Utshovঅধ্যায় 43
43.1
সংজয় উবাচ
পূর্বাহ্ণে তস্য রৌদ্রস্য যুদ্ধমহ্নো বিশাং পতে
প্রাবর্তত মহাঘোরং রাজ্ঞাং দেহাবকর্তনম্
43.2
কুরূণাং পাণ্ডবানাং চ সংগ্রামে বিজিগীষতাম্
সিংহানামিব সংহ্রাদো দিবমুর্বীং চ নাদয়ন্
43.3
আসীত্কিলকিলাশব্দস্তলশঙ্খরবৈঃ সহ
জজ্ঞিরে সিংহনাদাশ্চ শূরাণাং প্রতিগর্জতাম্
43.4
তলত্রাভিহতাশ্চৈব জ্যাশব্দা ভরতর্ষভ
পত্তীনাং পাদশব্দাশ্চ বাজিনাং চ মহাস্বনাঃ
43.5
তোত্ত্রাঙ্কুশনিপাতাশ্চ আয়ুধানাং চ নিস্বনাঃ
ঘণ্টাশব্দাশ্চ নাগানামন্যোন্যমভিধাবতাম্
43.6
তস্মিন্সমুদিতে শব্দে তুমুলে লোমহর্ষণে
বভূব রথনির্ঘোষঃ পর্জন্যনিনদোপমঃ
43.7
তে মনঃ ক্রূরমাধায় সমভিত্যক্তজীবিতাঃ
পাণ্ডবানভ্যবর্তন্ত সর্ব এবোচ্ছ্রিতধ্বজাঃ
43.8
স্বয়ং শাংতনবো রাজন্নভ্যধাবদ্ধনংজয়ম্
প্রগৃহ্য কার্মুকং ঘোরং কালদণ্ডোপমং রণে
43.9
অর্জুনোঽপি ধনুর্গৃহ্য গাণ্ডীবং লোকবিশ্রুতম্
অভ্যধাবত তেজস্বী গাঙ্গেয়ং রণমূর্ধনি
43.10
তাবুভৌ কুরুশার্দূলৌ পরস্পরবধৈষিণৌ
গাঙ্গেয়স্তু রণে পার্থং বিদ্ধ্বা নাকম্পয়দ্বলী
তথৈব পাণ্ডবো রাজন্ভীষ্মং নাকম্পয়দ্যুধি
43.11
সাত্যকিশ্চ মহেষ্বাসঃ কৃতবর্মাণমভ্যয়াৎ
তয়োঃ সমভবদ্যুদ্ধং তুমুলং লোমহর্ষণম্
43.12
সাত্যকিঃ কৃতবর্মাণং কৃতবর্মা চ সাত্যকিম্
আনর্ছতুঃ শরৈর্ঘোরৈস্তক্ষমাণৌ পরস্পরম্
43.13
তৌ শরাচিতসর্বাঙ্গৌ শুশুভাতে মহাবলৌ
বসন্তে পুষ্পশবলৌ পুষ্পিতাবিব কিংশুকৌ
43.14
অভিমন্যুর্মহেষ্বাসো বৃহদ্বলময়োধয়ৎ
ততঃ কোসলকো রাজা সৌভদ্রস্য বিশাং পতে
ধ্বজং চিচ্ছেদ সমরে সারথিং চ ন্যপাতয়ৎ
43.15
সৌভদ্রস্তু ততঃ ক্রুদ্ধঃ পাতিতে রথসারথৌ
বৃহদ্বলং মহারাজ বিব্যাধ নবভিঃ শরৈঃ
43.16
অথাপরাভ্যাং ভল্লাভ্যাং পীতাভ্যামরিমর্দনঃ
ধ্বজমেকেন চিচ্ছেদ পার্ষ্ণিমেকেন সারথিম্
অন্যোন্যং চ শরৈস্তীক্ষ্ণৈঃ ক্রুদ্ধৌ রাজংস্ততক্ষতুঃ
43.17
মানিনং সমরে দৃপ্তং কৃতবৈরং মহারথম্
ভীমসেনস্তব সুতং দুর্যোধনময়োধয়ৎ
43.18
তাবুভৌ নরশার্দূলৌ কুরুমুখ্যৌ মহাবলৌ
অন্যোন্যং শরবর্ষাভ্যাং ববৃষাতে রণাজিরে
43.19
তৌ তু বীক্ষ্য মহাত্মানৌ কৃতিনৌ চিত্রয়োধিনৌ
বিস্ময়ঃ সর্বভূতানাং সমপদ্যত ভারত
43.20
দুঃশাসনস্তু নকুলং প্রত্যুদ্যায় মহারথম্
অবিধ্যন্নিশিতৈর্বাণৈর্বহুভির্মর্মভেদিভিঃ
43.21
তস্য মাদ্রীসুতঃ কেতুং সশরং চ শরাসনম্
চিচ্ছেদ নিশিতৈর্বাণৈঃ প্রহসন্নিব ভারত
অথৈনং পঞ্চবিংশত্যা ক্ষুদ্রকাণাং সমার্দয়ৎ
43.22
পুত্রস্তু তব দুর্ধর্ষো নকুলস্য মহাহবে
যুগেষাং চিচ্ছিদে বাণৈর্ধ্বজং চৈব ন্যপাতয়ৎ
43.23
দুর্মুখঃ সহদেবং তু প্রত্যুদ্যায় মহাবলম্
বিব্যাধ শরবর্ষেণ যতমানং মহাহবে
43.24
সহদেবস্ততো বীরো দুর্মুখস্য মহাহবে
শরেণ ভৃশতীক্ষ্ণেন পাতয়ামাস সারথিম্
43.25
তাবন্যোন্যং সমাসাদ্য সমরে যুদ্ধদুর্মদৌ
ত্রাসয়েতাং শরৈর্ঘোরৈঃ কৃতপ্রতিকৃতৈষিণৌ
43.26
যুধিষ্ঠিরঃ স্বয়ং রাজা মদ্ররাজানমভ্যয়াৎ
তস্য মদ্রাধিপশ্চাপং দ্বিধা চিচ্ছেদ মারিষ
43.27
তদপাস্য ধনুশ্ছিন্নং কুন্তীপুত্রো যুধিষ্ঠিরঃ
অন্যত্কার্মুকমাদায় বেগবদ্বলবত্তরম্
43.28
ততো মদ্রেশ্বরং রাজা শরৈঃ সংনতপর্বভিঃ
ছাদয়ামাস সংক্রুদ্ধস্তিষ্ঠ তিষ্ঠেতি চাব্রবীৎ
43.29
ধৃষ্টদ্যুম্নস্ততো দ্রোণমভ্যদ্রবত ভারত
তস্য দ্রোণঃ সুসংক্রুদ্ধঃ পরাসুকরণং দৃঢম্
ত্রিধা চিচ্ছেদ সমরে যতমানস্য কার্মুকম্
43.30
শরং চৈব মহাঘোরং কালদণ্ডমিবাপরম্
প্রেষয়ামাস সমরে সোঽস্য কায়ে ন্যমজ্জত
43.31
অথান্যদ্ধনুরাদায় সায়কাংশ্চ চতুর্দশ
দ্রোণং দ্রুপদপুত্রস্তু প্রতিবিব্যাধ সংয়ুগে
তাবন্যোন্যং সুসংক্রুদ্ধৌ চক্রতুঃ সুভৃশং রণম্
43.32
সৌমদত্তিং রণে শঙ্খো রভসং রভসো যুধি
প্রত্যুদ্যয়ৌ মহারাজ তিষ্ঠ তিষ্ঠেতি চাব্রবীৎ
43.33
তস্য বৈ দক্ষিণং বীরো নির্বিভেদ রণে ভুজম্
সৌমদত্তিস্তথা শঙ্খং জত্রুদেশে সমাহনৎ
43.34
তয়োঃ সমভবদ্যুদ্ধং ঘোররূপং বিশাং পতে
দৃপ্তয়োঃ সমরে তূর্ণং বৃত্রবাসবয়োরিব
43.35
বাহ্লীকং তু রণে ক্রুদ্ধং ক্রুদ্ধরূপো বিশাং পতে
অভ্যদ্রবদমেয়াত্মা ধৃষ্টকেতুর্মহারথঃ
43.36
বাহ্লীকস্তু ততো রাজন্ধৃষ্টকেতুমমর্ষণম্
শরৈর্বহুভিরানর্ছত্সিংহনাদমথানদৎ
43.37
চেদিরাজস্তু সংক্রুদ্ধো বাহ্লীকং নবভিঃ শরৈঃ
বিব্যাধ সমরে তূর্ণং মত্তো মত্তমিব দ্বিপম্
43.38
তৌ তত্র সমরে ক্রুদ্ধৌ নর্দন্তৌ চ মুহুর্মুহুঃ
সমীয়তুঃ সুসংক্রুদ্ধাবঙ্গারকবুধাবিব
43.39
রাক্ষসং ক্রূরকর্মাণং ক্রূরকর্মা ঘটোত্কচঃ
অলম্বুসং প্রত্যুদিয়াদ্বলং শক্র ইবাহবে
43.40
ঘটোত্কচস্তু সংক্রুদ্ধো রাক্ষসং তং মহাবলম্
নবত্যা সায়কৈস্তীক্ষ্ণৈর্দারয়ামাস ভারত
43.41
অলম্বুসস্তু সমরে ভৈমসেনিং মহাবলম্
বহুধা বারয়ামাস শরৈঃ সংনতপর্বভিঃ
43.42
ব্যভ্রাজেতাং ততস্তৌ তু সংয়ুগে শরবিক্ষতৌ
যথা দেবাসুরে যুদ্ধে বলশক্রৌ মহাবলৌ
43.43
শিখণ্ডী সমরে রাজন্দ্রৌণিমভ্যুদ্যয়ৌ বলী
অশ্বত্থামা ততঃ ক্রুদ্ধঃ শিখণ্ডিনমবস্থিতম্
43.44
নারাচেন সুতীক্ষ্ণেন ভৃশং বিদ্ধ্বা ব্যকম্পয়ৎ
শিখণ্ড্যপি ততো রাজন্দ্রোণপুত্রমতাডয়ৎ
43.45
সায়কেন সুপীতেন তীক্ষ্ণেন নিশিতেন চ
তৌ জঘ্নতুস্তদান্যোন্যং শরৈর্বহুবিধৈর্মৃধে
43.46
ভগদত্তং রণে শূরং বিরাটো বাহিনীপতিঃ
অভ্যয়াত্ত্বরিতো রাজংস্ততো যুদ্ধমবর্তত
43.47
বিরাটো ভগদত্তেন শরবর্ষেণ তাডিতঃ
অভ্যবর্ষত্সুসংক্রুদ্ধো মেঘো বৃষ্ট্যা ইবাচলম্
43.48
ভগদত্তস্ততস্তূর্ণং বিরাটং পৃথিবীপতিম্
ছাদয়ামাস সমরে মেঘঃ সূর্যমিবোদিতম্
43.49
বৃহত্ক্ষত্রং তু কৈকেয়ং কৃপঃ শারদ্বতো যয়ৌ
তং কৃপঃ শরবর্ষেণ ছাদয়ামাস ভারত
43.50
গৌতমং কেকয়ঃ ক্রুদ্ধঃ শরবৃষ্ট্যাভ্যপূরয়ৎ
তাবন্যোন্যং হয়ান্হত্বা ধনুষী বিনিকৃত্য বৈ
43.51
বিরথাবসিয়ুদ্ধায় সমীয়তুরমর্ষণৌ
তয়োস্তদভবদ্যুদ্ধং ঘোররূপং সুদারুণম্
43.52
দ্রুপদস্তু ততো রাজা সৈন্ধবং বৈ জয়দ্রথম্
অভ্যুদ্যয়ৌ সংপ্রহৃষ্টো হৃষ্টরূপং পরংতপ
43.53
ততঃ সৈন্ধবকো রাজা দ্রুপদং বিশিখৈস্ত্রিভিঃ
তাডয়ামাস সমরে স চ তং প্রত্যবিধ্যত
43.54
তয়োঃ সমভবদ্যুদ্ধং ঘোররূপং সুদারুণম্
ঈক্ষিতৃপ্রীতিজননং শুক্রাঙ্গারকয়োরিব
43.55
বিকর্ণস্তু সুতস্তুভ্যং সুতসোমং মহাবলম্
অভ্যয়াজ্জবনৈরশ্বৈস্ততো যুদ্ধমবর্তত
43.56
বিকর্ণঃ সুতসোমং তু বিদ্ধ্বা নাকম্পয়চ্ছরৈঃ
সুতসোমো বিকর্ণং চ তদদ্ভুতমিবাভবৎ
43.57
সুশর্মাণং নরব্যাঘ্রং চেকিতানো মহারথঃ
অভ্যদ্রবত্সুসংক্রুদ্ধঃ পাণ্ডবার্থে পরাক্রমী
43.58
সুশর্মা তু মহারাজ চেকিতানং মহারথম্
মহতা শরবর্ষেণ বারয়ামাস সংয়ুগে
43.59
চেকিতানোঽপি সংরব্ধঃ সুশর্মাণং মহাহবে
প্রাচ্ছাদয়ত্তমিষুভির্মহামেঘ ইবাচলম্
43.60
শকুনিঃ প্রতিবিন্ধ্যং তু পরাক্রান্তং পরাক্রমী
অভ্যদ্রবত রাজেন্দ্র মত্তো মত্তমিব দ্বিপম্
43.61
যৌধিষ্ঠিরস্তু সংক্রুদ্ধঃ সৌবলং নিশিতৈঃ শরৈঃ
ব্যদারয়ত সংগ্রামে মঘবানিব দানবম্
43.62
শকুনিঃ প্রতিবিন্ধ্যং তু প্রতিবিধ্যন্তমাহবে
ব্যদারয়ন্মহাপ্রাজ্ঞঃ শরৈঃ সংনতপর্বভিঃ
43.63
সুদক্ষিণং তু রাজেন্দ্র কাম্বোজানাং মহারথম্
শ্রুতকর্মা পরাক্রান্তমভ্যদ্রবত সংয়ুগে
43.64
সুদক্ষিণস্তু সমরে সাহদেবিং মহারথম্
বিদ্ধ্বা নাকম্পয়ত বৈ মৈনাকমিব পর্বতম্
43.65
শ্রুতকর্মা ততঃ ক্রুদ্ধঃ কাম্বোজানাং মহারথম্
শরৈর্বহুভিরানর্ছদ্দারয়ন্নিব সর্বশঃ
43.66
ইরাবানথ সংক্রুদ্ধঃ শ্রুতায়ুষমমর্ষণম্
প্রত্যুদ্যয়ৌ রণে যত্তো যত্তরূপতরং ততঃ
43.67
আর্জুনিস্তস্য সমরে হয়ান্হত্বা মহারথঃ
ননাদ সুমহন্নাদং তত্সৈন্যং প্রত্যপূরয়ৎ
43.68
শ্রুতায়ুস্ত্বথ সংক্রুদ্ধঃ ফাল্গুনেঃ সমরে হয়ান্
নিজঘান গদাগ্রেণ ততো যুদ্ধমবর্তত
43.69
বিন্দানুবিন্দাবাবন্ত্যৌ কুন্তিভোজং মহারথম্
সসেনং সসুতং বীরং সংসসজ্জতুরাহবে
43.70
তত্রাদ্ভুতমপশ্যাম আবন্ত্যানাং পরাক্রমম্
যদয়ুধ্যন্স্থিরা ভূত্বা মহত্যা সেনয়া সহ
43.71
অনুবিন্দস্তু গদয়া কুন্তিভোজমতাডয়ৎ
কুন্তিভোজস্ততস্তূর্ণং শরব্রাতৈরবাকিরৎ
43.72
কুন্তিভোজসুতশ্চাপি বিন্দং বিব্যাধ সায়কৈঃ
স চ তং প্রতিবিব্যাধ তদদ্ভুতমিবাভবৎ
43.73
কেকয়া ভ্রাতরঃ পঞ্চ গান্ধারান্পঞ্চ মারিষ
সসৈন্যাস্তে সসৈন্যাংশ্চ যোধয়ামাসুরাহবে
43.74
বীরবাহুশ্চ তে পুত্রো বৈরাটিং রথসত্তমম্
উত্তরং যোধয়ামাস বিব্যাধ নিশিতৈঃ শরৈঃ
উত্তরশ্চাপি তং ধীরং বিব্যাধ নিশিতৈঃ শরৈঃ
43.75
চেদিরাট্সমরে রাজন্নুলূকং সমভিদ্রবৎ
উলূকশ্চাপি তং বাণৈর্নিশিতৈর্লোমবাহিভিঃ
43.76
তয়োর্যুদ্ধং সমভবদ্ঘোররূপং বিশাং পতে
দারয়েতাং সুসংক্রুদ্ধাবন্যোন্যমপরাজিতৌ
43.77
এবং দ্বংদ্বসহস্রাণি রথবারণবাজিনাম্
পদাতীনাং চ সমরে তব তেষাং চ সংকুলম্
43.78
মুহূর্তমিব তদ্যুদ্ধমাসীন্মধুরদর্শনম্
তত উন্মত্তবদ্রাজন্ন প্রাজ্ঞায়ত কিংচন
43.79
গজো গজেন সমরে রথী চ রথিনং যয়ৌ
অশ্বোঽশ্বং সমভিপ্রেত্য পদাতিশ্চ পদাতিনম্
43.80
ততো যুদ্ধং সুদুর্ধর্ষং ব্যাকুলং সমপদ্যত
শূরাণাং সমরে তত্র সমাসাদ্য পরস্পরম্
43.81
তত্র দেবর্ষয়ঃ সিদ্ধাশ্চারণাশ্চ সমাগতাঃ
প্রৈক্ষন্ত তদ্রণং ঘোরং দেবাসুররণোপমম্
43.82
ততো দন্তিসহস্রাণি রথানাং চাপি মারিষ
অশ্বৌঘাঃ পুরুষৌঘাশ্চ বিপরীতং সমায়য়ুঃ
43.83
তত্র তত্রৈব দৃশ্যন্তে রথবারণপত্তয়ঃ
সাদিনশ্চ নরব্যাঘ্র যুধ্যমানা মুহুর্মুহুঃ