Utshovঅধ্যায় 41
41.1
সংজয় উবাচ
ততো ধনংজয়ং দৃষ্ট্বা বাণগাণ্ডীবধারিণম্
পুনরেব মহানাদং ব্যসৃজন্ত মহারথাঃ
41.2
পাণ্ডবাঃ সোমকাশ্চৈব যে চৈষামনুয়ায়িনঃ
দধ্মুশ্চ মুদিতাঃ শঙ্খান্বীরাঃ সাগরসংভবান্
41.3
ততো ভের্যশ্চ পেশ্যশ্চ ক্রকচা গোবিষাণিকাঃ
সহসৈবাভ্যহন্যন্ত ততঃ শব্দো মহানভূৎ
41.4
অথ দেবাঃ সগন্ধর্বাঃ পিতরশ্চ জনেশ্বর
সিদ্ধচারণসংঘাশ্চ সমীয়ুস্তে দিদৃক্ষয়া
41.5
ঋষয়শ্চ মহাভাগাঃ পুরস্কৃত্য শতক্রতুম্
সমীয়ুস্তত্র সহিতা দ্রষ্টুং তদ্বৈশসং মহৎ
41.6
ততো যুধিষ্ঠিরো দৃষ্ট্বা যুদ্ধায় সুসমুদ্যতে
তে সেনে সাগরপ্রখ্যে মুহুঃ প্রচলিতে নৃপ
41.7
বিমুচ্য কবচং বীরো নিক্ষিপ্য চ বরায়ুধম্
অবরুহ্য রথাত্তূর্ণং পদ্ভ্যামেব কৃতাঞ্জলিঃ
41.8
পিতামহমভিপ্রেক্ষ্য ধর্মরাজো যুধিষ্ঠিরঃ
বাগ্যতঃ প্রয়য়ৌ যেন প্রাঙ্মুখো রিপুবাহিনীম্
41.9
তং প্রয়ান্তমভিপ্রেক্ষ্য কুন্তীপুত্রো ধনংজয়ঃ
অবতীর্য রথাত্তূর্ণং ভ্রাতৃভিঃ সহিতোঽন্বয়াৎ
41.10
বাসুদেবশ্চ ভগবান্পৃষ্ঠতোঽনুজগাম হ
যথামুখ্যাশ্চ রাজানস্তমন্বাজগ্মুরুত্সুকাঃ
41.11
অর্জুন উবাচ
কিং তে ব্যবসিতং রাজন্যদস্মানপহায় বৈ
পদ্ভ্যামেব প্রয়াতোঽসি প্রাঙ্মুখো রিপুবাহিনীম্
41.12
ভীমসেন উবাচ
ক্ব গমিষ্যসি রাজেন্দ্র নিক্ষিপ্তকবচায়ুধঃ
দংশিতেষ্বরিসৈন্যেষু ভ্রাতৄনুত্সৃজ্য পার্থিব
41.13
নকুল উবাচ
এবংগতে ত্বয়ি জ্যেষ্ঠে মম ভ্রাতরি ভারত
ভীর্মে দুনোতি হৃদয়ং ব্রূহি গন্তা ভবান্ক্ব নু
41.14
সহদেব উবাচ
অস্মিন্রণসমূহে বৈ বর্তমানে মহাভয়ে
যোদ্ধব্যে ক্ব নু গন্তাসি শত্রূনভিমুখো নৃপ
41.15
সংজয় উবাচ
এবমাভাষ্যমাণোঽপি ভ্রাতৃভিঃ কুরুনন্দন
নোবাচ বাগ্যতঃ কিংচিদ্গচ্ছত্যেব যুধিষ্ঠিরঃ
41.16
তানুবাচ মহাপ্রাজ্ঞো বাসুদেবো মহামনাঃ
অভিপ্রায়োঽস্য বিজ্ঞাতো ময়েতি প্রহসন্নিব
41.17
এষ ভীষ্মং তথা দ্রোণং গৌতমং শল্যমেব চ
অনুমান্য গুরূন্সর্বান্যোত্স্যতে পার্থিবোঽরিভিঃ
41.18
শ্রূয়তে হি পুরাকল্পে গুরূনননুমান্য যঃ
যুধ্যতে স ভবেদ্ব্যক্তমপধ্যাতো মহত্তরৈঃ
41.19
অনুমান্য যথাশাস্ত্রং যস্তু যুধ্যেন্মহত্তরৈঃ
ধ্রুবস্তস্য জয়ো যুদ্ধে ভবেদিতি মতির্মম
41.20
এবং ব্রুবতি কৃষ্ণে তু ধার্তরাষ্ট্রচমূং প্রতি
হাহাকারো মহানাসীন্নিঃশব্দাস্ত্বপরেঽভবন্
41.21
দৃষ্ট্বা যুধিষ্ঠিরং দূরাদ্ধার্তরাষ্ট্রস্য সৈনিকাঃ
মিথঃ সংকথয়াং চক্রুর্নেশোঽস্তি কুলপাংসনঃ
41.22
ব্যক্তং ভীত ইবাভ্যেতি রাজাসৌ ভীষ্মমন্তিকাৎ
যুধিষ্ঠিরঃ সসোদর্যঃ শরণার্থং প্রয়াচকঃ
41.23
ধনংজয়ে কথং নাথে পাণ্ডবে চ বৃকোদরে
নকুলে সহদেবে চ ভীতোঽভ্যেতি চ পাণ্ডবঃ
41.24
ন নূনং ক্ষত্রিয়কুলে জাতঃ সংপ্রথিতে ভুবি
যথাস্য হৃদয়ং ভীতমল্পসত্ত্বস্য সংয়ুগে
41.25
ততস্তে ক্ষত্রিয়াঃ সর্বে প্রশংসন্তি স্ম কৌরবান্
হৃষ্টাঃ সুমনসো ভূত্বা চৈলানি দুধুবুঃ পৃথক্
41.26
ব্যনিন্দন্ত ততঃ সর্বে যোধাস্তত্র বিশাং পতে
যুধিষ্ঠিরং সসোদর্যং সহিতং কেশবেন হ
41.27
ততস্তত্কৌরবং সৈন্যং ধিক্কৃত্বা তু যুধিষ্ঠিরম্
নিঃশব্দমভবত্তূর্ণং পুনরেব বিশাং পতে
41.28
কিং নু বক্ষ্যতি রাজাসৌ কিং ভীষ্মঃ প্রতিবক্ষ্যতি
কিং ভীমঃ সমরশ্লাঘী কিং নু কৃষ্ণার্জুনাবিতি
41.29
বিবক্ষিতং কিমস্যেতি সংশয়ঃ সুমহানভূৎ
উভয়োঃ সেনয়ো রাজন্যুধিষ্ঠিরকৃতে তদা
41.30
স বিগাহ্য চমূং শত্রোঃ শরশক্তিসমাকুলাম্
ভীষ্মমেবাভ্যয়াত্তূর্ণং ভ্রাতৃভিঃ পরিবারিতঃ
41.31
তমুবাচ ততঃ পাদৌ করাভ্যাং পীড্য পাণ্ডবঃ
ভীষ্মং শাংতনবং রাজা যুদ্ধায় সমুপস্থিতম্
41.32
যুধিষ্ঠির উবাচ
আমন্ত্রয়ে ত্বাং দুর্ধর্ষ যোত্স্যে তাত ত্বয়া সহ
অনুজানীহি মাং তাত আশিষশ্চ প্রয়োজয়
41.33
ভীষ্ম উবাচ
যদ্যেবং নাভিগচ্ছেথা যুধি মাং পৃথিবীপতে
শপেয়ং ত্বাং মহারাজ পরাভাবায় ভারত
41.34
প্রীতোঽস্মি পুত্র যুধ্যস্ব জয়মাপ্নুহি পাণ্ডব
যত্তেঽভিলষিতং চান্যত্তদবাপ্নুহি সংয়ুগে
41.35
ব্রিয়তাং চ বরঃ পার্থ কিমস্মত্তোঽভিকাঙ্ক্ষসি
এবং গতে মহারাজ ন তবাস্তি পরাজয়ঃ
41.36
অর্থস্য পুরুষো দাসো দাসস্ত্বর্থো ন কস্যচিৎ
ইতি সত্যং মহারাজ বদ্ধোঽস্ম্যর্থেন কৌরবৈঃ
41.37
অতস্ত্বাং ক্লীববদ্বাক্যং ব্রবীমি কুরুনন্দন
হৃতোঽস্ম্যর্থেন কৌরব্য যুদ্ধাদন্যত্কিমিচ্ছসি
41.38
যুধিষ্ঠির উবাচ
মন্ত্রয়স্ব মহাপ্রাজ্ঞ হিতৈষী মম নিত্যশঃ
যুধ্যস্ব কৌরবস্যার্থে মমৈষ সততং বরঃ
41.39
ভীষ্ম উবাচ
রাজন্কিমত্র সাহ্যং তে করোমি কুরুনন্দন
কামং যোত্স্যে পরস্যার্থে ব্রূহি যত্তে বিবক্ষিতম্
41.40
যুধিষ্ঠির উবাচ
কথং জয়েয়ং সংগ্রামে ভবন্তমপরাজিতম্
এতন্মে মন্ত্রয় হিতং যদি শ্রেয়ঃ প্রপশ্যসি
41.41
ভীষ্ম উবাচ
ন তং পশ্যামি কৌন্তেয় যো মাং যুধ্যন্তমাহবে
বিজয়েত পুমান্কশ্চিদপি সাক্ষাচ্ছতক্রতুঃ
41.42
যুধিষ্ঠির উবাচ
হন্ত পৃচ্ছামি তস্মাত্ত্বাং পিতামহ নমোঽস্তু তে
জয়োপায়ং ব্রবীহি ত্বমাত্মনঃ সমরে পরৈঃ
41.43
ভীষ্ম উবাচ
ন শত্রুং তাত পশ্যামি সমরে যো জয়েত মাম্
ন তাবন্মৃত্যুকালো মে পুনরাগমনং কুরু
41.44
সংজয় উবাচ
ততো যুধিষ্ঠিরো বাক্যং ভীষ্মস্য কুরুনন্দন
শিরসা প্রতিজগ্রাহ ভূয়স্তমভিবাদ্য চ
41.45
প্রায়াত্পুনর্মহাবাহুরাচার্যস্য রথং প্রতি
পশ্যতাং সর্বসৈন্যানাং মধ্যেন ভ্রাতৃভিঃ সহ
41.46
স দ্রোণমভিবাদ্যাথ কৃত্বা চৈব প্রদক্ষিণম্
উবাচ বাচা দুর্ধর্ষমাত্মনিঃশ্রেয়সং বচঃ
41.47
আমন্ত্রয়ে ত্বাং ভগবন্যোত্স্যে বিগতকল্মষঃ
জয়েয়ং চ রিপূন্সর্বাননুজ্ঞাতস্ত্বয়া দ্বিজ
41.48
দ্রোণ উবাচ
যদি মাং নাভিগচ্ছেথা যুদ্ধায় কৃতনিশ্চয়ঃ
শপেয়ং ত্বাং মহারাজ পরাভাবায় সর্বশঃ
41.49
তদ্যুধিষ্ঠির তুষ্টোঽস্মি পূজিতশ্চ ত্বয়ানঘ
অনুজানামি যুধ্যস্ব বিজয়ং সমবাপ্নুহি
41.50
করবাণি চ তে কামং ব্রূহি যত্তেঽভিকাঙ্ক্ষিতম্
এবং গতে মহারাজ যুদ্ধাদন্যত্কিমিচ্ছসি
41.51
অর্থস্য পুরুষো দাসো দাসস্ত্বর্থো ন কস্যচিৎ
ইতি সত্যং মহারাজ বদ্ধোঽস্ম্যর্থেন কৌরবৈঃ
41.52
অতস্ত্বাং ক্লীববদ্ব্রূমো যুদ্ধাদন্যত্কিমিচ্ছসি
যোত্স্যামি কৌরবস্যার্থে তবাশাস্যো জয়ো ময়া
41.53
যুধিষ্ঠির উবাচ
জয়মাশাস্স্ব মে ব্রহ্মন্মন্ত্রয়স্ব চ মদ্ধিতম্
যুধ্যস্ব কৌরবস্যার্থে বর এষ বৃতো ময়া
41.54
দ্রোণ উবাচ
ধ্রুবস্তে বিজয়ো রাজন্যস্য মন্ত্রী হরিস্তব
অহং চ ত্বাভিজানামি রণে শত্রূন্বিজেষ্যসি
41.55
যতো ধর্মস্ততঃ কৃষ্ণো যতঃ কৃষ্ণস্ততো জয়ঃ
যুধ্যস্ব গচ্ছ কৌন্তেয় পৃচ্ছ মাং কিং ব্রবীমি তে
41.56
যুধিষ্ঠির উবাচ
পৃচ্ছামি ত্বাং দ্বিজশ্রেষ্ঠ শৃণু মে যদ্বিবক্ষিতম্
কথং জয়েয়ং সংগ্রামে ভবন্তমপরাজিতম্
41.57
দ্রোণ উবাচ
ন তেঽস্তি বিজয়স্তাবদ্যাবদ্যুধ্যাম্যহং রণে
মমাশু নিধনে রাজন্যতস্ব সহ সোদরৈঃ
41.58
যুধিষ্ঠির উবাচ
হন্ত তস্মান্মহাবাহো বধোপায়ং বদাত্মনঃ
আচার্য প্রণিপত্যৈষ পৃচ্ছামি ত্বাং নমোঽস্তু তে
41.59
দ্রোণ উবাচ
ন শত্রুং তাত পশ্যামি যো মাং হন্যাদ্রণে স্থিতম্
যুধ্যমানং সুসংরব্ধং শরবর্ষৌঘবর্ষিণম্
41.60
ঋতে প্রায়গতং রাজন্ন্যস্তশস্ত্রমচেতনম্
হন্যান্মাং যুধি যোধানাং সত্যমেতদ্ব্রবীমি তে
41.61
শস্ত্রং চাহং রণে জহ্যাং শ্রুত্বা সুমহদপ্রিয়ম্
শ্রদ্ধেয়বাক্যাত্পুরুষাদেতত্সত্যং ব্রবীমি তে
41.62
সংজয় উবাচ
এতচ্ছ্রুত্বা মহারাজ ভারদ্বাজস্য ধীমতঃ
অনুমান্য তমাচার্যং প্রায়াচ্ছারদ্বতং প্রতি
41.63
সোঽভিবাদ্য কৃপং রাজা কৃত্বা চাপি প্রদক্ষিণম্
উবাচ দুর্ধর্ষতমং বাক্যং বাক্যবিশারদঃ
41.64
অনুমানয়ে ত্বাং যোত্স্যামি গুরো বিগতকল্মষঃ
জয়েয়ং চ রিপূন্সর্বাননুজ্ঞাতস্ত্বয়ানঘ
41.65
কৃপ উবাচ
যদি মাং নাভিগচ্ছেথা যুদ্ধায় কৃতনিশ্চয়ঃ
শপেয়ং ত্বাং মহারাজ পরাভাবায় সর্বশঃ
41.66
অর্থস্য পুরুষো দাসো দাসস্ত্বর্থো ন কস্যচিৎ
ইতি সত্যং মহারাজ বদ্ধোঽস্ম্যর্থেন কৌরবৈঃ
41.67
তেষামর্থে মহারাজ যোদ্ধব্যমিতি মে মতিঃ
অতস্ত্বাং ক্লীববদ্ব্রূমি যুদ্ধাদন্যত্কিমিচ্ছসি
41.68
যুধিষ্ঠির উবাচ
হন্ত পৃচ্ছামি তে তস্মাদাচার্য শৃণু মে বচঃ
41.69
সংজয় উবাচ
ইত্যুক্ত্বা ব্যথিতো রাজা নোবাচ গতচেতনঃ
তং গৌতমঃ প্রত্যুবাচ বিজ্ঞায়াস্য বিবক্ষিতম্
অবধ্যোঽহং মহীপাল যুধ্যস্ব জয়মাপ্নুহি
41.70
প্রীতস্ত্বভিগমেনাহং জয়ং তব নরাধিপ
আশাসিষ্যে সদোত্থায় সত্যমেতদ্ব্রবীমি তে
41.71
এতচ্ছ্রুত্বা মহারাজ গৌতমস্য বচস্তদা
অনুমান্য কৃপং রাজা প্রয়য়ৌ যেন মদ্ররাট্
41.72
স শল্যমভিবাদ্যাথ কৃত্বা চাভিপ্রদক্ষিণম্
উবাচ রাজা দুর্ধর্ষমাত্মনিঃশ্রেয়সং বচঃ
41.73
অনুমানয়ে ত্বাং যোত্স্যামি গুরো বিগতকল্মষঃ
জয়েয়ং চ মহারাজ অনুজ্ঞাতস্ত্বয়া রিপূন্
41.74
শল্য উবাচ
যদি মাং নাভিগচ্ছেথা যুদ্ধায় কৃতনিশ্চয়ঃ
শপেয়ং ত্বাং মহারাজ পরাভাবায় বৈ রণে
41.75
তুষ্টোঽস্মি পূজিতশ্চাস্মি যত্কাঙ্ক্ষসি তদস্তু তে
অনুজানামি চৈব ত্বাং যুধ্যস্ব জয়মাপ্নুহি
41.76
ব্রূহি চৈব পরং বীর কেনার্থঃ কিং দদামি তে
এবং গতে মহারাজ যুদ্ধাদন্যত্কিমিচ্ছসি
41.77
অর্থস্য পুরুষো দাসো দাসস্ত্বর্থো ন কস্যচিৎ
ইতি সত্যং মহারাজ বদ্ধোঽস্ম্যর্থেন কৌরবৈঃ
41.78
করিষ্যামি হি তে কামং ভাগিনেয় যথেপ্সিতম্
ব্রবীম্যতঃ ক্লীববত্ত্বাং যুদ্ধাদন্যত্কিমিচ্ছসি
41.79
যুধিষ্ঠির উবাচ
মন্ত্রয়স্ব মহারাজ নিত্যং মদ্ধিতমুত্তমম্
কামং যুধ্য পরস্যার্থে বরমেতদ্বৃণোম্যহম্
41.80
শল্য উবাচ
ব্রূহি কিমত্র সাহ্যং তে করোমি নৃপসত্তম
কামং যোত্স্যে পরস্যার্থে বৃতোঽস্ম্যর্থেন কৌরবৈঃ
41.81
যুধিষ্ঠির উবাচ
স এব মে বরঃ সত্য উদ্যোগে যস্ত্বয়া কৃতঃ
সূতপুত্রস্য সংগ্রামে কার্যস্তেজোবধস্ত্বয়া
41.82
শল্য উবাচ
সংপত্স্যত্যেষ তে কামঃ কুন্তীপুত্র যথেপ্সিতঃ
গচ্ছ যুধ্যস্ব বিস্রব্ধং প্রতিজানে জয়ং তব
41.83
সংজয় উবাচ
অনুমান্যাথ কৌন্তেয়ো মাতুলং মদ্রকেশ্বরম্
নির্জগাম মহাসৈন্যাদ্ভ্রাতৃভিঃ পরিবারিতঃ
41.84
বাসুদেবস্তু রাধেয়মাহবেঽভিজগাম বৈ
তত এনমুবাচেদং পাণ্ডবার্থে গদাগ্রজঃ
41.85
শ্রুতং মে কর্ণ ভীষ্মস্য দ্বেষাত্কিল ন যোত্স্যসি
অস্মান্বরয় রাধেয় যাবদ্ভীষ্মো ন হন্যতে
41.86
হতে তু ভীষ্মে রাধেয় পুনরেষ্যসি সংয়ুগে
ধার্তরাষ্ট্রস্য সাহায্যং যদি পশ্যসি চেত্সমম্
41.87
কর্ণ উবাচ
ন বিপ্রিয়ং করিষ্যামি ধার্তরাষ্ট্রস্য কেশব
ত্যক্তপ্রাণং হি মাং বিদ্ধি দুর্যোধনহিতৈষিণম্
41.88
সংজয় উবাচ
তচ্ছ্রুত্বা বচনং কৃষ্ণঃ সংন্যবর্তত ভারত
যুধিষ্ঠিরপুরোগৈশ্চ পাণ্ডবৈঃ সহ সংগতঃ
41.89
অথ সৈন্যস্য মধ্যে তু প্রাক্রোশত্পাণ্ডবাগ্রজঃ
যোঽস্মান্বৃণোতি তদহং বরয়ে সাহ্যকারণাৎ
41.90
অথ তান্সমভিপ্রেক্ষ্য যুয়ুত্সুরিদমব্রবীৎ
প্রীতাত্মা ধর্মরাজানং কুন্তীপুত্রং যুধিষ্ঠিরম্
41.91
অহং যোত্স্যামি মিষতঃ সংয়ুগে ধার্তরাষ্ট্রজান্
যুষ্মদর্থে মহারাজ যদি মাং বৃণুষেঽনঘ
41.92
যুধিষ্ঠির উবাচ
এহ্যেহি সর্বে যোত্স্যামস্তব ভ্রাতৄনপণ্ডিতান্
যুয়ুত্সো বাসুদেবশ্চ বয়ং চ ব্রূম সর্বশঃ
41.93
বৃণোমি ত্বাং মহাবাহো যুধ্যস্ব মম কারণাৎ
ত্বয়ি পিণ্ডশ্চ তন্তুশ্চ ধৃতরাষ্ট্রস্য দৃশ্যতে
41.94
ভজস্বাস্মান্রাজপুত্র ভজমানান্মহাদ্যুতে
ন ভবিষ্যতি দুর্বুদ্ধির্ধার্তরাষ্ট্রোঽত্যমর্ষণঃ
41.95
সংজয় উবাচ
ততো যুয়ুত্সুঃ কৌরব্যঃ পরিত্যজ্য সুতাংস্তব
জগাম পাণ্ডুপুত্রাণাং সেনাং বিশ্রাব্য দুন্দুভিম্
41.96
ততো যুধিষ্ঠিরো রাজা সংপ্রহৃষ্টঃ সহানুজৈঃ
জগ্রাহ কবচং ভূয়ো দীপ্তিমত্কনকোজ্জ্বলম্
41.97
প্রত্যপদ্যন্ত তে সর্বে রথান্স্বান্পুরুষর্ষভাঃ
ততো ব্যূহং যথাপূর্বং প্রত্যব্যূহন্ত তে পুনঃ
41.98
অবাদয়ন্দুন্দুভীংশ্চ শতশশ্চৈব পুষ্করান্
সিংহনাদাংশ্চ বিবিধান্বিনেদুঃ পুরুষর্ষভাঃ
41.99
রথস্থান্পুরুষব্যাঘ্রান্পাণ্ডবান্প্রেক্ষ্য পার্থিবাঃ
ধৃষ্টদ্যুম্নাদয়ঃ সর্বে পুনর্জহৃষিরে মুদা
41.100
গৌরবং পাণ্ডুপুত্রাণাং মান্যান্মানয়তাং চ তান্
দৃষ্ট্বা মহীক্ষিতস্তত্র পূজয়াং চক্রিরে ভৃশম্
41.101
সৌহৃদং চ কৃপাং চৈব প্রাপ্তকালং মহাত্মনাম্
দয়াং চ জ্ঞাতিষু পরাং কথয়াং চক্রিরে নৃপাঃ
41.102
সাধু সাধ্বিতি সর্বত্র নিশ্চেরুঃ স্তুতিসংহিতাঃ
বাচঃ পুণ্যাঃ কীর্তিমতাং মনোহৃদয়হর্ষিণীঃ
41.103
ম্লেচ্ছাশ্চার্যাশ্চ যে তত্র দদৃশুঃ শুশ্রুবুস্তদা
বৃত্তং তত্পাণ্ডুপুত্রাণাং রুরুদুস্তে সগদ্গদাঃ
41.104
ততো জঘ্নুর্মহাভেরীঃ শতশশ্চৈব পুষ্করান্
শঙ্খাংশ্চ গোক্ষীরনিভান্দধ্মুর্হৃষ্টা মনস্বিনঃ