Utshovঅধ্যায় 98
98.1
ধৃতরাষ্ট্র উবাচ
কথং দ্রোণো মহেষ্বাসঃ পাণ্ডবশ্চ ধনংজয়ঃ
সমীয়তূ রণে শূরৌ তন্মমাচক্ষ্ব সংজয়
98.2
প্রিয়ো হি পাণ্ডবো নিত্যং ভারদ্বাজস্য ধীমতঃ
আচার্যশ্চ রণে নিত্যং প্রিয়ঃ পার্থস্য সংজয়
98.3
তাবুভৌ রথিনৌ সংখ্যে দৃপ্তৌ সিংহাবিবোত্কটৌ
কথং সমীয়তুর্যুদ্ধে ভারদ্বাজধনংজয়ৌ
98.4
সংজয় উবাচ
ন দ্রোণঃ সমরে পার্থং জানীতে প্রিয়মাত্মনঃ
ক্ষত্রধর্মং পুরস্কৃত্য পার্থো বা গুরুমাহবে
98.5
ন ক্ষত্রিয়া রণে রাজন্বর্জয়ন্তি পরস্পরম্
নির্মর্যাদং হি যুধ্যন্তে পিতৃভির্ভ্রাতৃভিঃ সহ
98.6
রণে ভারত পার্থেন দ্রোণো বিদ্ধস্ত্রিভিঃ শরৈঃ
নাচিন্তয়ত তান্বাণান্পার্থচাপচ্যুতান্যুধি
98.7
শরবৃষ্ট্যা পুনঃ পার্থশ্ছাদয়ামাস তং রণে
প্রজজ্বাল চ রোষেণ গহনেঽগ্নিরিবোত্থিতঃ
98.8
ততোঽর্জুনং রণে দ্রোণঃ শরৈঃ সংনতপর্বভিঃ
বারয়ামাস রাজেন্দ্র নচিরাদিব ভারত
98.9
ততো দুর্যোধনো রাজা সুশর্মাণমচোদয়ৎ
দ্রোণস্য সমরে রাজন্পার্ষ্ণিগ্রহণকারণাৎ
98.10
ত্রিগর্তরাডপি ক্রুদ্ধো ভৃশমায়ম্য কার্মুকম্
ছাদয়ামাস সমরে পার্থং বাণৈরয়োমুখৈঃ
98.11
তাভ্যাং মুক্তাঃ শরা রাজন্নন্তরিক্ষে বিরেজিরে
হংসা ইব মহারাজ শরত্কালে নভস্তলে
98.12
তে শরাঃ প্রাপ্য কৌন্তেয়ং সমস্তা বিবিশুঃ প্রভো
ফলভারনতং যদ্বত্স্বাদুবৃক্ষং বিহংগমাঃ
98.13
অর্জুনস্তু রণে নাদং বিনদ্য রথিনাং বরঃ
ত্রিগর্তরাজং সমরে সপুত্রং বিব্যধে শরৈঃ
98.14
তে বধ্যমানাঃ পার্থেন কালেনেব যুগক্ষয়ে
পার্থমেবাভ্যবর্তন্ত মরণে কৃতনিশ্চয়াঃ
মুমুচুঃ শরবৃষ্টিং চ পাণ্ডবস্য রথং প্রতি
98.15
শরবৃষ্টিং ততস্তাং তু শরবর্ষেণ পাণ্ডবঃ
প্রতিজগ্রাহ রাজেন্দ্র তোয়বৃষ্টিমিবাচলঃ
98.16
তত্রাদ্ভুতমপশ্যাম বীভত্সোর্হস্তলাঘবম্
বিমুক্তাং বহুভিঃ শূরৈঃ শস্ত্রবৃষ্টিং দুরাসদাম্
98.17
যদেকো বারয়ামাস মারুতোঽভ্রগণানিব
কর্মণা তেন পার্থস্য তুতুষুর্দেবদানবাঃ
98.18
অথ ক্রুদ্ধো রণে পার্থস্ত্রিগর্তান্প্রতি ভারত
মুমোচাস্ত্রং মহারাজ বায়ব্যং পৃতনামুখে
98.19
প্রাদুরাসীত্ততো বায়ুঃ ক্ষোভয়াণো নভস্তলম্
পাতয়ন্বৈ তরুগণান্বিনিঘ্নংশ্চৈব সৈনিকান্
98.20
ততো দ্রোণোঽভিবীক্ষ্যৈব বায়ব্যাস্ত্রং সুদারুণম্
শৈলমন্যন্মহারাজ ঘোরমস্ত্রং মুমোচ হ
98.21
দ্রোণেন যুধি নির্মুক্তে তস্মিন্নস্ত্রে মহামৃধে
প্রশশাম ততো বায়ুঃ প্রসন্নাশ্চাভবন্দিশঃ
98.22
ততঃ পাণ্ডুসুতো বীরস্ত্রিগর্তস্য রথব্রজান্
নিরুত্সাহান্রণে চক্রে বিমুখান্বিপরাক্রমান্
98.23
ততো দুর্যোধনো রাজা কৃপশ্চ রথিনাং বরঃ
অশ্বত্থামা ততঃ শল্যঃ কাম্বোজশ্চ সুদক্ষিণঃ
98.24
বিন্দানুবিন্দাবাবন্ত্যৌ বাহ্লিকশ্চ সবাহ্লিকঃ
মহতা রথবংশেন পার্থস্যাবারয়ন্দিশঃ
98.25
তথৈব ভগদত্তশ্চ শ্রুতায়ুশ্চ মহাবলঃ
গজানীকেন ভীমস্য তাববারয়তাং দিশঃ
98.26
ভূরিশ্রবাঃ শলশ্চৈব সৌবলশ্চ বিশাং পতে
শরৌঘৈর্বিবিধৈস্তূর্ণং মাদ্রীপুত্রাববারয়ন্
98.27
ভীষ্মস্তু সহিতঃ সর্বৈর্ধার্তরাষ্ট্রস্য সৈনিকৈঃ
যুধিষ্ঠিরং সমাসাদ্য সর্বতঃ পর্যবারয়ৎ
98.28
আপতন্তং গজানীকং দৃষ্ট্বা পার্থো বৃকোদরঃ
লেলিহন্সৃক্কিণী বীরো মৃগরাডিব কাননে
98.29
ততস্তু রথিনাং শ্রেষ্ঠো গদাং গৃহ্য মহাহবে
অবপ্লুত্য রথাত্তূর্ণং তব সৈন্যমভীষয়ৎ
98.30
তমুদ্বীক্ষ্য গদাহস্তং ততস্তে গজসাদিনঃ
পরিবব্রূ রণে যত্তা ভীমসেনং সমন্ততঃ
98.31
গজমধ্যমনুপ্রাপ্তঃ পাণ্ডবশ্চ ব্যরাজত
মেঘজালস্য মহতো যথা মধ্যগতো রবিঃ
98.32
ব্যধমত্স গজানীকং গদয়া পাণ্ডবর্ষভঃ
মহাভ্রজালমতুলং মাতরিশ্বেব সংততম্
98.33
তে বধ্যমানা বলিনা ভীমসেনেন দন্তিনঃ
আর্তনাদং রণে চক্রুর্গর্জন্তো জলদা ইব
98.34
বহুধা দারিতশ্চৈব বিষাণৈস্তত্র দন্তিভিঃ
ফুল্লাশোকনিভঃ পার্থঃ শুশুভে রণমূর্ধনি
98.35
বিষাণে দন্তিনং গৃহ্য নির্বিষাণমথাকরোৎ
বিষাণেন চ তেনৈব কুম্ভেঽভ্যাহত্য দন্তিনম্
পাতয়ামাস সমরে দণ্ডহস্ত ইবান্তকঃ
98.36
শোণিতাক্তাং গদাং বিভ্রন্মেদোমজ্জাকৃতচ্ছবিঃ
কৃতাঙ্গদঃ শোণিতেন রুদ্রবত্প্রত্যদৃশ্যত
98.37
এবং তে বধ্যমানাস্তু হতশেষা মহাগজাঃ
প্রাদ্রবন্ত দিশো রাজন্বিমৃদ্নন্তঃ স্বকং বলম্
98.38
দ্রবদ্ভিস্তৈর্মহানাগৈঃ সমন্তাদ্ভরতর্ষভ
দুর্যোধনবলং সর্বং পুনরাসীত্পরাঙ্মুখম্