Utshovঅধ্যায় 54
54.1
সংজয় উবাচ
ততস্তে পার্থিবাঃ ক্রুদ্ধাঃ ফল্গুনং বীক্ষ্য সংয়ুগে
রথৈরনেকসাহস্রৈঃ সমন্তাত্পর্যবারয়ন্
54.2
অথৈনং রথবৃন্দেন কোষ্টকীকৃত্য ভারত
শরৈঃ সুবহুসাহস্রৈঃ সমন্তাদভ্যবারয়ন্
54.3
শক্তীশ্চ বিমলাস্তীক্ষ্ণা গদাশ্চ পরিঘৈঃ সহ
প্রাসান্পরশ্বধাংশ্চৈব মুদ্গরান্মুসলানপি
চিক্ষিপুঃ সমরে ক্রুদ্ধাঃ ফল্গুনস্য রথং প্রতি
54.4
শস্ত্রাণামথ তাং বৃষ্টিং শলভানামিবায়তিম্
রুরোধ সর্বতঃ পার্থঃ শরৈঃ কনকভূষণৈঃ
54.5
তত্র তল্লাঘবং দৃষ্ট্বা বীভত্সোরতিমানুষম্
দেবদানবগন্ধর্বাঃ পিশাচোরগরাক্ষসাঃ
সাধু সাধ্বিতি রাজেন্দ্র ফল্গুনং প্রত্যপূজয়ন্
54.6
সাত্যকিং চাভিমন্যুং চ মহত্যা সেনয়া সহ
গান্ধারাঃ সমরে শূরা রুরুধুঃ সহসৌবলাঃ
54.7
তত্র সৌবলকাঃ ক্রুদ্ধা বার্ষ্ণেয়স্য রথোত্তমম্
তিলশশ্চিচ্ছিদুঃ ক্রোধাচ্ছস্ত্রৈর্নানাবিধৈর্যুধি
54.8
সাত্যকিস্তু রথং ত্যক্ত্বা বর্তমানে মহাভয়ে
অভিমন্যো রথং তূর্ণমারুরোহ পরংতপঃ
54.9
তাবেকরথসংয়ুক্তৌ সৌবলেয়স্য বাহিনীম্
ব্যধমেতাং শিতৈস্তূর্ণং শরৈঃ সংনতপর্বভিঃ
54.10
দ্রোণভীষ্মৌ রণে যত্তৌ ধর্মরাজস্য বাহিনীম্
নাশয়েতাং শরৈস্তীক্ষ্ণৈঃ কঙ্কপত্রপরিচ্ছদৈঃ
54.11
ততো ধর্মসুতো রাজা মাদ্রীপুত্রৌ চ পাণ্ডবৌ
মিষতাং সর্বসৈন্যানাং দ্রোণানীকমুপাদ্রবন্
54.12
তত্রাসীত্সুমহদ্যুদ্ধং তুমুলং লোমহর্ষণম্
যথা দেবাসুরং যুদ্ধং পূর্বমাসীত্সুদারুণম্
54.13
কুর্বাণৌ তু মহত্কর্ম ভীমসেনঘটোত্কচৌ
দুর্যোধনস্ততোঽভ্যেত্য তাবুভাবভ্যবারয়ৎ
54.14
তত্রাদ্ভুতমপশ্যাম হৈডিম্বস্য পরাক্রমম্
অতীত্য পিতরং যুদ্ধে যদয়ুধ্যত ভারত
54.15
ভীমসেনস্তু সংক্রুদ্ধো দুর্যোধনমমর্ষণম্
হৃদ্যবিধ্যত্পৃষত্কেন প্রহসন্নিব পাণ্ডবঃ
54.16
ততো দুর্যোধনো রাজা প্রহারবরমোহিতঃ
নিষসাদ রথোপস্থে কশ্মলং চ জগাম হ
54.17
তং বিসংজ্ঞমথো জ্ঞাত্বা ত্বরমাণোঽস্য সারথিঃ
অপোবাহ রণাদ্রাজংস্ততঃ সৈন্যমভিদ্যত
54.18
ততস্তাং কৌরবীং সেনাং দ্রবমাণাং সমন্ততঃ
নিঘ্নন্ভীমঃ শরৈস্তীক্ষ্ণৈরনুবব্রাজ পৃষ্ঠতঃ
54.19
পার্ষতশ্চ রথশ্রেষ্ঠো ধর্মপুত্রশ্চ পাণ্ডবঃ
দ্রোণস্য পশ্যতঃ সৈন্যং গাঙ্গেয়স্য চ পশ্যতঃ
জঘ্নতুর্বিশিখৈস্তীক্ষ্ণৈঃ পরানীকবিশাতনৈঃ
54.20
দ্রবমাণং তু তত্সৈন্যং তব পুত্রস্য সংয়ুগে
নাশক্নুতাং বারয়িতুং ভীষ্মদ্রোণৌ মহারথৌ
54.21
বার্যমাণং হি ভীষ্মেণ দ্রোণেন চ বিশাং পতে
বিদ্রবত্যেব তত্সৈন্যং পশ্যতোর্দ্রোণভীষ্ময়োঃ
54.22
ততো রথসহস্রেষু বিদ্রবত্সু ততস্ততঃ
তাবাস্থিতাবেকরথং সৌভদ্রশিনিপুংগবৌ
সৌবলীং সমরে সেনাং শাতয়েতাং সমন্ততঃ
54.23
শুশুভাতে তদা তৌ তু শৈনেয়কুরুপুংগবৌ
অমাবাস্যাং গতৌ যদ্বত্সোমসূর্যৌ নভস্তলে
54.24
অর্জুনস্তু ততঃ ক্রুদ্ধস্তব সৈন্যং বিশাং পতে
ববর্ষ শরবর্ষেণ ধারাভিরিব তোয়দঃ
54.25
বধ্যমানং ততস্তত্তু শরৈঃ পার্থস্য সংয়ুগে
দুদ্রাব কৌরবং সৈন্যং বিষাদভয়কম্পিতম্
54.26
দ্রবতস্তান্সমালোক্য ভীষ্মদ্রোণৌ মহারথৌ
ন্যবারয়েতাং সংরব্ধৌ দুর্যোধনহিতৈষিণৌ
54.27
ততো দুর্যোধনো রাজা সমাশ্বস্য বিশাং পতে
ন্যবর্তয়ত তত্সৈন্যং দ্রবমাণং সমন্ততঃ
54.28
যত্র যত্র সুতং তুভ্যং যো যঃ পশ্যতি ভারত
তত্র তত্র ন্যবর্তন্ত ক্ষত্রিয়াণাং মহারথাঃ
54.29
তান্নিবৃত্তান্সমীক্ষ্যৈব ততোঽন্যেঽপীতরে জনাঃ
অন্যোন্যস্পর্ধয়া রাজঁল্লজ্জয়ান্যেঽবতস্থিরে
54.30
পুনরাবর্ততাং তেষাং বেগ আসীদ্বিশাং পতে
পূর্যতঃ সাগরস্যেব চন্দ্রস্যোদয়নং প্রতি
54.31
সংনিবৃত্তাংস্ততস্তাংস্তু দৃষ্ট্বা রাজা সুয়োধনঃ
অব্রবীত্ত্বরিতো গত্বা ভীষ্মং শাংতনবং বচঃ
54.32
পিতামহ নিবোধেদং যত্ত্বা বক্ষ্যামি ভারত
নানুরূপমহং মন্যে ত্বয়ি জীবতি কৌরব
54.33
দ্রোণে চাস্ত্রবিদাং শ্রেষ্ঠে সপুত্রে সসুহৃজ্জনে
কৃপে চৈব মহেষ্বাসে দ্রবতীয়ং বরূথিনী
54.34
ন পাণ্ডবাঃ প্রতিবলাস্তব রাজন্কথংচন
তথা দ্রোণস্য সংগ্রামে দ্রৌণেশ্চৈব কৃপস্য চ
54.35
অনুগ্রাহ্যাঃ পাণ্ডুসুতা নূনং তব পিতামহ
যথেমাং ক্ষমসে বীর বধ্যমানাং বরূথিনীম্
54.36
সোঽস্মি বাচ্যস্ত্বয়া রাজন্পূর্বমেব সমাগমে
ন যোত্স্যে পাণ্ডবান্সংখ্যে নাপি পার্ষতসাত্যকী
54.37
শ্রুত্বা তু বচনং তুভ্যমাচার্যস্য কৃপস্য চ
কর্ণেন সহিতঃ কৃত্যং চিন্তয়ানস্তদৈব হি
54.38
যদি নাহং পরিত্যাজ্যো যুবাভ্যামিহ সংয়ুগে
বিক্রমেণানুরূপেণ যুধ্যেতাং পুরুষর্ষভৌ
54.39
এতচ্ছ্রুত্বা বচো ভীষ্মঃ প্রহসন্বৈ মুহুর্মুহুঃ
অব্রবীত্তনয়ং তুভ্যং ক্রোধাদুদ্বৃত্য চক্ষুষী
54.40
বহুশো হি ময়া রাজংস্তথ্যমুক্তং হিতং বচঃ
অজেয়াঃ পাণ্ডবা যুদ্ধে দেবৈরপি সবাসবৈঃ
54.41
যত্তু শক্যং ময়া কর্তুং বৃদ্ধেনাদ্য নৃপোত্তম
করিষ্যামি যথাশক্তি প্রেক্ষেদানীং সবান্ধবঃ
54.42
অদ্য পাণ্ডুসুতান্সর্বান্সসৈন্যান্সহ বন্ধুভিঃ
মিষতো বারয়িষ্যামি সর্বলোকস্য পশ্যতঃ
54.43
এবমুক্তে তু ভীষ্মেণ পুত্রাস্তব জনেশ্বর
দধ্মুঃ শঙ্খান্মুদা যুক্তা ভেরীশ্চ জঘ্নিরে ভৃশম্
54.44
পাণ্ডবাপি ততো রাজঞ্শ্রুত্বা তং নিনদং মহৎ
দধ্মুঃ শঙ্খাংশ্চ ভেরীশ্চ মুরজাংশ্চ ব্যনাদয়ন্