Utshovঅধ্যায় 65
65.1
সংজয় উবাচ
ব্যুষিতায়াং চ শর্বর্যামুদিতে চ দিবাকরে
উভে সেনে মহারাজ যুদ্ধায়ৈব সমীয়তুঃ
65.2
অভ্যধাবংশ্চ সংক্রুদ্ধাঃ পরস্পরজিগীষবঃ
তে সর্বে সহিতা যুদ্ধে সমালোক্য পরস্পরম্
65.3
পাণ্ডবা ধার্তরাষ্ট্রাশ্চ রাজন্দুর্মন্ত্রিতে তব
ব্যূহৌ চ ব্যূহ্য সংরব্ধাঃ সংপ্রয়ুদ্ধাঃ প্রহারিণঃ
65.4
অরক্ষন্মকরব্যূহং ভীষ্মো রাজন্সমন্ততঃ
তথৈব পাণ্ডবা রাজন্নরক্ষন্ব্যূহমাত্মনঃ
65.5
স নির্যয়ৌ রথানীকং পিতা দেবব্রতস্তব
মহতা রথবংশেন সংবৃতো রথিনাং বরঃ
65.6
ইতরেতরমন্বীয়ুর্যথাভাগমবস্থিতাঃ
রথিনঃ পত্তয়শ্চৈব দন্তিনঃ সাদিনস্তথা
65.7
তান্দৃষ্ট্বা প্রোদ্যতান্সংখ্যে পাণ্ডবাশ্চ যশস্বিনঃ
শ্যেনেন ব্যূহরাজেন তেনাজয্যেন সংয়ুগে
65.8
অশোভত মুখে তস্য ভীমসেনো মহাবলঃ
নেত্রে শিখণ্ডী দুর্ধর্ষো ধৃষ্টদ্যুম্নশ্চ পার্ষতঃ
65.9
শীর্ষং তস্যাভবদ্বীরঃ সাত্যকিঃ সত্যবিক্রমঃ
বিধুন্বন্গাণ্ডিবং পার্থো গ্রীবায়ামভবত্তদা
65.10
অক্ষৌহিণ্যা সমগ্রা যা বামপক্ষোঽভবত্তদা
মহাত্মা দ্রুপদঃ শ্রীমান্সহ পুত্রেণ সংয়ুগে
65.11
দক্ষিণশ্চাভবত্পক্ষঃ কৈকেয়োঽক্ষৌহিণীপতিঃ
পৃষ্ঠতো দ্রৌপদেয়াশ্চ সৌভদ্রশ্চাপি বীর্যবান্
65.12
পৃষ্ঠে সমভবচ্ছ্রীমান্স্বয়ং রাজা যুধিষ্ঠিরঃ
ভ্রাতৃভ্যাং সহিতো ধীমান্যমাভ্যাং চারুবিক্রমঃ
65.13
প্রবিশ্য তু রণে ভীমো মকরং মুখতস্তদা
ভীষ্মমাসাদ্য সংগ্রামে ছাদয়ামাস সায়কৈঃ
65.14
ততো ভীষ্মো মহাস্ত্রাণি পাতয়ামাস ভারত
মোহয়ন্পাণ্ডুপুত্রাণাং ব্যূঢং সৈন্যং মহাহবে
65.15
সংমুহ্যতি তদা সৈন্যে ত্বরমাণো ধনংজয়ঃ
ভীষ্মং শরসহস্রেণ বিব্যাধ রণমূর্ধনি
65.16
পরিসংবার্য চাস্ত্রাণি ভীষ্মমুক্তানি সংয়ুগে
স্বেনানীকেন হৃষ্টেন যুদ্ধায় সমবস্থিতঃ
65.17
ততো দুর্যোধনো রাজা ভারদ্বাজমভাষত
পূর্বং দৃষ্ট্বা বধং ঘোরং বলস্য বলিনাং বরঃ
ভ্রাতৄণাং চ বধং যুদ্ধে স্মরমাণো মহারথঃ
65.18
আচার্য সততং ত্বং হি হিতকামো মমানঘ
বয়ং হি ত্বাং সমাশ্রিত্য ভীষ্মং চৈব পিতামহম্
65.19
দেবানপি রণে জেতুং প্রার্থয়ামো ন সংশয়ঃ
কিমু পাণ্ডুসুতান্যুদ্ধে হীনবীর্যপরাক্রমান্
65.20
এবমুক্তস্ততো দ্রোণস্তব পুত্রেণ মারিষ
অভিনত্পাণ্ডবানীকং প্রেক্ষমাণস্য সাত্যকেঃ
65.21
সাত্যকিস্তু তদা দ্রোণং বারয়ামাস ভারত
ততঃ প্রববৃতে যুদ্ধং তুমুলং লোমহর্ষণম্
65.22
শৈনেয়ং তু রণে ক্রুদ্ধো ভারদ্বাজঃ প্রতাপবান্
অবিধ্যন্নিশিতৈর্বাণৈর্জত্রুদেশে হসন্নিব
65.23
ভীমসেনস্ততঃ ক্রুদ্ধো ভারদ্বাজমবিধ্যত
সংরক্ষন্সাত্যকিং রাজন্দ্রোণাচ্ছস্ত্রভৃতাং বরাৎ
65.24
ততো দ্রোণশ্চ ভীষ্মশ্চ তথা শল্যশ্চ মারিষ
ভীমসেনং রণে ক্রুদ্ধাশ্ছাদয়াং চক্রিরে শরৈঃ
65.25
তত্রাভিমন্যুঃ সংক্রুদ্ধো দ্রৌপদেয়াশ্চ মারিষ
বিব্যধুর্নিশিতৈর্বাণৈঃ সর্বাংস্তানুদ্যতায়ুধান্
65.26
ভীষ্মদ্রোণৌ চ সংক্রুদ্ধাবাপতন্তৌ মহাবলৌ
প্রত্যুদ্যয়ৌ শিখণ্ডী তু মহেষ্বাসো মহাহবে
65.27
প্রগৃহ্য বলবদ্বীরো ধনুর্জলদনিস্বনম্
অভ্যবর্ষচ্ছরৈস্তূর্ণং ছাদয়ানো দিবাকরম্
65.28
শিখণ্ডিনং সমাসাদ্য ভরতানাং পিতামহঃ
অবর্জয়ত সংগ্রামে স্ত্রীত্বং তস্যানুসংস্মরন্
65.29
ততো দ্রোণো মহারাজ অভ্যদ্রবত তং রণে
রক্ষমাণস্ততো ভীষ্মং তব পুত্রেণ চোদিতঃ
65.30
শিখণ্ডী তু সমাসাদ্য দ্রোণং শস্ত্রভৃতাং বরম্
অবর্জয়ত সংগ্রামে যুগান্তাগ্নিমিবোল্বণম্
65.31
ততো বলেন মহতা পুত্রস্তব বিশাং পতে
জুগোপ ভীষ্মমাসাদ্য প্রার্থয়ানো মহদ্যশঃ
65.32
তথৈব পাণ্ডবা রাজন্পুরস্কৃত্য ধনংজয়ম্
ভীষ্মমেবাভ্যবর্তন্ত জয়ে কৃত্বা দৃঢাং মতিম্
65.33
তদ্যুদ্ধমভবদ্ঘোরং দেবানাং দানবৈরিব
জয়ং চ কাঙ্ক্ষতাং নিত্যং যশশ্চ পরমাদ্ভুতম্