Utshovঅধ্যায় 60
60.1
সংজয় উবাচ
ততো ভূরিশ্রবা রাজন্সাত্যকিং নবভিঃ শরৈঃ
অবিধ্যদ্ভৃশসংক্রুদ্ধস্তোত্ত্রৈরিব মহাদ্বিপম্
60.2
কৌরবং সাত্যকিশ্চৈব শরৈঃ সংনতপর্বভিঃ
অবাকিরদমেয়াত্মা সর্বলোকস্য পশ্যতঃ
60.3
ততো দুর্যোধনো রাজা সোদর্যৈঃ পরিবারিতঃ
সৌমদত্তিং রণে যত্তঃ সমন্তাত্পর্যবারয়ৎ
60.4
তথৈব পাণ্ডবাঃ সর্বে সাত্যকিং রভসং রণে
পরিবার্য স্থিতাঃ সংখ্যে সমন্তাত্সুমহৌজসঃ
60.5
ভীমসেনস্তু সংক্রুদ্ধো গদামুদ্যম্য ভারত
দুর্যোধনমুখান্সর্বান্পুত্রাংস্তে পর্যবারয়ৎ
60.6
রথৈরনেকসাহস্রৈঃ ক্রোধামর্ষসমন্বিতঃ
নন্দকস্তব পুত্রস্তু ভীমসেনং মহাবলম্
বিব্যাধ নিশিতৈঃ ষড্ভিঃ কঙ্কপত্রৈঃ শিলাশিতৈঃ
60.7
দুর্যোধনস্তু সমরে ভীমসেনং মহাবলম্
আজঘানোরসি ক্রুদ্ধো মার্গণৈর্নিশিতৈস্ত্রিভিঃ
60.8
ততো ভীমো মহাবাহুঃ স্বরথং সুমহাবলঃ
আরুরোহ রথশ্রেষ্ঠং বিশোকং চেদমব্রবীৎ
60.9
এতে মহারথাঃ শূরা ধার্তরাষ্ট্রা মহাবলাঃ
মামেব ভৃশসংক্রুদ্ধা হন্তুমভ্যুদ্যতা যুধি
60.10
এতানদ্য হনিষ্যামি পশ্যতস্তে ন সংশয়ঃ
তস্মান্মমাশ্বান্সংগ্রামে যত্তঃ সংয়চ্ছ সারথে
60.11
এবমুক্ত্বা ততঃ পার্থঃ পুত্রং দুর্যোধনং তব
বিব্যাধ দশভিস্তীক্ষ্ণৈঃ শরৈঃ কনকভূষণৈঃ
নন্দকং চ ত্রিভির্বাণৈঃ প্রত্যবিধ্যত্স্তনান্তরে
60.12
তং তু দুর্যোধনঃ ষষ্ট্যা বিদ্ধ্বা ভীমং মহাবলম্
ত্রিভিরন্যৈঃ সুনিশিতৈর্বিশোকং প্রত্যবিধ্যত
60.13
ভীমস্য চ রণে রাজন্ধনুশ্চিচ্ছেদ ভাস্বরম্
মুষ্টিদেশে শরৈস্তীক্ষ্ণৈস্ত্রিভী রাজা হসন্নিব
60.14
ভীমস্তু প্রেক্ষ্য যন্তারং বিশোকং সংয়ুগে তদা
পীডিতং বিশিখৈস্তীক্ষ্ণৈস্তব পুত্রেণ ধন্বিনা
60.15
অমৃষ্যমাণঃ সংক্রুদ্ধো ধনুর্দিব্যং পরামৃশৎ
পুত্রস্য তে মহারাজ বধার্থং ভরতর্ষভ
60.16
সমাদত্ত চ সংরব্ধঃ ক্ষুরপ্রং লোমবাহিনম্
তেন চিচ্ছেদ নৃপতের্ভীমঃ কার্মুকমুত্তমম্
60.17
সোঽপবিধ্য ধনুশ্ছিন্নং ক্রোধেন প্রজ্বলন্নিব
অন্যত্কার্মুকমাদত্ত সত্বরং বেগবত্তরম্
60.18
সংধত্ত বিশিখং ঘোরং কালমৃত্যুসমপ্রভম্
তেনাজঘান সংক্রুদ্ধো ভীমসেনং স্তনান্তরে
60.19
স গাঢবিদ্ধো ব্যথিতঃ স্যন্দনোপস্থ আবিশৎ
স নিষণ্ণো রথোপস্থে মূর্ছামভিজগাম হ
60.20
তং দৃষ্ট্বা ব্যথিতং ভীমমভিমন্যুপুরোগমাঃ
নামৃষ্যন্ত মহেষ্বাসাঃ পাণ্ডবানাং মহারথাঃ
60.21
ততস্তু তুমুলাং বৃষ্টিং শস্ত্রাণাং তিগ্মতেজসাম্
পাতয়ামাসুরব্যগ্রাঃ পুত্রস্য তব মূর্ধনি
60.22
প্রতিলভ্য ততঃ সংজ্ঞাং ভীমসেনো মহাবলঃ
দুর্যোধনং ত্রিভির্বিদ্ধ্বা পুনর্বিব্যাধ পঞ্চভিঃ
60.23
শল্যং চ পঞ্চবিংশত্যা শরৈর্বিব্যাধ পাণ্ডবঃ
রুক্মপুঙ্খৈর্মহেষ্বাসঃ স বিদ্ধো ব্যপয়াদ্রণাৎ
60.24
প্রত্যুদ্যয়ুস্ততো ভীমং তব পুত্রাশ্চতুর্দশ
সেনাপতিঃ সুষেণশ্চ জলসংধঃ সুলোচনঃ
60.25
উগ্রো ভীমরথো ভীমো ভীমবাহুরলোলুপঃ
দুর্মুখো দুষ্প্রধর্ষশ্চ বিবিত্সুর্বিকটঃ সমঃ
60.26
বিসৃজন্তো বহূন্বাণান্ক্রোধসংরক্তলোচনাঃ
ভীমসেনমভিদ্রুত্য বিব্যধুঃ সহিতা ভৃশম্
60.27
পুত্রাংস্তু তব সংপ্রেক্ষ্য ভীমসেনো মহাবলঃ
সৃক্কিণী বিলিহন্বীরঃ পশুমধ্যে বৃকো যথা
সেনাপতেঃ ক্ষুরপ্রেণ শিরশ্চিচ্ছেদ পাণ্ডবঃ
60.28
জলসংধং বিনির্ভিদ্য সোঽনয়দ্যমসাদনম্
সুষেণং চ ততো হত্বা প্রেষয়ামাস মৃত্যবে
60.29
উগ্রস্য সশিরস্ত্রাণং শিরশ্চন্দ্রোপমং ভুবি
পাতয়ামাস ভল্লেন কুণ্ডলাভ্যাং বিভূষিতম্
60.30
ভীমবাহুং চ সপ্তত্যা সাশ্বকেতুং সসারথিম্
নিনায় সমরে ভীমঃ পরলোকায় মারিষ
60.31
ভীমং ভীমরথং চোভৌ ভীমসেনো হসন্নিব
ভ্রাতরৌ রভসৌ রাজন্ননয়দ্যমসাদনম্
60.32
ততঃ সুলোচনং ভীমঃ ক্ষুরপ্রেণ মহামৃধে
মিষতাং সর্বসৈন্যানামনয়দ্যমসাদনম্
60.33
পুত্রাস্তু তব তং দৃষ্ট্বা ভীমসেনপরাক্রমম্
শেষা যেঽন্যেঽভবংস্তত্র তে ভীমস্য ভয়ার্দিতাঃ
বিপ্রদ্রুতা দিশো রাজন্বধ্যমানা মহাত্মনা
60.34
ততোঽব্রবীচ্ছাংতনবঃ সর্বানেব মহারথান্
এষ ভীমো রণে ক্রুদ্ধো ধার্তরাষ্ট্রান্মহারথান্
60.35
যথাপ্রাগ্র্যান্যথাজ্যেষ্ঠান্যথাশূরাংশ্চ সংগতান্
নিপাতয়ত্যুগ্রধন্বা তং প্রমথ্নীত পার্থিবাঃ
60.36
এবমুক্তাস্ততঃ সর্বে ধার্তরাষ্ট্রস্য সৈনিকাঃ
অভ্যদ্রবন্ত সংক্রুদ্ধা ভীমসেনং মহাবলম্
60.37
ভগদত্তঃ প্রভিন্নেন কুঞ্জরেণ বিশাং পতে
অপতত্সহসা তত্র যত্র ভীমো ব্যবস্থিতঃ
60.38
আপতন্নেব চ রণে ভীমসেনং শিলাশিতৈঃ
অদৃশ্যং সমরে চক্রে জীমূত ইব ভাস্করম্
60.39
অভিমন্যুমুখাস্তত্র নামৃষ্যন্ত মহারথাঃ
ভীমস্যাচ্ছাদনং সংখ্যে স্ববাহুবলমাশ্রিতাঃ
60.40
ত এনং শরবর্ষেণ সমন্তাত্পর্যবারয়ন্
গজং চ শরবৃষ্ট্যা তং বিভিদুস্তে সমন্ততঃ
60.41
স শস্ত্রবৃষ্ট্যাভিহতঃ প্রাদ্রবদ্দ্বিগুণং পদম্
প্রাগ্জ্যোতিষগজো রাজন্নানালিঙ্গৈঃ সুতেজনৈঃ
60.42
সংজাতরুধিরোত্পীডঃ প্রেক্ষণীয়োঽভবদ্রণে
গভস্তিভিরিবার্কস্য সংস্যূতো জলদো মহান্
60.43
স চোদিতো মদস্রাবী ভগদত্তেন বারণঃ
অভ্যধাবত তান্সর্বান্কালোত্সৃষ্ট ইবান্তকঃ
দ্বিগুণং জবমাস্থায় কম্পয়ংশ্চরণৈর্মহীম্
60.44
তস্য তত্সুমহদ্রূপং দৃষ্ট্বা সর্বে মহারথাঃ
অসহ্যং মন্যমানাস্তে নাতিপ্রমনসোঽভবন্
60.45
ততস্তু নৃপতিঃ ক্রুদ্ধো ভীমসেনং স্তনান্তরে
আজঘান নরব্যাঘ্র শরেণ নতপর্বণা
60.46
সোঽতিবিদ্ধো মহেষ্বাসস্তেন রাজ্ঞা মহারথঃ
মূর্ছয়াভিপরীতাঙ্গো ধ্বজয়ষ্টিমুপাশ্রিতঃ
60.47
তাংস্তু ভীতান্সমালক্ষ্য ভীমসেনং চ মূর্ছিতম্
ননাদ বলবন্নাদং ভগদত্তঃ প্রতাপবান্
60.48
ততো ঘটোত্কচো রাজন্প্রেক্ষ্য ভীমং তথাগতম্
সংক্রুদ্ধো রাক্ষসো ঘোরস্তত্রৈবান্তরধীয়ত
60.49
স কৃত্বা দারুণাং মায়াং ভীরূণাং ভয়বর্ধিনীম্
অদৃশ্যত নিমেষার্ধাদ্ঘোররূপং সমাশ্রিতঃ
60.50
ঐরাবতং সমারুহ্য স্বয়ং মায়াময়ং কৃতম্
তস্য চান্যেঽপি দিঙ্নাগা বভূবুরনুয়ায়িনঃ
60.51
অঞ্জনো বামনশ্চৈব মহাপদ্মশ্চ সুপ্রভঃ
ত্রয় এতে মহানাগা রাক্ষসৈঃ সমধিষ্ঠিতাঃ
60.52
মহাকায়াস্ত্রিধা রাজন্প্রস্রবন্তো মদং বহু
তেজোবীর্যবলোপেতা মহাবলপরাক্রমাঃ
60.53
ঘটোত্কচস্তু স্বং নাগং চোদয়ামাস তং ততঃ
সগজং ভগদত্তং তু হন্তুকামঃ পরংতপঃ
60.54
তে চান্যে চোদিতা নাগা রাক্ষসৈস্তৈর্মহাবলৈঃ
পরিপেতুঃ সুসংরব্ধাশ্চতুর্দংষ্ট্রাশ্চতুর্দিশম্
ভগদত্তস্য তং নাগং বিষাণৈস্তেঽভ্যপীডয়ন্
60.55
সংপীড্যমানস্তৈর্নাগৈর্বেদনার্তঃ শরাতুরঃ
সোঽনদত্সুমহানাদমিন্দ্রাশনিসমস্বনম্
60.56
তস্য তং নদতো নাদং সুঘোরং ভীমনিস্বনম্
শ্রুত্বা ভীষ্মোঽব্রবীদ্দ্রোণং রাজানং চ সুয়োধনম্
60.57
এষ যুধ্যতি সংগ্রামে হৈডিম্বেন দুরাত্মনা
ভগদত্তো মহেষ্বাসঃ কৃচ্ছ্রেণ পরিবর্ততে
60.58
রাক্ষসশ্চ মহামায়ঃ স চ রাজাতিকোপনঃ
তৌ সমেতৌ মহাবীর্যৌ কালমৃত্যুসমাবুভৌ
60.59
শ্রূয়তে হ্যেষ হৃষ্টানাং পাণ্ডবানাং মহাস্বনঃ
হস্তিনশ্চৈব সুমহান্ভীতস্য রুবতো ধ্বনিঃ
60.60
তত্র গচ্ছাম ভদ্রং বো রাজানং পরিরক্ষিতুম্
অরক্ষ্যমাণঃ সমরে ক্ষিপ্রং প্রাণান্বিমোক্ষ্যতে
60.61
তে ত্বরধ্বং মহাবীর্যাঃ কিং চিরেণ প্রয়ামহে
মহান্হি বর্ততে রৌদ্রঃ সংগ্রামো লোমহর্ষণঃ
60.62
ভক্তশ্চ কুলপুত্রশ্চ শূরশ্চ পৃতনাপতিঃ
যুক্তং তস্য পরিত্রাণং কর্তুমস্মাভিরচ্যুতাঃ
60.63
ভীষ্মস্য তদ্বচঃ শ্রুত্বা ভারদ্বাজপুরোগমাঃ
সহিতাঃ সর্বরাজানো ভগদত্তপরীপ্সয়া
উত্তমং জবমাস্থায় প্রয়য়ুর্যত্র সোঽভবৎ
60.64
তান্প্রয়াতান্সমালোক্য যুধিষ্ঠিরপুরোগমাঃ
পাঞ্চালাঃ পাণ্ডবৈঃ সার্ধং পৃষ্ঠতোঽনুয়য়ুঃ পরান্
60.65
তান্যনীকান্যথালোক্য রাক্ষসেন্দ্রঃ প্রতাপবান্
ননাদ সুমহানাদং বিস্ফোটমশনেরিব
60.66
তস্য তং নিনদং শ্রুত্বা দৃষ্ট্বা নাগাংশ্চ যুধ্যতঃ
ভীষ্মঃ শাংতনবো ভূয়ো ভারদ্বাজমভাষত
60.67
ন রোচতে মে সংগ্রামো হৈডিম্বেন দুরাত্মনা
বলবীর্যসমাবিষ্টঃ সসহায়শ্চ সাংপ্রতম্
60.68
নৈষ শক্যো যুধা জেতুমপি বজ্রভৃতা স্বয়ম্
লব্ধলক্ষ্যঃ প্রহারী চ বয়ং চ শ্রান্তবাহনাঃ
পাঞ্চালৈঃ পাণ্ডবেয়ৈশ্চ দিবসং ক্ষতবিক্ষতাঃ
60.69
তন্ন মে রোচতে যুদ্ধং পাণ্ডবৈর্জিতকাশিভিঃ
ঘুষ্যতামবহারোঽদ্য শ্বো যোত্স্যামঃ পরৈঃ সহ
60.70
পিতামহবচঃ শ্রুত্বা তথা চক্রুঃ স্ম কৌরবাঃ
উপায়েনাপয়ানং তে ঘটোত্কচভয়ার্দিতাঃ
60.71
কৌরবেষু নিবৃত্তেষু পাণ্ডবা জিতকাশিনঃ
সিংহনাদমকুর্বন্ত শঙ্খবেণুস্বনৈঃ সহ
60.72
এবং তদভবদ্যুদ্ধং দিবসং ভরতর্ষভ
পাণ্ডবানাং কুরূণাং চ পুরস্কৃত্য ঘটোত্কচম্
60.73
কৌরবাস্তু ততো রাজন্প্রয়য়ুঃ শিবিরং স্বকম্
ব্রীডমানা নিশাকালে পাণ্ডবেয়ৈঃ পরাজিতাঃ
60.74
শরবিক্ষতগাত্রাশ্চ পাণ্ডুপুত্রা মহারথাঃ
যুদ্ধে সুমনসো ভূত্বা শিবিরায়ৈব জগ্মিরে
60.75
পুরস্কৃত্য মহারাজ ভীমসেনঘটোত্কচৌ
পূজয়ন্তস্তদান্যোন্যং মুদা পরময়া যুতাঃ
60.76
নদন্তো বিবিধান্নাদাংস্তূর্যস্বনবিমিশ্রিতান্
সিংহনাদাংশ্চ কুর্বাণা বিমিশ্রাঞ্শঙ্খনিস্বনৈঃ
60.77
বিনদন্তো মহাত্মানঃ কম্পয়ন্তশ্চ মেদিনীম্
ঘট্টয়ন্তশ্চ মর্মাণি তব পুত্রস্য মারিষ
প্রয়াতাঃ শিবিরায়ৈব নিশাকালে পরংতপাঃ
60.78
দুর্যোধনস্তু নৃপতির্দীনো ভ্রাতৃবধেন চ
মুহূর্তং চিন্তয়ামাস বাষ্পশোকসমাকুলঃ
60.79
ততঃ কৃত্বা বিধিং সর্বং শিবিরস্য যথাবিধি
প্রদধ্যৌ শোকসংতপ্তো ভ্রাতৃব্যসনকর্শিতঃ