Utshovঅধ্যায় 57
57.1
সংজয় উবাচ
দ্রৌণির্ভূরিশ্রবাঃ শল্যশ্চিত্রসেনশ্চ মারিষ
পুত্রঃ সাংয়মনেশ্চৈব সৌভদ্রং সময়োধয়ন্
57.2
সংসক্তমতিতেজোভিস্তমেকং দদৃশুর্জনাঃ
পঞ্চভির্মনুজব্যাঘ্রৈর্গজৈঃ সিংহশিশুং যথা
57.3
নাভিলক্ষ্যতয়া কশ্চিন্ন শৌর্যে ন পরাক্রমে
বভূব সদৃশঃ কার্ষ্ণের্নাস্ত্রে নাপি চ লাঘবে
57.4
তথা তমাত্মজং যুদ্ধে বিক্রমন্তমরিংদমম্
দৃষ্ট্বা পার্থো রণে যত্তঃ সিংহনাদমথোঽনদৎ
57.5
পীডয়ানং চ তত্সৈন্যং পৌত্রং তব বিশাং পতে
দৃষ্ট্বা ত্বদীয়া রাজেন্দ্র সমন্তাত্পর্যবারয়ন্
57.6
ধ্বজিনীং ধার্তরাষ্ট্রাণাং দীনশত্রুরদীনবৎ
প্রত্যুদ্যয়ৌ স সৌভদ্রস্তেজসা চ বলেন চ
57.7
তস্য লাঘবমার্গস্থমাদিত্যসদৃশপ্রভম্
ব্যদৃশ্যত মহচ্চাপং সমরে যুধ্যতঃ পরৈঃ
57.8
স দ্রৌণিমিষুণৈকেন বিদ্ধ্বা শল্যং চ পঞ্চভিঃ
ধ্বজং সাংয়মনেশ্চাপি সোঽষ্টাভিরপবর্জয়ৎ
57.9
রুক্মদণ্ডাং মহাশক্তিং প্রেষিতাং সৌমদত্তিনা
শিতেনোরগসংকাশাং পত্রিণা বিজহার তাম্
57.10
শল্যস্য চ মহাঘোরানস্যতঃ শতশঃ শরান্
নিবার্যার্জুনদায়াদো জঘান সমরে হয়ান্
57.11
ভূরিশ্রবাশ্চ শল্যশ্চ দ্রৌণিঃ সাংয়মনিঃ শলঃ
নাভ্যবর্তন্ত সংরব্ধাঃ কার্ষ্ণের্বাহুবলাশ্রয়াৎ
57.12
ততস্ত্রিগর্তা রাজেন্দ্র মদ্রাশ্চ সহ কেকয়ৈঃ
পঞ্চত্রিংশতিসাহস্রাস্তব পুত্রেণ চোদিতাঃ
57.13
ধনুর্বেদবিদো মুখ্যা অজেয়াঃ শত্রুভির্যুধি
সহপুত্রং জিঘাংসন্তং পরিবব্রুঃ কিরীটিনম্
57.14
তৌ তু তত্র পিতাপুত্রৌ পরিক্ষিপ্তৌ রথর্ষভৌ
দদর্শ রাজন্পাঞ্চাল্যঃ সেনাপতিরমিত্রজিৎ
57.15
স বারণরথৌঘানাং সহস্রৈর্বহুভির্বৃতঃ
বাজিভিঃ পত্তিভিশ্চৈব বৃতঃ শতসহস্রশঃ
57.16
ধনুর্বিস্ফার্য সংক্রুদ্ধশ্চোদয়িত্বা বরূথিনীম্
যয়ৌ তন্মদ্রকানীকং কেকয়াংশ্চ পরংতপঃ
57.17
তেন কীর্তিমতা গুপ্তমনীকং দৃঢধন্বনা
প্রয়ুক্তরথনাগাশ্বং যোত্স্যমানমশোভত
57.18
সোঽর্জুনং প্রমুখে যান্তং পাঞ্চাল্যঃ কুরুনন্দন
ত্রিভিঃ শারদ্বতং বাণৈর্জত্রুদেশে সমর্পয়ৎ
57.19
ততঃ স মদ্রকান্হত্বা দশভির্দশভিঃ শরৈঃ
হৃষ্ট একো জঘানাশ্বং ভল্লেন কৃতবর্মণঃ
57.20
দমনং চাপি দায়াদং পৌরবস্য মহাত্মনঃ
জঘান বিপুলাগ্রেণ নারাচেন পরংতপঃ
57.21
ততঃ সাংয়মনেঃ পুত্রঃ পাঞ্চাল্যং যুদ্ধদুর্মদম্
অবিধ্যত্ত্রিংশতা বাণৈর্দশভিশ্চাস্য সারথিম্
57.22
সোঽতিবিদ্ধো মহেষ্বাসঃ সৃক্কিণী পরিসংলিহন্
ভল্লেন ভৃশতীক্ষ্ণেন নিচকর্তাস্য কার্মুকম্
57.23
অথৈনং পঞ্চবিংশত্যা ক্ষিপ্রমেব সমর্পয়ৎ
অশ্বাংশ্চাস্যাবধীদ্রাজন্নুভৌ তৌ পার্ষ্ণিসারথী
57.24
স হতাশ্বে রথে তিষ্ঠন্দদর্শ ভরতর্ষভ
পুত্রঃ সাংয়মনেঃ পুত্রং পাঞ্চাল্যস্য মহাত্মনঃ
57.25
স সংগৃহ্য মহাঘোরং নিস্ত্রিংশবরমায়সম্
পদাতিস্তূর্ণমভ্যর্ছদ্রথস্থং দ্রুপদাত্মজম্
57.26
তং মহৌঘমিবায়ান্তং খাত্পতন্তমিবোরগম্
ভ্রান্তাবরণনিস্ত্রিংশং কালোত্সৃষ্টমিবান্তকম্
57.27
দীপ্যন্তমিব শস্ত্রার্চ্যা মত্তবারণবিক্রমম্
অপশ্যন্পাণ্ডবাস্তত্র ধৃষ্টদ্যুম্নশ্চ পার্ষতঃ
57.28
তস্য পাঞ্চালপুত্রস্তু প্রতীপমভিধাবতঃ
শিতনিস্ত্রিংশহস্তস্য শরাবরণধারিণঃ
57.29
বাণবেগমতীতস্য রথাভ্যাশমুপেয়ুষঃ
ত্বরন্সেনাপতিঃ ক্রুদ্ধো বিভেদ গদয়া শিরঃ
57.30
তস্য রাজন্সনিস্ত্রিংশং সুপ্রভং চ শরাবরম্
হতস্য পততো হস্তাদ্বেগেন ন্যপতদ্ভুবি
57.31
তং নিহত্য গদাগ্রেণ লেভে স পরমং যশঃ
পুত্রঃ পাঞ্চালরাজস্য মহাত্মা ভীমবিক্রমঃ
57.32
তস্মিন্হতে মহেষ্বাসে রাজপুত্রে মহারথে
হাহাকারো মহানাসীত্তব সৈন্যস্য মারিষ
57.33
ততঃ সাংয়মনিঃ ক্রুদ্ধো দৃষ্ট্বা নিহতমাত্মজম্
অভিদুদ্রাব বেগেন পাঞ্চাল্যং যুদ্ধদুর্মদম্
57.34
তৌ তত্র সমরে বীরৌ সমেতৌ রথিনাং বরৌ
দদৃশুঃ সর্বরাজানঃ কুরবঃ পাণ্ডবাস্তথা
57.35
ততঃ সাংয়মনিঃ ক্রুদ্ধঃ পার্ষতং পরবীরহা
আজঘান ত্রিভির্বাণৈস্তোত্ত্রৈরিব মহাদ্বিপম্
57.36
তথৈব পার্ষতং শূরং শল্যঃ সমিতিশোভনঃ
আজঘানোরসি ক্রুদ্ধস্ততো যুদ্ধমবর্তত