Utshovঅধ্যায় 62
62.1
ভীষ্ম উবাচ
ততঃ স ভগবান্দেবো লোকানাং পরমেশ্বরঃ
ব্রহ্মাণং প্রত্যুবাচেদং স্নিগ্ধগম্ভীরয়া গিরা
62.2
বিদিতং তাত যোগান্মে সর্বমেতত্তবেপ্সিতম্
তথা তদ্ভবিতেত্যুক্ত্বা তত্রৈবান্তরধীয়ত
62.3
ততো দেবর্ষিগন্ধর্বা বিস্ময়ং পরমং গতাঃ
কৌতূহলপরাঃ সর্বে পিতামহমথাব্রুবন্
62.4
কো ন্বয়ং যো ভগবতা প্রণম্য বিনয়াদ্বিভো
বাগ্ভিঃ স্তুতো বরিষ্ঠাভিঃ শ্রোতুমিচ্ছাম তং বয়ম্
62.5
এবমুক্তস্তু ভগবান্প্রত্যুবাচ পিতামহঃ
দেবব্রহ্মর্ষিগন্ধর্বান্সর্বান্মধুরয়া গিরা
62.6
যত্তত্পরং ভবিষ্যং চ ভবিতব্যং চ যত্পরম্
ভূতাত্মা যঃ প্রভুশ্চৈব ব্রহ্ম যচ্চ পরং পদম্
62.7
তেনাস্মি কৃতসংবাদঃ প্রসন্নেন সুরর্ষভাঃ
জগতোঽনুগ্রহার্থায় যাচিতো মে জগত্পতিঃ
62.8
মানুষং লোকমাতিষ্ঠ বাসুদেব ইতি শ্রুতঃ
অসুরাণাং বধার্থায় সংভবস্ব মহীতলে
62.9
সংগ্রামে নিহতা যে তে দৈত্যদানবরাক্ষসাঃ
ত ইমে নৃষু সংভূতা ঘোররূপা মহাবলাঃ
62.10
তেষাং বধার্থং ভগবান্নরেণ সহিতো বশী
মানুষীং যোনিমাস্থায় চরিষ্যতি মহীতলে
62.11
নরনারায়ণৌ যৌ তৌ পুরাণাবৃষিসত্তমৌ
সহিতৌ মানুষে লোকে সংভূতাবমিতদ্যুতী
62.12
অজেয়ৌ সমরে যত্তৌ সহিতাবমরৈরপি
মূঢাস্ত্বেতৌ ন জানন্তি নরনারায়ণাবৃষী
62.13
তস্যাহমাত্মজো ব্রহ্মা সর্বস্য জগতঃ পতিঃ
বাসুদেবোঽর্চনীয়ো বঃ সর্বলোকমহেশ্বরঃ
62.14
তথা মনুষ্যোঽয়মিতি কদাচিত্সুরসত্তমাঃ
নাবজ্ঞেয়ো মহাবীর্যঃ শঙ্খচক্রগদাধরঃ
62.15
এতত্পরমকং গুহ্যমেতত্পরমকং পদম্
এতত্পরমকং ব্রহ্ম এতত্পরমকং যশঃ
62.16
এতদক্ষরমব্যক্তমেতত্তচ্ছাশ্বতং মহৎ
এতত্পুরুষসংজ্ঞং বৈ গীয়তে জ্ঞায়তে ন চ
62.17
এতত্পরমকং তেজ এতত্পরমকং সুখম্
এতত্পরমকং সত্যং কীর্তিতং বিশ্বকর্মণা
62.18
তস্মাত্সর্বৈঃ সুরৈঃ সেন্দ্রৈর্লোকৈশ্চামিতবিক্রমঃ
নাবজ্ঞেয়ো বাসুদেবো মানুষোঽয়মিতি প্রভুঃ
62.19
যশ্চ মানুষমাত্রোঽয়মিতি ব্রূয়াত্সুমন্দধীঃ
হৃষীকেশমবজ্ঞানাত্তমাহুঃ পুরুষাধমম্
62.20
যোগিনং তং মহাত্মানং প্রবিষ্টং মানুষীং তনুম্
অবমন্যেদ্বাসুদেবং তমাহুস্তামসং জনাঃ
62.21
দেবং চরাচরাত্মানং শ্রীবত্সাঙ্কং সুবর্চসম্
পদ্মনাভং ন জানাতি তমাহুস্তামসং জনাঃ
62.22
কিরীটকৌস্তুভধরং মিত্রাণামভয়ংকরম্
অবজানন্মহাত্মানং ঘোরে তমসি মজ্জতি
62.23
এবং বিদিত্বা তত্ত্বার্থং লোকানামীশ্বরেশ্বরঃ
বাসুদেবো নমস্কার্যঃ সর্বলোকৈঃ সুরোত্তমাঃ
62.24
এবমুক্ত্বা স ভগবান্সর্বান্দেবগণান্পুরা
বিসৃজ্য সর্বলোকাত্মা জগাম ভবনং স্বকম্
62.25
ততো দেবাঃ সগন্ধর্বা মুনয়োঽপ্সরসোঽপি চ
কথাং তাং ব্রহ্মণা গীতাং শ্রুত্বা প্রীতা দিবং যয়ুঃ
62.26
এতচ্ছ্রুতং ময়া তাত ঋষীণাং ভাবিতাত্মনাম্
বাসুদেবং কথয়তাং সমবায়ে পুরাতনম্
62.27
জামদগ্ন্যস্য রামস্য মার্কণ্ডেয়স্য ধীমতঃ
ব্যাসনারদয়োশ্চাপি শ্রুতং শ্রুতবিশারদ
62.28
এতমর্থং চ বিজ্ঞায় শ্রুত্বা চ প্রভুমব্যয়ম্
বাসুদেবং মহাত্মানং লোকানামীশ্বরেশ্বরম্
62.29
যস্যাসাবাত্মজো ব্রহ্মা সর্বস্য জগতঃ পিতা
কথং ন বাসুদেবোঽয়মর্চ্যশ্চেজ্যশ্চ মানবৈঃ
62.30
বারিতোঽসি পুরা তাত মুনিভির্বেদপারগৈঃ
মা গচ্ছ সংয়ুগং তেন বাসুদেবেন ধীমতা
মা পাণ্ডবৈঃ সার্ধমিতি তচ্চ মোহান্ন বুধ্যসে
62.31
মন্যে ত্বাং রাক্ষসং ক্রূরং তথা চাসি তমোবৃতঃ
যস্মাদ্দ্বিষসি গোবিন্দং পাণ্ডবং চ ধনংজয়ম্
নরনারায়ণৌ দেবৌ নান্যো দ্বিষ্যাদ্ধি মানবঃ
62.32
তস্মাদ্ব্রবীমি তে রাজন্নেষ বৈ শাশ্বতোঽব্যয়ঃ
সর্বলোকময়ো নিত্যঃ শাস্তা ধাতা ধরো ধ্রুবঃ
62.33
লোকান্ধারয়তে যস্ত্রীংশ্চরাচরগুরুঃ প্রভুঃ
যোদ্ধা জয়শ্চ জেতা চ সর্বপ্রকৃতিরীশ্বরঃ
62.34
রাজন্সত্ত্বময়ো হ্যেষ তমোরাগবিবর্জিতঃ
যতঃ কৃষ্ণস্ততো ধর্মো যতো ধর্মস্ততো জয়ঃ
62.35
তস্য মাহাত্ম্যয়োগেন যোগেনাত্মন এব চ
ধৃতাঃ পাণ্ডুসুতা রাজঞ্জয়শ্চৈষাং ভবিষ্যতি
62.36
শ্রেয়োয়ুক্তাং সদা বুদ্ধিং পাণ্ডবানাং দধাতি যঃ
বলং চৈব রণে নিত্যং ভয়েভ্যশ্চৈব রক্ষতি
62.37
স এষ শাশ্বতো দেবঃ সর্বগুহ্যময়ঃ শিবঃ
বাসুদেব ইতি জ্ঞেয়ো যন্মাং পৃচ্ছসি ভারত
62.38
ব্রাহ্মণৈঃ ক্ষত্রিয়ৈর্বৈশ্যৈঃ শূদ্রৈশ্চ কৃতলক্ষণৈঃ
সেব্যতেঽভ্যর্চ্যতে চৈব নিত্যয়ুক্তৈঃ স্বকর্মভিঃ
62.39
দ্বাপরস্য যুগস্যান্তে আদৌ কলিয়ুগস্য চ
সাত্বতং বিধিমাস্থায় গীতঃ সংকর্ষণেন যঃ
62.40
স এষ সর্বাসুরমর্ত্যলোকং; সমুদ্রকক্ষ্যান্তরিতাঃ পুরীশ্চ
যুগে যুগে মানুষং চৈব বাসং; পুনঃ পুনঃ সৃজতে বাসুদেবঃ