Utshovঅধ্যায় 58
58.1
ধৃতরাষ্ট্র উবাচ
দৈবমেব পরং মন্যে পৌরুষাদপি সংজয়
যত্সৈন্যং মম পুত্রস্য পাণ্ডুসৈন্যেন বধ্যতে
58.2
নিত্যং হি মামকাংস্তাত হতানেব হি শংসসি
অব্যগ্রাংশ্চ প্রহৃষ্টাংশ্চ নিত্যং শংসসি পাণ্ডবান্
58.3
হীনান্পুরুষকারেণ মামকানদ্য সংজয়
পতিতান্পাত্যমানাংশ্চ হতানেব চ শংসসি
58.4
যুধ্যমানান্যথাশক্তি ঘটমানাঞ্জয়ং প্রতি
পাণ্ডবা বিজয়ন্ত্যেব জীয়ন্তে চৈব মামকাঃ
58.5
সোঽহং তীব্রাণি দুঃখানি দুর্যোধনকৃতানি চ
অশ্রৌষং সততং তাত দুঃসহানি বহূনি চ
58.6
তমুপায়ং ন পশ্যামি জীয়েরন্যেন পাণ্ডবাঃ
মামকা বা জয়ং যুদ্ধে প্রাপ্নুয়ুর্যেন সংজয়
58.7
সংজয় উবাচ
ক্ষয়ং মনুষ্যদেহানাং গজবাজিরথক্ষয়ম্
শৃণু রাজন্স্থিরো ভূত্বা তবৈবাপনয়ো মহান্
58.8
ধৃষ্টদ্যুম্নস্তু শল্যেন পীডিতো নবভিঃ শরৈঃ
পীডয়ামাস সংক্রুদ্ধো মদ্রাধিপতিমায়সৈঃ
58.9
তত্রাদ্ভুতমপশ্যাম পার্ষতস্য পরাক্রমম্
ন্যবারয়ত যত্তূর্ণং শল্যং সমিতিশোভনম্
58.10
নান্তরং দদৃশে কশ্চিত্তয়োঃ সংরব্ধয়ো রণে
মুহূর্তমিব তদ্যুদ্ধং তয়োঃ সমমিবাভবৎ
58.11
ততঃ শল্যো মহারাজ ধৃষ্টদ্যুম্নস্য সংয়ুগে
ধনুশ্চিচ্ছেদ ভল্লেন পীতেন নিশিতেন চ
58.12
অথৈনং শরবর্ষেণ ছাদয়ামাস ভারত
গিরিং জলাগমে যদ্বজ্জলদা জলধারিণঃ
58.13
অভিমন্যুস্তু সংক্রুদ্ধো ধৃষ্টদ্যুম্নে নিপীডিতে
অভিদুদ্রাব বেগেন মদ্ররাজরথং প্রতি
58.14
ততো মদ্রাধিপরথং কার্ষ্ণিঃ প্রাপ্যাতিকোপনঃ
আর্তায়নিমমেয়াত্মা বিব্যাধ বিশিখৈস্ত্রিভিঃ
58.15
ততস্তু তাবকা রাজন্পরীপ্সন্তোঽঽর্জুনিং রণে
মদ্ররাজরথং তূর্ণং পরিবার্যাবতস্থিরে
58.16
দুর্যোধনো বিকর্ণশ্চ দুঃশাসনবিবিংশতী
দুর্মর্ষণো দুঃসহশ্চ চিত্রসেনশ্চ দুর্মুখঃ
58.17
সত্যব্রতশ্চ ভদ্রং তে পুরুমিত্রশ্চ ভারত
এতে মদ্রাধিপরথং পালয়ন্তঃ স্থিতা রণে
58.18
তান্ভীমসেনঃ সংক্রুদ্ধো ধৃষ্টদ্যুম্নশ্চ পার্ষতঃ
দ্রৌপদেয়াভিমন্যুশ্চ মাদ্রীপুত্রৌ চ পাণ্ডবৌ
58.19
নানারূপাণি শস্ত্রাণি বিসৃজন্তো বিশাং পতে
অভ্যবর্তন্ত সংহৃষ্টাঃ পরস্পরবধৈষিণঃ
তে বৈ সমীয়ুঃ সংগ্রামে রাজন্দুর্মন্ত্রিতে তব
58.20
তস্মিন্দাশরথে যুদ্ধে বর্তমানে ভয়াবহে
তাবকানাং পরেষাং চ প্রেক্ষকা রথিনোঽভবন্
58.21
শস্ত্রাণ্যনেকরূপাণি বিসৃজন্তো মহারথাঃ
অন্যোন্যমভিনর্দন্তঃ সংপ্রহারং প্রচক্রিরে
58.22
তে যত্তা জাতসংরম্ভাঃ সর্বেঽন্যোন্যং জিঘাংসবঃ
মহাস্ত্রাণি বিমুঞ্চন্তঃ সমাপেতুরমর্ষণাঃ
58.23
দুর্যোধনস্তু সংক্রুদ্ধো ধৃষ্টদ্যুম্নং মহারণে
বিব্যাধ নিশিতৈর্বাণৈশ্চতুর্ভিস্ত্বরিতো ভৃশম্
58.24
দুর্মর্ষণশ্চ বিংশত্যা চিত্রসেনশ্চ পঞ্চভিঃ
দুর্মুখো নবভির্বাণৈর্দুঃসহশ্চাপি সপ্তভিঃ
বিবিংশতিঃ পঞ্চভিশ্চ ত্রিভির্দুঃশাসনস্তথা
58.25
তান্প্রত্যবিধ্যদ্রাজেন্দ্র পার্ষতঃ শত্রুতাপনঃ
একৈকং পঞ্চবিংশত্যা দর্শয়ন্পাণিলাঘবম্
58.26
সত্যব্রতং তু সমরে পুরুমিত্রং চ ভারত
অভিমন্যুরবিধ্যত্তৌ দশভির্দশভিঃ শরৈঃ
58.27
মাদ্রীপুত্রৌ তু সমরে মাতুলং মাতৃনন্দনৌ
ছাদয়েতাং শরব্রাতৈস্তদদ্ভুতমিবাভবৎ
58.28
ততঃ শল্যো মহারাজ স্বস্রীয়ৌ রথিনাং বরৌ
শরৈর্বহুভিরানর্ছত্কৃতপ্রতিকৃতৈষিণৌ
ছাদ্যমানৌ ততস্তৌ তু মাদ্রীপুত্রৌ ন চেলতুঃ
58.29
অথ দুর্যোধনং দৃষ্ট্বা ভীমসেনো মহাবলঃ
বিধিত্সুঃ কলহস্যান্তং গদাং জগ্রাহ পাণ্ডবঃ
58.30
তমুদ্যতগদং দৃষ্ট্বা কৈলাসমিব শৃঙ্গিণম্
ভীমসেনং মহাবাহুং পুত্রাস্তে প্রাদ্রবন্ভয়াৎ
58.31
দুর্যোধনস্তু সংক্রুদ্ধো মাগধং সমচোদয়ৎ
অনীকং দশসাহস্রং কুঞ্জরাণাং তরস্বিনাম্
মাগধং পুরতঃ কৃত্বা ভীমসেনং সমভ্যয়াৎ
58.32
আপতন্তং চ তং দৃষ্ট্বা গজানীকং বৃকোদরঃ
গদাপাণিরবারোহদ্রথাত্সিংহ ইবোন্নদন্
58.33
অদ্রিসারময়ীং গুর্বীং প্রগৃহ্য মহতীং গদাম্
অভ্যধাবদ্গজানীকং ব্যাদিতাস্য ইবান্তকঃ
58.34
স গজান্গদয়া নিঘ্নন্ব্যচরত্সমরে বলী
ভীমসেনো মহাবাহুঃ সবজ্র ইব বাসবঃ
58.35
তস্য নাদেন মহতা মনোহৃদয়কম্পিনা
ব্যত্যচেষ্টন্ত সংহত্য গজা ভীমস্য নর্দতঃ
58.36
ততস্তু দ্রৌপদীপুত্রাঃ সৌভদ্রশ্চ মহারথঃ
নকুলঃ সহদেবশ্চ ধৃষ্টদ্যুম্নশ্চ পার্ষতঃ
58.37
পৃষ্ঠং ভীমস্য রক্ষন্তঃ শরবর্ষেণ বারণান্
অভ্যধাবন্ত বর্ষন্তো মেঘা ইব গিরীন্যথা
58.38
ক্ষুরৈঃ ক্ষুরপ্রৈর্ভল্লৈশ্চ পীতৈরঞ্জলিকৈরপি
পাতয়ন্তোত্তমাঙ্গানি পাণ্ডবা গজয়োধিনাম্
58.39
শিরোভিঃ প্রপতদ্ভিশ্চ বাহুভিশ্চ বিভূষিতৈঃ
অশ্মবৃষ্টিরিবাভাতি পাণিভিশ্চ সহাঙ্কুশৈঃ
58.40
হৃতোত্তমাঙ্গাঃ স্কন্ধেষু গজানাং গজয়োধিনঃ
অদৃশ্যন্তাচলাগ্রেষু দ্রুমা ভগ্নশিখা ইব
58.41
ধৃষ্টদ্যুম্নহতানন্যানপশ্যাম মহাগজান্
পতিতান্পাত্যমানাংশ্চ পার্ষতেন মহাত্মনা
58.42
মাগধোঽথ মহীপালো গজমৈরাবতোপমম্
প্রেষয়ামাস সমরে সৌভদ্রস্য রথং প্রতি
58.43
তমাপতন্তং সংপ্রেক্ষ্য মাগধস্য গজোত্তমম্
জঘানৈকেষুণা বীরঃ সৌভদ্রঃ পরবীরহা
58.44
তস্যাবর্জিতনাগস্য কার্ষ্ণিঃ পরপুরংজয়ঃ
রাজ্ঞো রজতপুঙ্খেন ভল্লেনাপহরচ্ছিরঃ
58.45
বিগাহ্য তদ্গজানীকং ভীমসেনোঽপি পাণ্ডবঃ
ব্যচরত্সমরে মৃদ্নন্গজানিন্দ্রো গিরীনিব
58.46
একপ্রহারাভিহতান্ভীমসেনেন কুঞ্জরান্
অপশ্যাম রণে তস্মিন্গিরীন্বজ্রহতানিব
58.47
ভগ্নদন্তান্ভগ্নকটান্ভগ্নসক্থাংশ্চ বারণান্
ভগ্নপৃষ্ঠান্ভগ্নকুম্ভান্নিহতান্পর্বতোপমান্
58.48
নদতঃ সীদতশ্চান্যান্বিমুখান্সমরে গজান্
বিমূত্রান্ভগ্নসংবিগ্নাংস্তথা বিশকৃতোঽপরান্
58.49
ভীমসেনস্য মার্গেষু গতাসূন্পর্বতোপমান্
অপশ্যাম হতান্নাগান্নিষ্টনন্তস্তথাপরে
58.50
বমন্তো রুধিরং চান্যে ভিন্নকুম্ভা মহাগজাঃ
বিহ্বলন্তো গতা ভূমিং শৈলা ইব ধরাতলে
58.51
মেদোরুধিরদিগ্ধাঙ্গো বসামজ্জাসমুক্ষিতঃ
ব্যচরত্সমরে ভীমো দণ্ডপাণিরিবান্তকঃ
58.52
গজানাং রুধিরাক্তাং তাং গদাং বিভ্রদ্বৃকোদরঃ
ঘোরঃ প্রতিভয়শ্চাসীত্পিনাকীব পিনাকধৃক্
58.53
নির্মথ্যমানাঃ ক্রুদ্ধেন ভীমসেনেন দন্তিনঃ
সহসা প্রাদ্রবঞ্শিষ্টা মৃদ্নন্তস্তব বাহিনীম্
58.54
তং হি বীরং মহেষ্বাসাঃ সৌভদ্রপ্রমুখা রথাঃ
পর্যরক্ষন্ত যুধ্যন্তং বজ্রায়ুধমিবামরাঃ
58.55
শোণিতাক্তাং গদাং বিভ্রদুক্ষিতো গজশোণিতৈঃ
কৃতান্ত ইব রৌদ্রাত্মা ভীমসেনো ব্যদৃশ্যত
58.56
ব্যায়চ্ছমানং গদয়া দিক্ষু সর্বাসু ভারত
নৃত্যমানমপশ্যাম নৃত্যন্তমিব শংকরম্
58.57
যমদণ্ডোপমাং গুর্বীমিন্দ্রাশনিসমস্বনাম্
অপশ্যাম মহারাজ রৌদ্রাং বিশসনীং গদাম্
58.58
বিমিশ্রাং কেশমজ্জাভিঃ প্রদিগ্ধাং রুধিরেণ চ
পিনাকমিব রুদ্রস্য ক্রুদ্ধস্যাভিঘ্নতঃ পশূন্
58.59
যথা পশূনাং সংঘাতং যষ্ট্যা পালঃ প্রকালয়েৎ
তথা ভীমো গজানীকং গদয়া পর্যকালয়ৎ
58.60
গদয়া বধ্যমানাস্তে মার্গণৈশ্চ সমন্ততঃ
স্বান্যনীকানি মৃদ্নন্তঃ প্রাদ্রবন্কুঞ্জরাস্তব
58.61
মহাবাত ইবাভ্রাণি বিধমিত্বা স বারণান্
অতিষ্ঠত্তুমুলে ভীমঃ শ্মশান ইব শূলভৃৎ