অধ্যায় 52

52.1

সংজয় উবাচ
প্রভাতায়াং তু শর্বর্যাং ভীষ্মঃ শাংতনবস্ততঃ
অনীকান্যনুসংয়ানে ব্যাদিদেশাথ ভারত

গারুডং চ মহাব্যূহং চক্রে শাংতনবস্তদা
পুত্রাণাং তে জয়াকাঙ্ক্ষী ভীষ্মঃ কুরুপিতামহঃ

গরুডস্য স্বয়ং তুণ্ডে পিতা দেবব্রতস্তব
চক্ষুষী চ ভরদ্বাজঃ কৃতবর্মা চ সাত্বতঃ

অশ্বত্থামা কৃপশ্চৈব শীর্ষমাস্তাং যশস্বিনৌ
ত্রিগর্তৈর্মত্স্যকৈকেয়ৈর্বাটধানৈশ্চ সংয়ুতৌ

ভূরিশ্রবাঃ শলঃ শল্যো ভগদত্তশ্চ মারিষ
মদ্রকাঃ সিন্ধুসৌবীরাস্তথা পঞ্চনদাশ্চ যে

জয়দ্রথেন সহিতা গ্রীবায়াং সংনিবেশিতাঃ
পৃষ্ঠে দুর্যোধনো রাজা সোদরৈঃ সানুগৈর্বৃতঃ

বিন্দানুবিন্দাবাবন্ত্যৌ কাম্বোজশ্চ শকৈঃ সহ
পুচ্ছমাসন্মহারাজ শূরসেনাশ্চ সর্বশঃ

মাগধাশ্চ কলিঙ্গাশ্চ দাশেরকগণৈঃ সহ
দক্ষিণং পক্ষমাসাদ্য স্থিতা ব্যূহস্য দংশিতাঃ

কাননাশ্চ বিকুঞ্জাশ্চ মুক্তাঃ পুণ্ড্রাবিষস্তথা
বৃহদ্বলেন সহিতা বামং পক্ষমুপাশ্রিতাঃ

ব্যূঢং দৃষ্ট্বা তু তত্সৈন্যং সব্যসাচী পরংতপঃ
ধৃষ্টদ্যুম্নেন সহিতঃ প্রত্যব্যূহত সংয়ুগে
অর্ধচন্দ্রেণ ব্যূহেন ব্যূহং তমতিদারুণম্

দক্ষিণং শৃঙ্গমাস্থায় ভীমসেনো ব্যরোচত
নানাশস্ত্রৌঘসংপন্নৈর্নানাদেশ্যৈর্নৃপৈর্বৃতঃ

তদন্বেব বিরাটশ্চ দ্রুপদশ্চ মহারথঃ
তদনন্তরমেবাসীন্নীলো নীলায়ুধৈঃ সহ

নীলাদনন্তরং চৈব ধৃষ্টকেতুর্মহারথঃ
চেদিকাশিকরূষৈশ্চ পৌরবৈশ্চাভিসংবৃতঃ

ধৃষ্টদ্যুম্নঃ শিখণ্ডী চ পাঞ্চালাশ্চ প্রভদ্রকাঃ
মধ্যে সৈন্যস্য মহতঃ স্থিতা যুদ্ধায় ভারত

তথৈব ধর্মরাজোঽপি গজানীকেন সংবৃতঃ
ততস্তু সাত্যকী রাজন্দ্রৌপদ্যাঃ পঞ্চ চাত্মজাঃ

অভিমন্যুস্ততস্তূর্ণমিরাবাংশ্চ ততঃ পরম্
ভৈমসেনিস্ততো রাজন্কেকয়াশ্চ মহারথাঃ

ততোঽভূদ্দ্বিপদাং শ্রেষ্ঠো বামং পার্শ্বমুপাশ্রিতঃ
সর্বস্য জগতো গোপ্তা গোপ্তা যস্য জনার্দনঃ

এবমেতন্মহাব্যূহং প্রত্যব্যূহন্ত পাণ্ডবাঃ
বধার্থং তব পুত্রাণাং তত্পক্ষং যে চ সংগতাঃ

ততঃ প্রববৃতে যুদ্ধং ব্যতিষক্তরথদ্বিপম্
তাবকানাং পরেষাং চ নিঘ্নতামিতরেতরম্

হয়ৌঘাশ্চ রথৌঘাশ্চ তত্র তত্র বিশাং পতে
সংপতন্তঃ স্ম দৃশ্যন্তে নিঘ্নমানাঃ পরস্পরম্

ধাবতাং চ রথৌঘানাং নিঘ্নতাং চ পৃথক্পৃথক্
বভূব তুমুলঃ শব্দো বিমিশ্রো দুন্দুভিস্বনৈঃ

দিবস্পৃঙ্নরবীরাণাং নিঘ্নতামিতরেতরম্
সংপ্রহারে সুতুমুলে তব তেষাং চ ভারত