Utshovঅধ্যায় 48
48.1
ধৃতরাষ্ট্র উবাচ
এবং ব্যূঢেষ্বনীকেষু মামকেষ্বিতরেষু চ
কথং প্রহরতাং শ্রেষ্ঠাঃ সংপ্রহারং প্রচক্রিরে
48.2
সংজয় উবাচ
সমং ব্যূঢেষ্বনীকেষু সংনদ্ধা রুচিরধ্বজাঃ
অপারমিব সংদৃশ্য সাগরপ্রতিমং বলম্
48.3
তেষাং মধ্যে স্থিতো রাজা পুত্রো দুর্যোধনস্তব
অব্রবীত্তাবকান্সর্বান্যুধ্যধ্বমিতি দংশিতাঃ
48.4
তে মনঃ ক্রূরমাস্থায় সমভিত্যক্তজীবিতাঃ
পাণ্ডবানভ্যবর্তন্ত সর্ব এবোচ্ছ্রিতধ্বজাঃ
48.5
ততো যুদ্ধং সমভবত্তুমুলং লোমহর্ষণম্
তাবকানাং পরেষাং চ ব্যতিষক্তরথদ্বিপম্
48.6
মুক্তাস্তু রথিভির্বাণা রুক্মপুঙ্খাঃ সুতেজনাঃ
সংনিপেতুরকুণ্ঠাগ্রা নাগেষু চ হয়েষু চ
48.7
তথা প্রবৃত্তে সংগ্রামে ধনুরুদ্যম্য দংশিতঃ
অভিপত্য মহাবাহুর্ভীষ্মো ভীমপরাক্রমঃ
48.8
সৌভদ্রে ভীমসেনে চ শৈনেয়ে চ মহারথে
কেকয়ে চ বিরাটে চ ধৃষ্টদ্যুম্নে চ পার্ষতে
48.9
এতেষু নরবীরেষু চেদিমত্স্যেষু চাভিতঃ
ববর্ষ শরবর্ষাণি বৃদ্ধঃ কুরুপিতামহঃ
48.10
প্রাকম্পত মহাব্যূহস্তস্মিন্বীরসমাগমে
সর্বেষামেব সৈন্যানামাসীদ্ব্যতিকরো মহান্
48.11
সাদিতধ্বজনাগাশ্চ হতপ্রবরবাজিনঃ
বিপ্রয়াতরথানীকাঃ সমপদ্যন্ত পাণ্ডবাঃ
48.12
অর্জুনস্তু নরব্যাঘ্রো দৃষ্ট্বা ভীষ্মং মহারথম্
বার্ষ্ণেয়মব্রবীত্ক্রুদ্ধো যাহি যত্র পিতামহঃ
48.13
এষ ভীষ্মঃ সুসংক্রুদ্ধো বার্ষ্ণেয় মম বাহিনীম্
নাশয়িষ্যতি সুব্যক্তং দুর্যোধনহিতে রতঃ
48.14
এষ দ্রোণঃ কৃপঃ শল্যো বিকর্ণশ্চ জনার্দন
ধার্তরাষ্ট্রাশ্চ সহিতা দুর্যোধনপুরোগমাঃ
48.15
পাঞ্চালান্নিহনিষ্যন্তি রক্ষিতা দৃঢধন্বনা
সোঽহং ভীষ্মং গমিষ্যামি সৈন্যহেতোর্জনার্দন
48.16
তমব্রবীদ্বাসুদেবো যত্তো ভব ধনংজয়
এষ ত্বা প্রাপয়ে বীর পিতামহরথং প্রতি
48.17
এবমুক্ত্বা ততঃ শৌরী রথং তং লোকবিশ্রুতম্
প্রাপয়ামাস ভীষ্মায় রথং প্রতি জনেশ্বর
48.18
চঞ্চদ্বহুপতাকেন বলাকাবর্ণবাজিনা
সমুচ্ছ্রিতমহাভীমনদদ্বানরকেতুনা
মহতা মেঘনাদেন রথেনাদিত্যবর্চসা
48.19
বিনিঘ্নন্কৌরবানীকং শূরসেনাংশ্চ পাণ্ডবঃ
আয়াচ্ছরান্নুদঞ্শীঘ্রং সুহৃচ্ছোষবিনাশনঃ
48.20
তমাপতন্তং বেগেন প্রভিন্নমিব বারণম্
ত্রাসয়ানং রণে শূরান্পাতয়ন্তং চ সায়কৈঃ
48.21
সৈন্ধবপ্রমুখৈর্গুপ্তঃ প্রাচ্যসৌবীরকেকয়ৈঃ
সহসা প্রত্যুদীয়ায় ভীষ্মঃ শাংতনবোঽর্জুনম্
48.22
কো হি গাণ্ডীবধন্বানমন্যঃ কুরুপিতামহাৎ
দ্রোণবৈকর্তনাভ্যাং বা রথঃ সংয়াতুমর্হতি
48.23
ততো ভীষ্মো মহারাজ কৌরবাণাং পিতামহঃ
অর্জুনং সপ্তসপ্তত্যা নারাচানাং সমাবৃণোৎ
48.24
দ্রোণশ্চ পঞ্চবিংশত্যা কৃপঃ পঞ্চাশতা শরৈঃ
দুর্যোধনশ্চতুঃষষ্ট্যা শল্যশ্চ নবভিঃ শরৈঃ
48.25
সৈন্ধবো নবভিশ্চাপি শকুনিশ্চাপি পঞ্চভিঃ
বিকর্ণো দশভির্ভল্লৈ রাজন্বিব্যাধ পাণ্ডবম্
48.26
স তৈর্বিদ্ধো মহেষ্বাসঃ সমন্তান্নিশিতৈঃ শরৈঃ
ন বিব্যথে মহাবাহুর্ভিদ্যমান ইবাচলঃ
48.27
স ভীষ্মং পঞ্চবিংশত্যা কৃপং চ নবভিঃ শরৈঃ
দ্রোণং ষষ্ট্যা নরব্যাঘ্রো বিকর্ণং চ ত্রিভিঃ শরৈঃ
48.28
আর্তায়নিং ত্রিভির্বাণৈ রাজানং চাপি পঞ্চভিঃ
প্রত্যবিধ্যদমেয়াত্মা কিরীটী ভরতর্ষভ
48.29
তং সাত্যকির্বিরাটশ্চ ধৃষ্টদ্যুম্নশ্চ পার্ষতঃ
দ্রৌপদেয়াভিমন্যুশ্চ পরিবব্রুর্ধনংজয়ম্
48.30
ততো দ্রোণং মহেষ্বাসং গাঙ্গেয়স্য প্রিয়ে রতম্
অভ্যবর্ষত পাঞ্চাল্যঃ সংয়ুক্তঃ সহ সোমকৈঃ
48.31
ভীষ্মস্তু রথিনাং শ্রেষ্ঠস্তূর্ণং বিব্যাধ পাণ্ডবম্
অশীত্যা নিশিতৈর্বাণৈস্ততোঽক্রোশন্ত তাবকাঃ
48.32
তেষাং তু নিনদং শ্রুত্বা প্রহৃষ্টানাং প্রহৃষ্টবৎ
প্রবিবেশ ততো মধ্যং রথসিংহঃ প্রতাপবান্
48.33
তেষাং তু রথসিংহানাং মধ্যং প্রাপ্য ধনংজয়ঃ
চিক্রীড ধনুষা রাজঁল্লক্ষ্যং কৃত্বা মহারথান্
48.34
ততো দুর্যোধনো রাজা ভীষ্মমাহ জনেশ্বরঃ
পীড্যমানং স্বকং সৈন্যং দৃষ্ট্বা পার্থেন সংয়ুগে
48.35
এষ পাণ্ডুসুতস্তাত কৃষ্ণেন সহিতো বলী
যততাং সর্বসৈন্যানাং মূলং নঃ পরিকৃন্ততি
ত্বয়ি জীবতি গাঙ্গেয়ে দ্রোণে চ রথিনাং বরে
48.36
ত্বত্কৃতে হ্যেষ কর্ণোঽপি ন্যস্তশস্ত্রো মহারথঃ
ন যুধ্যতি রণে পার্থং হিতকামঃ সদা মম
48.37
স তথা কুরু গাঙ্গেয় যথা হন্যেত ফল্গুনঃ
এবমুক্তস্ততো রাজন্পিতা দেবব্রতস্তব
ধিক্ক্ষত্রধর্মমিত্যুক্ত্বা যয়ৌ পার্থরথং প্রতি
48.38
উভৌ শ্বেতহয়ৌ রাজন্সংসক্তৌ দৃশ্য পার্থিবাঃ
সিংহনাদান্ভৃশং চক্রুঃ শঙ্খশব্দাংশ্চ ভারত
48.39
দ্রৌণির্দুর্যোধনশ্চৈব বিকর্ণশ্চ তবাত্মজঃ
পরিবার্য রণে ভীষ্মং স্থিতা যুদ্ধায় মারিষ
48.40
তথৈব পাণ্ডবাঃ সর্বে পরিবার্য ধনংজয়ম্
স্থিতা যুদ্ধায় মহতে ততো যুদ্ধমবর্তত
48.41
গাঙ্গেয়স্তু রণে পার্থমানর্ছন্নবভিঃ শরৈঃ
তমর্জুনঃ প্রত্যবিধ্যদ্দশভির্মর্মবেধিভিঃ
48.42
ততঃ শরসহস্রেণ সুপ্রয়ুক্তেন পাণ্ডবঃ
অর্জুনঃ সমরশ্লাঘী ভীষ্মস্যাবারয়দ্দিশঃ
48.43
শরজালং ততস্তত্তু শরজালেন কৌরব
বারয়ামাস পার্থস্য ভীষ্মঃ শাংতনবস্তথা
48.44
উভৌ পরমসংহৃষ্টাবুভৌ যুদ্ধাভিনন্দিনৌ
নির্বিশেষময়ুধ্যেতাং কৃতপ্রতিকৃতৈষিণৌ
48.45
ভীষ্মচাপবিমুক্তানি শরজালানি সংঘশঃ
শীর্যমাণান্যদৃশ্যন্ত ভিন্নান্যর্জুনসায়কৈঃ
48.46
তথৈবার্জুনমুক্তানি শরজালানি ভাগশঃ
গাঙ্গেয়শরনুন্নানি ন্যপতন্ত মহীতলে
48.47
অর্জুনঃ পঞ্চবিংশত্যা ভীষ্মমার্চ্ছচ্ছিতৈঃ শরৈঃ
ভীষ্মোঽপি সমরে পার্থং বিব্যাধ ত্রিংশতা শরৈঃ
48.48
অন্যোন্যস্য হয়ান্বিদ্ধ্বা ধ্বজৌ চ সুমহাবলৌ
রথেষাং রথচক্রে চ চিক্রীডতুররিংদমৌ
48.49
ততঃ ক্রুদ্ধো মহারাজ ভীষ্মঃ প্রহরতাং বরঃ
বাসুদেবং ত্রিভির্বাণৈরাজঘান স্তনান্তরে
48.50
ভীষ্মচাপচ্যুতৈর্বাণৈর্নির্বিদ্ধো মধুসূদনঃ
বিররাজ রণে রাজন্সপুষ্প ইব কিংশুকঃ
48.51
ততোঽর্জুনো ভৃশং ক্রুদ্ধো নির্বিদ্ধং প্রেক্ষ্য মাধবম্
গাঙ্গেয়সারথিং সংখ্যে নির্বিভেদ ত্রিভিঃ শরৈঃ
48.52
যতমানৌ তু তৌ বীরাবন্যোন্যস্য বধং প্রতি
নাশক্নুতাং তদান্যোন্যমভিসংধাতুমাহবে
48.53
মণ্ডলানি বিচিত্রাণি গতপ্রত্যাগতানি চ
অদর্শয়েতাং বহুধা সূতসামর্থ্যলাঘবাৎ
48.54
অন্তরং চ প্রহারেষু তর্কয়ন্তৌ মহারথৌ
রাজন্নন্তরমার্গস্থৌ স্থিতাবাস্তাং মুহুর্মুহুঃ
48.55
উভৌ সিংহরবোন্মিশ্রং শঙ্খশব্দং প্রচক্রতুঃ
তথৈব চাপনির্ঘোষং চক্রতুস্তৌ মহারথৌ
48.56
তয়োঃ শঙ্খপ্রণাদেন রথনেমিস্বনেন চ
দারিতা সহসা ভূমিশ্চকম্প চ ননাদ চ
48.57
ন তয়োরন্তরং কশ্চিদ্দদৃশে ভরতর্ষভ
বলিনৌ সমরে শূরাবন্যোন্যসদৃশাবুভৌ
48.58
চিহ্নমাত্রেণ ভীষ্মং তু প্রজজ্ঞুস্তত্র কৌরবাঃ
তথা পাণ্ডুসুতাঃ পার্থং চিহ্নমাত্রেণ জজ্ঞিরে
48.59
তয়োর্নৃবরয়ো রাজন্দৃশ্য তাদৃক্পরাক্রমম্
বিস্ময়ং সর্বভূতানি জগ্মুর্ভারত সংয়ুগে
48.60
ন তয়োর্বিবরং কশ্চিদ্রণে পশ্যতি ভারত
ধর্মে স্থিতস্য হি যথা ন কশ্চিদ্বৃজিনং ক্বচিৎ
48.61
উভৌ হি শরজালেন তাবদৃশ্যৌ বভূবতুঃ
প্রকাশৌ চ পুনস্তূর্ণং বভূবতুরুভৌ রণে
48.62
তত্র দেবাঃ সগন্ধর্বাশ্চারণাশ্চ সহর্ষিভিঃ
অন্যোন্যং প্রত্যভাষন্ত তয়োর্দৃষ্ট্বা পরাক্রমম্
48.63
ন শক্যৌ যুধি সংরব্ধৌ জেতুমেতৌ মহারথৌ
সদেবাসুরগন্ধর্বৈর্লোকৈরপি কথংচন
48.64
আশ্চর্যভূতং লোকেষু যুদ্ধমেতন্মহাদ্ভুতম্
নৈতাদৃশানি যুদ্ধানি ভবিষ্যন্তি কথংচন
48.65
নাপি শক্যো রণে জেতুং ভীষ্মঃ পার্থেন ধীমতা
সধনুশ্চ রথস্থশ্চ প্রবপন্সায়কান্রণে
48.66
তথৈব পাণ্ডবং যুদ্ধে দেবৈরপি দুরাসদম্
ন বিজেতুং রণে ভীষ্ম উত্সহেত ধনুর্ধরম্
48.67
ইতি স্ম বাচঃ শ্রূয়ন্তে প্রোচ্চরন্ত্যস্ততস্ততঃ
গাঙ্গেয়ার্জুনয়োঃ সংখ্যে স্তবয়ুক্তা বিশাং পতে
48.68
ত্বদীয়াস্তু ততো যোধাঃ পাণ্ডবেয়াশ্চ ভারত
অন্যোন্যং সমরে জঘ্নুস্তয়োস্তত্র পরাক্রমে
48.69
শিতধারৈস্তথা খড্গৈর্বিমলৈশ্চ পরশ্বধৈঃ
শরৈরন্যৈশ্চ বহুভিঃ শস্ত্রৈর্নানাবিধৈর্যুধি
উভয়োঃ সেনয়োর্বীরা ন্যকৃন্তন্ত পরস্পরম্
48.70
বর্তমানে তথা ঘোরে তস্মিন্যুদ্ধে সুদারুণে
দ্রোণপাঞ্চাল্যয়ো রাজন্মহানাসীত্সমাগমঃ