Utshovঅধ্যায় 46
46.1
সংজয় উবাচ
কৃতেঽবহারে সৈন্যানাং প্রথমে ভরতর্ষভ
ভীষ্মে চ যুধি সংরব্ধে হৃষ্টে দুর্যোধনে তথা
46.2
ধর্মরাজস্ততস্তূর্ণমভিগম্য জনার্দনম্
ভ্রাতৃভিঃ সহিতঃ সর্বৈঃ সর্বৈশ্চৈব জনেশ্বরৈঃ
46.3
শুচা পরময়া যুক্তশ্চিন্তয়ানঃ পরাজয়ম্
বার্ষ্ণেয়মব্রবীদ্রাজন্দৃষ্ট্বা ভীষ্মস্য বিক্রমম্
46.4
কৃষ্ণ পশ্য মহেষ্বাসং ভীষ্মং ভীমপরাক্রমম্
শরৈর্দহন্তং সৈন্যং মে গ্রীষ্মে কক্ষমিবানলম্
46.5
কথমেনং মহাত্মানং শক্ষ্যামঃ প্রতিবীক্ষিতুম্
লেলিহ্যমানং সৈন্যং মে হবিষ্মন্তমিবানলম্
46.6
এতং হি পুরুষব্যাঘ্রং ধনুষ্মন্তং মহাবলম্
দৃষ্ট্বা বিপ্রদ্রুতং সৈন্যং মদীয়ং মার্গণাহতম্
46.7
শক্যো জেতুং যমঃ ক্রুদ্ধো বজ্রপাণিশ্চ সংয়ুগে
বরুণঃ পাশভৃচ্চাপি কুবেরো বা গদাধরঃ
46.8
ন তু ভীষ্মো মহাতেজাঃ শক্যো জেতুং মহাবলঃ
সোঽহমেবং গতে মগ্নো ভীষ্মাগাধজলেঽপ্লবঃ
46.9
আত্মনো বুদ্ধিদৌর্বল্যাদ্ভীষ্মমাসাদ্য কেশব
বনং যাস্যামি গোবিন্দ শ্রেয়ো মে তত্র জীবিতুম্
46.10
ন ত্বিমান্পৃথিবীপালান্দাতুং ভীষ্মায় মৃত্যবে
ক্ষপয়িষ্যতি সেনাং মে কৃষ্ণ ভীষ্মো মহাস্ত্রবিৎ
46.11
যথানলং প্রজ্বলিতং পতংগাঃ সমভিদ্রুতাঃ
বিনাশায়ৈব গচ্ছন্তি তথা মে সৈনিকো জনঃ
46.12
ক্ষয়ং নীতোঽস্মি বার্ষ্ণেয় রাজ্যহেতোঃ পরাক্রমী
ভ্রাতরশ্চৈব মে বীরাঃ কর্শিতাঃ শরপীডিতাঃ
46.13
মত্কৃতে ভ্রাতৃসৌহার্দাদ্রাজ্যাদ্ভ্রষ্টাস্তথা সুখাৎ
জীবিতং বহু মন্যেঽহং জীবিতং হ্যদ্য দুর্লভম্
46.14
জীবিতস্য হি শেষেণ তপস্তপ্স্যামি দুশ্চরম্
ন ঘাতয়িষ্যামি রণে মিত্রাণীমানি কেশব
46.15
রথান্মে বহুসাহস্রান্দিব্যৈরস্ত্রৈর্মহাবলঃ
ঘাতয়ত্যনিশং ভীষ্মঃ প্রবরাণাং প্রহারিণাম্
46.16
কিং নু কৃত্বা কৃতং মে স্যাদ্ব্রূহি মাধব মাচিরম্
মধ্যস্থমিব পশ্যামি সমরে সব্যসাচিনম্
46.17
একো ভীমঃ পরং শক্ত্যা যুধ্যত্যেষ মহাভুজঃ
কেবলং বাহুবীর্যেণ ক্ষত্রধর্মমনুস্মরন্
46.18
গদয়া বীরঘাতিন্যা যথোত্সাহং মহামনাঃ
করোত্যসুকরং কর্ম গজাশ্বরথপত্তিষু
46.19
নালমেষ ক্ষয়ং কর্তুং পরসৈন্যস্য মারিষ
আর্জবেনৈব যুদ্ধেন বীর বর্ষশতৈরপি
46.20
একোঽস্ত্রবিত্সখা তেঽয়ং সোঽপ্যস্মান্সমুপেক্ষতে
নির্দহ্যমানান্ভীষ্মেণ দ্রোণেন চ মহাত্মনা
46.21
দিব্যান্যস্ত্রাণি ভীষ্মস্য দ্রোণস্য চ মহাত্মনঃ
ধক্ষ্যন্তি ক্ষত্রিয়ান্সর্বান্প্রয়ুক্তানি পুনঃ পুনঃ
46.22
কৃষ্ণ ভীষ্মঃ সুসংরব্ধঃ সহিতঃ সর্বপার্থিবৈঃ
ক্ষপয়িষ্যতি নো নূনং যাদৃশোঽস্য পরাক্রমঃ
46.23
স ত্বং পশ্য মহেষ্বাসং যোগীষ্বর মহারথম্
যো ভীষ্মং শময়েত্সংখ্যে দাবাগ্নিং জলদো যথা
46.24
তব প্রসাদাদ্গোবিন্দ পাণ্ডবা নিহতদ্বিষঃ
স্বরাজ্যমনুসংপ্রাপ্তা মোদিষ্যন্তি সবান্ধবাঃ
46.25
এবমুক্ত্বা ততঃ পার্থো ধ্যায়ন্নাস্তে মহামনাঃ
চিরমন্তর্মনা ভূত্বা শোকোপহতচেতনঃ
46.26
শোকার্তং পাণ্ডবং জ্ঞাত্বা দুঃখেন হতচেতসম্
অব্রবীত্তত্র গোবিন্দো হর্ষয়ন্সর্বপাণ্ডবান্
46.27
মা শুচো ভরতশ্রেষ্ঠ ন ত্বং শোচিতুমর্হসি
যস্য তে ভ্রাতরঃ শূরাঃ সর্বলোকস্য ধন্বিনঃ
46.28
অহং চ প্রিয়কৃদ্রাজন্সাত্যকিশ্চ মহারথঃ
বিরাটদ্রুপদৌ বৃদ্ধৌ ধৃষ্টদ্যুম্নশ্চ পার্ষতঃ
46.29
তথৈব সবলাঃ সর্বে রাজানো রাজসত্তম
ত্বত্প্রসাদং প্রতীক্ষন্তে ত্বদ্ভক্তাশ্চ বিশাং পতে
46.30
এষ তে পার্ষতো নিত্যং হিতকামঃ প্রিয়ে রতঃ
সেনাপত্যমনুপ্রাপ্তো ধৃষ্টদ্যুম্নো মহাবলঃ
শিখণ্ডী চ মহাবাহো ভীষ্মস্য নিধনং কিল
46.31
এতচ্ছ্রুত্বা ততো রাজা ধৃষ্টদ্যুম্নং মহারথম্
অব্রবীত্সমিতৌ তস্যাং বাসুদেবস্য শৃণ্বতঃ
46.32
ধৃষ্টদ্যুম্ন নিবোধেদং যত্ত্বা বক্ষ্যামি মারিষ
নাতিক্রম্যং ভবেত্তচ্চ বচনং মম ভাষিতম্
46.33
ভবান্সেনাপতির্মহ্যং বাসুদেবেন সংমতঃ
কার্ত্তিকেয়ো যথা নিত্যং দেবানামভবত্পুরা
তথা ত্বমপি পাণ্ডূনাং সেনানীঃ পুরুষর্ষভ
46.34
স ত্বং পুরুষশার্দূল বিক্রম্য জহি কৌরবান্
অহং চ ত্বানুয়াস্যামি ভীমঃ কৃষ্ণশ্চ মারিষ
46.35
মাদ্রীপুত্রৌ চ সহিতৌ দ্রৌপদেয়াশ্চ দংশিতাঃ
যে চান্যে পৃথিবীপালাঃ প্রধানাঃ পুরুষর্ষভ
46.36
তত উদ্ধর্ষয়ন্সর্বান্ধৃষ্টদ্যুম্নোঽভ্যভাষত
অহং দ্রোণান্তকঃ পার্থ বিহিতঃ শংভুনা পুরা
46.37
রণে ভীষ্মং তথা দ্রোণং কৃপং শল্যং জয়দ্রথম্
সর্বানদ্য রণে দৃপ্তান্প্রতিয়োত্স্যামি পার্থিব
46.38
অথোত্ক্রুষ্টং মহেষ্বাসৈঃ পাণ্ডবৈর্যুদ্ধদুর্মদৈঃ
সমুদ্যতে পার্থিবেন্দ্রে পার্ষতে শত্রুসূদনে
46.39
তমব্রবীত্ততঃ পার্থঃ পার্ষতং পৃতনাপতিম্
ব্যূহঃ ক্রৌঞ্চারুণো নাম সর্বশত্রুনিবর্হণঃ
46.40
যং বৃহস্পতিরিন্দ্রায় তদা দেবাসুরেঽব্রবীৎ
তং যথাবত্প্রতিব্যূহ পরানীকবিনাশনম্
অদৃষ্টপূর্বং রাজানঃ পশ্যন্তু কুরুভিঃ সহ
46.41
তথোক্তঃ স নৃদেবেন বিষ্ণুর্বজ্রভৃতা ইব
প্রভাতে সর্বসৈন্যানামগ্রে চক্রে ধনংজয়ম্
46.42
আদিত্যপথগঃ কেতুস্তস্যাদ্ভুতমনোরমঃ
শাসনাত্পুরুহূতস্য নির্মিতো বিশ্বকর্মণা
46.43
ইন্দ্রায়ুধসবর্ণাভিঃ পতাকাভিরলংকৃতঃ
আকাশগ ইবাকাশে গন্ধর্বনগরোপমঃ
নৃত্যমান ইবাভাতি রথচর্যাসু মারিষ
46.44
তেন রত্নবতা পার্থঃ স চ গাণ্ডীবধন্বনা
বভূব পরমোপেতঃ স্বয়ংভূরিব ভানুনা
46.45
শিরোঽভূদ্দ্রুপদো রাজা মহত্যা সেনয়া বৃতঃ
কুন্তিভোজশ্চ চৈদ্যশ্চ চক্ষুষ্যাস্তাং জনেশ্বর
46.46
দাশার্ণকাঃ প্রয়াগাশ্চ দাশেরকগণৈঃ সহ
অনূপগাঃ কিরাতাশ্চ গ্রীবায়াং ভরতর্ষভ
46.47
পটচ্চরৈশ্চ হুণ্ডৈশ্চ রাজন্পৌরবকৈস্তথা
নিষাদৈঃ সহিতশ্চাপি পৃষ্ঠমাসীদ্যুধিষ্ঠিরঃ
46.48
পক্ষৌ তু ভীমসেনশ্চ ধৃষ্টদ্যুম্নশ্চ পার্ষতঃ
দ্রৌপদেয়াভিমন্যুশ্চ সাত্যকিশ্চ মহারথঃ
46.49
পিশাচা দরদাশ্চৈব পুণ্ড্রাঃ কুণ্ডীবিষৈঃ সহ
মডকা লডকাশ্চৈব তঙ্গণাঃ পরতঙ্গণাঃ
46.50
বাহ্লিকাস্তিত্তিরাশ্চৈব চোলাঃ পাণ্ড্যাশ্চ ভারত
এতে জনপদা রাজন্দক্ষিণং পক্ষমাশ্রিতাঃ
46.51
অগ্নিবেষ্যা জগত্তুণ্ডাঃ পলদাশাশ্চ ভারত
শবরাস্তুম্বুপাশ্চৈব বত্সাশ্চ সহ নাকুলৈঃ
নকুলঃ সহদেবশ্চ বামং পার্শ্বং সমাশ্রিতাঃ
46.52
রথানাময়ুতং পক্ষৌ শিরশ্চ নিয়ুতং তথা
পৃষ্ঠমর্বুদমেবাসীত্সহস্রাণি চ বিংশতিঃ
গ্রীবায়াং নিয়ুতং চাপি সহস্রাণি চ সপ্ততিঃ
46.53
পক্ষকোটিপ্রপক্ষেষু পক্ষান্তেষু চ বারণাঃ
জগ্মুঃ পরিবৃতা রাজংশ্চলন্ত ইব পর্বতাঃ
46.54
জঘনং পালয়ামাস বিরাটঃ সহ কেকয়ৈঃ
কাশিরাজশ্চ শৈব্যশ্চ রথানাময়ুতৈস্ত্রিভিঃ
46.55
এবমেতং মহাব্যূহং ব্যূহ্য ভারত পাণ্ডবাঃ
সূর্যোদয়নমিচ্ছন্তঃ স্থিতা যুদ্ধায় দংশিতাঃ
46.56
তেষামাদিত্যবর্ণানি বিমলানি মহান্তি চ
শ্বেতচ্ছত্রাণ্যশোভন্ত বারণেষু রথেষু চ