Utshovঅধ্যায় 59
59.1
সংজয় উবাচ
তস্মিন্হতে গজানীকে পুত্রো দুর্যোধনস্তব
ভীমসেনং ঘ্নতেত্যেবং সর্বসৈন্যান্যচোদয়ৎ
59.2
ততঃ সর্বাণ্যনীকানি তব পুত্রস্য শাসনাৎ
অভ্যদ্রবন্ভীমসেনং নদন্তং ভৈরবান্রবান্
59.3
তং বলৌঘমপর্যন্তং দেবৈরপি দুরুত্সহম্
আপতন্তং সুদুষ্পারং সমুদ্রমিব পর্বণি
59.4
রথনাগাশ্বকলিলং শঙ্খদুন্দুভিনাদিতম্
অথানন্তমপারং চ নরেন্দ্রস্তিমিতহ্রদম্
59.5
তং ভীমসেনঃ সমরে মহোদধিমিবাপরম্
সেনাসাগরমক্ষোভ্যং বেলেব সমবারয়ৎ
59.6
তদাশ্চর্যমপশ্যাম শ্রদ্ধেয়মপি চাদ্ভুতম্
ভীমসেনস্য সমরে রাজন্কর্মাতিমানুষম্
59.7
উদীর্ণাং পৃথিবীং সর্বাং সাশ্বাং সরথকুঞ্জরাম্
অসংভ্রমং ভীমসেনো গদয়া সমতাডয়ৎ
59.8
স সংবার্য বলৌঘাংস্তান্গদয়া রথিনাং বরঃ
অতিষ্ঠত্তুমুলে ভীমো গিরির্মেরুরিবাচলঃ
59.9
তস্মিন্সুতুমুলে ঘোরে কালে পরমদারুণে
ভ্রাতরশ্চৈব পুত্রাশ্চ ধৃষ্টদ্যুম্নশ্চ পার্ষতঃ
59.10
দ্রৌপদেয়াভিমন্যুশ্চ শিখণ্ডী চ মহারথঃ
ন প্রাজহন্ভীমসেনং ভয়ে জাতে মহাবলম্
59.11
ততঃ শৈক্যায়সীং গুর্বীং প্রগৃহ্য মহতীং গদাম্
অবধীত্তাবকান্যোধান্দণ্ডপাণিরিবান্তকঃ
পোথয়ন্রথবৃন্দানি বাজিবৃন্দানি চাভিভূঃ
59.12
ব্যচরত্সমরে ভীমো যুগান্তে পাবকো যথা
বিনিঘ্নন্সমরে সর্বান্যুগান্তে কালবদ্বিভুঃ
59.13
ঊরুবেগেন সংকর্ষন্রথজালানি পাণ্ডবঃ
প্রমর্দয়ন্গজান্সর্বান্নড্বলানীব কুঞ্জরঃ
59.14
মৃদ্নন্রথেভ্যো রথিনো গজেভ্যো গজয়োধিনঃ
সাদিনশ্চাশ্বপৃষ্ঠেভ্যো ভূমৌ চৈব পদাতিনঃ
59.15
তত্র তত্র হতৈশ্চাপি মনুষ্যগজবাজিভিঃ
রণাঙ্গণং তদভবন্মৃত্যোরাঘাতসংনিভম্
59.16
পিনাকমিব রুদ্রস্য ক্রুদ্ধস্যাভিঘ্নতঃ পশূন্
যমদণ্ডোপমামুগ্রামিন্দ্রাশনিসমস্বনাম্
দদৃশুর্ভীমসেনস্য রৌদ্রাং বিশসনীং গদাম্
59.17
আবিধ্যতো গদাং তস্য কৌন্তেয়স্য মহাত্মনঃ
বভৌ রূপং মহাঘোরং কালস্যেব যুগক্ষয়ে
59.18
তং তথা মহতীং সেনাং দ্রাবয়ন্তং পুনঃ পুনঃ
দৃষ্ট্বা মৃত্যুমিবায়ান্তং সর্বে বিমনসোঽভবন্
59.19
যতো যতঃ প্রেক্ষতে স্ম গদামুদ্যম্য পাণ্ডবঃ
তেন তেন স্ম দীর্যন্তে সর্বসৈন্যানি ভারত
59.20
প্রদারয়ন্তং সৈন্যানি বলৌঘেনাপরাজিতম্
গ্রসমানমনীকানি ব্যাদিতাস্যমিবান্তকম্
59.21
তং তথা ভীমকর্মাণং প্রগৃহীতমহাগদম্
দৃষ্ট্বা বৃকোদরং ভীষ্মঃ সহসৈব সমভ্যয়াৎ
59.22
মহতা মেঘঘোষেণ রথেনাদিত্যবর্চসা
ছাদয়ঞ্শরবর্ষেণ পর্জন্য ইব বৃষ্টিমান্
59.23
তমায়ান্তং তথা দৃষ্ট্বা ব্যাত্তাননমিবান্তকম্
ভীষ্মং ভীমো মহাবাহুঃ প্রত্যুদীয়াদমর্ষণঃ
59.24
তস্মিন্ক্ষণে সাত্যকিঃ সত্যসংধঃ; শিনিপ্রবীরোঽভ্যপতত্পিতামহম্
নিঘ্নন্নমিত্রান্ধনুষা দৃঢেন; স কম্পয়ংস্তব পুত্রস্য সেনাম্
59.25
তং যান্তমশ্বৈ রজতপ্রকাশৈঃ; শরান্ধমন্তং ধনুষা দৃঢেন
নাশক্নুবন্বারয়িতুং তদানীং; সর্বে গণা ভারত যে ত্বদীয়াঃ
59.26
অবিধ্যদেনং নিশিতৈঃ শরাগ্রৈ;রলম্বুসো রাজবরার্শ্যশৃঙ্গিঃ
তং বৈ চতুর্ভিঃ প্রতিবিধ্য বীরো; নপ্তা শিনেরভ্যপতদ্রথেন
59.27
অন্বাগতং বৃষ্ণিবরং নিশম্য; মধ্যে রিপূণাং পরিবর্তমানম্
প্রাবর্তয়ন্তং কুরুপুংগবাংশ্চ; পুনঃ পুনশ্চ প্রণদন্তমাজৌ
59.28
নাশক্নুবন্বারয়িতুং বরিষ্ঠং; মধ্যংদিনে সূর্যমিবাতপন্তম্
ন তত্র কশ্চিন্নবিষণ্ণ আসী;দৃতে রাজন্সোমদত্তস্য পুত্রাৎ
59.29
স হ্যাদদানো ধনুরুগ্রবেগং; ভূরিশ্রবা ভারত সৌমদত্তিঃ
দৃষ্ট্বা রথান্স্বান্ব্যপনীয়মানা;ন্প্রত্যুদ্যয়ৌ সাত্যকিং যোদ্ধুমিচ্ছন্