Utshovঅধ্যায় 61
61.1
ধৃতরাষ্ট্র উবাচ
ভয়ং মে সুমহজ্জাতং বিস্ময়শ্চৈব সংজয়
শ্রুত্বা পাণ্ডুকুমারাণাং কর্ম দেবৈঃ সুদুষ্করম্
61.2
পুত্রাণাং চ পরাভবং শ্রুত্বা সংজয় সর্বশঃ
চিন্তা মে মহতী সূত ভবিষ্যতি কথং ত্বিতি
61.3
ধ্রুবং বিদুরবাক্যানি ধক্ষ্যন্তি হৃদয়ং মম
যথা হি দৃশ্যতে সর্বং দৈবয়োগেন সংজয়
61.4
যত্র ভীষ্মমুখাঞ্শূরানস্ত্রজ্ঞান্যোধসত্তমান্
পাণ্ডবানামনীকানি যোধয়ন্তি প্রহারিণঃ
61.5
কেনাবধ্যা মহাত্মানঃ পাণ্ডুপুত্রা মহাবলাঃ
কেন দত্তবরাস্তাত কিং বা জ্ঞানং বিদন্তি তে
যেন ক্ষয়ং ন গচ্ছন্তি দিবি তারাগণা ইব
61.6
পুনঃ পুনর্ন মৃষ্যামি হতং সৈন্যং স্ম পাণ্ডবৈঃ
ময্যেব দণ্ডঃ পততি দৈবাত্পরমদারুণঃ
61.7
যথাবধ্যাঃ পাণ্ডুসুতা যথা বধ্যাশ্চ মে সুতাঃ
এতন্মে সর্বমাচক্ষ্ব যথাতত্ত্বেন সংজয়
61.8
ন হি পারং প্রপশ্যামি দুঃখস্যাস্য কথংচন
সমুদ্রস্যেব মহতো ভুজাভ্যাং প্রতরন্নরঃ
61.9
পুত্রাণাং ব্যসনং মন্যে ধ্রুবং প্রাপ্তং সুদারুণম্
ঘাতয়িষ্যতি মে পুত্রান্সর্বান্ভীমো ন সংশয়ঃ
61.10
ন হি পশ্যামি তং বীরং যো মে রক্ষেত্সুতান্রণে
ধ্রুবং বিনাশঃ সমরে পুত্রাণাং মম সংজয়
61.11
তস্মান্মে কারণং সূত যুক্তিং চৈব বিশেষতঃ
পৃচ্ছতোঽদ্য যথাতত্ত্বং সর্বমাখ্যাতুমর্হসি
61.12
দুর্যোধনোঽপি যচ্চক্রে দৃষ্ট্বা স্বান্বিমুখান্রণে
ভীষ্মদ্রোণৌ কৃপশ্চৈব সৌবলেয়ো জয়দ্রথঃ
দ্রৌণির্বাপি মহেষ্বাসো বিকর্ণো বা মহাবলঃ
61.13
নিশ্চয়ো বাপি কস্তেষাং তদা হ্যাসীন্মহাত্মনাম্
বিমুখেষু মহাপ্রাজ্ঞ মম পুত্রেষু সংজয়
61.14
সংজয় উবাচ
শৃণু রাজন্নবহিতঃ শ্রুত্বা চৈবাবধারয়
নৈব মন্ত্রকৃতং কিংচিন্নৈব মায়াং তথাবিধাম্
ন বৈ বিভীষিকাং কাংচিদ্রাজন্কুর্বন্তি পাণ্ডবাঃ
61.15
যুধ্যন্তি তে যথান্যায়ং শক্তিমন্তশ্চ সংয়ুগে
ধর্মেণ সর্বকার্যাণি কীর্তিতানীতি ভারত
আরভন্তে সদা পার্থাঃ প্রার্থয়ানা মহদ্যশঃ
61.16
ন তে যুদ্ধান্নিবর্তন্তে ধর্মোপেতা মহাবলাঃ
শ্রিয়া পরময়া যুক্তা যতো ধর্মস্ততো জয়ঃ
তেনাবধ্যা রণে পার্থা জয়য়ুক্তাশ্চ পার্থিব
61.17
তব পুত্রা দুরাত্মানঃ পাপেষ্বভিরতাঃ সদা
নিষ্ঠুরা হীনকর্মাণস্তেন হীয়ন্তি সংয়ুগে
61.18
সুবহূনি নৃশংসানি পুত্রৈস্তব জনেশ্বর
নিকৃতানীহ পাণ্ডূনাং নীচৈরিব যথা নরৈঃ
61.19
সর্বং চ তদনাদৃত্য পুত্রাণাং তব কিল্বিষম্
সাপহ্নবাঃ সদৈবাসন্পাণ্ডবাঃ পাণ্ডুপূর্বজ
ন চৈনান্বহু মন্যন্তে পুত্রাস্তব বিশাং পতে
61.20
তস্য পাপস্য সততং ক্রিয়মাণস্য কর্মণঃ
সংপ্রাপ্তং সুমহদ্ঘোরং ফলং কিংপাকসংনিভম্
স তদ্ভুঙ্ক্ষ্ব মহারাজ সপুত্রঃ সসুহৃজ্জনঃ
61.21
নাববুধ্যসি যদ্রাজন্বার্যমাণঃ সুহৃজ্জনৈঃ
বিদুরেণাথ ভীষ্মেণ দ্রোণেন চ মহাত্মনা
61.22
তথা ময়া চাপ্যসকৃদ্বার্যমাণো ন গৃহ্ণসি
বাক্যং হিতং চ পথ্যং চ মর্ত্যঃ পথ্যমিবৌষধম্
পুত্রাণাং মতমাস্থায় জিতান্মন্যসি পাণ্ডবান্
61.23
শৃণু ভূয়ো যথাতত্ত্বং যন্মাং ত্বং পরিপৃচ্ছসি
কারণং ভরতশ্রেষ্ঠ পাণ্ডবানাং জয়ং প্রতি
তত্তেঽহং কথয়িষ্যামি যথাশ্রুতমরিংদম
61.24
দুর্যোধনেন সংপৃষ্ট এতমর্থং পিতামহঃ
দৃষ্ট্বা ভ্রাতৄন্রণে সর্বান্নির্জিতান্সুমহারথান্
61.25
শোকসংমূঢহৃদয়ো নিশাকালে স্ম কৌরবঃ
পিতামহং মহাপ্রাজ্ঞং বিনয়েনোপগম্য হ
যদব্রবীত্সুতস্তেঽসৌ তন্মে শৃণু জনেশ্বর
61.26
দুর্যোধন উবাচ
ত্বং চ দ্রোণশ্চ শল্যশ্চ কৃপো দ্রৌণিস্তথৈব চ
কৃতবর্মা চ হার্দিক্যঃ কাম্বোজশ্চ সুদক্ষিণঃ
61.27
ভূরিশ্রবা বিকর্ণশ্চ ভগদত্তশ্চ বীর্যবান্
মহারথাঃ সমাখ্যাতাঃ কুলপুত্রাস্তনুত্যজঃ
61.28
ত্রয়াণামপি লোকানাং পর্যাপ্তা ইতি মে মতিঃ
পাণ্ডবানাং সমস্তাশ্চ ন তিষ্ঠন্তি পরাক্রমে
61.29
তত্র মে সংশয়ো জাতস্তন্মমাচক্ষ্ব পৃচ্ছতঃ
যং সমাশ্রিত্য কৌন্তেয়া জয়ন্ত্যস্মান্পদে পদে
61.30
ভীষ্ম উবাচ
শৃণু রাজন্বচো মহ্যং যত্ত্বাং বক্ষ্যামি কৌরব
বহুশশ্চ মমোক্তোঽসি ন চ মে তত্ত্বয়া কৃতম্
61.31
ক্রিয়তাং পাণ্ডবৈঃ সার্ধং শমো ভরতসত্তম
এতত্ক্ষমমহং মন্যে পৃথিব্যাস্তব চাভিভো
61.32
ভুঞ্জেমাং পৃথিবীং রাজন্ভ্রাতৃভিঃ সহিতঃ সুখী
দুর্হৃদস্তাপয়ন্সর্বান্নন্দয়ংশ্চাপি বান্ধবান্
61.33
ন চ মে ক্রোশতস্তাত শ্রুতবানসি বৈ পুরা
তদিদং সমনুপ্রাপ্তং যত্পাণ্ডূনবমন্যসে
61.34
যশ্চ হেতুরবধ্যত্বে তেষামক্লিষ্টকর্মণাম্
তং শৃণুষ্ব মহারাজ মম কীর্তয়তঃ প্রভো
61.35
নাস্তি লোকেষু তদ্ভূতং ভবিতা নো ভবিষ্যতি
যো জয়েত্পাণ্ডবান্সংখ্যে পালিতাঞ্শার্ঙ্গধন্বনা
61.36
যত্তু মে কথিতং তাত মুনিভির্ভাবিতাত্মভিঃ
পুরাণগীতং ধর্মজ্ঞ তচ্ছৃণুষ্ব যথাতথম্
61.37
পুরা কিল সুরাঃ সর্বে ঋষয়শ্চ সমাগতাঃ
পিতামহমুপাসেদুঃ পর্বতে গন্ধমাদনে
61.38
মধ্যে তেষাং সমাসীনঃ প্রজাপতিরপশ্যত
বিমানং জাজ্বলদ্ভাসা স্থিতং প্রবরমম্বরে
61.39
ধ্যানেনাবেদ্য তং ব্রহ্মা কৃত্বা চ নিয়তোঽঞ্জলিম্
নমশ্চকার হৃষ্টাত্মা পরমং পরমেশ্বরম্
61.40
ঋষয়স্ত্বথ দেবাশ্চ দৃষ্ট্বা ব্রহ্মাণমুত্থিতম্
স্থিতাঃ প্রাঞ্জলয়ঃ সর্বে পশ্যন্তো মহদদ্ভুতম্
61.41
যথাবচ্চ তমভ্যর্চ্য ব্রহ্মা ব্রহ্মবিদাং বরঃ
জগাদ জগতঃ স্রষ্টা পরং পরমধর্মবিৎ
61.42
বিশ্বাবসুর্বিশ্বমূর্তির্বিশ্বেশো; বিষ্বক্সেনো বিশ্বকর্মা বশী চ
বিশ্বেশ্বরো বাসুদেবোঽসি তস্মা;দ্যোগাত্মানং দৈবতং ত্বামুপৈমি
61.43
জয় বিশ্ব মহাদেব জয় লোকহিতে রত
জয় যোগীশ্বর বিভো জয় যোগপরাবর
61.44
পদ্মগর্ভ বিশালাক্ষ জয় লোকেশ্বরেশ্বর
ভূতভব্যভবন্নাথ জয় সৌম্যাত্মজাত্মজ
61.45
অসংখ্যেয়গুণাজেয় জয় সর্বপরায়ণ
নারায়ণ সুদুষ্পার জয় শার্ঙ্গধনুর্ধর
61.46
সর্বগুহ্যগুণোপেত বিশ্বমূর্তে নিরাময়
বিশ্বেশ্বর মহাবাহো জয় লোকার্থতত্পর
61.47
মহোরগ বরাহাদ্য হরিকেশ বিভো জয়
হরিবাস বিশামীশ বিশ্বাবাসামিতাব্যয়
61.48
ব্যক্তাব্যক্তামিতস্থান নিয়তেন্দ্রিয় সেন্দ্রিয়
অসংখ্যেয়াত্মভাবজ্ঞ জয় গম্ভীর কামদ
61.49
অনন্ত বিদিতপ্রজ্ঞ নিত্যং ভূতবিভাবন
কৃতকার্য কৃতপ্রজ্ঞ ধর্মজ্ঞ বিজয়াজয়
61.50
গুহ্যাত্মন্সর্বভূতাত্মন্স্ফুটসংভূতসংভব
ভূতার্থতত্ত্ব লোকেশ জয় ভূতবিভাবন
61.51
আত্ময়োনে মহাভাগ কল্পসংক্ষেপতত্পর
উদ্ভাবন মনোদ্ভাব জয় ব্রহ্মজনপ্রিয়
61.52
নিসর্গসর্গাভিরত কামেশ পরমেশ্বর
অমৃতোদ্ভব সদ্ভাব যুগাগ্নে বিজয়প্রদ
61.53
প্রজাপতিপতে দেব পদ্মনাভ মহাবল
আত্মভূত মহাভূত কর্মাত্মঞ্জয় কর্মদ
61.54
পাদৌ তব ধরা দেবী দিশো বাহুর্দিবং শিরঃ
মূর্তিস্তেঽহং সুরাঃ কায়শ্চন্দ্রাদিত্যৌ চ চক্ষুষী
61.55
বলং তপশ্চ সত্যং চ ধর্মঃ কামাত্মজঃ প্রভো
তেজোঽগ্নিঃ পবনঃ শ্বাস আপস্তে স্বেদসংভবাঃ
61.56
অশ্বিনৌ শ্রবণৌ নিত্যং দেবী জিহ্বা সরস্বতী
বেদাঃ সংস্কারনিষ্ঠা হি ত্বয়ীদং জগদাশ্রিতম্
61.57
ন সংখ্যাং ন পরীমাণং ন তেজো ন পরাক্রমম্
ন বলং যোগয়োগীশ জানীমস্তে ন সংভবম্
61.58
ত্বদ্ভক্তিনিরতা দেব নিয়মৈস্ত্বা সমাহিতাঃ
অর্চয়ামঃ সদা বিষ্ণো পরমেশং মহেশ্বরম্
61.59
ঋষয়ো দেবগন্ধর্বা যক্ষরাক্ষসপন্নগাঃ
পিশাচা মানুষাশ্চৈব মৃগপক্ষিসরীসৃপাঃ
61.60
এবমাদি ময়া সৃষ্টং পৃথিব্যাং ত্বত্প্রসাদজম্
পদ্মনাভ বিশালাক্ষ কৃষ্ণ দুঃস্বপ্ননাশন
61.61
ত্বং গতিঃ সর্বভূতানাং ত্বং নেতা ত্বং জগন্মুখম্
ত্বত্প্রসাদেন দেবেশ সুখিনো বিবুধাঃ সদা
61.62
পৃথিবী নির্ভয়া দেব ত্বত্প্রসাদাত্সদাভবৎ
তস্মাদ্ভব বিশালাক্ষ যদুবংশবিবর্ধনঃ
61.63
ধর্মসংস্থাপনার্থায় দৈতেয়ানাং বধায় চ
জগতো ধারণার্থায় বিজ্ঞাপ্যং কুরু মে প্রভো
61.64
যদেতত্পরমং গুহ্যং ত্বত্প্রসাদময়ং বিভো
বাসুদেব তদেতত্তে ময়োদ্গীতং যথাতথম্
61.65
সৃষ্ট্বা সংকর্ষণং দেবং স্বয়মাত্মানমাত্মনা
কৃষ্ণ ত্বমাত্মনাস্রাক্ষীঃ প্রদ্যুম্নং চাত্মসংভবম্
61.66
প্রদ্যুম্নাচ্চানিরুদ্ধং ত্বং যং বিদুর্বিষ্ণুমব্যয়ম্
অনিরুদ্ধোঽসৃজন্মাং বৈ ব্রহ্মাণং লোকধারিণম্
61.67
বাসুদেবময়ঃ সোঽহং ত্বয়ৈবাস্মি বিনির্মিতঃ
বিভজ্য ভাগশোঽঽত্মানং ব্রজ মানুষতাং বিভো
61.68
তত্রাসুরবধং কৃত্বা সর্বলোকসুখায় বৈ
ধর্মং স্থাপ্য যশঃ প্রাপ্য যোগং প্রাপ্স্যসি তত্ত্বতঃ
61.69
ত্বাং হি ব্রহ্মর্ষয়ো লোকে দেবাশ্চামিতবিক্রম
তৈস্তৈশ্চ নামভির্ভক্তা গায়ন্তি পরমাত্মকম্
61.70
স্থিতাশ্চ সর্বে ত্বয়ি ভূতসংঘাঃ; কৃত্বাশ্রয়ং ত্বাং বরদং সুবাহো
অনাদিমধ্যান্তমপারয়োগং; লোকস্য সেতুং প্রবদন্তি বিপ্রাঃ