অধ্যায় 63

63.1

দুর্যোধন উবাচ
বাসুদেবো মহদ্ভূতং সর্বলোকেষু কথ্যতে
তস্যাগমং প্রতিষ্ঠাং চ জ্ঞাতুমিচ্ছে পিতামহ

ভীষ্ম উবাচ
বাসুদেবো মহদ্ভূতং সংভূতং সহ দৈবতৈঃ
ন পরং পুণ্ডরীকাক্ষাদ্দৃশ্যতে ভরতর্ষভ
মার্কণ্ডেয়শ্চ গোবিন্দং কথয়ত্যদ্ভুতং মহৎ

সর্বভূতানি ভূতাত্মা মহাত্মা পুরুষোত্তমঃ
আপো বায়ুশ্চ তেজশ্চ ত্রয়মেতদকল্পয়ৎ

স সৃষ্ট্বা পৃথিবীং দেবঃ সর্বলোকেশ্বরঃ প্রভুঃ
অপ্সু বৈ শয়নং চক্রে মহাত্মা পুরুষোত্তমঃ
সর্বতোয়ময়ো দেবো যোগাত্সুষ্বাপ তত্র হ

মুখতঃ সোঽগ্নিমসৃজত্প্রাণাদ্বায়ুমথাপি চ
সরস্বতীং চ বেদাংশ্চ মনসঃ সসৃজেঽচ্যুতঃ

এষ লোকান্সসর্জাদৌ দেবাংশ্চর্ষিগণৈঃ সহ
নিধনং চৈব মৃত্যুং চ প্রজানাং প্রভবোঽব্যয়ঃ

এষ ধর্মশ্চ ধর্মজ্ঞো বরদঃ সর্বকামদঃ
এষ কর্তা চ কার্যং চ পূর্বদেবঃ স্বয়ংপ্রভুঃ

ভূতং ভব্যং ভবিষ্যচ্চ পূর্বমেতদকল্পয়ৎ
উভে সংধ্যে দিশঃ খং চ নিয়মং চ জনার্দনঃ

ঋষীংশ্চৈব হি গোবিন্দস্তপশ্চৈবানু কল্পয়ৎ
স্রষ্টারং জগতশ্চাপি মহাত্মা প্রভুরব্যয়ঃ

অগ্রজং সর্বভূতানাং সংকর্ষণমকল্পয়ৎ
শেষং চাকল্পয়দ্দেবমনন্তমিতি যং বিদুঃ

যো ধারয়তি ভূতানি ধরাং চেমাং সপর্বতাম্
ধ্যানয়োগেন বিপ্রাশ্চ তং বদন্তি মহৌজসম্

কর্ণস্রোতোদ্ভবং চাপি মধুং নাম মহাসুরম্
তমুগ্রমুগ্রকর্মাণমুগ্রাং বুদ্ধিং সমাস্থিতম্
ব্রহ্মণোঽপচিতিং কুর্বঞ্জঘান পুরুষোত্তমঃ

তস্য তাত বধাদেব দেবদানবমানবাঃ
মধুসূদনমিত্যাহুরৃষয়শ্চ জনার্দনম্
বরাহশ্চৈব সিংহশ্চ ত্রিবিক্রমগতিঃ প্রভুঃ

এষ মাতা পিতা চৈব সর্বেষাং প্রাণিনাং হরিঃ
পরং হি পুণ্ডরীকাক্ষান্ন ভূতং ন ভবিষ্যতি

মুখতোঽসৃজদ্ব্রাহ্মণান্বাহুভ্যাং ক্ষত্রিয়াংস্তথা
বৈশ্যাংশ্চাপ্যূরুতো রাজঞ্শূদ্রান্পদ্ভ্যাং তথৈব চ
তপসা নিয়তো দেবো নিধানং সর্বদেহিনাম্

ব্রহ্মভূতমমাবাস্যাং পৌর্ণমাস্যাং তথৈব চ
যোগভূতং পরিচরন্কেশবং মহদাপ্নুয়াৎ

কেশবঃ পরমং তেজঃ সর্বলোকপিতামহঃ
এবমাহুর্হৃষীকেশং মুনয়ো বৈ নরাধিপ

এবমেনং বিজানীহি আচার্যং পিতরং গুরুম্
কৃষ্ণো যস্য প্রসীদেত লোকাস্তেনাক্ষয়া জিতাঃ

যশ্চৈবৈনং ভয়স্থানে কেশবং শরণং ব্রজেৎ
সদা নরঃ পঠংশ্চেদং স্বস্তিমান্স সুখী ভবেৎ

যে চ কৃষ্ণং প্রপদ্যন্তে তে ন মুহ্যন্তি মানবাঃ
ভয়ে মহতি যে মগ্নাঃ পাতি নিত্যং জনার্দনঃ

এতদ্যুধিষ্ঠিরো জ্ঞাত্বা যাথাতথ্যেন ভারত
সর্বাত্মনা মহাত্মানং কেশবং জগদীশ্বরম্
প্রপন্নঃ শরণং রাজন্যোগানামীশ্বরং প্রভুম্