৌ মহেষ্বাসাবভ্যবর্তত দুর্জয়ৌ
68.6
যুধিষ্ঠিরো মহারাজ গজানীকং মহারথঃ
সমবর্তত সংগ্রামে পুত্রেণ নিকৃতস্তব
68.7
মাদ্রীপুত্রস্তু নকুলঃ শূরঃ সংক্রন্দনো যুধি
ত্রিগর্তানাং রথোদারৈঃ সমসজ্জত পাণ্ডবঃ
68.8
অভ্যবর্তন্ত দুর্ধর্ষাঃ সমরে শাল্বকেকয়ান্
সাত্যকিশ্চেকিতানশ্চ সৌভদ্রশ্চ মহারথঃ
68.9
ধৃষ্টকেতুশ্চ সমরে রাক্ষসশ্চ ঘটোত্কচঃ
পুত্রাণাং তে রথানীকং প্রত্যুদ্যাতাঃ সুদুর্জয়াঃ
68.10
সেনাপতিরমেয়াত্মা ধৃষ্টদ্যুম্নো মহাবলঃ
দ্রোণেন সমরে রাজন্সমিয়ায়েন্দ্রকর্মণা
68.11
এবমেতে মহেষ্বাসাস্তাবকাঃ পাণ্ডবৈঃ সহ
সমেত্য সমরে শূরাঃ সংপ্রহারং প্রচক্রিরে
68.12
মধ্যংদিনগতে সূর্যে নভস্যাকুলতাং গতে
কুরবঃ পাণ্ডবেয়াশ্চ নিজঘ্নুরিতরেতরম্
68.13
ধ্বজিনো হেমচিত্রাঙ্গা বিচরন্তো রণাজিরে
সপতাকা রথা রেজুর্বৈয়াঘ্রপরিবারণাঃ
68.14
সমেতানাং চ সমরে জিগীষূণাং পরস্পরম্
বভূব তুমুলঃ শব্দঃ সিংহানামিব নর্দতাম্
68.15
তত্রাদ্ভুতমপশ্যাম সংপ্রহারং সুদারুণম্
যমকুর্বন্রণে বীরাঃ সৃঞ্জয়াঃ কুরুভিঃ সহ
68.16
নৈব খং ন দিশো রাজন্ন সূর্যং শত্রুতাপন
বিদিশো বাপ্যপশ্যাম শরৈর্মুক্তৈঃ সমন্ততঃ
68.17
শক্তীনাং বিমলাগ্রাণাং তোমরাণাং তথাস্যতাম্
নিস্ত্রিংশানাং চ পীতানাং নীলোত্পলনিভাঃ প্রভাঃ
68.18
কবচানাং বিচিত্রাণাং ভূষণানাং প্রভাস্তথা
খং দিশঃ প্রদিশশ্চৈব ভাসয়ামাসুরোজসা
বিররাজ তদা রাজংস্তত্র তত্র রণাঙ্গণম্
68.19
রথসিংহাসনব্যাঘ্রাঃ সমায়ান্তশ্চ সংয়ুগে
বিরেজুঃ সমরে রাজন্গ্রহা ইব নভস্তলে
68.20
ভীষ্মস্তু রথিনাং শ্রেষ্ঠো ভীমসেনং মহাবলম্
অবারয়ত সংক্রুদ্ধঃ সর্বসৈন্যস্য পশ্যতঃ
68.21
ততো ভীষ্মবিনির্মুক্তা রুক্মপুঙ্খাঃ শিলাশিতাঃ
অভ্যঘ্নন্সমরে ভীমং তৈলধৌতাঃ সুতেজনাঃ
68.22
তস্য শক্তিং মহাবেগাং ভীমসেনো মহাবলঃ
ক্রুদ্ধাশীবিষসংকাশাং প্রেষয়ামাস ভারত
68.23
তামাপতন্তীং সহসা রুক্মদণ্ডাং দুরাসদাম্
চিচ্ছেদ সমরে ভীষ্মঃ শরৈঃ সংনতপর্বভিঃ
68.24
ততোঽপরেণ ভল্লেন পীতেন নিশিতেন চ
কার্মুকং ভীমসেনস্য দ্বিধা চিচ্ছেদ ভারত
68.25
সাত্যকিস্তু ততস্তূর্ণং ভীষ্মমাসাদ্য সংয়ুগে
শরৈর্বহুভিরানর্ছত্পিতরং তে জনেশ্বর
68.26
ততঃ সংধায় বৈ তীক্ষ্ণং শরং পরমদারুণম্
বার্ষ্ণেয়স্য রথাদ্ভীষ্মঃ পাতয়ামাস সারথিম্
68.27
তস্যাশ্বাঃ প্রদ্রুতা রাজন্নিহতে রথসারথৌ
তেন তেনৈব ধাবন্তি মনোমারুতরংহসঃ
68.28
ততঃ সর্বস্য সৈন্যস্য নিস্বনস্তুমুলোঽভবৎ
হাহাকারশ্চ সংজজ্ঞে পাণ্ডবানাং মহাত্মনাম্
68.29
অভিদ্রবত গৃহ্ণীত হয়ান্যচ্ছত ধাবত
ইত্যাসীত্তুমুলঃ শব্দো যুয়ুধানরথং প্রতি
68.30
এতস্মিন্নেব কালে তু ভীষ্মঃ শাংতনবঃ পুনঃ
ব্যহনত্পাণ্ডবীং সেনামাসুরীমিব বৃত্রহা
68.31
তে বধ্যমানা ভীষ্মেণ পাঞ্চালাঃ সোমকৈঃ সহ
আর্যাং যুদ্ধে মতিং কৃত্বা ভীষ্মমেবাভিদুদ্রুবুঃ
68.32
ধৃষ্টদ্যুম্নমুখাশ্চাপি পার্থাঃ শাংতনবং রণে
অভ্যধাবঞ্জিগীষন্তস্তব পুত্রস্য বাহিনীম্
68.33
তথৈব তাবকা রাজন্ভীষ্মদ্রোণমুখাঃ পরান্
অভ্যধাবন্ত বেগেন ততো যুদ্ধমবর্তত