Utshovঅধ্যায় 49
49.1
ধৃতরাষ্ট্র উবাচ
কথং দ্রোণো মহেষ্বাসঃ পাঞ্চাল্যশ্চাপি পার্ষতঃ
রণে সমীয়তুর্যত্তৌ তন্মমাচক্ষ্ব সংজয়
49.2
দিষ্টমেব পরং মন্যে পৌরুষাদপি সংজয়
যত্র শাংতনবো ভীষ্মো নাতরদ্যুধি পাণ্ডবম্
49.3
ভীষ্মো হি সমরে ক্রুদ্ধো হন্যাল্লোকাংশ্চরাচরান্
স কথং পাণ্ডবং যুদ্ধে নাতরত্সংজয়ৌজসা
49.4
সংজয় উবাচ
শৃণু রাজন্স্থিরো ভূত্বা যুদ্ধমেতত্সুদারুণম্
ন শক্যঃ পাণ্ডবো জেতুং দেবৈরপি সবাসবৈঃ
49.5
দ্রোণস্তু নিশিতৈর্বাণৈর্ধৃষ্টদ্যুম্নময়োধয়ৎ
সারথিং চাস্য ভল্লেন রথনীডাদপাতয়ৎ
49.6
তস্যাথ চতুরো বাহাংশ্চতুর্ভিঃ সায়কোত্তমৈঃ
পীডয়ামাস সংক্রুদ্ধো ধৃষ্টদ্যুম্নস্য মারিষ
49.7
ধৃষ্টদ্যুম্নস্ততো দ্রোণং নবত্যা নিশিতৈঃ শরৈঃ
বিব্যাধ প্রহসন্বীরস্তিষ্ঠ তিষ্ঠেতি চাব্রবীৎ
49.8
ততঃ পুনরমেয়াত্মা ভারদ্বাজঃ প্রতাপবান্
শরৈঃ প্রচ্ছাদয়ামাস ধৃষ্টদ্যুম্নমমর্ষণম্
49.9
আদদে চ শরং ঘোরং পার্ষতস্য বধং প্রতি
শক্রাশনিসমস্পর্শং মৃত্যুদণ্ডমিবাপরম্
49.10
হাহাকারো মহানাসীত্সর্বসৈন্যস্য ভারত
তমিষুং সংধিতং দৃষ্ট্বা ভারদ্বাজেন সংয়ুগে
49.11
তত্রাদ্ভুতমপশ্যাম ধৃষ্টদ্যুম্নস্য পৌরুষম্
যদেকঃ সমরে বীরস্তস্থৌ গিরিরিবাচলঃ
49.12
তং চ দীপ্তং শরং ঘোরমায়ান্তং মৃত্যুমাত্মনঃ
চিচ্ছেদ শরবৃষ্টিং চ ভারদ্বাজে মুমোচ হ
49.13
তত উচ্চুক্রুশুঃ সর্বে পাঞ্চালাঃ পাণ্ডবৈঃ সহ
ধৃষ্টদ্যুম্নেন তত্কর্ম কৃতং দৃষ্ট্বা সুদুষ্করম্
49.14
ততঃ শক্তিং মহাবেগাং স্বর্ণবৈডূর্যভূষিতাম্
দ্রোণস্য নিধনাকাঙ্ক্ষী চিক্ষেপ স পরাক্রমী
49.15
তামাপতন্তীং সহসা শক্তিং কনকভূষণাম্
ত্রিধা চিক্ষেপ সমরে ভারদ্বাজো হসন্নিব
49.16
শক্তিং বিনিহতাং দৃষ্ট্বা ধৃষ্টদ্যুম্নঃ প্রতাপবান্
ববর্ষ শরবর্ষাণি দ্রোণং প্রতি জনেশ্বর
49.17
শরবর্ষং ততস্তং তু সংনিবার্য মহায়শাঃ
দ্রোণো দ্রুপদপুত্রস্য মধ্যে চিচ্ছেদ কার্মুকম্
49.18
স চ্ছিন্নধন্বা সমরে গদাং গুর্বীং মহায়শাঃ
দ্রোণায় প্রেষয়ামাস গিরিসারময়ীং বলী
49.19
সা গদা বেগবন্মুক্তা প্রায়াদ্দ্রোণজিঘাংসয়া
তত্রাদ্ভুতমপশ্যাম ভারদ্বাজস্য বিক্রমম্
49.20
লাঘবাদ্ব্যংসয়ামাস গদাং হেমবিভূষিতাম্
ব্যংসয়িত্বা গদাং তাং চ প্রেষয়ামাস পার্ষতে
49.21
ভল্লান্সুনিশিতান্পীতান্স্বর্ণপুঙ্খাঞ্শিলাশিতান্
তে তস্য কবচং ভিত্ত্বা পপুঃ শোণিতমাহবে
49.22
অথান্যদ্ধনুরাদায় ধৃষ্টদ্যুম্নো মহামনাঃ
দ্রোণং যুধি পরাক্রম্য শরৈর্বিব্যাধ পঞ্চভিঃ
49.23
রুধিরাক্তৌ ততস্তৌ তু শুশুভাতে নরর্ষভৌ
বসন্তসময়ে রাজন্পুষ্পিতাবিব কিংশুকৌ
49.24
অমর্ষিতস্ততো রাজন্পরাক্রম্য চমূমুখে
দ্রোণো দ্রুপদপুত্রস্য পুনশ্চিচ্ছেদ কার্মুকম্
49.25
অথৈনং ছিন্নধন্বানং শরৈঃ সংনতপর্বভিঃ
অবাকিরদমেয়াত্মা বৃষ্ট্যা মেঘ ইবাচলম্
49.26
সারথিং চাস্য ভল্লেন রথনীডাদপাতয়ৎ
অথাস্য চতুরো বাহাংশ্চতুর্ভির্নিশিতৈঃ শরৈঃ
49.27
পাতয়ামাস সমরে সিংহনাদং ননাদ চ
ততোঽপরেণ ভল্লেন হস্তাচ্চাপমথাচ্ছিনৎ
49.28
স চ্ছিন্নধন্বা বিরথো হতাশ্বো হতসারথিঃ
গদাপাণিরবারোহত্খ্যাপয়ন্পৌরুষং মহৎ
49.29
তামস্য বিশিখৈস্তূর্ণং পাতয়ামাস ভারত
রথাদনবরূঢস্য তদদ্ভুতমিবাভবৎ
49.30
ততঃ স বিপুলং চর্ম শতচন্দ্রং চ ভানুমৎ
খড্গং চ বিপুলং দিব্যং প্রগৃহ্য সুভুজো বলী
49.31
অভিদুদ্রাব বেগেন দ্রোণস্য বধকাঙ্ক্ষয়া
আমিষার্থী যথা সিংহো বনে মত্তমিব দ্বিপম্
49.32
তত্রাদ্ভুতমপশ্যাম ভারদ্বাজস্য পৌরুষম্
লাঘবং চাস্ত্রয়োগং চ বলং বাহ্বোশ্চ ভারত
49.33
যদেনং শরবর্ষেণ বারয়ামাস পার্ষতম্
ন শশাক ততো গন্তুং বলবানপি সংয়ুগে
49.34
তত্র স্থিতমপশ্যাম ধৃষ্টদ্যুম্নং মহারথম্
বারয়াণং শরৌঘাংশ্চ চর্মণা কৃতহস্তবৎ
49.35
ততো ভীমো মহাবাহুঃ সহসাভ্যপতদ্বলী
সাহায্যকারী সমরে পার্ষতস্য মহাত্মনঃ
49.36
স দ্রোণং নিশিতৈর্বাণৈ রাজন্বিব্যাধ সপ্তভিঃ
পার্ষতং চ তদা তূর্ণমন্যমারোপয়দ্রথম্
49.37
ততো দুর্যোধনো রাজা কলিঙ্গং সমচোদয়ৎ
সৈন্যেন মহতা যুক্তং ভারদ্বাজস্য রক্ষণে
49.38
ততঃ সা মহতী সেনা কলিঙ্গানাং জনেশ্বর
ভীমমভ্যুদ্যয়ৌ তূর্ণং তব পুত্রস্য শাসনাৎ
49.39
পাঞ্চাল্যমভিসংত্যজ্য দ্রোণোঽপি রথিনাং বরঃ
বিরাটদ্রুপদৌ বৃদ্ধৌ যোধয়ামাস সংগতৌ
ধৃষ্টদ্যুম্নোঽপি সমরে ধর্মরাজং সমভ্যয়াৎ
49.40
ততঃ প্রববৃতে যুদ্ধং তুমুলং লোমহর্ষণম্
কলিঙ্গানাং চ সমরে ভীমস্য চ মহাত্মনঃ
জগতঃ প্রক্ষয়করং ঘোররূপং ভয়ানকম্