Utshovঅধ্যায় 67
67.1
সংজয় উবাচ
দৃষ্ট্বা ভীষ্মেণ সংসক্তান্ভ্রাতৄনন্যাংশ্চ পার্থিবান্
তমভ্যধাবদ্গাঙ্গেয়মুদ্যতাস্ত্রো ধনংজয়ঃ
67.2
পাঞ্চজন্যস্য নির্ঘোষং ধনুষো গাণ্ডিবস্য চ
ধ্বজং চ দৃষ্ট্বা পার্থস্য সর্বান্নো ভয়মাবিশৎ
67.3
অসজ্জমানং বৃক্ষেষু ধূমকেতুমিবোত্থিতম্
বহুবর্ণং চ চিত্রং চ দিব্যং বানরলক্ষণম্
অপশ্যাম মহারাজ ধ্বজং গাণ্ডিবধন্বনঃ
67.4
বিদ্যুতং মেঘমধ্যস্থাং ভ্রাজমানামিবাম্বরে
দদৃশুর্গাণ্ডিবং যোধা রুক্মপৃষ্ঠং মহারথে
67.5
অশুশ্রুম ভৃশং চাস্য শক্রস্যেবাভিগর্জতঃ
সুঘোরং তলয়োঃ শব্দং নিঘ্নতস্তব বাহিনীম্
67.6
চণ্ডবাতো যথা মেঘঃ সবিদ্যুত্স্তনয়িত্নুমান্
দিশঃ সংপ্লাবয়ন্সর্বাঃ শরবর্ষৈঃ সমন্ততঃ
67.7
অভ্যধাবত গাঙ্গেয়ং ভৈরবাস্ত্রো ধনংজয়ঃ
দিশং প্রাচীং প্রতীচীং চ ন জানীমোঽস্ত্রমোহিতাঃ
67.8
কাংদিগ্ভূতাঃ শ্রান্তপত্রা হতাস্ত্রা হতচেতসঃ
অন্যোন্যমভিসংশ্লিষ্য যোধাস্তে ভরতর্ষভ
67.9
ভীষ্মমেবাভিলীয়ন্ত সহ সর্বৈস্তবাত্মজৈঃ
তেষামার্তায়নমভূদ্ভীষ্মঃ শংতনবো রণে
67.10
সমুত্পতন্ত বিত্রস্তা রথেভ্যো রথিনস্তদা
সাদিনশ্চাশ্বপৃষ্ঠেভ্যো ভূমৌ চাপি পদাতয়ঃ
67.11
শ্রুত্বা গাণ্ডীবনির্ঘোষং বিস্ফূর্জিতমিবাশনেঃ
সর্বসৈন্যানি ভীতানি ব্যবলীয়ন্ত ভারত
67.12
অথ কাম্বোজমুখ্যৈস্তু বৃহদ্ভিঃ শীঘ্রগামিভিঃ
গোপানাং বহুসাহস্রৈর্বলৈর্গোবাসনো বৃতঃ
67.13
মদ্রসৌবীরগান্ধারৈস্ত্রিগর্তৈশ্চ বিশাং পতে
সর্বকালিঙ্গমুখ্যৈশ্চ কলিঙ্গাধিপতির্বৃতঃ
67.14
নাগা নরগণৌঘাশ্চ দুঃশাসনপুরঃসরাঃ
জয়দ্রথশ্চ নৃপতিঃ সহিতঃ সর্বরাজভিঃ
67.15
হয়ারোহবরাশ্চৈব তব পুত্রেণ চোদিতাঃ
চতুর্দশ সহস্রাণি সৌবলং পর্যবারয়ন্
67.16
ততস্তে সহিতাঃ সর্বে বিভক্তরথবাহনাঃ
পাণ্ডবান্সমরে জগ্মুস্তাবকা ভরতর্ষভ
67.17
রথিভির্বারণৈরশ্বৈঃ পদাতৈশ্চ সমীরিতম্
ঘোরমায়োধনং জজ্ঞে মহাভ্রসদৃশং রজঃ
67.18
তোমরপ্রাসনারাচগজাশ্বরথয়োধিনাম্
বলেন মহতা ভীষ্মঃ সমসজ্জত্কিরীটিনা
67.19
আবন্ত্যঃ কাশিরাজেন ভীমসেনেন সৈন্ধবঃ
অজাতশত্রুর্মদ্রাণামৃষভেণ যশস্বিনা
সহপুত্রঃ সহামাত্যঃ শল্যেন সমসজ্জত
67.20
বিকর্ণঃ সহদেবেন চিত্রসেনঃ শিখণ্ডিনা
মত্স্যা দুর্যোধনং জগ্মুঃ শকুনিং চ বিশাং পতে
67.21
দ্রুপদশ্চেকিতানশ্চ সাত্যকিশ্চ মহারথঃ
দ্রোণেন সমসজ্জন্ত সপুত্রেণ মহাত্মনা
কৃপশ্চ কৃতবর্মা চ ধৃষ্টকেতুমভিদ্রুতৌ
67.22
এবং প্রজবিতাশ্বানি ভ্রান্তনাগরথানি চ
সৈন্যানি সমসজ্জন্ত প্রয়ুদ্ধানি সমন্ততঃ
67.23
নিরভ্রে বিদ্যুতস্তীব্রা দিশশ্চ রজসাবৃতাঃ
প্রাদুরাসন্মহোল্কাশ্চ সনির্ঘাতা বিশাং পতে
67.24
প্রববৌ চ মহাবাতঃ পাংসুবর্ষং পপাত চ
নভস্যন্তর্দধে সূর্যঃ সৈন্যেন রজসাবৃতঃ
67.25
প্রমোহঃ সর্বসত্ত্বানামতীব সমপদ্যত
রজসা চাভিভূতানামস্ত্রজালৈশ্চ তুদ্যতাম্
67.26
বীরবাহুবিসৃষ্টানাং সর্বাবরণভেদিনাম্
সংঘাতঃ শরজালানাং তুমুলঃ সমপদ্যত
67.27
প্রকাশং চক্রুরাকাশমুদ্যতানি ভুজোত্তমৈঃ
নক্ষত্রবিমলাভানি শস্ত্রাণি ভরতর্ষভ
67.28
আর্ষভাণি বিচিত্রাণি রুক্মজালাবৃতানি চ
সংপেতুর্দিক্ষু সর্বাসু চর্মাণি ভরতর্ষভ
67.29
সূর্যবর্ণৈশ্চ নিস্ত্রিংশৈঃ পাত্যমানানি সর্বশঃ
দিক্ষু সর্বাস্বদৃশ্যন্ত শরীরাণি শিরাংসি চ
67.30
ভগ্নচক্রাক্ষনীডাশ্চ নিপাতিতমহাধ্বজাঃ
হতাশ্বাঃ পৃথিবীং জগ্মুস্তত্র তত্র মহারথাঃ
67.31
পরিপেতুর্হয়াশ্চাত্র কেচিচ্ছস্ত্রকৃতব্রণাঃ
রথান্বিপরিকর্ষন্তো হতেষু রথয়োধিষু
67.32
শরাহতা ভিন্নদেহা বদ্ধয়োক্ত্রা হয়োত্তমাঃ
যুগানি পর্যকর্ষন্ত তত্র তত্র স্ম ভারত
67.33
অদৃশ্যন্ত সসূতাশ্চ সাশ্বাঃ সরথয়োধিনঃ
একেন বলিনা রাজন্বারণেন হতা রথাঃ
67.34
গন্ধহস্তিমদস্রাবমাঘ্রায় বহবো রণে
সংনিপাতে বলৌঘানাং বীতমাদদিরে গজাঃ
67.35
সতোমরমহামাত্রৈর্নিপতদ্ভির্গতাসুভিঃ
বভূবায়োধনং ছন্নং নারাচাভিহতৈর্গজৈঃ
67.36
সংনিপাতে বলৌঘানাং প্রেষিতৈর্বরবারণৈঃ
নিপেতুর্যুধি সংভগ্নাঃ সয়োধাঃ সধ্বজা রথাঃ
67.37
নাগরাজোপমৈর্হস্তৈর্নাগৈরাক্ষিপ্য সংয়ুগে
ব্যদৃশ্যন্ত মহারাজ সংভগ্না রথকূবরাঃ
67.38
বিশীর্ণরথজালাশ্চ কেশেষ্বাক্ষিপ্য দন্তিভিঃ
দ্রুমশাখা ইবাবিধ্য নিষ্পিষ্টা রথিনো রণে
67.39
রথেষু চ রথান্যুদ্ধে সংসক্তান্বরবারণাঃ
বিকর্ষন্তো দিশঃ সর্বাঃ সংপেতুঃ সর্বশব্দগাঃ
67.40
তেষাং তথা কর্ষতাং চ গজানাং রূপমাবভৌ
সরঃসু নলিনীজালং বিষক্তমিব কর্ষতাম্
67.41
এবং সংছাদিতং তত্র বভূবায়োধনং মহৎ
সাদিভিশ্চ পদাতৈশ্চ সধ্বজৈশ্চ মহারথৈঃ