অধ্যায় 64

64.1

ভীষ্ম উবাচ
শৃণু চেদং মহারাজ ব্রহ্মভূতস্তবং মম
ব্রহ্মর্ষিভিশ্চ দেবৈশ্চ যঃ পুরা কথিতো ভুবি

সাধ্যানামপি দেবানাং দেবদেবেশ্বরঃ প্রভুঃ
লোকভাবনভাবজ্ঞ ইতি ত্বাং নারদোঽব্রবীৎ
ভূতং ভব্যং ভবিষ্যং চ মার্কণ্ডেয়োঽভ্যুবাচ হ

যজ্ঞানাং চৈব যজ্ঞং ত্বাং তপশ্চ তপসামপি
দেবানামপি দেবং চ ত্বামাহ ভগবান্ভৃগুঃ
পুরাণে ভৈরবং রূপং বিষ্ণো ভূতপতেতি বৈ

বাসুদেবো বসূনাং ত্বং শক্রং স্থাপয়িতা তথা
দেবদেবোঽসি দেবানামিতি দ্বৈপায়নোঽব্রবীৎ

পূর্বে প্রজানিসর্গেষু দক্ষমাহুঃ প্রজাপতিম্
স্রষ্টারং সর্বভূতানামঙ্গিরাস্ত্বাং ততোঽব্রবীৎ

অব্যক্তং তে শরীরোত্থং ব্যক্তং তে মনসি স্থিতম্
দেবা বাক্সংভবাশ্চেতি দেবলস্ত্বসিতোঽব্রবীৎ

শিরসা তে দিবং ব্যাপ্তং বাহুভ্যাং পৃথিবী ধৃতা
জঠরং তে ত্রয়ো লোকাঃ পুরুষোঽসি সনাতনঃ

এবং ত্বামভিজানন্তি তপসা ভাবিতা নরাঃ
আত্মদর্শনতৃপ্তানামৃষীণাং চাপি সত্তমঃ

রাজর্ষীণামুদারাণামাহবেষ্বনিবর্তিনাম্
সর্বধর্মপ্রধানানাং ত্বং গতির্মধুসূদন

এষ তে বিস্তরস্তাত সংক্ষেপশ্চ প্রকীর্তিতঃ
কেশবস্য যথাতত্ত্বং সুপ্রীতো ভব কেশবে

সংজয় উবাচ
পুণ্যং শ্রুত্বৈতদাখ্যানং মহারাজ সুতস্তব
কেশবং বহু মেনে স পাণ্ডবাংশ্চ মহারথান্

তমব্রবীন্মহারাজ ভীষ্মঃ শাংতনবঃ পুনঃ
মাহাত্ম্যং তে শ্রুতং রাজন্কেশবস্য মহাত্মনঃ

নরস্য চ যথাতত্ত্বং যন্মাং ত্বং পরিপৃচ্ছসি
যদর্থং নৃষু সংভূতৌ নরনারায়ণাবুভৌ

অবধ্যৌ চ যথা বীরৌ সংয়ুগেষ্বপরাজিতৌ
যথা চ পাণ্ডবা রাজন্নগম্যা যুধি কস্যচিৎ

প্রীতিমান্হি দৃঢং কৃষ্ণঃ পাণ্ডবেষু যশস্বিষু
তস্মাদ্ব্রবীমি রাজেন্দ্র শমো ভবতু পাণ্ডবৈঃ

পৃথিবীং ভুঙ্ক্ষ্ব সহিতো ভ্রাতৃভির্বলিভির্বশী
নরনারায়ণৌ দেবাববজ্ঞায় নশিষ্যসি

এবমুক্ত্বা তব পিতা তূষ্ণীমাসীদ্বিশাং পতে
ব্যসর্জয়চ্চ রাজানং শয়নং চ বিবেশ হ

রাজাপি শিবিরং প্রায়াত্প্রণিপত্য মহাত্মনে
শিশ্যে চ শয়নে শুভ্রে তাং রাত্রিং ভরতর্ষভ