Utshovঅধ্যায় 44
44.1
সংজয় উবাচ
রাজঞ্শতসহস্রাণি তত্র তত্র তদা তদা
নির্মর্যাদং প্রয়ুদ্ধানি তত্তে বক্ষ্যামি ভারত
44.2
ন পুত্রঃ পিতরং জজ্ঞে ন পিতা পুত্রমৌরসম্
ন ভ্রাতা ভ্রাতরং তত্র স্বস্রীয়ং ন চ মাতুলঃ
44.3
মাতুলং ন চ স্বস্রীয়ো ন সখায়ং সখা তথা
আবিষ্টা ইব যুধ্যন্তে পাণ্ডবাঃ কুরুভিঃ সহ
44.4
রথানীকং নরব্যাঘ্রাঃ কেচিদভ্যপতন্রথৈঃ
অভজ্যন্ত যুগৈরেব যুগানি ভরতর্ষভ
44.5
রথেষাশ্চ রথেষাভিঃ কূবরা রথকূবরৈঃ
সংহতাঃ সংহতৈঃ কেচিত্পরস্পরজিঘাংসবঃ
44.6
ন শেকুশ্চলিতুং কেচিত্সংনিপত্য রথা রথৈঃ
প্রভিন্নাস্তু মহাকায়াঃ সংনিপত্য গজা গজৈঃ
44.7
বহুধাদারয়ন্ক্রুদ্ধা বিষাণৈরিতরেতরম্
সতোমরপতাকৈশ্চ বারণাঃ পরবারণৈঃ
44.8
অভিসৃত্য মহারাজ বেগবদ্ভির্মহাগজৈঃ
দন্তৈরভিহতাস্তত্র চুক্রুশুঃ পরমাতুরাঃ
44.9
অভিনীতাশ্চ শিক্ষাভিস্তোত্ত্রাঙ্কুশসমাহতাঃ
সুপ্রভিন্নাঃ প্রভিন্নানাং সংমুখাভিমুখা যয়ুঃ
44.10
প্রভিন্নৈরপি সংসক্তাঃ কেচিত্তত্র মহাগজাঃ
ক্রৌঞ্চবন্নিনদং মুক্ত্বা প্রাদ্রবন্ত ততস্ততঃ
44.11
সম্যক্প্রণীতা নাগাশ্চ প্রভিন্নকরটামুখাঃ
ঋষ্টিতোমরনারাচৈর্নির্বিদ্ধা বরবারণাঃ
44.12
বিনেদুর্ভিন্নমর্মাণো নিপেতুশ্চ গতাসবঃ
প্রাদ্রবন্ত দিশঃ কেচিন্নদন্তো ভৈরবান্রবান্
44.13
গজানাং পাদরক্ষাস্তু ব্যূঢোরস্কাঃ প্রহারিণঃ
ঋষ্টিভিশ্চ ধনুর্ভিশ্চ বিমলৈশ্চ পরশ্বধৈঃ
44.14
গদাভির্মুসলৈশ্চৈব ভিণ্ডিপালৈঃ সতোমরৈঃ
আয়সৈঃ পরিঘৈশ্চৈব নিস্ত্রিংশৈর্বিমলৈঃ শিতৈঃ
44.15
প্রগৃহীতৈঃ সুসংরব্ধা ধাবমানাস্ততস্ততঃ
ব্যদৃশ্যন্ত মহারাজ পরস্পরজিঘাংসবঃ
44.16
রাজমানাশ্চ নিস্ত্রিংশাঃ সংসিক্তা নরশোণিতৈঃ
প্রত্যদৃশ্যন্ত শূরাণামন্যোন্যমভিধাবতাম্
44.17
অবক্ষিপ্তাবধূতানামসীনাং বীরবাহুভিঃ
সংজজ্ঞে তুমুলঃ শব্দঃ পততাং পরমর্মসু
44.18
গদামুসলরুগ্ণানাং ভিন্নানাং চ বরাসিভিঃ
দন্তিদন্তাবভিন্নানাং মৃদিতানাং চ দন্তিভিঃ
44.19
তত্র তত্র নরৌঘাণাং ক্রোশতামিতরেতরম্
শুশ্রুবুর্দারুণা বাচঃ প্রেতানামিব ভারত
44.20
হয়ৈরপি হয়ারোহাশ্চামরাপীডধারিভিঃ
হংসৈরিব মহাবেগৈরন্যোন্যমভিদুদ্রুবুঃ
44.21
তৈর্বিমুক্তা মহাপ্রাসা জাম্বূনদবিভূষণাঃ
আশুগা বিমলাস্তীক্ষ্ণাঃ সংপেতুর্ভুজগোপমাঃ
44.22
অশ্বৈরগ্র্যজবৈঃ কেচিদাপ্লুত্য মহতো রথান্
শিরাংস্যাদদিরে বীরা রথিনামশ্বসাদিনঃ
44.23
বহূনপি হয়ারোহান্ভল্লৈঃ সংনতপর্বভিঃ
রথী জঘান সংপ্রাপ্য বাণগোচরমাগতান্
44.24
নগমেঘপ্রতীকাশাশ্চাক্ষিপ্য তুরগান্গজাঃ
পাদৈরেবাবমৃদ্নন্ত মত্তাঃ কনকভূষণাঃ
44.25
পাট্যমানেষু কুম্ভেষু পার্শ্বেষ্বপি চ বারণাঃ
প্রাসৈর্বিনিহতাঃ কেচিদ্বিনেদুঃ পরমাতুরাঃ
44.26
সাশ্বারোহান্হয়ান্কেচিদুন্মথ্য বরবারণাঃ
সহসা চিক্ষিপুস্তত্র সংকুলে ভৈরবে সতি
44.27
সাশ্বারোহান্বিষাণাগ্রৈরুত্ক্ষিপ্য তুরগান্দ্বিপাঃ
রথৌঘানবমৃদ্নন্তঃ সধ্বজান্পরিচক্রমুঃ
44.28
পুংস্ত্বাদভিমদত্বাচ্চ কেচিদত্র মহাগজাঃ
সাশ্বারোহান্হয়াঞ্জঘ্নুঃ করৈঃ সচরণৈস্তথা
44.29
কেচিদাক্ষিপ্য করিণঃ সাশ্বানপি রথান্করৈঃ
বিকর্ষন্তো দিশঃ সর্বাঃ সমীয়ুঃ সর্বশব্দগাঃ
44.30
আশুগা বিমলাস্তীক্ষ্ণাঃ সংপেতুর্ভুজগোপমাঃ
নরাশ্বকায়ান্নির্ভিদ্য লৌহানি কবচানি চ
44.31
নিপেতুর্বিমলাঃ শক্ত্যো বীরবাহুভিরর্পিতাঃ
মহোল্কাপ্রতিমা ঘোরাস্তত্র তত্র বিশাং পতে
44.32
দ্বীপিচর্মাবনদ্ধৈশ্চ ব্যাঘ্রচর্মশয়ৈরপি
বিকোশৈর্বিমলৈঃ খড্গৈরভিজঘ্নুঃ পরান্রণে
44.33
অভিপ্লুতমভিক্রুদ্ধমেকপার্শ্বাবদারিতম্
বিদর্শয়ন্তঃ সংপেতুঃ খড্গচর্মপরশ্বধৈঃ
44.34
শক্তিভির্দারিতাঃ কেচিত্সংছিন্নাশ্চ পরশ্বধৈঃ
হস্তিভির্মৃদিতাঃ কেচিত্ক্ষুণ্ণাশ্চান্যে তুরংগমৈঃ
44.35
রথনেমিনিকৃত্তাশ্চ নিকৃত্তা নিশিতৈঃ শরৈঃ
বিক্রোশন্তি নরা রাজংস্তত্র তত্র স্ম বান্ধবান্
44.36
পুত্রানন্যে পিতৄনন্যে ভ্রাতৄংশ্চ সহ বান্ধবৈঃ
মাতুলান্ভাগিনেয়াংশ্চ পরানপি চ সংয়ুগে
44.37
বিকীর্ণান্ত্রাঃ সুবহবো ভগ্নসক্থাশ্চ ভারত
বাহুভিঃ সুভুজাচ্ছিন্নৈঃ পার্শ্বেষু চ বিদারিতাঃ
ক্রন্দন্তঃ সমদৃশ্যন্ত তৃষিতা জীবিতেপ্সবঃ
44.38
তৃষ্ণাপরিগতাঃ কেচিদল্পসত্ত্বা বিশাং পতে
ভূমৌ নিপতিতাঃ সংখ্যে জলমেব যয়াচিরে
44.39
রুধিরৌঘপরিক্লিন্নাঃ ক্লিশ্যমানাশ্চ ভারত
ব্যনিন্দন্ভৃশমাত্মানং তব পুত্রাংশ্চ সংগতান্
44.40
অপরে ক্ষত্রিয়াঃ শূরাঃ কৃতবৈরাঃ পরস্পরম্
নৈব শস্ত্রং বিমুঞ্চন্তি নৈব ক্রন্দন্তি মারিষ
তর্জয়ন্তি চ সংহৃষ্টাস্তত্র তত্র পরস্পরম্
44.41
নির্দশ্য দশনৈশ্চাপি ক্রোধাত্স্বদশনচ্ছদান্
ভ্রুকুটীকুটিলৈর্বক্ত্রৈঃ প্রেক্ষন্তে চ পরস্পরম্
44.42
অপরে ক্লিশ্যমানাস্তু ব্রণার্তাঃ শরপীডিতাঃ
নিষ্কূজাঃ সমপদ্যন্ত দৃঢসত্ত্বা মহাবলাঃ
44.43
অন্যে তু বিরথাঃ শূরা রথমন্যস্য সংয়ুগে
প্রার্থয়ানা নিপতিতাঃ সংক্ষুণ্ণা বরবারণৈঃ
অশোভন্ত মহারাজ পুষ্পিতা ইব কিংশুকাঃ
44.44
সংবভূবুরনীকেষু বহবো ভৈরবস্বনাঃ
বর্তমানে মহাভীমে তস্মিন্বীরবরক্ষয়ে
44.45
অহনত্তু পিতা পুত্রং পুত্রশ্চ পিতরং রণে
স্বস্রীয়ো মাতুলং চাপি স্বস্রীয়ং চাপি মাতুলঃ
44.46
সখায়ং চ সখা রাজন্সংবন্ধী বান্ধবং তথা
এবং যুয়ুধিরে তত্র কুরবঃ পাণ্ডবৈঃ সহ
44.47
বর্তমানে ভয়ে তস্মিন্নির্মর্যাদে মহাহবে
ভীষ্মমাসাদ্য পার্থানাং বাহিনী সমকম্পত
44.48
কেতুনা পঞ্চতারেণ তালেন ভরতর্ষভ
রাজতেন মহাবাহুরুচ্ছ্রিতেন মহারথে
বভৌ ভীষ্মস্তদা রাজংশ্চন্দ্রমা ইব মেরুণা