Utshovঅধ্যায় 50
50.1
ধৃতরাষ্ট্র উবাচ
তথা প্রতিসমাদিষ্টঃ কলিঙ্গো বাহিনীপতিঃ
কথমদ্ভুতকর্মাণং ভীমসেনং মহাবলম্
50.2
চরন্তং গদয়া বীরং দণ্ডপাণিমিবান্তকম্
যোধয়ামাস সমরে কলিঙ্গঃ সহ সেনয়া
50.3
সংজয় উবাচ
পুত্রেণ তব রাজেন্দ্র স তথোক্তো মহাবলঃ
মহত্যা সেনয়া গুপ্তঃ প্রায়াদ্ভীমরথং প্রতি
50.4
তামাপতন্তীং সহসা কলিঙ্গানাং মহাচমূম্
রথনাগাশ্বকলিলাং প্রগৃহীতমহায়ুধাম্
50.5
ভীমসেনঃ কলিঙ্গানামার্ছদ্ভারত বাহিনীম্
কেতুমন্তং চ নৈষাদিমায়ান্তং সহ চেদিভিঃ
50.6
ততঃ শ্রুতায়ুঃ সংক্রুদ্ধো রাজ্ঞা কেতুমতা সহ
আসসাদ রণে ভীমং ব্যূঢানীকেষু চেদিষু
50.7
রথৈরনেকসাহস্রৈঃ কলিঙ্গানাং জনাধিপঃ
অয়ুতেন গজানাং চ নিষাদৈঃ সহ কেতুমান্
ভীমসেনং রণে রাজন্সমন্তাত্পর্যবারয়ৎ
50.8
চেদিমত্স্যকরূষাশ্চ ভীমসেনপুরোগমাঃ
অভ্যবর্তন্ত সহসা নিষাদান্সহ রাজভিঃ
50.9
ততঃ প্রববৃতে যুদ্ধং ঘোররূপং ভয়ানকম্
প্রজানন্ন চ যোধান্স্বান্পরস্পরজিঘাংসয়া
50.10
ঘোরমাসীত্ততো যুদ্ধং ভীমস্য সহসা পরৈঃ
যথেন্দ্রস্য মহারাজ মহত্যা দৈত্যসেনয়া
50.11
তস্য সৈন্যস্য সংগ্রামে যুধ্যমানস্য ভারত
বভূব সুমহাঞ্শব্দঃ সাগরস্যেব গর্জতঃ
50.12
অন্যোন্যস্য তদা যোধা নিকৃন্তন্তো বিশাং পতে
মহীং চক্রুশ্চিতাং সর্বাং শশশোণিতসংনিভাম্
50.13
যোধাংশ্চ স্বান্পরান্বাপি নাভ্যজানঞ্জিঘাংসয়া
স্বানপ্যাদদতে স্বাশ্চ শূরাঃ সমরদুর্জয়াঃ
50.14
বিমর্দঃ সুমহানাসীদল্পানাং বহুভিঃ সহ
কলিঙ্গৈঃ সহ চেদীনাং নিষাদৈশ্চ বিশাং পতে
50.15
কৃত্বা পুরুষকারং তু যথাশক্তি মহাবলাঃ
ভীমসেনং পরিত্যজ্য সংন্যবর্তন্ত চেদয়ঃ
50.16
সর্বৈঃ কলিঙ্গৈরাসন্নঃ সংনিবৃত্তেষু চেদিষু
স্ববাহুবলমাস্থায় ন ন্যবর্তত পাণ্ডবঃ
50.17
ন চচাল রথোপস্থাদ্ভীমসেনো মহাবলঃ
শিতৈরবাকিরন্বাণৈঃ কলিঙ্গানাং বরূথিনীম্
50.18
কলিঙ্গস্তু মহেষ্বাসঃ পুত্রশ্চাস্য মহারথঃ
শক্রদেব ইতি খ্যাতো জঘ্নতুঃ পাণ্ডবং শরৈঃ
50.19
ততো ভীমো মহাবাহুর্বিধুন্বন্রুচিরং ধনুঃ
যোধয়ামাস কালিঙ্গান্স্ববাহুবলমাশ্রিতঃ
50.20
শক্রদেবস্তু সমরে বিসৃজন্সায়কান্বহূন্
অশ্বাঞ্জঘান সমরে ভীমসেনস্য সায়কৈঃ
ববর্ষ শরবর্ষাণি তপান্তে জলদো যথা
50.21
হতাশ্বে তু রথে তিষ্ঠন্ভীমসেনো মহাবলঃ
শক্রদেবায় চিক্ষেপ সর্বশৈক্যায়সীং গদাম্
50.22
স তয়া নিহতো রাজন্কলিঙ্গস্য সুতো রথাৎ
সধ্বজঃ সহ সূতেন জগাম ধরণীতলম্
50.23
হতমাত্মসুতং দৃষ্ট্বা কলিঙ্গানাং জনাধিপঃ
রথৈরনেকসাহস্রৈর্ভীমস্যাবারয়দ্দিশঃ
50.24
ততো ভীমো মহাবাহুর্গুর্বীং ত্যক্ত্বা মহাগদাম্
উদ্ববর্হাথ নিস্ত্রিংশং চিকীর্ষুঃ কর্ম দারুণম্
50.25
চর্ম চাপ্রতিমং রাজন্নার্ষভং পুরুষর্ষভ
নক্ষত্রৈরর্ধচন্দ্রৈশ্চ শাতকুম্ভময়ৈশ্চিতম্
50.26
কলিঙ্গস্তু ততঃ ক্রুদ্ধো ধনুর্জ্যামবমৃজ্য হ
প্রগৃহ্য চ শরং ঘোরমেকং সর্পবিষোপমম্
প্রাহিণোদ্ভীমসেনায় বধাকাঙ্ক্ষী জনেশ্বরঃ
50.27
তমাপতন্তং বেগেন প্রেরিতং নিশিতং শরম্
ভীমসেনো দ্বিধা রাজংশ্চিচ্ছেদ বিপুলাসিনা
উদক্রোশচ্চ সংহৃষ্টস্ত্রাসয়ানো বরূথিনীম্
50.28
কলিঙ্গস্তু ততঃ ক্রুদ্ধো ভীমসেনায় সংয়ুগে
তোমরান্প্রাহিণোচ্ছীঘ্রং চতুর্দশ শিলাশিতান্
50.29
তানপ্রাপ্তান্মহাবাহুঃ খগতানেব পাণ্ডবঃ
চিচ্ছেদ সহসা রাজন্নসংভ্রান্তো বরাসিনা
50.30
নিকৃত্য তু রণে ভীমস্তোমরান্বৈ চতুর্দশ
ভানুমন্তমভিপ্রেক্ষ্য প্রাদ্রবত্পুরুষর্ষভঃ
50.31
ভানুমাংস্তু ততো ভীমং শরবর্ষেণ ছাদয়ন্
ননাদ বলবন্নাদং নাদয়ানো নভস্তলম্
50.32
ন তং স মমৃষে ভীমঃ সিংহনাদং মহারণে
ততঃ স্বরেণ মহতা বিননাদ মহাস্বনম্
50.33
তেন শব্দেন বিত্রস্তা কলিঙ্গানাং বরূথিনী
ন ভীমং সমরে মেনে মানুষং ভরতর্ষভ
50.34
ততো ভীমো মহারাজ নদিত্বা বিপুলং স্বনম্
সাসির্বেগাদবপ্লুত্য দন্তাভ্যাং বারণোত্তমম্
50.35
আরুরোহ ততো মধ্যং নাগরাজস্য মারিষ
খড্গেন পৃথুনা মধ্যে ভানুমন্তমথাচ্ছিনৎ
50.36
সোঽন্তরায়ুধিনং হত্বা রাজপুত্রমরিংদমঃ
গুরুভারসহস্কন্ধে নাগস্যাসিমপাতয়ৎ
50.37
ছিন্নস্কন্ধঃ স বিনদন্পপাত গজয়ূথপঃ
আরুগ্ণঃ সিন্ধুবেগেন সানুমানিব পর্বতঃ
50.38
ততস্তস্মাদবপ্লুত্য গজাদ্ভারত ভারতঃ
খড্গপাণিরদীনাত্মা অতিষ্ঠদ্ভুবি দংশিতঃ
50.39
স চচার বহূন্মার্গানভীতঃ পাতয়ন্গজান্
অগ্নিচক্রমিবাবিদ্ধং সর্বতঃ প্রত্যদৃশ্যত
50.40
অশ্ববৃন্দেষু নাগেষু রথানীকেষু চাভিভূঃ
পদাতীনাং চ সংঘেষু বিনিঘ্নঞ্শোণিতোক্ষিতঃ
শ্যেনবদ্ব্যচরদ্ভীমো রণে রিপুবলোত্কটঃ
50.41
ছিন্দংস্তেষাং শরীরাণি শিরাংসি চ মহাজবঃ
খড্গেন শিতধারেণ সংয়ুগে গজয়োধিনাম্
50.42
পদাতিরেকঃ সংক্রুদ্ধঃ শত্রূণাং ভয়বর্ধনঃ
মোহয়ামাস চ তদা কালান্তকয়মোপমঃ
50.43
মূঢাশ্চ তে তমেবাজৌ বিনদন্তঃ সমাদ্রবন্
সাসিমুত্তমবেগেন বিচরন্তং মহারণে
50.44
নিকৃত্য রথিনামাজৌ রথেষাশ্চ যুগানি চ
জঘান রথিনশ্চাপি বলবানরিমর্দনঃ
50.45
ভীমসেনশ্চরন্মার্গান্সুবহূন্প্রত্যদৃশ্যত
ভ্রান্তমুদ্ভ্রান্তমাবিদ্ধমাপ্লুতং প্রসৃতং সৃতম্
সংপাতং সমুদীর্যং চ দর্শয়ামাস পাণ্ডবঃ
50.46
কেচিদগ্রাসিনা ছিন্নাঃ পাণ্ডবেন মহাত্মনা
বিনেদুর্ভিন্নমর্মাণো নিপেতুশ্চ গতাসবঃ
50.47
ছিন্নদন্তাগ্রহস্তাশ্চ ভিন্নকুম্ভাস্তথাপরে
বিয়োধাঃ স্বান্যনীকানি জঘ্নুর্ভারত বারণাঃ
নিপেতুরুর্ব্যাং চ তথা বিনদন্তো মহারবান্
50.48
ছিন্নাংশ্চ তোমরাংশ্চাপান্মহামাত্রশিরাংসি চ
পরিস্তোমানি চিত্রাণি কক্ষ্যাশ্চ কনকোজ্জ্বলাঃ
50.49
গ্রৈবেয়াণ্যথ শক্তীশ্চ পতাকাঃ কণপাংস্তথা
তূণীরাণ্যথ যন্ত্রাণি বিচিত্রাণি ধনূংষি চ
50.50
অগ্নিকুণ্ডানি শুভ্রাণি তোত্ত্রাংশ্চৈবাঙ্কুশৈঃ সহ
ঘণ্টাশ্চ বিবিধা রাজন্হেমগর্ভাংস্ত্সরূনপি
পততঃ পতিতাংশ্চৈব পশ্যামঃ সহ সাদিভিঃ
50.51
ছিন্নগাত্রাবরকরৈর্নিহতৈশ্চাপি বারণৈঃ
আসীত্তস্মিন্সমাস্তীর্ণা পতিতৈর্ভূর্নগৈরিব
50.52
বিমৃদ্যৈবং মহানাগান্মমর্দাশ্বান্নরর্ষভঃ
অশ্বারোহবরাংশ্চাপি পাতয়ামাস ভারত
তদ্ঘোরমভবদ্যুদ্ধং তস্য তেষাং চ ভারত
50.53
খলীনান্যথ যোক্ত্রাণি কশাশ্চ কনকোজ্জ্বলাঃ
পরিস্তোমাশ্চ প্রাসাশ্চ ঋষ্টয়শ্চ মহাধনাঃ
50.54
কবচান্যথ চর্মাণি চিত্রাণ্যাস্তরণানি চ
তত্র তত্রাপবিদ্ধানি ব্যদৃশ্যন্ত মহাহবে
50.55
প্রোথয়ন্ত্রৈর্বিচিত্রৈশ্চ শস্ত্রৈশ্চ বিমলৈস্তথা
স চক্রে বসুধাং কীর্ণাং শবলৈঃ কুসুমৈরিব
50.56
আপ্লুত্য রথিনঃ কাংশ্চিত্পরামৃশ্য মহাবলঃ
পাতয়ামাস খড্গেন সধ্বজানপি পাণ্ডবঃ
50.57
মুহুরুত্পততো দিক্ষু ধাবতশ্চ যশস্বিনঃ
মার্গাংশ্চ চরতশ্চিত্রান্ব্যস্ময়ন্ত রণে জনাঃ
50.58
নিজঘান পদা কাংশ্চিদাক্ষিপ্যান্যানপোথয়ৎ
খড্গেনান্যাংশ্চ চিচ্ছেদ নাদেনান্যাংশ্চ ভীষয়ন্
50.59
ঊরুবেগেন চাপ্যন্যান্পাতয়ামাস ভূতলে
অপরে চৈনমালোক্য ভয়াত্পঞ্চত্বমাগতাঃ
50.60
এবং সা বহুলা সেনা কলিঙ্গানাং তরস্বিনাম্
পরিবার্য রণে ভীষ্মং ভীমসেনমুপাদ্রবৎ
50.61
ততঃ কলিঙ্গসৈন্যানাং প্রমুখে ভরতর্ষভ
শ্রুতায়ুষমভিপ্রেক্ষ্য ভীমসেনঃ সমভ্যয়াৎ
50.62
তমায়ান্তমভিপ্রেক্ষ্য কলিঙ্গো নবভিঃ শরৈঃ
ভীমসেনমমেয়াত্মা প্রত্যবিধ্যত্স্তনান্তরে
50.63
কলিঙ্গবাণাভিহতস্তোত্ত্রার্দিত ইব দ্বিপঃ
ভীমসেনঃ প্রজজ্বাল ক্রোধেনাগ্নিরিবেন্ধনৈঃ
50.64
অথাশোকঃ সমাদায় রথং হেমপরিষ্কৃতম্
ভীমং সংপাদয়ামাস রথেন রথসারথিঃ
50.65
তমারুহ্য রথং তূর্ণং কৌন্তেয়ঃ শত্রুসূদনঃ
কলিঙ্গমভিদুদ্রাব তিষ্ঠ তিষ্ঠেতি চাব্রবীৎ
50.66
ততঃ শ্রুতায়ুর্বলবান্ভীমায় নিশিতাঞ্শরান্
প্রেষয়ামাস সংক্রুদ্ধো দর্শয়ন্পাণিলাঘবম্
50.67
স কার্মুকবরোত্সৃষ্টৈর্নবভির্নিশিতৈঃ শরৈঃ
সমাহতো ভৃশং রাজন্কলিঙ্গেন মহায়শাঃ
সংচুক্রুধে ভৃশং ভীমো দণ্ডাহত ইবোরগঃ
50.68
ক্রুদ্ধশ্চ চাপমায়ম্য বলবদ্বলিনাং বরঃ
কলিঙ্গমবধীত্পার্থো ভীমঃ সপ্তভিরায়সৈঃ
50.69
ক্ষুরাভ্যাং চক্ররক্ষৌ চ কলিঙ্গস্য মহাবলৌ
সত্যদেবং চ সত্যং চ প্রাহিণোদ্যমসাদনম্
50.70
ততঃ পুনরমেয়াত্মা নারাচৈর্নিশিতৈস্ত্রিভিঃ
কেতুমন্তং রণে ভীমোঽগময়দ্যমসাদনম্
50.71
ততঃ কলিঙ্গাঃ সংক্রুদ্ধা ভীমসেনমমর্ষণম্
অনীকৈর্বহুসাহস্রৈঃ ক্ষত্রিয়াঃ সমবারয়ন্
50.72
ততঃ শক্তিগদাখড্গতোমরর্ষ্টিপরশ্বধৈঃ
কলিঙ্গাশ্চ ততো রাজন্ভীমসেনমবাকিরন্
50.73
সংনিবার্য স তাং ঘোরাং শরবৃষ্টিং সমুত্থিতাম্
গদামাদায় তরসা পরিপ্লুত্য মহাবলঃ
ভীমঃ সপ্তশতান্বীরাননয়দ্যমসাদনম্
50.74
পুনশ্চৈব দ্বিসাহস্রান্কলিঙ্গানরিমর্দনঃ
প্রাহিণোন্মৃত্যুলোকায় তদদ্ভুতমিবাভবৎ
50.75
এবং স তান্যনীকানি কলিঙ্গানাং পুনঃ পুনঃ
বিভেদ সমরে বীরঃ প্রেক্ষ্য ভীষ্মং মহাব্রতম্
50.76
হতারোহাশ্চ মাতঙ্গাঃ পাণ্ডবেন মহাত্মনা
বিপ্রজগ্মুরনীকেষু মেঘা বাতহতা ইব
মৃদ্নন্তঃ স্বান্যনীকানি বিনদন্তঃ শরাতুরাঃ
50.77
ততো ভীমো মহাবাহুঃ শঙ্খং প্রাধ্মাপয়দ্বলী
সর্বকালিঙ্গসৈন্যানাং মনাংসি সমকম্পয়ৎ
50.78
মোহশ্চাপি কলিঙ্গানামাবিবেশ পরংতপ
প্রাকম্পন্ত চ সৈন্যানি বাহনানি চ সর্বশঃ
50.79
ভীমেন সমরে রাজন্গজেন্দ্রেণেব সর্বতঃ
মার্গান্বহূন্বিচরতা ধাবতা চ ততস্ততঃ
মুহুরুত্পততা চৈব সংমোহঃ সমজায়ত
50.80
ভীমসেনভয়ত্রস্তং সৈন্যং চ সমকম্পত
ক্ষোভ্যমাণমসংবাধং গ্রাহেণেব মহত্সরঃ
50.81
ত্রাসিতেষু চ বীরেষু ভীমেনাদ্ভুতকর্মণা
পুনরাবর্তমানেষু বিদ্রবত্সু চ সংঘশঃ
50.82
সর্বকালিঙ্গয়োধেষু পাণ্ডূনাং ধ্বজিনীপতিঃ
অব্রবীত্স্বান্যনীকানি যুধ্যধ্বমিতি পার্ষতঃ
50.83
সেনাপতিবচঃ শ্রুত্বা শিখণ্ডিপ্রমুখা গণাঃ
ভীমমেবাভ্যবর্তন্ত রথানীকৈঃ প্রহারিভিঃ
50.84
ধর্মরাজশ্চ তান্সর্বানুপজগ্রাহ পাণ্ডবঃ
মহতা মেঘবর্ণেন নাগানীকেন পৃষ্ঠতঃ
50.85
এবং সংচোদ্য সর্বাণি স্বান্যনীকানি পার্ষতঃ
ভীমসেনস্য জগ্রাহ পার্ষ্ণিং সত্পুরুষোচিতাম্
50.86
ন হি পাঞ্চালরাজস্য লোকে কশ্চন বিদ্যতে
ভীমসাত্যকয়োরন্যঃ প্রাণেভ্যঃ প্রিয়কৃত্তমঃ
50.87
সোঽপশ্যত্তং কলিঙ্গেষু চরন্তমরিসূদনম্
ভীমসেনং মহাবাহুং পার্ষতঃ পরবীরহা
50.88
ননর্দ বহুধা রাজন্হৃষ্টশ্চাসীত্পরংতপঃ
শঙ্খং দধ্মৌ চ সমরে সিংহনাদং ননাদ চ
50.89
স চ পারাবতাশ্বস্য রথে হেমপরিষ্কৃতে
কোবিদারধ্বজং দৃষ্ট্বা ভীমসেনঃ সমাশ্বসৎ
50.90
ধৃষ্টদ্যুম্নস্তু তং দৃষ্ট্বা কলিঙ্গৈঃ সমভিদ্রুতম্
ভীমসেনমমেয়াত্মা ত্রাণায়াজৌ সমভ্যয়াৎ
50.91
তৌ দূরাত্সাত্যকির্দৃষ্ট্বা ধৃষ্টদ্যুম্নবৃকোদরৌ
কলিঙ্গান্সমরে বীরৌ যোধয়ন্তৌ মনস্বিনৌ
50.92
স তত্র গত্বা শৈনেয়ো জবেন জয়তাং বরঃ
পার্থপার্ষতয়োঃ পার্ষ্ণিং জগ্রাহ পুরুষর্ষভঃ
50.93
স কৃত্বা কদনং তত্র প্রগৃহীতশরাসনঃ
আস্থিতো রৌদ্রমাত্মানং জঘান সমরে পরান্
50.94
কলিঙ্গপ্রভবাং চৈব মাংসশোণিতকর্দমাম্
রুধিরস্যন্দিনীং তত্র ভীমঃ প্রাবর্তয়ন্নদীম্
50.95
অন্তরেণ কলিঙ্গানাং পাণ্ডবানাং চ বাহিনীম্
সংততার সুদুস্তারাং ভীমসেনো মহাবলঃ
50.96
ভীমসেনং তথা দৃষ্ট্বা প্রাক্রোশংস্তাবকা নৃপ
কালোঽয়ং ভীমরূপেণ কলিঙ্গৈঃ সহ যুধ্যতে
50.97
ততঃ শাংতনবো ভীষ্মঃ শ্রুত্বা তং নিনদং রণে
অভ্যয়াত্ত্বরিতো ভীমং ব্যূঢানীকঃ সমন্ততঃ
50.98
তং সাত্যকির্ভীমসেনো ধৃষ্টদ্যুম্নশ্চ পার্ষতঃ
অভ্যদ্রবন্ত ভীষ্মস্য রথং হেমপরিষ্কৃতম্
50.99
পরিবার্য চ তে সর্বে গাঙ্গেয়ং রভসং রণে
ত্রিভিস্ত্রিভিঃ শরৈর্ঘোরৈর্ভীষ্মমানর্ছুরঞ্জসা
50.100
প্রত্যবিধ্যত তান্সর্বান্পিতা দেবব্রতস্তব
যতমানান্মহেষ্বাসাংস্ত্রিভিস্ত্রিভিরজিহ্মগৈঃ
50.101
ততঃ শরসহস্রেণ সংনিবার্য মহারথান্
হয়ান্কাঞ্চনসংনাহান্ভীমস্য ন্যহনচ্ছরৈঃ
50.102
হতাশ্বে তু রথে তিষ্ঠন্ভীমসেনঃ প্রতাপবান্
শক্তিং চিক্ষেপ তরসা গাঙ্গেয়স্য রথং প্রতি
50.103
অপ্রাপ্তামেব তাং শক্তিং পিতা দেবব্রতস্তব
ত্রিধা চিচ্ছেদ সমরে সা পৃথিব্যামশীর্যত
50.104
ততঃ শৈক্যায়সীং গুর্বীং প্রগৃহ্য বলবদ্গদাম্
ভীমসেনো রথাত্তূর্ণং পুপ্লুবে মনুজর্ষভ
50.105
সাত্যকোঽপি ততস্তূর্ণং ভীমস্য প্রিয়কাম্যয়া
সারথিং কুরুবৃদ্ধস্য পাতয়ামাস সায়কৈঃ
50.106
ভীষ্মস্তু নিহতে তস্মিন্সারথৌ রথিনাং বরঃ
বাতায়মানৈস্তৈরশ্বৈরপনীতো রণাজিরাৎ
50.107
ভীমসেনস্ততো রাজন্নপনীতে মহাব্রতে
প্রজজ্বাল যথা বহ্নির্দহন্কক্ষমিবৈধিতঃ
50.108
স হত্বা সর্বকালিঙ্গান্সেনামধ্যে ব্যতিষ্ঠত
নৈনমভ্যুত্সহন্কেচিত্তাবকা ভরতর্ষভ
50.109
ধৃষ্টদ্যুম্নস্তমারোপ্য স্বরথে রথিনাং বরঃ
পশ্যতাং সর্বসৈন্যানামপোবাহ যশস্বিনম্
50.110
সংপূজ্যমানঃ পাঞ্চাল্যৈর্মত্স্যৈশ্চ ভরতর্ষভ
ধৃষ্টদ্যুম্নং পরিষ্বজ্য সমেয়াদথ সাত্যকিম্
50.111
অথাব্রবীদ্ভীমসেনং সাত্যকিঃ সত্যবিক্রমঃ
প্রহর্ষয়ন্যদুব্যাঘ্রো ধৃষ্টদ্যুম্নস্য পশ্যতঃ
50.112
দিষ্ট্যা কলিঙ্গরাজশ্চ রাজপুত্রশ্চ কেতুমান্
শক্রদেবশ্চ কালিঙ্গঃ কলিঙ্গাশ্চ মৃধে হতাঃ
50.113
স্ববাহুবলবীর্যেণ নাগাশ্বরথসংকুলঃ
মহাব্যূহঃ কলিঙ্গানামেকেন মৃদিতস্ত্বয়া
50.114
এবমুক্ত্বা শিনের্নপ্তা দীর্ঘবাহুররিংদমঃ
রথাদ্রথমভিদ্রুত্য পর্যষ্বজত পাণ্ডবম্
50.115
ততঃ স্বরথমারুহ্য পুনরেব মহারথঃ
তাবকানবধীত্ক্রুদ্ধো ভীমস্য বলমাদধৎ