Utshovঅধ্যায় 100
100.1
সংজয় উবাচ
অর্জুনস্তু নরব্যাঘ্র সুশর্মপ্রমুখান্নৃপান্
অনয়ত্প্রেতরাজস্য ভবনং সায়কৈঃ শিতৈঃ
100.2
সুশর্মাপি ততো বাণৈঃ পার্থং বিব্যাধ সংয়ুগে
বাসুদেবং চ সপ্তত্যা পার্থং চ নবভিঃ পুনঃ
100.3
তান্নিবার্য শরৌঘেণ শক্রসূনুর্মহারথঃ
সুশর্মণো রণে যোধান্প্রাহিণোদ্যমসাদনম্
100.4
তে বধ্যমানাঃ পার্থেন কালেনেব যুগক্ষয়ে
ব্যদ্রবন্ত রণে রাজন্ভয়ে জাতে মহারথাঃ
100.5
উত্সৃজ্য তুরগান্কেচিদ্রথান্কেচিচ্চ মারিষ
গজানন্যে সমুত্সৃজ্য প্রাদ্রবন্ত দিশো দশ
100.6
অপরে তুদ্যমানাস্তু বাজিনাগরথা রণাৎ
ত্বরয়া পরয়া যুক্তাঃ প্রাদ্রবন্ত বিশাং পতে
100.7
পাদাতাশ্চাপি শস্ত্রাণি সমুত্সৃজ্য মহারণে
নিরপেক্ষা ব্যধাবন্ত তেন তেন স্ম ভারত
100.8
বার্যমাণাঃ স্ম বহুশস্ত্রৈগর্তেন সুশর্মণা
তথান্যৈঃ পার্থিবশ্রেষ্ঠৈর্ন ব্যতিষ্ঠন্ত সংয়ুগে
100.9
তদ্বলং প্রদ্রুতং দৃষ্ট্বা পুত্রো দুর্যোধনস্তব
পুরস্কৃত্য রণে ভীষ্মং সর্বসৈন্যপুরস্কৃতম্
100.10
সর্বোদ্যোগেন মহতা ধনংজয়মুপাদ্রবৎ
ত্রিগর্তাধিপতেরর্থে জীবিতস্য বিশাং পতে
100.11
স একঃ সমরে তস্থৌ কিরন্বহুবিধাঞ্শরান্
ভ্রাতৃভিঃ সহিতঃ সর্বৈঃ শেষা বিপ্রদ্রুতা নরাঃ
100.12
তথৈব পাণ্ডবা রাজন্সর্বোদ্যোগেন দংশিতাঃ
প্রয়য়ুঃ ফল্গুনার্থায় যত্র ভীষ্মো ব্যবস্থিতঃ
100.13
জানন্তোঽপি রণে শৌর্যং ঘোরং গাণ্ডীবধন্বনঃ
হাহাকারকৃতোত্সাহা ভীষ্মং জগ্মুঃ সমন্ততঃ
100.14
ততস্তালধ্বজঃ শূরঃ পাণ্ডবানামনীকিনীম্
ছাদয়ামাস সমরে শরৈঃ সংনতপর্বভিঃ
100.15
একীভূতাস্ততঃ সর্বে কুরবঃ পাণ্ডবৈঃ সহ
অয়ুধ্যন্ত মহারাজ মধ্যং প্রাপ্তে দিবাকরে
100.16
সাত্যকিঃ কৃতবর্মাণং বিদ্ধ্বা পঞ্চভিরায়সৈঃ
অতিষ্ঠদাহবে শূরঃ কিরন্বাণান্সহস্রশঃ
100.17
তথৈব দ্রুপদো রাজা দ্রোণং বিদ্ধ্বা শিতৈঃ শরৈঃ
পুনর্বিব্যাধ সপ্তত্যা সারথিং চাস্য সপ্তভিঃ
100.18
ভীমসেনস্তু রাজানং বাহ্লিকং প্রপিতামহম্
বিদ্ধ্বানদন্মহানাদং শার্দূল ইব কাননে
100.19
আর্জুনিশ্চিত্রসেনেন বিদ্ধো বহুভিরাশুগৈঃ
চিত্রসেনং ত্রিভির্বাণৈর্বিব্যাধ হৃদয়ে ভৃশম্
100.20
সমাগতৌ তৌ তু রণে মহামাত্রৌ ব্যরোচতাম্
যথা দিবি মহাঘোরৌ রাজন্বুধশনৈশ্চরৌ
100.21
তস্যাশ্বাংশ্চতুরো হত্বা সূতং চ নবভিঃ শরৈঃ
ননাদ বলবন্নাদং সৌভদ্রঃ পরবীরহা
100.22
হতাশ্বাত্তু রথাত্তূর্ণমবপ্লুত্য মহারথঃ
আরুরোহ রথং তূর্ণং দুর্মুখস্য বিশাং পতে
100.23
দ্রোণশ্চ দ্রুপদং বিদ্ধ্বা শরৈঃ সংনতপর্বভিঃ
সারথিং চাস্য বিব্যাধ ত্বরমাণঃ পরাক্রমী
100.24
পীড্যমানস্ততো রাজা দ্রুপদো বাহিনীমুখে
অপায়াজ্জবনৈরশ্বৈঃ পূর্ববৈরমনুস্মরন্
100.25
ভীমসেনস্তু রাজানং মুহূর্তাদিব বাহ্লিকম্
ব্যশ্বসূতরথং চক্রে সর্বসৈন্যস্য পশ্যতঃ
100.26
সসংভ্রমো মহারাজ সংশয়ং পরমং গতঃ
অবপ্লুত্য ততো বাহাদ্বাহ্লিকঃ পুরুষোত্তমঃ
আরুরোহ রথং তূর্ণং লক্ষ্মণস্য মহারথঃ
100.27
সাত্যকিঃ কৃতবর্মাণং বারয়িত্বা মহারথঃ
শরৈর্বহুবিধৈ রাজন্নাসসাদ পিতামহম্
100.28
স বিদ্ধ্বা ভারতং ষষ্ট্যা নিশিতৈর্লোমবাহিভিঃ
ননর্তেব রথোপস্থে বিধুন্বানো মহদ্ধনুঃ
100.29
তস্যায়সীং মহাশক্তিং চিক্ষেপাথ পিতামহঃ
হেমচিত্রাং মহাবেগাং নাগকন্যোপমাং শুভাম্
100.30
তামাপতন্তীং সহসা মৃত্যুকল্পাং সুতেজনাম্
ধ্বংসয়ামাস বার্ষ্ণেয়ো লাঘবেন মহায়শাঃ
100.31
অনাসাদ্য তু বার্ষ্ণেয়ং শক্তিঃ পরমদারুণা
ন্যপতদ্ধরণীপৃষ্ঠে মহোল্কেব গতপ্রভা
100.32
বার্ষ্ণেয়স্তু ততো রাজন্স্বাং শক্তিং ঘোরদর্শনাম্
বেগবদ্গৃহ্য চিক্ষেপ পিতামহরথং প্রতি
100.33
বার্ষ্ণেয়ভুজবেগেন প্রণুন্না সা মহাহবে
অভিদুদ্রাব বেগেন কালরাত্রির্যথা নরম্
100.34
তামাপতন্তীং সহসা দ্বিধা চিচ্ছেদ ভারত
ক্ষুরপ্রাভ্যাং সুতীক্ষ্ণাভ্যাং সান্বকীর্যত ভূতলে
100.35
ছিত্ত্বা তু শক্তিং গাঙ্গেয়ঃ সাত্যকিং নবভিঃ শরৈঃ
আজঘানোরসি ক্রুদ্ধঃ প্রহসঞ্শত্রুকর্শনঃ
100.36
ততঃ সরথনাগাশ্বাঃ পাণ্ডবাঃ পাণ্ডুপূর্বজ
পরিবব্রূ রণে ভীষ্মং মাধবত্রাণকারণাৎ
100.37
ততঃ প্রববৃতে যুদ্ধং তুমুলং লোমহর্ষণম্
পাণ্ডবানাং কুরূণাং চ সমরে বিজয়ৈষিণাম্