Utshovঅধ্যায় 45
45.1
সংজয় উবাচ
গতপূর্বাহ্ণভূয়িষ্ঠে তস্মিন্নহনি দারুণে
বর্তমানে মহারৌদ্রে মহাবীরবরক্ষয়ে
45.2
দুর্মুখঃ কৃতবর্মা চ কৃপঃ শল্যো বিবিংশতিঃ
ভীষ্মং জুগুপুরাসাদ্য তব পুত্রেণ চোদিতাঃ
45.3
এতৈরতিরথৈর্গুপ্তঃ পঞ্চভির্ভরতর্ষভ
পাণ্ডবানামনীকানি বিজগাহে মহারথঃ
45.4
চেদিকাশিকরূষেষু পাঞ্চালেষু চ ভারত
ভীষ্মস্য বহুধা তালশ্চরন্কেতুরদৃশ্যত
45.5
শিরাংসি চ তদা ভীষ্মো বাহূংশ্চাপি সহায়ুধান্
নিচকর্ত মহাবেগৈর্ভল্লৈঃ সংনতপর্বভিঃ
45.6
নৃত্যতো রথমার্গেষু ভীষ্মস্য ভরতর্ষভ
কেচিদার্তস্বরং চক্রুর্নাগা মর্মণি তাডিতাঃ
45.7
অভিমন্যুঃ সুসংক্রুদ্ধঃ পিশঙ্গৈস্তুরগোত্তমৈঃ
সংয়ুক্তং রথমাস্থায় প্রায়াদ্ভীষ্মরথং প্রতি
45.8
জাম্বূনদবিচিত্রেণ কর্ণিকারেণ কেতুনা
অভ্যবর্ষত ভীষ্মং চ তাংশ্চৈব রথসত্তমান্
45.9
স তালকেতোস্তীক্ষ্ণেন কেতুমাহত্য পত্রিণা
ভীষ্মেণ যুয়ুধে বীরস্তস্য চানুচরৈঃ সহ
45.10
কৃতবর্মাণমেকেন শল্যং পঞ্চভিরায়সৈঃ
বিদ্ধ্বা নবভিরানর্ছচ্ছিতাগ্রৈঃ প্রপিতামহম্
45.11
পূর্ণায়তবিসৃষ্টেন সম্যক্প্রণিহিতেন চ
ধ্বজমেকেন বিব্যাধ জাম্বূনদবিভূষিতম্
45.12
দুর্মুখস্য তু ভল্লেন সর্বাবরণভেদিনা
জহার সারথেঃ কায়াচ্ছিরঃ সংনতপর্বণা
45.13
ধনুশ্চিচ্ছেদ ভল্লেন কার্তস্বরবিভূষিতম্
কৃপস্য নিশিতাগ্রেণ তাংশ্চ তীক্ষ্ণমুখৈঃ শরৈঃ
45.14
জঘান পরমক্রুদ্ধো নৃত্যন্নিব মহারথঃ
তস্য লাঘবমুদ্বীক্ষ্য তুতুষুর্দেবতা অপি
45.15
লব্ধলক্ষ্যতয়া কার্ষ্ণেঃ সর্বে ভীষ্মমুখা রথাঃ
সত্ত্ববন্তমমন্যন্ত সাক্ষাদিব ধনংজয়ম্
45.16
তস্য লাঘবমার্গস্থমলাতসদৃশপ্রভম্
দিশঃ পর্যপতচ্চাপং গাণ্ডীবমিব ঘোষবৎ
45.17
তমাসাদ্য মহাবেগৈর্ভীষ্মো নবভিরাশুগৈঃ
বিব্যাধ সমরে তূর্ণমার্জুনিং পরবীরহা
45.18
ধ্বজং চাস্য ত্রিভির্ভল্লৈশ্চিচ্ছেদ পরমৌজসঃ
সারথিং চ ত্রিভির্বাণৈরাজঘান যতব্রতঃ
45.19
তথৈব কৃতবর্মা চ কৃপঃ শল্যশ্চ মারিষ
বিদ্ধ্বা নাকম্পয়ত্কার্ষ্ণিং মৈনাকমিব পর্বতম্
45.20
স তৈঃ পরিবৃতঃ শূরো ধার্তরাষ্ট্রৈর্মহারথৈঃ
ববর্ষ শরবর্ষাণি কার্ষ্ণিঃ পঞ্চরথান্প্রতি
45.21
ততস্তেষাং মহাস্ত্রাণি সংবার্য শরবৃষ্টিভিঃ
ননাদ বলবান্কার্ষ্ণির্ভীষ্মায় বিসৃজঞ্শরান্
45.22
তত্রাস্য সুমহদ্রাজন্বাহ্বোর্বলমদৃশ্যত
যতমানস্য সমরে ভীষ্মমর্দয়তঃ শরৈঃ
45.23
পরাক্রান্তস্য তস্যৈব ভীষ্মোঽপি প্রাহিণোচ্ছরান্
স তাংশ্চিচ্ছেদ সমরে ভীষ্মচাপচ্যুতাঞ্শরান্
45.24
ততো ধ্বজমমোঘেষুর্ভীষ্মস্য নবভিঃ শরৈঃ
চিচ্ছেদ সমরে বীরস্তত উচ্চুক্রুশুর্জনাঃ
45.25
স রাজতো মহাস্কন্ধস্তালো হেমবিভূষিতঃ
সৌভদ্রবিশিখৈশ্ছিন্নঃ পপাত ভুবি ভারত
45.26
ধ্বজং সৌভদ্রবিশিখৈঃ পতিতং ভরতর্ষভ
দৃষ্ট্বা ভীমোঽনদদ্ধৃষ্টঃ সৌভদ্রমভিহর্ষয়ন্
45.27
অথ ভীষ্মো মহাস্ত্রাণি দিব্যানি চ বহূনি চ
প্রাদুশ্চক্রে মহারৌদ্রঃ ক্ষণে তস্মিন্মহাবলঃ
45.28
ততঃ শতসহস্রেণ সৌভদ্রং প্রপিতামহঃ
অবাকিরদমেয়াত্মা শরাণাং নতপর্বণাম্
45.29
ততো দশ মহেষ্বাসাঃ পাণ্ডবানাং মহারথাঃ
রক্ষার্থমভ্যধাবন্ত সৌভদ্রং ত্বরিতা রথৈঃ
45.30
বিরাটঃ সহ পুত্রেণ ধৃষ্টদ্যুম্নশ্চ পার্ষতঃ
ভীমশ্চ কেকয়াশ্চৈব সাত্যকিশ্চ বিশাং পতে
45.31
জবেনাপততাং তেষাং ভীষ্মঃ শাংতনবো রণে
পাঞ্চাল্যং ত্রিভিরানর্ছত্সাত্যকিং নিশিতৈঃ শরৈঃ
45.32
পূর্ণায়তবিসৃষ্টেন ক্ষুরেণ নিশিতেন চ
ধ্বজমেকেন চিচ্ছেদ ভীমসেনস্য পত্রিণা
45.33
জাম্বূনদময়ঃ কেতুঃ কেসরী নরসত্তম
পপাত ভীমসেনস্য ভীষ্মেণ মথিতো রথাৎ
45.34
ভীমসেনস্ত্রিভির্বিদ্ধ্বা ভীষ্মং শাংতনবং রণে
কৃপমেকেন বিব্যাধ কৃতবর্মাণমষ্টভিঃ
45.35
প্রগৃহীতাগ্রহস্তেন বৈরাটিরপি দন্তিনা
অভ্যদ্রবত রাজানং মদ্রাধিপতিমুত্তরঃ
45.36
তস্য বারণরাজস্য জবেনাপততো রথী
শল্যো নিবারয়ামাস বেগমপ্রতিমং রণে
45.37
তস্য ক্রুদ্ধঃ স নাগেন্দ্রো বৃহতঃ সাধুবাহিনঃ
পদা যুগমধিষ্ঠায় জঘান চতুরো হয়ান্
45.38
স হতাশ্বে রথে তিষ্ঠন্মদ্রাধিপতিরায়সীম্
উত্তরান্তকরীং শক্তিং চিক্ষেপ ভুজগোপমাম্
45.39
তয়া ভিন্নতনুত্রাণঃ প্রবিশ্য বিপুলং তমঃ
স পপাত গজস্কন্ধাত্প্রমুক্তাঙ্কুশতোমরঃ
45.40
সমাদায় চ শল্যোঽসিমবপ্লুত্য রথোত্তমাৎ
বারণেন্দ্রস্য বিক্রম্য চিচ্ছেদাথ মহাকরম্
45.41
ভিন্নমর্মা শরব্রাতৈশ্ছিন্নহস্তঃ স বারণঃ
ভীমমার্তস্বরং কৃত্বা পপাত চ মমার চ
45.42
এতদীদৃশকং কৃত্বা মদ্ররাজো মহারথঃ
আরুরোহ রথং তূর্ণং ভাস্বরং কৃতবর্মণঃ
45.43
উত্তরং নিহতং দৃষ্ট্বা বৈরাটির্ভ্রাতরং শুভম্
কৃতবর্মণা চ সহিতং দৃষ্ট্বা শল্যমবস্থিতম্
শঙ্খঃ ক্রোধাত্প্রজজ্বাল হবিষা হব্যবাডিব
45.44
স বিস্ফার্য মহচ্চাপং কার্তস্বরবিভূষিতম্
অভ্যধাবজ্জিঘাংসন্বৈ শল্যং মদ্রাধিপং বলী
45.45
মহতা রথবংশেন সমন্তাত্পরিবারিতঃ
সৃজন্বাণময়ং বর্ষং প্রায়াচ্ছল্যরথং প্রতি
45.46
তমাপতন্তং সংপ্রেক্ষ্য মত্তবারণবিক্রমম্
তাবকানাং রথাঃ সপ্ত সমন্তাত্পর্যবারয়ন্
মদ্ররাজং পরীপ্সন্তো মৃত্যোর্দংষ্ট্রান্তরং গতম্
45.47
ততো ভীষ্মো মহাবাহুর্বিনদ্য জলদো যথা
তালমাত্রং ধনুর্গৃহ্য শঙ্খমভ্যদ্রবদ্রণে
45.48
তমুদ্যতমুদীক্ষ্যাথ মহেষ্বাসং মহাবলম্
সংত্রস্তা পাণ্ডবী সেনা বাতবেগহতেব নৌঃ
45.49
তত্রার্জুনঃ সংত্বরিতঃ শঙ্খস্যাসীত্পুরঃসরঃ
ভীষ্মাদ্রক্ষ্যোঽয়মদ্যেতি ততো যুদ্ধমবর্তত
45.50
হাহাকারো মহানাসীদ্যোধানাং যুধি যুধ্যতাম্
তেজস্তেজসি সংপৃক্তমিত্যেবং বিস্ময়ং যয়ুঃ
45.51
অথ শল্যো গদাপাণিরবতীর্য মহারথাৎ
শঙ্খস্য চতুরো বাহানহনদ্ভরতর্ষভ
45.52
স হতাশ্বাদ্রথাত্তূর্ণং খড্গমাদায় বিদ্রুতঃ
বীভত্সোঃ স্যন্দনং প্রাপ্য ততঃ শান্তিমবিন্দত
45.53
ততো ভীষ্মরথাত্তূর্ণমুত্পতন্তি পতত্রিণঃ
যৈরন্তরিক্ষং ভূমিশ্চ সর্বতঃ সমবস্তৃতম্
45.54
পাঞ্চালানথ মত্স্যাংশ্চ কেকয়াংশ্চ প্রভদ্রকান্
ভীষ্মঃ প্রহরতাং শ্রেষ্ঠঃ পাতয়ামাস মার্গণৈঃ
45.55
উত্সৃজ্য সমরে তূর্ণং পাণ্ডবং সব্যসাচিনম্
অভ্যদ্রবত পাঞ্চাল্যং দ্রুপদং সেনয়া বৃতম্
প্রিয়ং সংবন্ধিনং রাজঞ্শরানবকিরন্বহূন্
45.56
অগ্নিনেব প্রদগ্ধানি বনানি শিশিরাত্যয়ে
শরদগ্ধান্যদৃশ্যন্ত সৈন্যানি দ্রুপদস্য হ
অতিষ্ঠত রণে ভীষ্মো বিধূম ইব পাবকঃ
45.57
মধ্যংদিনে যথাদিত্যং তপন্তমিব তেজসা
ন শেকুঃ পাণ্ডবেয়স্য যোধা ভীষ্মং নিরীক্ষিতুম্
45.58
বীক্ষাং চক্রুঃ সমন্তাত্তে পাণ্ডবা ভয়পীডিতাঃ
ত্রাতারং নাধ্যগচ্ছন্ত গাবঃ শীতার্দিতা ইব
45.59
হতবিপ্রদ্রুতে সৈন্যে নিরুত্সাহে বিমর্দিতে
হাহাকারো মহানাসীত্পাণ্ডুসৈন্যেষু ভারত
45.60
ততো ভীষ্মঃ শাংতনবো নিত্যং মণ্ডলকার্মুকঃ
মুমোচ বাণান্দীপ্তাগ্রানহীনাশীবিষানিব
45.61
শরৈরেকায়নীকুর্বন্দিশঃ সর্বা যতব্রতঃ
জঘান পাণ্ডবরথানাদিশ্যাদিশ্য ভারত
45.62
ততঃ সৈন্যেষু ভগ্নেষু মথিতেষু চ সর্বশঃ
প্রাপ্তে চাস্তং দিনকরে ন প্রাজ্ঞায়ত কিংচন
45.63
ভীষ্মং চ সমুদীর্যন্তং দৃষ্ট্বা পার্থা মহাহবে
অবহারমকুর্বন্ত সৈন্যানাং ভরতর্ষভ