Utshovঅধ্যায় 53
53.1
সংজয় উবাচ
ততো ব্যূঢেষ্বনীকেষু তাবকেষ্বিতরেষু চ
ধনংজয়ো রথানীকমবধীত্তব ভারত
শরৈরতিরথো যুদ্ধে পাতয়ন্রথয়ূথপান্
53.2
তে বধ্যমানাঃ পার্থেন কালেনেব যুগক্ষয়ে
ধার্তরাষ্ট্রা রণে যত্তাঃ পাণ্ডবান্প্রত্যয়োধয়ন্
প্রার্থয়ানা যশো দীপ্তং মৃত্যুং কৃত্বা নিবর্তনম্
53.3
একাগ্রমনসো ভূত্বা পাণ্ডবানাং বরূথিনীম্
বভঞ্জুর্বহুশো রাজংস্তে চাভজ্যন্ত সংয়ুগে
53.4
দ্রবদ্ভিরথ ভগ্নৈশ্চ পরিবর্তদ্ভিরেব চ
পাণ্ডবৈঃ কৌরবৈশ্চৈব ন প্রজ্ঞায়ত কিংচন
53.5
উদতিষ্ঠদ্রজো ভৌমং ছাদয়ানং দিবাকরম্
দিশঃ প্রতিদিশো বাপি তত্র জজ্ঞুঃ কথংচন
53.6
অনুমানেন সংজ্ঞাভির্নামগোত্রৈশ্চ সংয়ুগে
বর্ততে স্ম তদা যুদ্ধং তত্র তত্র বিশাং পতে
53.7
ন ব্যূহো ভিদ্যতে তত্র কৌরবাণাং কথংচন
রক্ষিতঃ সত্যসংধেন ভারদ্বাজেন ধীমতা
53.8
তথৈব পাণ্ডবেয়ানাং রক্ষিতঃ সব্যসাচিনা
নাভিদ্যত মহাব্যূহো ভীমেন চ সুরক্ষিতঃ
53.9
সেনাগ্রাদভিনিষ্পত্য প্রায়ুধ্যংস্তত্র মানবাঃ
উভয়োঃ সেনয়ো রাজন্ব্যতিষক্তরথদ্বিপাঃ
53.10
হয়ারোহৈর্হয়ারোহাঃ পাত্যন্তে স্ম মহাহবে
ঋষ্টিভির্বিমলাগ্রাভিঃ প্রাসৈরপি চ সংয়ুগে
53.11
রথী রথিনমাসাদ্য শরৈঃ কনকভূষণৈঃ
পাতয়ামাস সমরে তস্মিন্নতিভয়ংকরে
53.12
গজারোহা গজারোহান্নারাচশরতোমরৈঃ
সংসক্তাঃ পাতয়ামাসুস্তব তেষাং চ সংঘশঃ
53.13
পত্তিসংঘা রণে পত্তীন্ভিণ্ডিপালপরশ্বধৈঃ
ন্যপাতয়ন্ত সংহৃষ্টাঃ পরস্পরকৃতাগসঃ
53.14
পদাতী রথিনং সংখ্যে রথী চাপি পদাতিনম্
ন্যপাতয়চ্ছিতৈঃ শস্ত্রৈঃ সেনয়োরুভয়োরপি
53.15
গজারোহা হয়ারোহান্পাতয়াং চক্রিরে তদা
হয়ারোহা গজস্থাংশ্চ তদদ্ভুতমিবাভবৎ
53.16
গজারোহবরৈশ্চাপি তত্র তত্র পদাতয়ঃ
পাতিতাঃ সমদৃশ্যন্ত তৈশ্চাপি গজয়োধিনঃ
53.17
পত্তিসংঘা হয়ারোহৈঃ সাদিসংঘাশ্চ পত্তিভিঃ
পাত্যমানা ব্যদৃশ্যন্ত শতশোঽথ সহস্রশঃ
53.18
ধ্বজৈস্তত্রাপবিদ্ধৈশ্চ কার্মুকৈস্তোমরৈস্তথা
প্রাসৈস্তথা গদাভিশ্চ পরিঘৈঃ কম্পনৈস্তথা
53.19
শক্তিভিঃ কবচৈশ্চিত্রৈঃ কণপৈরঙ্কুশৈরপি
নিস্ত্রিংশৈর্বিমলৈশ্চাপি স্বর্ণপুঙ্খৈঃ শরৈস্তথা
53.20
পরিস্তোমৈঃ কুথাভিশ্চ কম্বলৈশ্চ মহাধনৈঃ
ভূর্ভাতি ভরতশ্রেষ্ঠ স্রগ্দামৈরিব চিত্রিতা
53.21
নরাশ্বকায়ৈঃ পতিতৈর্দন্তিভিশ্চ মহাহবে
অগম্যরূপা পৃথিবী মাংসশোণিতকর্দমা
53.22
প্রশশাম রজো ভৌমং ব্যুক্ষিতং রণশোণিতৈঃ
দিশশ্চ বিমলাঃ সর্বাঃ সংবভূবুর্জনেশ্বর
53.23
উত্থিতান্যগণেয়ানি কবন্ধানি সমন্ততঃ
চিহ্নভূতানি জগতো বিনাশার্থায় ভারত
53.24
তস্মিন্যুদ্ধে মহারৌদ্রে বর্তমানে সুদারুণে
প্রত্যদৃশ্যন্ত রথিনো ধাবমানাঃ সমন্ততঃ
53.25
ততো দ্রোণশ্চ ভীষ্মশ্চ সৈন্ধবশ্চ জয়দ্রথঃ
পুরুমিত্রো বিকর্ণশ্চ শকুনিশ্চাপি সৌবলঃ
53.26
এতে সমরদুর্ধর্ষাঃ সিংহতুল্যপরাক্রমাঃ
পাণ্ডবানামনীকানি বভঞ্জুঃ স্ম পুনঃ পুনঃ
53.27
তথৈব ভীমসেনোঽপি রাক্ষসশ্চ ঘটোত্কচঃ
সাত্যকিশ্চেকিতানশ্চ দ্রৌপদেয়াশ্চ ভারত
53.28
তাবকাংস্তব পুত্রাংশ্চ সহিতান্সর্বরাজভিঃ
দ্রাবয়ামাসুরাজৌ তে ত্রিদশা দানবানিব
53.29
তথা তে সমরেঽন্যোন্যং নিঘ্নন্তঃ ক্ষত্রিয়র্ষভাঃ
রক্তোক্ষিতা ঘোররূপা বিরেজুর্দানবা ইব
53.30
বিনির্জিত্য রিপূন্বীরাঃ সেনয়োরুভয়োরপি
ব্যদৃশ্যন্ত মহামাত্রা গ্রহা ইব নভস্তলে
53.31
ততো রথসহস্রেণ পুত্রো দুর্যোধনস্তব
অভ্যয়াত্পাণ্ডবান্যুদ্ধে রাক্ষসং চ ঘটোত্কচম্
53.32
তথৈব পাণ্ডবাঃ সর্বে মহত্যা সেনয়া সহ
দ্রোণভীষ্মৌ রণে শূরৌ প্রত্যুদ্যয়ুররিংদমৌ
53.33
কিরীটী তু যয়ৌ ক্রুদ্ধঃ সমর্থান্পার্থিবোত্তমান্
আর্জুনিঃ সাত্যকিশ্চৈব যয়তুঃ সৌবলং বলম্
53.34
ততঃ প্রববৃতে ভূয়ঃ সংগ্রামো লোমহর্ষণঃ
তাবকানাং পরেষাং চ সমরে বিজিগীষতাম্