Utshovঅধ্যায় 47
47.1
সংজয় উবাচ
ক্রৌঞ্চং ততো মহাব্যূহমভেদ্যং তনয়স্তব
ব্যূঢং দৃষ্ট্বা মহাঘোরং পার্থেনামিততেজসা
47.2
আচার্যমুপসংগম্য কৃপং শল্যং চ মারিষ
সৌমদত্তিং বিকর্ণং চ অশ্বত্থামানমেব চ
47.3
দুঃশাসনাদীন্ভ্রাতৄংশ্চ স সর্বানেব ভারত
অন্যাংশ্চ সুবহূঞ্শূরান্যুদ্ধায় সমুপাগতান্
47.4
প্রাহেদং বচনং কালে হর্ষয়ংস্তনয়স্তব
নানাশস্ত্রপ্রহরণাঃ সর্বে শস্ত্রাস্ত্রবেদিনঃ
47.5
একৈকশঃ সমর্থা হি যূয়ং সর্বে মহারথাঃ
পাণ্ডুপুত্রান্রণে হন্তুং সসৈন্যান্কিমু সংহতাঃ
47.6
অপর্যাপ্তং তদস্মাকং বলং ভীষ্মাভিরক্ষিতম্
পর্যাপ্তং ত্বিদমেতেষাং বলং পার্থিবসত্তমাঃ
47.7
সংস্থানাঃ শূরসেনাশ্চ বেণিকাঃ কুকুরাস্তথা
আরেবকাস্ত্রিগর্তাশ্চ মদ্রকা যবনাস্তথা
47.8
শত্রুংজয়েন সহিতাস্তথা দুঃশাসনেন চ
বিকর্ণেন চ বীরেণ তথা নন্দোপনন্দকৈঃ
47.9
চিত্রসেনেন সহিতাঃ সহিতাঃ পাণিভদ্রকৈঃ
ভীষ্মমেবাভিরক্ষন্তু সহ সৈন্যপুরস্কৃতাঃ
47.10
ততো দ্রোণশ্চ ভীষ্মশ্চ তব পুত্রশ্চ মারিষ
অব্যূহন্ত মহাব্যূহং পাণ্ডূনাং প্রতিবাধনে
47.11
ভীষ্মঃ সৈন্যেন মহতা সমন্তাত্পরিবারিতঃ
যয়ৌ প্রকর্ষন্মহতীং বাহিনীং সুররাডিব
47.12
তমন্বয়ান্মহেষ্বাসো ভারদ্বাজঃ প্রতাপবান্
কুন্তলৈশ্চ দশার্ণৈশ্চ মাগধৈশ্চ বিশাং পতে
47.13
বিদর্ভৈর্মেকলৈশ্চৈব কর্ণপ্রাবরণৈরপি
সহিতাঃ সর্বসৈন্যেন ভীষ্মমাহবশোভিনম্
47.14
গান্ধারাঃ সিন্ধুসৌবীরাঃ শিবয়োঽথ বসাতয়ঃ
শকুনিশ্চ স্বসৈন্যেন ভারদ্বাজমপালয়ৎ
47.15
ততো দুর্যোধনো রাজা সহিতঃ সর্বসোদরৈঃ
অশ্বাতকৈর্বিকর্ণৈশ্চ তথা শর্মিলকোসলৈঃ
47.16
দরদৈশ্চূচুপৈশ্চৈব তথা ক্ষুদ্রকমালবৈঃ
অভ্যরক্ষত সংহৃষ্টঃ সৌবলেয়স্য বাহিনীম্
47.17
ভূরিশ্রবাঃ শলঃ শল্যো ভগদত্তশ্চ মারিষ
বিন্দানুবিন্দাবাবন্ত্যৌ বামং পার্শ্বমপালয়ন্
47.18
সৌমদত্তিঃ সুশর্মা চ কাম্বোজশ্চ সুদক্ষিণঃ
শতায়ুশ্চ শ্রুতায়ুশ্চ দক্ষিণং পার্শ্বমাস্থিতাঃ
47.19
অশ্বত্থামা কৃপশ্চৈব কৃতবর্মা চ সাত্বতঃ
মহত্যা সেনয়া সার্ধং সেনাপৃষ্ঠে ব্যবস্থিতাঃ
47.20
পৃষ্ঠগোপাস্তু তস্যাসন্নানাদেশ্যা জনেশ্বরাঃ
কেতুমান্বসুদানশ্চ পুত্রঃ কাশ্যস্য চাভিভূঃ
47.21
ততস্তে তাবকাঃ সর্বে হৃষ্টা যুদ্ধায় ভারত
দধ্মুঃ শঙ্খান্মুদা যুক্তাঃ সিংহনাদাংশ্চ নাদয়ন্
47.22
তেষাং শ্রুত্বা তু হৃষ্টানাং কুরুবৃদ্ধঃ পিতামহঃ
সিংহনাদং বিনদ্যোচ্চৈঃ শঙ্খং দধ্মৌ প্রতাপবান্
47.23
ততঃ শঙ্খাশ্চ ভের্যশ্চ পেশ্যশ্চ বিবিধাঃ পরৈঃ
আনকাশ্চাভ্যহন্যন্ত স শব্দস্তুমুলোঽভবৎ
47.24
ততঃ শ্বেতৈর্হয়ৈর্যুক্তে মহতি স্যন্দনে স্থিতৌ
প্রদধ্মতুঃ শঙ্খবরৌ হেমরত্নপরিষ্কৃতৌ
47.25
পাঞ্চজন্যং হৃষীকেশো দেবদত্তং ধনংজয়ঃ
পৌণ্ড্রং দধ্মৌ মহাশঙ্খং ভীমকর্মা বৃকোদরঃ
47.26
অনন্তবিজয়ং রাজা কুন্তীপুত্রো যুধিষ্ঠিরঃ
নকুলঃ সহদেবশ্চ সুঘোষমণিপুষ্পকৌ
47.27
কাশিরাজশ্চ শৈব্যশ্চ শিখণ্ডী চ মহারথঃ
ধৃষ্টদ্যুম্নো বিরাটশ্চ সাত্যকিশ্চ মহায়শাঃ
47.28
পাঞ্চাল্যশ্চ মহেষ্বাসো দ্রৌপদ্যাঃ পঞ্চ চাত্মজাঃ
সর্বে দধ্মুর্মহাশঙ্খান্সিংহনাদাংশ্চ নেদিরে
47.29
স ঘোষঃ সুমহাংস্তত্র বীরৈস্তৈঃ সমুদীরিতঃ
নভশ্চ পৃথিবীং চৈব তুমুলো ব্যনুনাদয়ৎ
47.30
এবমেতে মহারাজ প্রহৃষ্টাঃ কুরুপাণ্ডবাঃ
পুনর্যুদ্ধায় সংজগ্মুস্তাপয়ানাঃ পরস্পরম্