অধ্যায় 66

66.1

সংজয় উবাচ
অকরোত্তুমুলং যুদ্ধং ভীষ্মঃ শাংতনবস্তদা
ভীমসেনভয়াদিচ্ছন্পুত্রাংস্তারয়িতুং তব

পূর্বাহ্ণে তন্মহারৌদ্রং রাজ্ঞাং যুদ্ধমবর্তত
কুরূণাং পাণ্ডবানাং চ মুখ্যশূরবিনাশনম্

তস্মিন্নাকুলসংগ্রামে বর্তমানে মহাভয়ে
অভবত্তুমুলঃ শব্দঃ সংস্পৃশন্গগনং মহৎ

নদদ্ভিশ্চ মহানাগৈর্হেষমাণৈশ্চ বাজিভিঃ
ভেরীশঙ্খনিনাদৈশ্চ তুমুলঃ সমপদ্যত

যুয়ুত্সবস্তে বিক্রান্তা বিজয়ায় মহাবলাঃ
অন্যোন্যমভিগর্জন্তো গোষ্ঠেষ্বিব মহর্ষভাঃ

শিরসাং পাত্যমানানাং সমরে নিশিতৈঃ শরৈঃ
অশ্মবৃষ্টিরিবাকাশে বভূব ভরতর্ষভ

কুণ্ডলোষ্ণীষধারীণি জাতরূপোজ্জ্বলানি চ
পতিতানি স্ম দৃশ্যন্তে শিরাংসি ভরতর্ষভ

বিশিখোন্মথিতৈর্গাত্রৈর্বাহুভিশ্চ সকার্মুকৈঃ
সহস্তাভরণৈশ্চান্যৈরভবচ্ছাদিতা মহী

কবচোপহিতৈর্গাত্রৈর্হস্তৈশ্চ সমলংকৃতৈঃ
মুখৈশ্চ চন্দ্রসংকাশৈ রক্তান্তনয়নৈঃ শুভৈঃ

গজবাজিমনুষ্যাণাং সর্বগাত্রৈশ্চ ভূপতে
আসীত্সর্বা সমাকীর্ণা মুহূর্তেন বসুংধরা

রজোমেঘৈশ্চ তুমুলৈঃ শস্ত্রবিদ্যুত্প্রকাশিতৈঃ
আয়ুধানাং চ নির্ঘোষঃ স্তনয়িত্নুসমোঽভবৎ

স সংপ্রহারস্তুমুলঃ কটুকঃ শোণিতোদকঃ
প্রাবর্তত কুরূণাং চ পাণ্ডবানাং চ ভারত

তস্মিন্মহাভয়ে ঘোরে তুমুলে লোমহর্ষণে
ববর্ষুঃ শরবর্ষাণি ক্ষত্রিয়া যুদ্ধদুর্মদাঃ

ক্রোশন্তি কুঞ্জরাস্তত্র শরবর্ষপ্রতাপিতাঃ
তাবকানাং পরেষাং চ সংয়ুগে ভরতোত্তম
অশ্বাশ্চ পর্যধাবন্ত হতারোহা দিশো দশ

উত্পত্য নিপতন্ত্যন্যে শরঘাতপ্রপীডিতাঃ
তাবকানাং পরেষাং চ যোধানাং ভরতর্ষভ

অশ্বানাং কুঞ্জরাণাং চ রথানাং চাতিবর্ততাম্
সংঘাতাঃ স্ম প্রদৃশ্যন্তে তত্র তত্র বিশাং পতে

গদাভিরসিভিঃ প্রাসৈর্বাণৈশ্চ নতপর্বভিঃ
জঘ্নুঃ পরস্পরং তত্র ক্ষত্রিয়াঃ কালচোদিতাঃ

অপরে বাহুভির্বীরা নিয়ুদ্ধকুশলা যুধি
বহুধা সমসজ্জন্ত আয়সৈঃ পরিঘৈরিব

মুষ্টিভির্জানুভিশ্চৈব তলৈশ্চৈব বিশাং পতে
অন্যোন্যং জঘ্নিরে বীরাস্তাবকাঃ পাণ্ডবৈঃ সহ

বিরথা রথিনশ্চাত্র নিস্ত্রিংশবরধারিণঃ
অন্যোন্যমভিধাবন্ত পরস্পরবধৈষিণঃ

ততো দুর্যোধনো রাজা কলিঙ্গৈর্বহুভির্বৃতঃ
পুরস্কৃত্য রণে ভীষ্মং পাণ্ডবানভ্যবর্তত

তথৈব পাণ্ডবাঃ সর্বে পরিবার্য বৃকোদরম্
ভীষ্মমভ্যদ্রবন্ক্রুদ্ধা রণে রভসবাহনাঃ