Utshovঅধ্যায় 51
51.1
সংজয় উবাচ
গতাপরাহ্ণভূয়িষ্ঠে তস্মিন্নহনি ভারত
রথনাগাশ্বপত্তীনাং সাদিনাং চ মহাক্ষয়ে
51.2
দ্রোণপুত্রেণ শল্যেন কৃপেণ চ মহাত্মনা
সমসজ্জত পাঞ্চাল্যস্ত্রিভিরেতৈর্মহারথৈঃ
51.3
স লোকবিদিতানশ্বান্নিজঘান মহাবলঃ
দ্রৌণেঃ পাঞ্চালদায়াদঃ শিতৈর্দশভিরাশুগৈঃ
51.4
ততঃ শল্যরথং তূর্ণমাস্থায় হতবাহনঃ
দ্রৌণিঃ পাঞ্চালদায়াদমভ্যবর্ষদথেষুভিঃ
51.5
ধৃষ্টদ্যুম্নং তু সংসক্তং দ্রৌণিনা দৃশ্য ভারত
সৌভদ্রোঽভ্যপতত্তূর্ণং বিকিরন্নিশিতাঞ্শরান্
51.6
স শল্যং পঞ্চবিংশত্যা কৃপং চ নবভিঃ শরৈঃ
অশ্বত্থামানমষ্টাভির্বিব্যাধ পুরুষর্ষভ
51.7
আর্জুনিং তু ততস্তূর্ণং দ্রৌণির্বিব্যাধ পত্রিণা
শল্যো দ্বাদশভিশ্চৈব কৃপশ্চ নিশিতৈস্ত্রিভিঃ
51.8
লক্ষ্মণস্তব পৌত্রস্তু তব পৌত্রমবস্থিতম্
অভ্যবর্তত সংহৃষ্টস্ততো যুদ্ধমবর্তত
51.9
দৌর্যোধনিস্তু সংক্রুদ্ধঃ সৌভদ্রং নবভিঃ শরৈঃ
বিব্যাধ সমরে রাজংস্তদদ্ভুতমিবাভবৎ
51.10
অভিমন্যুস্তু সংক্রুদ্ধো ভ্রাতরং ভরতর্ষভ
শরৈঃ পঞ্চাশতা রাজন্ক্ষিপ্রহস্তোঽভ্যবিধ্যত
51.11
লক্ষ্মণোঽপি ততস্তস্য ধনুশ্চিচ্ছেদ পত্রিণা
মুষ্টিদেশে মহারাজ তত উচ্চুক্রুশুর্জনাঃ
51.12
তদ্বিহায় ধনুশ্ছিন্নং সৌভদ্রঃ পরবীরহা
অন্যদাদত্তবাংশ্চিত্রং কার্মুকং বেগবত্তরম্
51.13
তৌ তত্র সমরে হৃষ্টৌ কৃতপ্রতিকৃতৈষিণৌ
অন্যোন্যং বিশিখৈস্তীক্ষ্ণৈর্জঘ্নতুঃ পুরুষর্ষভৌ
51.14
ততো দুর্যোধনো রাজা দৃষ্ট্বা পুত্রং মহারথম্
পীডিতং তব পৌত্রেণ প্রায়াত্তত্র জনেশ্বরঃ
51.15
সংনিবৃত্তে তব সুতে সর্ব এব জনাধিপাঃ
আর্জুনিং রথবংশেন সমন্তাত্পর্যবারয়ন্
51.16
স তৈঃ পরিবৃতঃ শূরৈঃ শূরো যুধি সুদুর্জয়ৈঃ
ন স্ম বিব্যথতে রাজন্কৃষ্ণতুল্যপরাক্রমঃ
51.17
সৌভদ্রমথ সংসক্তং তত্র দৃষ্ট্বা ধনংজয়ঃ
অভিদুদ্রাব সংক্রুদ্ধস্ত্রাতুকামঃ স্বমাত্মজম্
51.18
ততঃ সরথনাগাশ্বা ভীষ্মদ্রোণপুরোগমাঃ
অভ্যবর্তন্ত রাজানঃ সহিতাঃ সব্যসাচিনম্
51.19
উদ্ধূতং সহসা ভৌমং নাগাশ্বরথসাদিভিঃ
দিবাকরপথং প্রাপ্য রজস্তীব্রমদৃশ্যত
51.20
তানি নাগসহস্রাণি ভূমিপালশতানি চ
তস্য বাণপথং প্রাপ্য নাভ্যবর্তন্ত সর্বশঃ
51.21
প্রণেদুঃ সর্বভূতানি বভূবুস্তিমিরা দিশঃ
কুরূণামনয়স্তীব্রঃ সমদৃশ্যত দারুণঃ
51.22
নাপ্যন্তরিক্ষং ন দিশো ন ভূমির্ন চ ভাস্করঃ
প্রজজ্ঞে ভরতশ্রেষ্ঠ শরসংঘৈঃ কিরীটিনঃ
51.23
সাদিতধ্বজনাগাস্তু হতাশ্বা রথিনো ভৃশম্
বিপ্রদ্রুতরথাঃ কেচিদ্দৃশ্যন্তে রথয়ূথপাঃ
51.24
বিরথা রথিনশ্চান্যে ধাবমানাঃ সমন্ততঃ
তত্র তত্রৈব দৃশ্যন্তে সায়ুধাঃ সাঙ্গদৈর্ভুজৈঃ
51.25
হয়ারোহা হয়াংস্ত্যক্ত্বা গজারোহাশ্চ দন্তিনঃ
অর্জুনস্য ভয়াদ্রাজন্সমন্তাদ্বিপ্রদুদ্রুবুঃ
51.26
রথেভ্যশ্চ গজেভ্যশ্চ হয়েভ্যশ্চ নরাধিপাঃ
পতিতাঃ পাত্যমানাশ্চ দৃশ্যন্তেঽর্জুনতাডিতাঃ
51.27
সগদানুদ্যতান্বাহূন্সখড্গাংশ্চ বিশাং পতে
সপ্রাসাংশ্চ সতূণীরান্সশরান্সশরাসনান্
51.28
সাঙ্কুশান্সপতাকাংশ্চ তত্র তত্রার্জুনো নৃণাম্
নিচকর্ত শরৈরুগ্রৈ রৌদ্রং বিভ্রদ্বপুস্তদা
51.29
পরিঘাণাং প্রবৃদ্ধানাং মুদ্গরাণাং চ মারিষ
প্রাসানাং ভিণ্ডিপালানাং নিস্ত্রিংশানাং চ সংয়ুগে
51.30
পরশ্বধানাং তীক্ষ্ণানাং তোমরাণাং চ ভারত
বর্মণাং চাপবিদ্ধানাং কবচানাং চ ভূতলে
51.31
ধ্বজানাং চর্মণাং চৈব ব্যজনানাং চ সর্বশঃ
ছত্রাণাং হেমদণ্ডানাং চামরাণাং চ ভারত
51.32
প্রতোদানাং কশানাং চ যোক্ত্রাণাং চৈব মারিষ
রাশয়শ্চাত্র দৃশ্যন্তে বিনিকীর্ণা রণক্ষিতৌ
51.33
নাসীত্তত্র পুমান্কশ্চিত্তব সৈন্যস্য ভারত
যোঽর্জুনং সমরে শূরং প্রত্যুদ্যায়াত্কথংচন
51.34
যো যো হি সমরে পার্থং প্রত্যুদ্যাতি বিশাং পতে
স স বৈ বিশিখৈস্তীক্ষ্ণৈঃ পরলোকায় নীয়তে
51.35
তেষু বিদ্রবমাণেষু তব যোধেষু সর্বশঃ
অর্জুনো বাসুদেবশ্চ দধ্মতুর্বারিজোত্তমৌ
51.36
তত্প্রভগ্নং বলং দৃষ্ট্বা পিতা দেবব্রতস্তব
অব্রবীত্সমরে শূরং ভারদ্বাজং স্ময়ন্নিব
51.37
এষ পাণ্ডুসুতো বীরঃ কৃষ্ণেন সহিতো বলী
তথা করোতি সৈন্যানি যথা কুর্যাদ্ধনংজয়ঃ
51.38
ন হ্যেষ সমরে শক্যো জেতুমদ্য কথংচন
যথাস্য দৃশ্যতে রূপং কালান্তকয়মোপমম্
51.39
ন নিবর্তয়িতুং চাপি শক্যেয়ং মহতী চমূঃ
অন্যোন্যপ্রেক্ষয়া পশ্য দ্রবতীয়ং বরূথিনী
51.40
এষ চাস্তং গিরিশ্রেষ্ঠং ভানুমান্প্রতিপদ্যতে
বপূংষি সর্বলোকস্য সংহরন্নিব সর্বথা
51.41
তত্রাবহারং সংপ্রাপ্তং মন্যেঽহং পুরুষর্ষভ
শ্রান্তা ভীতাশ্চ নো যোধা ন যোত্স্যন্তি কথংচন
51.42
এবমুক্ত্বা ততো ভীষ্মো দ্রোণমাচার্যসত্তমম্
অবহারমথো চক্রে তাবকানাং মহারথঃ
51.43
ততোঽবহারঃ সৈন্যানাং তব তেষাং চ ভারত
অস্তং গচ্ছতি সূর্যেঽভূত্সংধ্যাকালে চ বর্ততি