Utshovঅধ্যায় 55
55.1
ধৃতরাষ্ট্র উবাচ
প্রতিজ্ঞাতে তু ভীষ্মেণ তস্মিন্যুদ্ধে সুদারুণে
ক্রোধিতো মম পুত্রেণ দুঃখিতেন বিশেষতঃ
55.2
ভীষ্মঃ কিমকরোত্তত্র পাণ্ডবেয়েষু সংজয়
পিতামহে বা পাঞ্চালাস্তন্মমাচক্ষ্ব সংজয়
55.3
সংজয় উবাচ
গতপূর্বাহ্ণভূয়িষ্ঠে তস্মিন্নহনি ভারত
জয়ং প্রাপ্তেষু হৃষ্টেষু পাণ্ডবেষু মহাত্মসু
55.4
সর্বধর্মবিশেষজ্ঞঃ পিতা দেবব্রতস্তব
অভ্যয়াজ্জবনৈরশ্বৈঃ পাণ্ডবানামনীকিনীম্
মহত্যা সেনয়া গুপ্তস্তব পুত্রৈশ্চ সর্বশঃ
55.5
প্রাবর্তত ততো যুদ্ধং তুমুলং লোমহর্ষণম্
অস্মাকং পাণ্ডবৈঃ সার্ধমনয়াত্তব ভারত
55.6
ধনুষাং কূজতাং তত্র তলানাং চাভিহন্যতাম্
মহান্সমভবচ্ছব্দো গিরীণামিব দীর্যতাম্
55.7
তিষ্ঠ স্থিতোঽস্মি বিদ্ধ্যেনং নিবর্তস্ব স্থিরো ভব
স্থিতোঽস্মি প্রহরস্বেতি শব্দাঃ শ্রূয়ন্ত সর্বশঃ
55.8
কাঞ্চনেষু তনুত্রেষু কিরীটেষু ধ্বজেষু চ
শিলানামিব শৈলেষু পতিতানামভূত্স্বনঃ
55.9
পতিতান্যুত্তমাঙ্গানি বাহবশ্চ বিভূষিতাঃ
ব্যচেষ্টন্ত মহীং প্রাপ্য শতশোঽথ সহস্রশঃ
55.10
হৃতোত্তমাঙ্গাঃ কেচিত্তু তথৈবোদ্যতকার্মুকাঃ
প্রগৃহীতায়ুধাশ্চাপি তস্থুঃ পুরুষসত্তমাঃ
55.11
প্রাবর্তত মহাবেগা নদী রুধিরবাহিনী
মাতঙ্গাঙ্গশিলারৌদ্রা মাংসশোণিতকর্দমা
55.12
বরাশ্বনরনাগানাং শরীরপ্রভবা তদা
পরলোকার্ণবমুখী গৃধ্রগোমায়ুমোদিনী
55.13
ন দৃষ্টং ন শ্রুতং চাপি যুদ্ধমেতাদৃশং নৃপ
যথা তব সুতানাং চ পাণ্ডবানাং চ ভারত
55.14
নাসীদ্রথপথস্তত্র যোধৈর্যুধি নিপাতিতৈঃ
গজৈশ্চ পতিতৈর্নীলৈর্গিরিশৃঙ্গৈরিবাবৃতম্
55.15
বিকীর্ণৈঃ কবচৈশ্চিত্রৈর্ধ্বজৈশ্ছত্রৈশ্চ মারিষ
শুশুভে তদ্রণস্থানং শরদীব নভস্তলম্
55.16
বিনির্ভিন্নাঃ শরৈঃ কেচিদন্তপীডাবিকর্ষিণঃ
অভীতাঃ সমরে শত্রূনভ্যধাবন্ত দংশিতাঃ
55.17
তাত ভ্রাতঃ সখে বন্ধো বয়স্য মম মাতুল
মা মাং পরিত্যজেত্যন্যে চুক্রুশুঃ পতিতা রণে
55.18
আধাবাভ্যেহি মা গচ্ছ কিং ভীতোঽসি ক্ব যাস্যসি
স্থিতোঽহং সমরে মা ভৈরিতি চান্যে বিচুক্রুশুঃ
55.19
তত্র ভীষ্মঃ শাংতনবো নিত্যং মণ্ডলকার্মুকঃ
মুমোচ বাণান্দীপ্তাগ্রানহীনাশীবিষানিব
55.20
শরৈরেকায়নীকুর্বন্দিশঃ সর্বা যতব্রতঃ
জঘান পাণ্ডবরথানাদিশ্যাদিশ্য ভারত
55.21
স নৃত্যন্বৈ রথোপস্থে দর্শয়ন্পাণিলাঘবম্
অলাতচক্রবদ্রাজংস্তত্র তত্র স্ম দৃশ্যতে
55.22
তমেকং সমরে শূরং পাণ্ডবাঃ সৃঞ্জয়াস্তথা
অনেকশতসাহস্রং সমপশ্যন্ত লাঘবাৎ
55.23
মায়াকৃতাত্মানমিব ভীষ্মং তত্র স্ম মেনিরে
পূর্বস্যাং দিশি তং দৃষ্ট্বা প্রতীচ্যাং দদৃশুর্জনাঃ
55.24
উদীচ্যাং চৈনমালোক্য দক্ষিণস্যাং পুনঃ প্রভো
এবং স সমরে বীরো গাঙ্গেয়ঃ প্রত্যদৃশ্যত
55.25
ন চৈনং পাণ্ডবেয়ানাং কশ্চিচ্ছক্নোতি বীক্ষিতুম্
বিশিখানেব পশ্যন্তি ভীষ্মচাপচ্যুতান্বহূন্
55.26
কুর্বাণং সমরে কর্ম সূদয়ানং চ বাহিনীম্
ব্যাক্রোশন্ত রণে তত্র বীরা বহুবিধং বহু
অমানুষেণ রূপেণ চরন্তং পিতরং তব
55.27
শলভা ইব রাজানঃ পতন্তি বিধিচোদিতাঃ
ভীষ্মাগ্নিমভি সংক্রুদ্ধং বিনাশায় সহস্রশঃ
55.28
ন হি মোঘঃ শরঃ কশ্চিদাসীদ্ভীষ্মস্য সংয়ুগে
নরনাগাশ্বকায়েষু বহুত্বাল্লঘুবেধিনঃ
55.29
ভিনত্ত্যেকেন বাণেন সুমুক্তেন পতত্রিণা
গজকঙ্কটসংনাহং বজ্রেণেবাচলোত্তমম্
55.30
দ্বৌ ত্রীনপি গজারোহান্পিণ্ডিতান্বর্মিতানপি
নারাচেন সুতীক্ষ্ণেন নিজঘান পিতা তব
55.31
যো যো ভীষ্মং নরব্যাঘ্রমভ্যেতি যুধি কশ্চন
মুহূর্তদৃষ্টঃ স ময়া পাতিতো ভুবি দৃশ্যতে
55.32
এবং সা ধর্মরাজস্য বধ্যমানা মহাচমূঃ
ভীষ্মেণাতুলবীর্যেণ ব্যশীর্যত সহস্রধা
55.33
প্রকীর্যত মহাসেনা শরবর্ষাভিতাপিতা
পশ্যতো বাসুদেবস্য পার্থস্য চ মহাত্মনঃ
55.34
যতমানাপি তে বীরা দ্রবমাণান্মহারথান্
নাশক্নুবন্বারয়িতুং ভীষ্মবাণপ্রপীডিতাঃ
55.35
মহেন্দ্রসমবীর্যেণ বধ্যমানা মহাচমূঃ
অভজ্যত মহারাজ ন চ দ্বৌ সহ ধাবতঃ
55.36
আবিদ্ধনরনাগাশ্বং পতিতধ্বজকূবরম্
অনীকং পাণ্ডুপুত্রাণাং হাহাভূতমচেতনম্
55.37
জঘানাত্র পিতা পুত্রং পুত্রশ্চ পিতরং তথা
প্রিয়ং সখায়ং চাক্রন্দে সখা দৈববলাত্কৃতঃ
55.38
বিমুচ্য কবচানন্যে পাণ্ডুপুত্রস্য সৈনিকাঃ
প্রকীর্য কেশান্ধাবন্তঃ প্রত্যদৃশ্যন্ত ভারত
55.39
তদ্গোকুলমিবোদ্ভ্রান্তমুদ্ভ্রান্তরথয়ূথপম্
দদৃশে পাণ্ডুপুত্রস্য সৈন্যমার্তস্বরং তদা
55.40
প্রভজ্যমানং তত্সৈন্যং দৃষ্ট্বা দেবকিনন্দনঃ
উবাচ পার্থং বীভত্সুং নিগৃহ্য রথমুত্তমম্
55.41
অয়ং স কালঃ সংপ্রাপ্তঃ পার্থ যঃ কাঙ্ক্ষিতস্ত্বয়া
প্রহরাস্মৈ নরব্যাঘ্র ন চেন্মোহাদ্বিমুহ্যসে
55.42
যত্ত্বয়া কথিতং বীর পুরা রাজ্ঞাং সমাগমে
ভীষ্মদ্রোণমুখান্সর্বান্ধার্তরাষ্ট্রস্য সৈনিকান্
55.43
সানুবন্ধান্হনিষ্যামি যে মাং যোত্স্যন্তি সংয়ুগে
ইতি তত্কুরু কৌন্তেয় সত্যং বাক্যমরিংদম
55.44
বীভত্সো পশ্য সৈন্যং স্বং ভজ্যমানং সমন্ততঃ
দ্রবতশ্চ মহীপালান্সর্বান্যৌধিষ্ঠিরে বলে
55.45
দৃষ্ট্বা হি সমরে ভীষ্মং ব্যাত্তাননমিবান্তকম্
ভয়ার্তাঃ সংপ্রণশ্যন্তি সিংহং ক্ষুদ্রমৃগা ইব
55.46
এবমুক্তঃ প্রত্যুবাচ বাসুদেবং ধনংজয়ঃ
চোদয়াশ্বান্যতো ভীষ্মো বিগাহ্যৈতদ্বলার্ণবম্
55.47
ততোঽশ্বান্রজতপ্রখ্যাংশ্চোদয়ামাস মাধবঃ
যতো ভীষ্মরথো রাজন্দুষ্প্রেক্ষ্যো রশ্মিমানিব
55.48
ততস্তত্পুনরাবৃত্তং যুধিষ্ঠিরবলং মহৎ
দৃষ্ট্বা পার্থং মহাবাহুং ভীষ্মায়োদ্যন্তমাহবে
55.49
ততো ভীষ্মঃ কুরুশ্রেষ্ঠঃ সিংহবদ্বিনদন্মুহুঃ
ধনংজয়রথং তূর্ণং শরবর্ষৈরবাকিরৎ
55.50
ক্ষণেন স রথস্তস্য সহয়ঃ সহসারথিঃ
শরবর্ষেণ মহতা সংছন্নো ন প্রকাশতে
55.51
বাসুদেবস্ত্বসংভ্রান্তো ধৈর্যমাস্থায় সত্ত্ববান্
চোদয়ামাস তানশ্বান্বিতুন্নান্ভীষ্মসায়কৈঃ
55.52
ততঃ পার্থো ধনুর্গৃহ্য দিব্যং জলদনিস্বনম্
পাতয়ামাস ভীষ্মস্য ধনুশ্ছিত্ত্বা ত্রিভিঃ শরৈঃ
55.53
স চ্ছিন্নধন্বা কৌরব্যঃ পুনরন্যন্মহদ্ধনুঃ
নিমেষান্তরমাত্রেণ সজ্যং চক্রে পিতা তব
55.54
বিচকর্ষ ততো দোর্ভ্যাং ধনুর্জলদনিস্বনম্
অথাস্য তদপি ক্রুদ্ধশ্চিচ্ছেদ ধনুরর্জুনঃ
55.55
তস্য তত্পূজয়ামাস লাঘবং শংতনোঃ সুতঃ
সাধু পার্থ মহাবাহো সাধু ভো পাণ্ডুনন্দন
55.56
ত্বয্যেবৈতদ্যুক্তরূপং মহত্কর্ম ধনংজয়
প্রীতোঽস্মি সুদৃঢং পুত্র কুরু যুদ্ধং ময়া সহ
55.57
ইতি পার্থং প্রশস্যাথ প্রগৃহ্যান্যন্মহদ্ধনুঃ
মুমোচ সমরে বীরঃ শরান্পার্থরথং প্রতি
55.58
অদর্শয়দ্বাসুদেবো হয়য়ানে পরং বলম্
মোঘান্কুর্বঞ্শরাংস্তস্য মণ্ডলান্যচরল্লঘু
55.59
তথাপি ভীষ্মঃ সুদৃঢং বাসুদেবধনংজয়ৌ
বিব্যাধ নিশিতৈর্বাণৈঃ সর্বগাত্রেষু মারিষ
55.60
শুশুভাতে নরব্যাঘ্রৌ তৌ ভীষ্মশরবিক্ষতৌ
গোবৃষাবিব নর্দন্তৌ বিষাণোল্লিখিতাঙ্কিতৌ
55.61
পুনশ্চাপি সুসংক্রুদ্ধঃ শরৈঃ সংনতপর্বভিঃ
কৃষ্ণয়োর্যুধি সংরব্ধো ভীষ্মো ব্যাবারয়দ্দিশঃ
55.62
বার্ষ্ণেয়ং চ শরৈস্তীক্ষ্ণৈঃ কম্পয়ামাস রোষিতঃ
মুহুরভ্যুত্স্ময়ন্ভীষ্মঃ প্রহস্য স্বনবত্তদা
55.63
ততঃ কৃষ্ণস্তু সমরে দৃষ্ট্বা ভীষ্মপরাক্রমম্
সংপ্রেক্ষ্য চ মহাবাহুঃ পার্থস্য মৃদুয়ুদ্ধতাম্
55.64
ভীষ্মং চ শরবর্ষাণি সৃজন্তমনিশং যুধি
প্রতপন্তমিবাদিত্যং মধ্যমাসাদ্য সেনয়োঃ
55.65
বরান্বরান্বিনিঘ্নন্তং পাণ্ডুপুত্রস্য সৈনিকান্
যুগান্তমিব কুর্বাণং ভীষ্মং যৌধিষ্ঠিরে বলে
55.66
অমৃষ্যমাণো ভগবান্কেশবঃ পরবীরহা
অচিন্তয়দমেয়াত্মা নাস্তি যৌধিষ্ঠিরং বলম্
55.67
একাহ্না হি রণে ভীষ্মো নাশয়েদ্দেবদানবান্
কিমু পাণ্ডুসুতান্যুদ্ধে সবলান্সপদানুগান্
55.68
দ্রবতে চ মহত্সৈন্যং পাণ্ডবস্য মহাত্মনঃ
এতে চ কৌরবাস্তূর্ণং প্রভগ্নান্দৃশ্য সোমকান্
আদ্রবন্তি রণে হৃষ্টা হর্ষয়ন্তঃ পিতামহম্
55.69
সোঽহং ভীষ্মং নিহন্ম্যদ্য পাণ্ডবার্থায় দংশিতঃ
ভারমেতং বিনেষ্যামি পাণ্ডবানাং মহাত্মনাম্
55.70
অর্জুনোঽপি শরৈস্তীক্ষ্ণৈর্বধ্যমানো হি সংয়ুগে
কর্তব্যং নাভিজানাতি রণে ভীষ্মস্য গৌরবাৎ
55.71
তথা চিন্তয়তস্তস্য ভূয় এব পিতামহঃ
প্রেষয়ামাস সংক্রুদ্ধঃ শরান্পার্থরথং প্রতি
55.72
তেষাং বহুত্বাদ্ধি ভৃশং শরাণাং; দিশোঽথ সর্বাঃ পিহিতা বভূবুঃ
ন চান্তরিক্ষং ন দিশো ন ভূমি;র্ন ভাস্করোঽদৃশ্যত রশ্মিমালী
ববুশ্চ বাতাস্তুমুলাঃ সধূমা; দিশশ্চ সর্বাঃ ক্ষুভিতা বভূবুঃ
55.73
দ্রোণো বিকর্ণোঽথ জয়দ্রথশ্চ; ভূরিশ্রবাঃ কৃতবর্মা কৃপশ্চ
শ্রুতায়ুরম্বষ্ঠপতিশ্চ রাজা; বিন্দানুবিন্দৌ চ সুদক্ষিণশ্চ
55.74
প্রাচ্যাশ্চ সৌবীরগণাশ্চ সর্বে; বসাতয়ঃ ক্ষুদ্রকমালবাশ্চ
কিরীটিনং ত্বরমাণাভিসস্রু;র্নিদেশগাঃ শাংতনবস্য রাজ্ঞঃ
55.75
তং বাজিপাদাতরথৌঘজালৈ;রনেকসাহস্রশতৈর্দদর্শ
কিরীটিনং সংপরিবার্যমাণং; শিনের্নপ্তা বারণয়ূথপৈশ্চ
55.76
ততস্তু দৃষ্ট্বার্জুনবাসুদেবৌ; পদাতিনাগাশ্বরথৈঃ সমন্তাৎ
অভিদ্রুতৌ শস্ত্রভৃতাং বরিষ্ঠৌ; শিনিপ্রবীরোঽভিসসার তূর্ণম্
55.77
স তান্যনীকানি মহাধনুষ্মা;ঞ্শিনিপ্রবীরঃ সহসাভিপত্য
চকার সাহায্যমথার্জুনস্য; বিষ্ণুর্যথা বৃত্রনিষূদনস্য
55.78
বিশীর্ণনাগাশ্বরথধ্বজৌঘং; ভীষ্মেণ বিত্রাসিতসর্বয়োধম্
যুধিষ্ঠিরানীকমভিদ্রবন্তং; প্রোবাচ সংদৃশ্য শিনিপ্রবীরঃ
55.79
ক্ব ক্ষত্রিয়া যাস্যথ নৈষ ধর্মঃ; সতাং পুরস্তাত্কথিতঃ পুরাণৈঃ
মা স্বাং প্রতিজ্ঞাং জহত প্রবীরাঃ; স্বং বীরধর্মং পরিপালয়ধ্বম্
55.80
তান্বাসবানন্তরজো নিশম্য; নরেন্দ্রমুখ্যান্দ্রবতঃ সমন্তাৎ
পার্থস্য দৃষ্ট্বা মৃদুয়ুদ্ধতাং চ; ভীষ্মং চ সংখ্যে সমুদীর্যমাণম্
55.81
অমৃষ্যমাণঃ স ততো মহাত্মা; যশস্বিনং সর্বদশার্হভর্তা
উবাচ শৈনেয়মভিপ্রশংস;ন্দৃষ্ট্বা কুরূনাপততঃ সমন্তাৎ
55.82
যে যান্তি যান্ত্বেব শিনিপ্রবীর; যেঽপি স্থিতাঃ সাত্বত তেঽপি যান্তু
ভীষ্মং রথাত্পশ্য নিপাত্যমানং; দ্রোণং চ সংখ্যে সগণং ময়াদ্য
55.83
নাসৌ রথঃ সাত্বত কৌরবাণাং; ক্রুদ্ধস্য মুচ্যেত রণেঽদ্য কশ্চিৎ
তস্মাদহং গৃহ্য রথাঙ্গমুগ্রং; প্রাণং হরিষ্যামি মহাব্রতস্য
55.84
নিহত্য ভীষ্মং সগণং তথাজৌ; দ্রোণং চ শৈনেয় রথপ্রবীরম্
প্রীতিং করিষ্যামি ধনংজয়স্য; রাজ্ঞশ্চ ভীমস্য তথাশ্বিনোশ্চ
55.85
নিহত্য সর্বান্ধৃতরাষ্ট্রপুত্রাং;স্তত্পক্ষিণো যে চ নরেন্দ্রমুখ্যাঃ
রাজ্যেন রাজানমজাতশত্রুং; সংপাদয়িষ্যাম্যহমদ্য হৃষ্টঃ
55.86
ততঃ সুনাভং বসুদেবপুত্রঃ; সূর্যপ্রভং বজ্রসমপ্রভাবম্
ক্ষুরান্তমুদ্যম্য ভুজেন চক্রং; রথাদবপ্লুত্য বিসৃজ্য বাহান্
55.87
সংকম্পয়ন্গাং চরণৈর্মহাত্মা; বেগেন কৃষ্ণঃ প্রসসার ভীষ্মম্
মদান্ধমাজৌ সমুদীর্ণদর্পঃ; সিংহো জিঘাংসন্নিব বারণেন্দ্রম্
55.88
সোঽভ্যদ্রবদ্ভীষ্মমনীকমধ্যে; ক্রুদ্ধো মহেন্দ্রাবরজঃ প্রমাথী
ব্যালম্বিপীতান্তপটশ্চকাশে; ঘনো যথা খেঽচিরভাপিনদ্ধঃ
55.89
সুদর্শনং চাস্য ররাজ শৌরে;স্তচ্চক্রপদ্মং সুভুজোরুনালম্
যথাদিপদ্মং তরুণার্কবর্ণং; ররাজ নারায়ণনাভিজাতম্
55.90
তত্কৃষ্ণকোপোদয়সূর্যবুদ্ধং; ক্ষুরান্ততীক্ষ্ণাগ্রসুজাতপত্রম্
তস্যৈব দেহোরুসরঃপ্ররূঢং; ররাজ নারায়ণবাহুনালম্
55.91
তমাত্তচক্রং প্রণদন্তমুচ্চৈঃ; ক্রুদ্ধং মহেন্দ্রাবরজং সমীক্ষ্য
সর্বাণি ভূতানি ভৃশং বিনেদুঃ; ক্ষয়ং কুরূণামিতি চিন্তয়িত্বা
55.92
স বাসুদেবঃ প্রগৃহীতচক্রঃ; সংবর্তয়িষ্যন্নিব জীবলোকম্
অভ্যুত্পতঁল্লোকগুরুর্বভাসে; ভূতানি ধক্ষ্যন্নিব কালবহ্নিঃ
55.93
তমাপতন্তং প্রগৃহীতচক্রং; সমীক্ষ্য দেবং দ্বিপদাং বরিষ্ঠম্
অসংভ্রমাত্কার্মুকবাণপাণী; রথে স্থিতঃ শাংতনবোঽভ্যুবাচ
55.94
এহ্যেহি দেবেশ জগন্নিবাস; নমোঽস্তু তে শার্ঙ্গরথাঙ্গপাণে
প্রসহ্য মাং পাতয় লোকনাথ; রথোত্তমাদ্ভূতশরণ্য সংখ্যে
55.95
ত্বয়া হতস্যেহ মমাদ্য কৃষ্ণ; শ্রেয়ঃ পরস্মিন্নিহ চৈব লোকে
সংভাবিতোঽস্ম্যন্ধকবৃষ্ণিনাথ; লোকৈস্ত্রিভির্বীর তবাভিয়ানাৎ
55.96
রথাদবপ্লুত্য ততস্ত্বরাবা;ন্পার্থোঽপ্যনুদ্রুত্য যদুপ্রবীরম্
জগ্রাহ পীনোত্তমলম্ববাহুং; বাহ্বোর্হরিং ব্যায়তপীনবাহুঃ
55.97
নিগৃহ্যমাণশ্চ তদাদিদেবো; ভৃশং সরোষঃ কিল নাম যোগী
আদায় বেগেন জগাম বিষ্ণু;র্জিষ্ণুং মহাবাত ইবৈকবৃক্ষম্
55.98
পার্থস্তু বিষ্টভ্য বলেন পাদৌ; ভীষ্মান্তিকং তূর্ণমভিদ্রবন্তম্
বলান্নিজগ্রাহ কিরীটমালী; পদেঽথ রাজন্দশমে কথংচিৎ
55.99
অবস্থিতং চ প্রণিপত্য কৃষ্ণং; প্রীতোঽর্জুনঃ কাঞ্চনচিত্রমালী
উবাচ কোপং প্রতিসংহরেতি; গতির্ভবান্কেশব পাণ্ডবানাম্
55.100
ন হাস্যতে কর্ম যথাপ্রতিজ্ঞং; পুত্রৈঃ শপে কেশব সোদরৈশ্চ
অন্তং করিষ্যামি যথা কুরূণাং; ত্বয়াহমিন্দ্রানুজ সংপ্রয়ুক্তঃ
55.101
ততঃ প্রতিজ্ঞাং সময়ং চ তস্মৈ; জনার্দনঃ প্রীতমনা নিশম্য
স্থিতঃ প্রিয়ে কৌরবসত্তমস্য; রথং সচক্রঃ পুনরারুরোহ
55.102
স তানভীষূন্পুনরাদদানঃ; প্রগৃহ্য শঙ্খং দ্বিষতাং নিহন্তা
বিনাদয়ামাস ততো দিশশ্চ; স পাঞ্চজন্যস্য রবেণ শৌরিঃ
55.103
ব্যাবিদ্ধনিষ্কাঙ্গদকুণ্ডলং তং; রজোবিকীর্ণাঞ্চিতপক্ষ্মনেত্রম্
বিশুদ্ধদংষ্ট্রং প্রগৃহীতশঙ্খং; বিচুক্রুশুঃ প্রেক্ষ্য কুরুপ্রবীরাঃ
55.104
মৃদঙ্গভেরীপটহপ্রণাদা; নেমিস্বনা দুন্দুভিনিস্বনাশ্চ
সসিংহনাদাশ্চ বভূবুরুগ্রাঃ; সর্বেষ্বনীকেষু ততঃ কুরূণাম্
55.105
গাণ্ডীবঘোষঃ স্তনয়িত্নুকল্পো; জগাম পার্থস্য নভো দিশশ্চ
জগ্মুশ্চ বাণা বিমলাঃ প্রসন্নাঃ; সর্বা দিশঃ পাণ্ডবচাপমুক্তাঃ
55.106
তং কৌরবাণামধিপো বলেন; ভীষ্মেণ ভূরিশ্রবসা চ সার্ধম্
অভ্যুদ্যয়াবুদ্যতবাণপাণিঃ; কক্ষং দিধক্ষন্নিব ধূমকেতুঃ
55.107
অথার্জুনায় প্রজহার ভল্লা;ন্ভূরিশ্রবাঃ সপ্ত সুবর্ণপুঙ্খান্
দুর্যোধনস্তোমরমুগ্রবেগং; শল্যো গদাং শাংতনবশ্চ শক্তিম্
55.108
স সপ্তভিঃ সপ্ত শরপ্রবেকা;ন্সংবার্য ভূরিশ্রবসা বিসৃষ্টান্
শিতেন দুর্যোধনবাহুমুক্তং; ক্ষুরেণ তত্তোমরমুন্মমাথ
55.109
ততঃ শুভামাপততীং স শক্তিং; বিদ্যুত্প্রভাং শাংতনবেন মুক্তাম্
গদাং চ মদ্রাধিপবাহুমুক্তাং; দ্বাভ্যাং শরাভ্যাং নিচকর্ত বীরঃ
55.110
ততো ভুজাভ্যাং বলবদ্বিকৃষ্য; চিত্রং ধনুর্গাণ্ডিবমপ্রমেয়ম্
মাহেন্দ্রমস্ত্রং বিধিবত্সুঘোরং; প্রাদুশ্চকারাদ্ভুতমন্তরিক্ষে
55.111
তেনোত্তমাস্ত্রেণ ততো মহাত্মা; সর্বাণ্যনীকানি মহাধনুষ্মান্
শরৌঘজালৈর্বিমলাগ্নিবর্ণৈ;র্নিবারয়ামাস কিরীটমালী
55.112
শিলীমুখাঃ পার্থধনুঃপ্রমুক্তা; রথান্ধ্বজাগ্রাণি ধনূংষি বাহূন্
নিকৃত্য দেহান্বিবিশুঃ পরেষাং; নরেন্দ্রনাগেন্দ্রতুরংগমাণাম্
55.113
ততো দিশশ্চানুদিশশ্চ পার্থঃ; শরৈঃ সুধারৈর্নিশিতৈর্বিতত্য
গাণ্ডীবশব্দেন মনাংসি তেষাং; কিরীটমালী ব্যথয়াং চকার
55.114
তস্মিংস্তথা ঘোরতমে প্রবৃত্তে; শঙ্খস্বনা দুন্দুভিনিস্বনাশ্চ
অন্তর্হিতা গাণ্ডিবনিস্বনেন; বভূবুরুগ্রাশ্চ রণপ্রণাদাঃ
55.115
গাণ্ডীবশব্দং তমথো বিদিত্বা; বিরাটরাজপ্রমুখা নৃবীরাঃ
পাঞ্চালরাজো দ্রুপদশ্চ বীর;স্তং দেশমাজগ্মুরদীনসত্ত্বাঃ
55.116
সর্বাণি সৈন্যানি তু তাবকানি; যতো যতো গাণ্ডিবজঃ প্রণাদঃ
ততস্ততঃ সংনতিমেব জগ্মু;র্ন তং প্রতীপোঽভিসসার কশ্চিৎ
55.117
তস্মিন্সুঘোরে নৃপসংপ্রহারে; হতাঃ প্রবীরাঃ সরথাঃ সসূতাঃ
গজাশ্চ নারাচনিপাততপ্তা; মহাপতাকাঃ শুভরুক্মকক্ষ্যাঃ
55.118
পরীতসত্ত্বাঃ সহসা নিপেতুঃ; কিরীটিনা ভিন্নতনুত্রকায়াঃ
দৃঢাহতাঃ পত্রিভিরুগ্রবেগৈঃ; পার্থেন ভল্লৈর্নিশিতৈঃ শিতাগ্রৈঃ
55.119
নিকৃত্তয়ন্ত্রা নিহতেন্দ্রকীলা; ধ্বজা মহান্তো ধ্বজিনীমুখেষু
পদাতিসংঘাশ্চ রথাশ্চ সংখ্যে; হয়াশ্চ নাগাশ্চ ধনংজয়েন
55.120
বাণাহতাস্তূর্ণমপেতসত্ত্বা; বিষ্টভ্য গাত্রাণি নিপেতুরুর্ব্যাম্
ঐন্দ্রেণ তেনাস্ত্রবরেণ রাজ;ন্মহাহবে ভিন্নতনুত্রদেহাঃ
55.121
ততঃ শরৌঘৈর্নিশিতৈঃ কিরীটিনা; নৃদেহশস্ত্রক্ষতলোহিতোদা
নদী সুঘোরা নরদেহফেনা; প্রবর্তিতা তত্র রণাজিরে বৈ
55.122
বেগেন সাতীব পৃথুপ্রবাহা; প্রসুস্রুতা ভৈরবারাবরূপা
পরেতনাগাশ্বশরীররোধা; নরান্ত্রমজ্জাভৃতমাংসপঙ্কা
55.123
প্রভূতরক্ষোগণভূতসেবিতা; শিরঃকপালাকুলকেশশাদ্বলা
শরীরসংঘাতসহস্রবাহিনী; বিশীর্ণনানাকবচোর্মিসংকুলা
55.124
নরাশ্বনাগাস্থিনিকৃত্তশর্করা; বিনাশপাতালবতী ভয়াবহা
তাং কঙ্কমালাবৃতগৃধ্রকহ্বৈঃ; ক্রব্যাদসংঘৈশ্চ তরক্ষুভিশ্চ
55.125
উপেতকূলাং দদৃশুঃ সমন্তা;ত্ক্রূরাং মহাবৈতরণীপ্রকাশাম্
প্রবর্তিতামর্জুনবাণসংঘৈ;র্মেদোবসাসৃক্প্রবহাং সুভীমাম্
55.126
তে চেদিপাঞ্চালকরূষমত্স্যাঃ; পার্থাশ্চ সর্বে সহিতাঃ প্রণেদুঃ
বিত্রাস্য সেনাং ধ্বজিনীপতীনাং; সিংহো মৃগাণামিব যূথসংঘান্
বিনেদতুস্তাবতিহর্ষয়ুক্তৌ; গাণ্ডীবধন্বা চ জনার্দনশ্চ
55.127
ততো রবিং সংহৃতরশ্মিজালং; দৃষ্ট্বা ভৃশং শস্ত্রপরিক্ষতাঙ্গাঃ
তদৈন্দ্রমস্ত্রং বিততং সুঘোর;মসহ্যমুদ্বীক্ষ্য যুগান্তকল্পম্
55.128
অথাপয়ানং কুরবঃ সভীষ্মাঃ; সদ্রোণদুর্যোধনবাহ্লিকাশ্চ
চক্রুর্নিশাং সংধিগতাং সমীক্ষ্য; বিভাবসোর্লোহিতরাজিয়ুক্তাম্
55.129
অবাপ্য কীর্তিং চ যশশ্চ লোকে; বিজিত্য শত্রূংশ্চ ধনংজয়োঽপি
যয়ৌ নরেন্দ্রৈঃ সহ সোদরৈশ্চ; সমাপ্তকর্মা শিবিরং নিশায়াম্
ততঃ প্রজজ্ঞে তুমুলঃ কুরূণাং; নিশামুখে ঘোরতরঃ প্রণাদঃ
55.130
রণে রথানাময়ুতং নিহত্য; হতা গজাঃ সপ্তশতার্জুনেন
প্রাচ্যাশ্চ সৌবীরগণাশ্চ সর্বে; নিপাতিতাঃ ক্ষুদ্রকমালবাশ্চ
মহত্কৃতং কর্ম ধনংজয়েন; কর্তুং যথা নার্হতি কশ্চিদন্যঃ
55.131
শ্রুতায়ুরম্বষ্ঠপতিশ্চ রাজা; তথৈব দুর্মর্ষণচিত্রসেনৌ
দ্রোণঃ কৃপঃ সৈন্ধববাহ্লিকৌ চ; ভূরিশ্রবাঃ শল্যশলৌ চ রাজন্
স্ববাহুবীর্যেণ জিতাঃ সভীষ্মাঃ; কিরীটিনা লোকমহারথেন
55.132
ইতি ব্রুবন্তঃ শিবিরাণি জগ্মুঃ; সর্বে গণা ভারত যে ত্বদীয়াঃ
উল্কাসহস্রৈশ্চ সুসংপ্রদীপ্তৈ;র্বিভ্রাজমানৈশ্চ তথা প্রদীপৈঃ
কিরীটিবিত্রাসিতসর্বয়োধা; চক্রে নিবেশং ধ্বজিনী কুরূণাম্