Utshovঅধ্যায় 102
102.1
সংজয় উবাচ
ততঃ পিতা তব ক্রুদ্ধো নিশিতৈঃ সায়কোত্তমৈঃ
আজঘান রণে পার্থান্সহসেনান্সমন্ততঃ
102.2
ভীমং দ্বাদশভির্বিদ্ধ্বা সাত্যকিং নবভিঃ শরৈঃ
নকুলং চ ত্রিভির্বাণৈঃ সহদেবং চ সপ্তভিঃ
102.3
যুধিষ্ঠিরং দ্বাদশভির্বাহ্বোরুরসি চার্পয়ৎ
ধৃষ্টদ্যুম্নং ততো বিদ্ধ্বা বিননাদ মহাবলঃ
102.4
তং দ্বাদশার্ধৈর্নকুলো মাধবশ্চ ত্রিভিঃ শরৈঃ
ধৃষ্টদ্যুম্নশ্চ সপ্তত্যা ভীমসেনশ্চ পঞ্চভিঃ
যুধিষ্ঠিরো দ্বাদশভিঃ প্রত্যবিধ্যত্পিতামহম্
102.5
দ্রোণস্তু সাত্যকিং বিদ্ধ্বা ভীমসেনমবিধ্যত
একৈকং পঞ্চভির্বাণৈর্যমদণ্ডোপমৈঃ শিতৈঃ
102.6
তৌ চ তং প্রত্যবিধ্যেতাং ত্রিভিস্ত্রিভিরজিহ্মগৈঃ
তোত্ত্রৈরিব মহানাগং দ্রোণং ব্রাহ্মণপুংগবম্
102.7
সৌবীরাঃ কিতবাঃ প্রাচ্যাঃ প্রতীচ্যোদীচ্যমালবাঃ
অভীষাহাঃ শূরসেনাঃ শিবয়োঽথ বসাতয়ঃ
সংগ্রামে নাজহুর্ভীষ্মং বধ্যমানাঃ শিতৈঃ শরৈঃ
102.8
তথৈবান্যে বধ্যমানাঃ পাণ্ডবেয়ৈর্মহাত্মভিঃ
পাণ্ডবানভ্যবর্তন্ত বিবিধায়ুধপাণয়ঃ
তথৈব পাণ্ডবা রাজন্পরিবব্রুঃ পিতামহম্
102.9
স সমন্তাত্পরিবৃতো রথৌঘৈরপরাজিতঃ
গহনেঽগ্নিরিবোত্সৃষ্টঃ প্রজজ্বাল দহন্পরান্
102.10
রথাগ্ন্যগারশ্চাপার্চিরসিশক্তিগদেন্ধনঃ
শরস্ফুলিঙ্গো ভীষ্মাগ্নির্দদাহ ক্ষত্রিয়র্ষভান্
102.11
সুবর্ণপুঙ্খৈরিষুভির্গার্ধ্রপক্ষৈঃ সুতেজনৈঃ
কর্ণিনালীকনারাচৈশ্ছাদয়ামাস তদ্বলম্
102.12
অপাতয়দ্ধ্বজাংশ্চৈব রথিনশ্চ শিতৈঃ শরৈঃ
মুণ্ডতালবনানীব চকার স রথব্রজান্
102.13
নির্মনুষ্যান্রথান্রাজন্গজানশ্বাংশ্চ সংয়ুগে
অকরোত্স মহাবাহুঃ সর্বশস্ত্রভৃতাং বরঃ
102.14
তস্য জ্যাতলনির্ঘোষং বিস্ফূর্জিতমিবাশনেঃ
নিশম্য সর্বভূতানি সমকম্পন্ত ভারত
102.15
অমোঘা হ্যপতন্বাণাঃ পিতুস্তে ভরতর্ষভ
নাসজ্জন্ত তনুত্রেষু ভীষ্মচাপচ্যুতাঃ শরাঃ
102.16
হতবীরান্রথান্রাজন্সংয়ুক্তাঞ্জবনৈর্হয়ৈঃ
অপশ্যাম মহারাজ হ্রিয়মাণান্রণাজিরে
102.17
চেদিকাশিকরূষাণাং সহস্রাণি চতুর্দশ
মহারথাঃ সমাখ্যাতাঃ কুলপুত্রাস্তনুত্যজঃ
অপরাবর্তিনঃ সর্বে সুবর্ণবিকৃতধ্বজাঃ
102.18
সংগ্রামে ভীষ্মমাসাদ্য ব্যাদিতাস্যমিবান্তকম্
নিমগ্নাঃ পরলোকায় সবাজিরথকুঞ্জরাঃ
102.19
ভগ্নাক্ষোপস্করান্কাংশ্চিদ্ভগ্নচক্রাংশ্চ সর্বশঃ
অপশ্যাম রথান্রাজঞ্শতশোঽথ সহস্রশঃ
102.20
সবরূথৈ রথৈর্ভগ্নৈ রথিভিশ্চ নিপাতিতৈঃ
শরৈঃ সুকবচৈশ্ছিন্নৈঃ পট্টিশৈশ্চ বিশাং পতে
102.21
গদাভির্মুসলৈশ্চৈব নিস্ত্রিংশৈশ্চ শিলীমুখৈঃ
অনুকর্ষৈরুপাসঙ্গৈশ্চক্রৈর্ভগ্নৈশ্চ মারিষ
102.22
বাহুভিঃ কার্মুকৈঃ খড্গৈঃ শিরোভিশ্চ সকুণ্ডলৈঃ
তলত্রৈরঙ্গুলিত্রৈশ্চ ধ্বজৈশ্চ বিনিপাতিতৈঃ
চাপৈশ্চ বহুধা ছিন্নৈঃ সমাস্তীর্যত মেদিনী
102.23
হতারোহা গজা রাজন্হয়াশ্চ হতসাদিনঃ
পরিপেতুর্দ্রুতং তত্র শতশোঽথ সহস্রশঃ
102.24
যতমানাশ্চ তে বীরা দ্রবমাণান্মহারথান্
নাশক্নুবন্বারয়িতুং ভীষ্মবাণপ্রপীডিতান্
102.25
মহেন্দ্রসমবীর্যেণ বধ্যমানা মহাচমূঃ
অভজ্যত মহারাজ ন চ দ্বৌ সহ ধাবতঃ
102.26
আবিদ্ধরথনাগাশ্বং পতিতধ্বজকূবরম্
অনীকং পাণ্ডুপুত্রাণাং হাহাভূতমচেতনম্
102.27
জঘানাত্র পিতা পুত্রং পুত্রশ্চ পিতরং তথা
প্রিয়ং সখায়ং চাক্রন্দে সখা দৈববলাত্কৃতঃ
102.28
বিমুচ্য কবচানন্যে পাণ্ডুপুত্রস্য সৈনিকাঃ
প্রকীর্য কেশান্ধাবন্তঃ প্রত্যদৃশ্যন্ত ভারত
102.29
তদ্গোকুলমিবোদ্ভ্রান্তমুদ্ভ্রান্তরথকুঞ্জরম্
দদৃশে পাণ্ডুপুত্রস্য সৈন্যমার্তস্বরং তদা
102.30
প্রভজ্যমানং সৈন্যং তু দৃষ্ট্বা যাদবনন্দনঃ
উবাচ পার্থং বীভত্সুং নিগৃহ্য রথমুত্তমম্
102.31
অয়ং স কালঃ সংপ্রাপ্তঃ পার্থ যঃ কাঙ্ক্ষিতস্তব
প্রহরাস্মৈ নরব্যাঘ্র ন চেন্মোহাত্প্রমুহ্যসে
102.32
যত্পুরা কথিতং বীর ত্বয়া রাজ্ঞাং সমাগমে
বিরাটনগরে পার্থ সংজয়স্য সমীপতঃ
102.33
ভীষ্মদ্রোণমুখান্সর্বান্ধার্তরাষ্ট্রস্য সৈনিকান্
সানুবন্ধান্হনিষ্যামি যে মাং যোত্স্যন্তি সংয়ুগে
102.34
ইতি তত্কুরু কৌন্তেয় সত্যং বাক্যমরিংদম
ক্ষত্রধর্মমনুস্মৃত্য যুধ্যস্ব ভরতর্ষভ
102.35
ইত্যুক্তো বাসুদেবেন তির্যগ্দৃষ্টিরধোমুখঃ
অকাম ইব বীভত্সুরিদং বচনমব্রবীৎ
102.36
অবধ্যানাং বধং কৃত্বা রাজ্যং বা নরকোত্তরম্
দুঃখানি বনবাসে বা কিং নু মে সুকৃতং ভবেৎ
102.37
চোদয়াশ্বান্যতো ভীষ্মঃ করিষ্যে বচনং তব
পাতয়িষ্যামি দুর্ধর্ষং বৃদ্ধং কুরুপিতামহম্
102.38
ততোঽশ্বান্রজতপ্রখ্যাংশ্চোদয়ামাস মাধবঃ
যতো ভীষ্মস্ততো রাজন্দুষ্প্রেক্ষ্যো রশ্মিবানিব
102.39
ততস্তত্পুনরাবৃত্তং যুধিষ্ঠিরবলং মহৎ
দৃষ্ট্বা পার্থং মহাবাহুং ভীষ্মায়োদ্যন্তমাহবে
102.40
ততো ভীষ্মঃ কুরুশ্রেষ্ঠঃ সিংহবদ্বিনদন্মুহুঃ
ধনংজয়রথং শীঘ্রং শরবর্ষৈরবাকিরৎ
102.41
ক্ষণেন স রথস্তস্য সহয়ঃ সহসারথিঃ
শরবর্ষেণ মহতা ন প্রাজ্ঞায়ত কিংচন
102.42
বাসুদেবস্ত্বসংভ্রান্তো ধৈর্যমাস্থায় সাত্বতঃ
চোদয়ামাস তানশ্বান্বিতুন্নান্ভীষ্মসায়কৈঃ
102.43
ততঃ পার্থো ধনুর্গৃহ্য দিব্যং জলদনিস্বনম্
পাতয়ামাস ভীষ্মস্য ধনুশ্ছিত্ত্বা শিতৈঃ শরৈঃ
102.44
স চ্ছিন্নধন্বা কৌরব্যঃ পুনরন্যন্মহদ্ধনুঃ
নিমেষান্তরমাত্রেণ সজ্যং চক্রে পিতা তব
102.45
বিচকর্ষ ততো দোর্ভ্যাং ধনুর্জলদনিস্বনম্
অথাস্য তদপি ক্রুদ্ধশ্চিচ্ছেদ ধনুরর্জুনঃ
102.46
তস্য তত্পূজয়ামাস লাঘবং শংতনোঃ সুতঃ
সাধু পার্থ মহাবাহো সাধু কুন্তীসুতেতি চ
102.47
সমাভাষ্যৈনমপরং প্রগৃহ্য রুচিরং ধনুঃ
মুমোচ সমরে ভীষ্মঃ শরান্পার্থরথং প্রতি
102.48
অদর্শয়দ্বাসুদেবো হয়য়ানে পরং বলম্
মোঘান্কুর্বঞ্শরাংস্তস্য মণ্ডলানি বিদর্শয়ন্
102.49
শুশুভাতে নরব্যাঘ্রৌ ভীষ্মপার্থৌ শরক্ষতৌ
গোবৃষাবিব সংরব্ধৌ বিষাণোল্লিখিতাঙ্কিতৌ
102.50
বাসুদেবস্তু সংপ্রেক্ষ্য পার্থস্য মৃদুয়ুদ্ধতাম্
ভীষ্মং চ শরবর্ষাণি সৃজন্তমনিশং যুধি
102.51
প্রতপন্তমিবাদিত্যং মধ্যমাসাদ্য সেনয়োঃ
বরান্বরান্বিনিঘ্নন্তং পাণ্ডুপুত্রস্য সৈনিকান্
102.52
যুগান্তমিব কুর্বাণং ভীষ্মং যৌধিষ্ঠিরে বলে
নামৃষ্যত মহাবাহুর্মাধবঃ পরবীরহা
102.53
উত্সৃজ্য রজতপ্রখ্যান্হয়ান্পার্থস্য মারিষ
ক্রুদ্ধো নাম মহায়োগী প্রচস্কন্দ মহারথাৎ
অভিদুদ্রাব ভীষ্মং স ভুজপ্রহরণো বলী
102.54
প্রতোদপাণিস্তেজস্বী সিংহবদ্বিনদন্মুহুঃ
দারয়ন্নিব পদ্ভ্যাং স জগতীং জগতীশ্বরঃ
102.55
ক্রোধতাম্রেক্ষণঃ কৃষ্ণো জিঘাংসুরমিতদ্যুতিঃ
গ্রসন্নিব চ চেতাংসি তাবকানাং মহাহবে
102.56
দৃষ্ট্বা মাধবমাক্রন্দে ভীষ্মায়োদ্যন্তমাহবে
হতো ভীষ্মো হতো ভীষ্ম ইতি তত্র স্ম সৈনিকাঃ
ক্রোশন্তঃ প্রাদ্রবন্সর্বে বাসুদেবভয়ান্নরাঃ
102.57
পীতকৌশেয়সংবীতো মণিশ্যামো জনার্দনঃ
শুশুভে বিদ্রবন্ভীষ্মং বিদ্যুন্মালী যথাম্বুদঃ
102.58
স সিংহ ইব মাতঙ্গং যূথর্ষভ ইবর্ষভম্
অভিদুদ্রাব তেজস্বী বিনদন্যাদবর্ষভঃ
102.59
তমাপতন্তং সংপ্রেক্ষ্য পুণ্ডরীকাক্ষমাহবে
অসংভ্রমং রণে ভীষ্মো বিচকর্ষ মহদ্ধনুঃ
উবাচ চৈনং গোবিন্দমসংভ্রান্তেন চেতসা
102.60
এহ্যেহি পুণ্ডরীকাক্ষ দেবদেব নমোঽস্তু তে
মামদ্য সাত্বতশ্রেষ্ঠ পাতয়স্ব মহাহবে
102.61
ত্বয়া হি দেব সংগ্রামে হতস্যাপি মমানঘ
শ্রেয় এব পরং কৃষ্ণ লোকেঽমুষ্মিন্নিহৈব চ
সংভাবিতোঽস্মি গোবিন্দ ত্রৈলোক্যেনাদ্য সংয়ুগে
102.62
অন্বগেব ততঃ পার্থস্তমনুদ্রুত্য কেশবম্
নিজগ্রাহ মহাবাহুর্বাহুভ্যাং পরিগৃহ্য বৈ
102.63
নিগৃহ্যমাণঃ পার্থেন কৃষ্ণো রাজীবলোচনঃ
জগাম চৈনমাদায় বেগেন পুরুষোত্তমঃ
102.64
পার্থস্তু বিষ্টভ্য বলাচ্চরণৌ পরবীরহা
নিজঘ্রাহ হৃষীকেশং কথংচিদ্দশমে পদে
102.65
তত এনমুবাচার্তঃ ক্রোধপর্যাকুলেক্ষণম্
নিঃশ্বসন্তং যথা নাগমর্জুনঃ পরবীরহা
102.66
নিবর্তস্ব মহাবাহো নানৃতং কর্তুমর্হসি
যত্ত্বয়া কথিতং পূর্বং ন যোত্স্যামীতি কেশব
102.67
মিথ্যাবাদীতি লোকস্ত্বাং কথয়িষ্যতি মাধব
মমৈষ ভারঃ সর্বো হি হনিষ্যামি যতব্রতম্
102.68
শপে মাধব সখ্যেন সত্যেন সুকৃতেন চ
অন্তং যথা গমিষ্যামি শত্রূণাং শত্রুকর্শন
102.69
অদ্যৈব পশ্য দুর্ধর্ষং পাত্যমানং মহাব্রতম্
তারাপতিমিবাপূর্ণমন্তকালে যদৃচ্ছয়া
102.70
মাধবস্তু বচঃ শ্রুত্বা ফল্গুনস্য মহাত্মনঃ
নকিংচিদুক্ত্বা সক্রোধ আরুরোহ রথং পুনঃ
102.71
তৌ রথস্থৌ নরব্যাঘ্রৌ ভীষ্মঃ শাংতনবঃ পুনঃ
ববর্ষ শরবর্ষেণ মেঘো বৃষ্ট্যা যথাচলৌ
102.72
প্রাণাংশ্চাদত্ত যোধানাং পিতা দেবব্রতস্তব
গভস্তিভিরিবাদিত্যস্তেজাংসি শিশিরাত্যয়ে
102.73
যথা কুরূণাং সৈন্যানি বভঞ্জ যুধি পাণ্ডবঃ
তথা পাণ্ডবসৈন্যানি বভঞ্জ যুধি তে পিতা
102.74
হতবিদ্রুতসৈন্যাস্তু নিরুত্সাহা বিচেতসঃ
নিরীক্ষিতুং ন শেকুস্তে ভীষ্মমপ্রতিমং রণে
মধ্যং গতমিবাদিত্যং প্রতপন্তং স্বতেজসা
102.75
তে বধ্যমানা ভীষ্মেণ কালেনেব যুগক্ষয়ে
বীক্ষাং চক্রুর্মহারাজ পাণ্ডবা ভয়পীডিতাঃ
102.76
ত্রাতারং নাধ্যগচ্ছন্ত গাবঃ পঙ্কগতা ইব
পিপীলিকা ইব ক্ষুণ্ণা দুর্বলা বলিনা রণে
102.77
মহারথং ভারত দুষ্প্রধর্ষং; শরৌঘিণং প্রতপন্তং নরেন্দ্রান্
ভীষ্মং ন শেকুঃ প্রতিবীক্ষিতুং তে; শরার্চিষং সূর্যমিবাতপন্তম্
102.78
বিমৃদ্নতস্তস্য তু পাণ্ডুসেনা;মস্তং জগামাথ সহস্ররশ্মিঃ
ততো বলানাং শ্রমকর্শিতানাং; মনোঽবহারং প্রতি সংবভূব