Utshovঅধ্যায় 99
99.1
সংজয় উবাচ
মধ্যাহ্নে তু মহারাজ সংগ্রামঃ সমপদ্যত
লোকক্ষয়করো রৌদ্রো ভীষ্মস্য সহ সোমকৈঃ
99.2
গাঙ্গেয়ো রথিনাং শ্রেষ্ঠঃ পাণ্ডবানামনীকিনীম্
ব্যধমন্নিশিতৈর্বাণৈঃ শতশোঽথ সহস্রশঃ
99.3
সংমমর্দ চ তত্সৈন্যং পিতা দেবব্রতস্তব
ধান্যানামিব লূনানাং প্রকরং গোগণা ইব
99.4
ধৃষ্টদ্যুম্নঃ শিখণ্ডী চ বিরাটো দ্রুপদস্তথা
ভীষ্মমাসাদ্য সমরে শরৈর্জঘ্নুর্মহারথম্
99.5
ধৃষ্টদ্যুম্নং ততো বিদ্ধ্বা বিরাটং চ ত্রিভিঃ শরৈঃ
দ্রুপদস্য চ নারাচং প্রেষয়ামাস ভারত
99.6
তেন বিদ্ধা মহেষ্বাসা ভীষ্মেণামিত্রকর্শিনা
চুক্রুধুঃ সমরে রাজন্পাদস্পৃষ্টা ইবোরগাঃ
99.7
শিখণ্ডী তং চ বিব্যাধ ভরতানাং পিতামহম্
স্ত্রীময়ং মনসা ধ্যাত্বা নাস্মৈ প্রাহরদচ্যুতঃ
99.8
ধৃষ্টদ্যুম্নস্তু সমরে ক্রোধাদগ্নিরিব জ্বলন্
পিতামহং ত্রিভির্বাণৈর্বাহ্বোরুরসি চার্পয়ৎ
99.9
দ্রুপদঃ পঞ্চবিংশত্যা বিরাটো দশভিঃ শরৈঃ
শিখণ্ডী পঞ্চবিংশত্যা ভীষ্মং বিব্যাধ সায়কৈঃ
99.10
সোঽতিবিদ্ধো মহারাজ ভীষ্মঃ সংখ্যে মহাত্মভিঃ
বসন্তে পুষ্পশবলো রক্তাশোক ইবাবভৌ
99.11
তান্প্রত্যবিধ্যদ্গাঙ্গেয়স্ত্রিভিস্ত্রিভিরজিহ্মগৈঃ
দ্রুপদস্য চ ভল্লেন ধনুশ্চিচ্ছেদ মারিষ
99.12
সোঽন্যত্কার্মুকমাদায় ভীষ্মং বিব্যাধ পঞ্চভিঃ
সারথিং চ ত্রিভির্বাণৈঃ সুশিতৈ রণমূর্ধনি
99.13
ততো ভীমো মহারাজ দ্রৌপদ্যাঃ পঞ্চ চাত্মজাঃ
কেকয়া ভ্রাতরঃ পঞ্চ সাত্যকিশ্চৈব সাত্বতঃ
99.14
অভ্যদ্রবন্ত গাঙ্গেয়ং যুধিষ্ঠিরহিতেপ্সয়া
রিরক্ষিষন্তঃ পাঞ্চাল্যং ধৃষ্টদ্যুম্নমুখান্রণে
99.15
তথৈব তাবকাঃ সর্বে ভীষ্মরক্ষার্থমুদ্যতাঃ
প্রত্যুদ্যয়ুঃ পাণ্ডুসেনাং সহসৈন্যা নরাধিপ
99.16
তত্রাসীত্সুমহদ্যুদ্ধং তব তেষাং চ সংকুলম্
নরাশ্বরথনাগানাং যমরাষ্ট্রবিবর্ধনম্
99.17
রথী রথিনমাসাদ্য প্রাহিণোদ্যমসাদনম্
তথেতরান্সমাসাদ্য নরনাগাশ্বসাদিনঃ
99.18
অনয়ন্পরলোকায় শরৈঃ সংনতপর্বভিঃ
অস্ত্রৈশ্চ বিবিধৈর্ঘোরৈস্তত্র তত্র বিশাং পতে
99.19
রথাশ্চ রথিভির্হীনা হতসারথয়স্তথা
বিপ্রদ্রুতাশ্বাঃ সমরে দিশো জগ্মুঃ সমন্ততঃ
99.20
মর্দমানা নরান্রাজন্হয়াংশ্চ সুবহূন্রণে
বাতায়মানা দৃশ্যন্তে গন্ধর্বনগরোপমাঃ
99.21
রথিনশ্চ রথৈর্হীনা বর্মিণস্তেজসা যুতাঃ
কুণ্ডলোষ্ণীষিণঃ সর্বে নিষ্কাঙ্গদবিভূষিতাঃ
99.22
দেবপুত্রসমা রূপে শৌর্যে শক্রসমা যুধি
ঋদ্ধ্যা বৈশ্রবণং চাতি নয়েন চ বৃহস্পতিম্
99.23
সর্বলোকেশ্বরাঃ শূরাস্তত্র তত্র বিশাং পতে
বিপ্রদ্রুতা ব্যদৃশ্যন্ত প্রাকৃতা ইব মানবাঃ
99.24
দন্তিনশ্চ নরশ্রেষ্ঠ বিহীনা বরসাদিভিঃ
মৃদ্নন্তঃ স্বান্যনীকানি সংপেতুঃ সর্বশব্দগাঃ
99.25
বর্মভিশ্চামরৈশ্ছত্রৈঃ পতাকাভিশ্চ মারিষ
কক্ষ্যাভিরথ তোত্ত্রৈশ্চ ঘণ্টাভিস্তোমরৈস্তথা
99.26
বিশীর্ণৈর্বিপ্রধাবন্তো দৃশ্যন্তে স্ম দিশো দশ
নগমেঘপ্রতীকাশৈর্জলদোদয়নিস্বনৈঃ
99.27
তথৈব দন্তিভির্হীনান্গজারোহান্বিশাং পতে
প্রধাবন্তোঽন্বপশ্যাম তব তেষাং চ সংকুলে
99.28
নানাদেশসমুত্থাংশ্চ তুরগান্হেমভূষিতান্
বাতায়মানানদ্রাক্ষং শতশোঽথ সহস্রশঃ
99.29
অশ্বারোহান্হতৈরশ্বৈর্গৃহীতাসীন্সমন্ততঃ
দ্রবমাণানপশ্যাম দ্রাব্যমাণাংশ্চ সংয়ুগে
99.30
গজো গজং সমাসাদ্য দ্রবমাণং মহারণে
যয়ৌ বিমৃদ্নংস্তরসা পদাতীন্বাজিনস্তথা
99.31
তথৈব চ রথান্রাজন্সংমমর্দ রণে গজঃ
রথশ্চৈব সমাসাদ্য পদাতিং তুরগং তথা
99.32
ব্যমৃদ্নাত্সমরে রাজংস্তুরগাংশ্চ নরান্রণে
এবং তে বহুধা রাজন্প্রমৃদ্নন্তঃ পরস্পরম্
99.33
তস্মিন্রৌদ্রে তথা যুদ্ধে বর্তমানে মহাভয়ে
প্রাবর্তত নদী ঘোরা শোণিতান্ত্রতরঙ্গিণী
99.34
অস্থিসংচয়সংঘাটা কেশশৈবলশাদ্বলা
রথহ্রদা শরাবর্তা হয়মীনা দুরাসদা
99.35
শীর্ষোপলসমাকীর্ণা হস্তিগ্রাহসমাকুলা
কবচোষ্ণীষফেনাঢ্যা ধনুর্দ্বীপাসিকচ্ছপা
99.36
পতাকাধ্বজবৃক্ষাঢ্যা মর্ত্যকূলাপহারিণী
ক্রব্যাদসংঘসংকীর্ণা যমরাষ্ট্রবিবর্ধিনী
99.37
তাং নদীং ক্ষত্রিয়াঃ শূরা হয়নাগরথপ্লবৈঃ
প্রতেরুর্বহবো রাজন্ভয়ং ত্যক্ত্বা মহাহবে
99.38
অপোবাহ রণে ভীরূন্কশ্মলেনাভিসংবৃতান্
যথা বৈতরণী প্রেতান্প্রেতরাজপুরং প্রতি
99.39
প্রাক্রোশন্ক্ষত্রিয়াস্তত্র দৃষ্ট্বা তদ্বৈশসং মহৎ
দুর্যোধনাপরাধেন ক্ষয়ং গচ্ছন্তি কৌরবাঃ
99.40
গুণবত্সু কথং দ্বেষং ধার্তরাষ্ট্রো জনেশ্বরঃ
কৃতবান্পাণ্ডুপুত্রেষু পাপাত্মা লোভমোহিতঃ
99.41
এবং বহুবিধা বাচঃ শ্রূয়ন্তে স্মাত্র ভারত
পাণ্ডবস্তবসংয়ুক্তাঃ পুত্রাণাং তে সুদারুণাঃ
99.42
তা নিশম্য তদা বাচঃ সর্বয়োধৈরুদাহৃতাঃ
আগস্কৃত্সর্বলোকস্য পুত্রো দুর্যোধনস্তব
99.43
ভীষ্মং দ্রোণং কৃপং চৈব শল্যং চোবাচ ভারত
যুধ্যধ্বমনহংকারাঃ কিং চিরং কুরুথেতি চ
99.44
ততঃ প্রববৃতে যুদ্ধং কুরূণাং পাণ্ডবৈঃ সহ
অক্ষদ্যূতকৃতং রাজন্সুঘোরং বৈশসং তদা
99.45
যত্পুরা ন নিগৃহ্ণীষে বার্যমাণো মহাত্মভিঃ
বৈচিত্রবীর্য তস্যেদং ফলং পশ্য তথাবিধম্
99.46
ন হি পাণ্ডুসুতা রাজন্সসৈন্যাঃ সপদানুগাঃ
রক্ষন্তি সমরে প্রাণান্কৌরবা বা বিশাং পতে
99.47
এতস্মাত্কারণাদ্ঘোরো বর্ততে স্ম জনক্ষয়ঃ
দৈবাদ্বা পুরুষব্যাঘ্র তব চাপনয়ান্নৃপ