Utshovঅধ্যায় 101
101.1
সংজয় উবাচ
দৃষ্ট্বা ভীষ্মং রণে ক্রুদ্ধং পাণ্ডবৈরভিসংবৃতম্
যথা মেঘৈর্মহারাজ তপান্তে দিবি ভাস্করম্
101.2
দুর্যোধনো মহারাজ দুঃশাসনমভাষত
এষ শূরো মহেষ্বাসো ভীষ্মঃ শত্রুনিষূদনঃ
101.3
ছাদিতঃ পাণ্ডবৈঃ শূরৈঃ সমন্তাদ্ভরতর্ষভ
তস্য কার্যং ত্বয়া বীর রক্ষণং সুমহাত্মনঃ
101.4
রক্ষ্যমাণো হি সমরে ভীষ্মোঽস্মাকং পিতামহঃ
নিহন্যাত্সমরে যত্তান্পাঞ্চালান্পাণ্ডবৈঃ সহ
101.5
তত্র কার্যমহং মন্যে ভীষ্মস্যৈবাভিরক্ষণম্
গোপ্তা হ্যেষ মহেষ্বাসো ভীষ্মোঽস্মাকং পিতামহঃ
101.6
স ভবান্সর্বসৈন্যেন পরিবার্য পিতামহম্
সমরে দুষ্করং কর্ম কুর্বাণং পরিরক্ষতু
101.7
এবমুক্তস্তু সমরে পুত্রো দুঃশাসনস্তব
পরিবার্য স্থিতো ভীষ্মং সৈন্যেন মহতা বৃতঃ
101.8
ততঃ শতসহস্রেণ হয়ানাং সুবলাত্মজঃ
বিমলপ্রাসহস্তানামৃষ্টিতোমরধারিণাম্
101.9
দর্পিতানাং সুবেগানাং বলস্থানাং পতাকিনাম্
শিক্ষিতৈর্যুদ্ধকুশলৈরুপেতানাং নরোত্তমৈঃ
101.10
নকুলং সহদেবং চ ধর্মরাজং চ পাণ্ডবম্
ন্যবারয়ন্নরশ্রেষ্ঠং পরিবার্য সমন্ততঃ
101.11
ততো দুর্যোধনো রাজা শূরাণাং হয়সাদিনাম্
অয়ুতং প্রেষয়ামাস পাণ্ডবানাং নিবারণে
101.12
তৈঃ প্রবিষ্টৈর্মহাবেগৈর্গরুত্মদ্ভিরিবাহবে
খুরাহতা ধরা রাজংশ্চকম্পে চ ননাদ চ
101.13
খুরশব্দশ্চ সুমহান্বাজিনাং শুশ্রুবে তদা
মহাবংশবনস্যেব দহ্যমানস্য পর্বতে
101.14
উত্পতদ্ভিশ্চ তৈস্তত্র সমুদ্ধূতং মহদ্রজঃ
দিবাকরপথং প্রাপ্য ছাদয়ামাস ভাস্করম্
101.15
বেগবদ্ভির্হয়ৈস্তৈস্তু ক্ষোভিতং পাণ্ডবং বলম্
নিপতদ্ভির্মহাবেগৈর্হংসৈরিব মহত্সরঃ
হেষতাং চৈব শব্দেন ন প্রাজ্ঞায়ত কিংচন
101.16
ততো যুধিষ্ঠিরো রাজা মাদ্রীপুত্রৌ চ পাণ্ডবৌ
প্রত্যঘ্নংস্তরসা বেগং সমরে হয়সাদিনাম্
101.17
উদ্বৃত্তস্য মহারাজ প্রাবৃট্কালেন পূর্যতঃ
পৌর্ণমাস্যামম্বুবেগং যথা বেলা মহোদধেঃ
101.18
ততস্তে রথিনো রাজঞ্শরৈঃ সংনতপর্বভিঃ
ন্যকৃন্তন্নুত্তমাঙ্গানি কায়েভ্যো হয়সাদিনাম্
101.19
তে নিপেতুর্মহারাজ নিহতা দৃঢধন্বিভিঃ
নাগৈরিব মহানাগা যথা স্যুর্গিরিগহ্বরে
101.20
তেঽপি প্রাসৈঃ সুনিশিতৈঃ শরৈঃ সংনতপর্বভিঃ
ন্যকৃন্তন্নুত্তমাঙ্গানি বিচরন্তো দিশো দশ
101.21
অত্যাসন্না হয়ারোহা ঋষ্টিভির্ভরতর্ষভ
অচ্ছিনন্নুত্তমাঙ্গানি ফলানীব মহাদ্রুমাৎ
101.22
সসাদিনো হয়া রাজংস্তত্র তত্র নিষূদিতাঃ
পতিতাঃ পাত্যমানাশ্চ শতশোঽথ সহস্রশঃ
101.23
বধ্যমানা হয়াস্তে তু প্রাদ্রবন্ত ভয়ার্দিতাঃ
যথা সিংহান্সমাসাদ্য মৃগাঃ প্রাণপরায়ণাঃ
101.24
পাণ্ডবাস্তু মহারাজ জিত্বা শত্রূন্মহাহবে
দধ্মুঃ শঙ্খাংশ্চ ভেরীশ্চ তাডয়ামাসুরাহবে
101.25
ততো দুর্যোধনো দৃষ্ট্বা দীনং সৈন্যমবস্থিতম্
অব্রবীদ্ভরতশ্রেষ্ঠ মদ্ররাজমিদং বচঃ
101.26
এষ পাণ্ডুসুতো জ্যেষ্ঠো জিত্বা মাতুল মামকান্
পশ্যতাং নো মহাবাহো সেনাং দ্রাবয়তে বলী
101.27
তং বারয় মহাবাহো বেলেব মকরালয়ম্
ত্বং হি সংশ্রূয়সেঽত্যর্থমসহ্যবলবিক্রমঃ
101.28
পুত্রস্য তব তদ্বাক্যং শ্রুত্বা শল্যঃ প্রতাপবান্
প্রয়য়ৌ রথবংশেন যত্র রাজা যুধিষ্ঠিরঃ
101.29
তদাপতদ্বৈ সহসা শল্যস্য সুমহদ্বলম্
মহৌঘবেগং সমরে বারয়ামাস পাণ্ডবঃ
101.30
মদ্ররাজং চ সমরে ধর্মরাজো মহারথঃ
দশভিঃ সায়কৈস্তূর্ণমাজঘান স্তনান্তরে
নকুলঃ সহদেবশ্চ ত্রিভিস্ত্রিভিরজিহ্মগৈঃ
101.31
মদ্ররাজোঽপি তান্সর্বানাজঘান ত্রিভিস্ত্রিভিঃ
যুধিষ্ঠিরং পুনঃ ষষ্ট্যা বিব্যাধ নিশিতৈঃ শরৈঃ
মাদ্রীপুত্রৌ চ সংরব্ধৌ দ্বাভ্যাং দ্বাভ্যামতাডয়ৎ
101.32
ততো ভীমো মহাবাহুর্দৃষ্ট্বা রাজানমাহবে
মদ্ররাজবশং প্রাপ্তং মৃত্যোরাস্যগতং যথা
অভ্যদ্রবত সংগ্রামে যুধিষ্ঠিরমমিত্রজিৎ
101.33
ততো যুদ্ধং মহাঘোরং প্রাবর্তত সুদারুণম্
অপরাং দিশমাস্থায় দ্যোতমানে দিবাকরে