অধ্যায় 56

56.1

সংজয় উবাচ
ব্যুষ্টাং নিশাং ভারত ভারতানা;মনীকিনীনাং প্রমুখে মহাত্মা
যয়ৌ সপত্নান্প্রতি জাতকোপো; বৃতঃ সমগ্রেণ বলেন ভীষ্মঃ

56.2

তং দ্রোণদুর্যোধনবাহ্লিকাশ্চ; তথৈব দুর্মর্ষণচিত্রসেনৌ
জয়দ্রথশ্চাতিবলো বলৌঘৈ;র্নৃপাস্তথান্যেঽনুয়য়ুঃ সমন্তাৎ

56.3

স তৈর্মহদ্ভিশ্চ মহারথৈশ্চ; তেজস্বিভির্বীর্যবদ্ভিশ্চ রাজন্
ররাজ রাজোত্তম রাজমুখ্যৈ;র্বৃতঃ স দেবৈরিব বজ্রপাণিঃ

56.4

তস্মিন্ননীকপ্রমুখে বিষক্তা; দোধূয়মানাশ্চ মহাপতাকাঃ
সুরক্তপীতাসিতপাণ্ডুরাভা; মহাগজস্কন্ধগতা বিরেজুঃ

56.5

সা বাহিনী শাংতনবেন রাজ্ঞা; মহারথৈর্বারণবাজিভিশ্চ
বভৌ সবিদ্যুত্স্তনয়িত্নুকল্পা; জলাগমে দ্যৌরিব জাতমেঘা

56.6

ততো রণায়াভিমুখী প্রয়াতা; প্রত্যর্জুনং শাংতনবাভিগুপ্তা
সেনা মহোগ্রা সহসা কুরূণাং; বেগো যথা ভীম ইবাপগায়াঃ

56.7

তং ব্যালনানাবিধগূঢসারং; গজাশ্বপাদাতরথৌঘপক্ষম্
ব্যূহং মহামেঘসমং মহাত্মা; দদর্শ দূরাত্কপিরাজকেতুঃ

56.8

স নির্যয়ৌ কেতুমতা রথেন; নরর্ষভঃ শ্বেতহয়েন বীরঃ
বরূথিনা সৈন্যমুখে মহাত্মা; বধে ধৃতঃ সর্বসপত্নয়ূনাম্

56.9

সূপস্করং সোত্তরবন্ধুরেষং; যত্তং যদূনামৃষভেণ সংখ্যে
কপিধ্বজং প্রেক্ষ্য বিষেদুরাজৌ; সহৈব পুত্রৈস্তব কৌরবেয়াঃ

56.10

প্রকর্ষতা গুপ্তমুদায়ুধেন; কিরীটিনা লোকমহারথেন
তং ব্যূহরাজং দদৃশুস্ত্বদীয়া;শ্চতুশ্চতুর্ব্যালসহস্রকীর্ণম্

56.11

যথা হি পূর্বেঽহনি ধর্মরাজ্ঞা; ব্যূহঃ কৃতঃ কৌরবনন্দনেন
তথা তথোদ্দেশমুপেত্য তস্থুঃ; পাঞ্চালমুখ্যৈঃ সহ চেদিমুখ্যাঃ

56.12

ততো মহাবেগসমাহতানি; ভেরীসহস্রাণি বিনেদুরাজৌ
শঙ্খস্বনা দুন্দুভিনিস্বনাশ্চ; সর্বেষ্বনীকেষু সসিংহনাদাঃ

56.13

ততঃ সবাণানি মহাস্বনানি; বিস্ফার্যমাণানি ধনূংষি বীরৈঃ
ক্ষণেন ভেরীপণবপ্রণাদা;নন্তর্দধুঃ শঙ্খমহাস্বনাশ্চ

56.14

তচ্ছঙ্খশব্দাবৃতমন্তরিক্ষ;মুদ্ধূতভৌমদ্রুতরেণুজালম্
মহাবিতানাবততপ্রকাশ;মালোক্য বীরাঃ সহসাভিপেতুঃ

56.15

রথী রথেনাভিহতঃ সসূতঃ; পপাত সাশ্বঃ সরথঃ সকেতুঃ
গজো গজেনাভিহতঃ পপাত; পদাতিনা চাভিহতঃ পদাতিঃ

56.16

আবর্তমানান্যভিবর্তমানৈ;র্বাণৈঃ ক্ষতান্যদ্ভুতদর্শনানি
প্রাসৈশ্চ খড্গৈশ্চ সমাহতানি; সদশ্ববৃন্দানি সদশ্ববৃন্দৈঃ

56.17

সুবর্ণতারাগণভূষিতানি; শরাবরাণি প্রহিতানি বীরৈঃ
বিদার্যমাণানি পরশ্বধৈশ্চ; প্রাসৈশ্চ খড্গৈশ্চ নিপেতুরুর্ব্যাম্

56.18

গজৈর্বিষাণৈর্বরহস্তরুগ্ণাঃ; কেচিত্সসূতা রথিনঃ প্রপেতুঃ
গজর্ষভাশ্চাপি রথর্ষভেণ; নিপেতিরে বাণহতাঃ পৃথিব্যাম্

56.19

গজৌঘবেগোদ্ধতসাদিতানাং; শ্রুত্বা নিষেদুর্বসুধাং মনুষ্যাঃ
আর্তস্বরং সাদিপদাতিয়ূনাং; বিষাণগাত্রাবরতাডিতানাম্

56.20

সংভ্রান্তনাগাশ্বরথে প্রসূতে; মহাভয়ে সাদিপদাতিয়ূনাম্
মহারথৈঃ সংপরিবার্যমাণং; দদর্শ ভীষ্মঃ কপিরাজকেতুম্

56.21

তং পঞ্চতালোচ্ছ্রিততালকেতুঃ; সদশ্ববেগোদ্ধতবীর্যয়াতঃ
মহাস্ত্রবাণাশনিদীপ্তমার্গং; কিরীটিনং শাংতনবোঽভ্যধাবৎ

56.22

তথৈব শক্রপ্রতিমানকল্প;মিন্দ্রাত্মজং দ্রোণমুখাভিসস্রুঃ
কৃপশ্চ শল্যশ্চ বিবিংশতিশ্চ; দুর্যোধনঃ সৌমদত্তিশ্চ রাজন্

56.23

ততো রথানীকমুখাদুপেত্য; সর্বাস্ত্রবিত্কাঞ্চনচিত্রবর্মা
জবেন শূরোঽভিসসার সর্বাং;স্তথার্জুনস্যাত্র সুতোঽভিমন্যুঃ

56.24

তেষাং মহাস্ত্রাণি মহারথানা;মসক্তকর্মা বিনিহত্য কার্ষ্ণিঃ
বভৌ মহামন্ত্রহুতার্চিমালী; সদোগতঃ সন্ভগবানিবাগ্নিঃ

56.25

ততঃ স তূর্ণং রুধিরোদফেনাং; কৃত্বা নদীং বৈশসনে রিপূণাম্
জগাম সৌভদ্রমতীত্য ভীষ্মো; মহারথং পার্থমদীনসত্ত্বঃ

56.26

ততঃ প্রহস্যাদ্ভুতদর্শনেন; গাণ্ডীবনির্হ্রাদমহাস্বনেন
বিপাঠজালেন মহাস্ত্রজালং; বিনাশয়ামাস কিরীটমালী

56.27

তমুত্তমং সর্বধনুর্ধরাণা;মসক্তকর্মা কপিরাজকেতুঃ
ভীষ্মং মহাত্মাভিববর্ষ তূর্ণং; শরৌঘজালৈর্বিমলৈশ্চ ভল্লৈঃ

56.28

এবংবিধং কার্মুকভীমনাদ;মদীনবত্সত্পুরুষোত্তমাভ্যাম্
দদর্শ লোকঃ কুরুসৃঞ্জয়াশ্চ; তদ্দ্বৈরথং ভীষ্মধনংজয়াভ্যাম্

Contains text from DharmicData, made available under the Open Database License (ODbL). Simple meanings are written by AI and can contain mistakes.