Utshovঅধ্যায় 42
42.1
ধৃতরাষ্ট্র উবাচ
এবং ব্যূঢেষ্বনীকেষু মামকেষ্বিতরেষু চ
কে পূর্বং প্রাহরংস্তত্র কুরবঃ পাণ্ডবাস্তথা
42.2
সংজয় উবাচ
ভ্রাতৃভিঃ সহিতো রাজন্পুত্রো দুর্যোধনস্তব
ভীষ্মং প্রমুখতঃ কৃত্বা প্রয়য়ৌ সহ সেনয়া
42.3
তথৈব পাণ্ডবাঃ সর্বে ভীমসেনপুরোগমাঃ
ভীষ্মেণ যুদ্ধমিচ্ছন্তঃ প্রয়য়ুর্হৃষ্টমানসাঃ
42.4
ক্ষ্বেডাঃ কিলকিলাশব্দাঃ ক্রকচা গোবিষাণিকাঃ
ভেরীমৃদঙ্গমুরজা হয়কুঞ্জরনিস্বনাঃ
42.5
উভয়োঃ সেনয়ো রাজংস্ততস্তেঽস্মান্সমাদ্রবন্
বয়ং প্রতিনদন্তশ্চ তদাসীত্তুমুলং মহৎ
42.6
মহান্ত্যনীকানি মহাসমুচ্ছ্রয়ে; সমাগমে পাণ্ডবধার্তরাষ্ট্রয়োঃ
চকম্পিরে শঙ্খমৃদঙ্গনিস্বনৈঃ; প্রকম্পিতানীব বনানি বায়ুনা
42.7
নরেন্দ্রনাগাশ্বরথাকুলানা;মভ্যায়তীনামশিবে মুহূর্তে
বভূব ঘোষস্তুমুলশ্চমূনাং; বাতোদ্ধুতানামিব সাগরাণাম্
42.8
তস্মিন্সমুত্থিতে শব্দে তুমুলে লোমহর্ষণে
ভীমসেনো মহাবাহুঃ প্রাণদদ্গোবৃষো যথা
42.9
শঙ্খদুন্দুভিনির্ঘোষং বারণানাং চ বৃংহিতম্
সিংহনাদং চ সৈন্যানাং ভীমসেনরবোঽভ্যভূৎ
42.10
হয়ানাং হেষমাণানামনীকেষু সহস্রশঃ
সর্বানভ্যভবচ্ছব্দান্ভীমসেনস্য নিস্বনঃ
42.11
তং শ্রুত্বা নিনদং তস্য সৈন্যাস্তব বিতত্রসুঃ
জীমূতস্যেব নদতঃ শক্রাশনিসমস্বনম্
42.12
বাহনানি চ সর্বাণি শকৃন্মূত্রং প্রসুস্রুবুঃ
শব্দেন তস্য বীরস্য সিংহস্যেবেতরে মৃগাঃ
42.13
দর্শয়ন্ঘোরমাত্মানং মহাভ্রমিব নাদয়ন্
বিভীষয়ংস্তব সুতাংস্তব সেনাং সমভ্যয়াৎ
42.14
তমায়ান্তং মহেষ্বাসং সোদর্যাঃ পর্যবারয়ন্
ছাদয়ন্তঃ শরব্রাতৈর্মেঘা ইব দিবাকরম্
42.15
দুর্যোধনশ্চ পুত্রস্তে দুর্মুখো দুঃসহঃ শলঃ
দুঃশাসনশ্চাতিরথস্তথা দুর্মর্ষণো নৃপ
42.16
বিবিংশতিশ্চিত্রসেনো বিকর্ণশ্চ মহারথঃ
পুরুমিত্রো জয়ো ভোজঃ সৌমদত্তিশ্চ বীর্যবান্
42.17
মহাচাপানি ধুন্বন্তো জলদা ইব বিদ্যুতঃ
আদদানাশ্চ নারাচান্নির্মুক্তাশীবিষোপমান্
42.18
অথ তান্দ্রৌপদীপুত্রাঃ সৌভদ্রশ্চ মহারথঃ
নকুলঃ সহদেবশ্চ ধৃষ্টদ্যুম্নশ্চ পার্ষতঃ
42.19
ধার্তরাষ্ট্রান্প্রতিয়য়ুরর্দয়ন্তঃ শিতৈঃ শরৈঃ
বজ্রৈরিব মহাবেগৈঃ শিখরাণি ধরাভৃতাম্
42.20
তস্মিন্প্রথমসংমর্দে ভীমজ্যাতলনিস্বনে
তাবকানাং পরেষাং চ নাসীত্কশ্চিত্পরাঙ্মুখঃ
42.21
লাঘবং দ্রোণশিষ্যাণামপশ্যং ভরতর্ষভ
নিমিত্তবেধিনাং রাজঞ্শরানুত্সৃজতাং ভৃশম্
42.22
নোপশাম্যতি নির্ঘোষো ধনুষাং কূজতাং তথা
বিনিশ্চেরুঃ শরা দীপ্তা জ্যোতীংষীব নভস্তলাৎ
42.23
সর্বে ত্বন্যে মহীপালাঃ প্রেক্ষকা ইব ভারত
দদৃশুর্দর্শনীয়ং তং ভীমং জ্ঞাতিসমাগমম্
42.24
ততস্তে জাতসংরম্ভাঃ পরস্পরকৃতাগসঃ
অন্যোন্যস্পর্ধয়া রাজন্ব্যায়চ্ছন্ত মহারথাঃ
42.25
কুরুপাণ্ডবসেনে তে হস্ত্যশ্বরথসংকুলে
শুশুভাতে রণেঽতীব পটে চিত্রগতে ইব
42.26
ততস্তে পার্থিবাঃ সর্বে প্রগৃহীতশরাসনাঃ
সহসৈন্যাঃ সমাপেতুঃ পুত্রস্য তব শাসনাৎ
42.27
যুধিষ্ঠিরেণ চাদিষ্টাঃ পার্থিবাস্তে সহস্রশঃ
বিনদন্তঃ সমাপেতুঃ পুত্রস্য তব বাহিনীম্
42.28
উভয়োঃ সেনয়োস্তীব্রঃ সৈন্যানাং স সমাগমঃ
অন্তর্ধীয়ত চাদিত্যঃ সৈন্যেন রজসাবৃতঃ
42.29
প্রয়ুদ্ধানাং প্রভগ্নানাং পুনরাবর্ততামপি
নাত্র স্বেষাং পরেষাং বা বিশেষঃ সমজায়ত
42.30
তস্মিংস্তু তুমুলে যুদ্ধে বর্তমানে মহাভয়ে
অতি সর্বাণ্যনীকানি পিতা তেঽভিব্যরোচত