Utshovঅধ্যায় 103
103.1
সংজয় উবাচ
যুধ্যতামেব তেষাং তু ভাস্করেঽস্তমুপাগতে
সংধ্যা সমভবদ্ঘোরা নাপশ্যাম ততো রণম্
103.2
ততো যুধিষ্ঠিরো রাজা সংধ্যাং সংদৃশ্য ভারত
বধ্যমানং বলং চাপি ভীষ্মেণামিত্রঘাতিনা
103.3
মুক্তশস্ত্রং পরাবৃত্তং পলায়নপরায়ণম্
ভীষ্মং চ যুধি সংরব্ধমনুয়ান্তং মহারথান্
103.4
সোমকাংশ্চ জিতান্দৃষ্ট্বা নিরুত্সাহান্মহারথান্
চিন্তয়িত্বা চিরং ধ্যাত্বা অবহারমরোচয়ৎ
103.5
ততোঽবহারং সৈন্যানাং চক্রে রাজা যুধিষ্ঠিরঃ
তথৈব তব সৈন্যানামবহারো হ্যভূত্তদা
103.6
ততোঽবহারং সৈন্যানাং কৃত্বা তত্র মহারথাঃ
ন্যবিশন্ত কুরুশ্রেষ্ঠ সংগ্রামে ক্ষতবিক্ষতাঃ
103.7
ভীষ্মস্য সমরে কর্ম চিন্তয়ানাস্তু পাণ্ডবাঃ
নালভন্ত তদা শান্তিং ভৃশং ভীষ্মেণ পীডিতাঃ
103.8
ভীষ্মোঽপি সমরে জিত্বা পাণ্ডবান্সহ সৃঞ্জয়ৈঃ
পূজ্যমানস্তব সুতৈর্বন্দ্যমানশ্চ ভারত
103.9
ন্যবিশত্কুরুভিঃ সার্ধং হৃষ্টরূপৈঃ সমন্ততঃ
ততো রাত্রিঃ সমভবত্সর্বভূতপ্রমোহিনী
103.10
তস্মিন্রাত্রিমুখে ঘোরে পাণ্ডবা বৃষ্ণিভিঃ সহ
সৃঞ্জয়াশ্চ দুরাধর্ষা মন্ত্রায় সমুপাবিশন্
103.11
আত্মনিঃশ্রেয়সং সর্বে প্রাপ্তকালং মহাবলাঃ
মন্ত্রয়ামাসুরব্যগ্রা মন্ত্রনিশ্চয়কোবিদাঃ
103.12
ততো যুধিষ্ঠিরো রাজা মন্ত্রয়িত্বা চিরং নৃপ
বাসুদেবং সমুদ্বীক্ষ্য বাক্যমেতদুবাচ হ
103.13
পশ্য কৃষ্ণ মহাত্মানং ভীষ্মং ভীমপরাক্রমম্
গজং নলবনানীব বিমৃদ্নন্তং বলং মম
103.14
ন চৈবৈনং মহাত্মানমুত্সহামো নিরীক্ষিতুম্
লেলিহ্যমানং সৈন্যেষু প্রবৃদ্ধমিব পাবকম্
103.15
যথা ঘোরো মহানাগস্তক্ষকো বৈ বিষোল্বণঃ
তথা ভীষ্মো রণে কৃষ্ণ তীক্ষ্ণশস্ত্রঃ প্রতাপবান্
103.16
গৃহীতচাপঃ সমরে বিমুঞ্চংশ্চ শিতাঞ্শরান্
শক্যো জেতুং যমঃ ক্রুদ্ধো বজ্রপাণিশ্চ দেবরাট্
103.17
বরুণঃ পাশভৃদ্বাপি সগদো বা ধনেশ্বরঃ
ন তু ভীষ্মঃ সুসংক্রুদ্ধঃ শক্যো জেতুং মহাহবে
103.18
সোঽহমেবং গতে কৃষ্ণ নিমগ্নঃ শোকসাগরে
আত্মনো বুদ্ধিদৌর্বল্যাদ্ভীষ্মমাসাদ্য সংয়ুগে
103.19
বনং যাস্যামি দুর্ধর্ষ শ্রেয়ো মে তত্র বৈ গতম্
ন যুদ্ধং রোচয়ে কৃষ্ণ হন্তি ভীষ্মো হি নঃ সদা
103.20
যথা প্রজ্বলিতং বহ্নিং পতংগঃ সমভিদ্রবন্
একতো মৃত্যুমভ্যেতি তথাহং ভীষ্মমীয়িবান্
103.21
ক্ষয়ং নীতোঽস্মি বার্ষ্ণেয় রাজ্যহেতোঃ পরাক্রমী
ভ্রাতরশ্চৈব মে শূরাঃ সায়কৈর্ভৃশপীডিতাঃ
103.22
মত্কৃতে ভ্রাতৃসৌহার্দাদ্রাজ্যাত্প্রভ্রংশনং গতাঃ
পরিক্লিষ্টা তথা কৃষ্ণা মত্কৃতে মধুসূদন
103.23
জীবিতং বহু মন্যেঽহং জীবিতং হ্যদ্য দুর্লভম্
জীবিতস্যাদ্য শেষেণ চরিষ্যে ধর্মমুত্তমম্
103.24
যদি তেঽহমনুগ্রাহ্যো ভ্রাতৃভিঃ সহ কেশব
স্বধর্মস্যাবিরোধেন তদুদাহর কেশব
103.25
এতচ্ছ্রুত্বা বচস্তস্য কারুণ্যাদ্বহুবিস্তরম্
প্রত্যুবাচ ততঃ কৃষ্ণঃ সান্ত্বয়ানো যুধিষ্ঠিরম্
103.26
ধর্মপুত্র বিষাদং ত্বং মা কৃথাঃ সত্যসংগর
যস্য তে ভ্রাতরঃ শূরা দুর্জয়াঃ শত্রুসূদনাঃ
103.27
অর্জুনো ভীমসেনশ্চ বায্বগ্নিসমতেজসৌ
মাদ্রীপুত্রৌ চ বিক্রান্তৌ ত্রিদশানামিবেশ্বরৌ
103.28
মাং বা নিয়ুঙ্ক্ষ্ব সৌহার্দাদ্যোত্স্যে ভীষ্মেণ পাণ্ডব
ত্বত্প্রয়ুক্তো হ্যহং রাজন্কিং ন কুর্যাং মহাহবে
103.29
হনিষ্যামি রণে ভীষ্মমাহূয় পুরুষর্ষভম্
পশ্যতাং ধার্তরাষ্ট্রাণাং যদি নেচ্ছতি ফল্গুনঃ
103.30
যদি ভীষ্মে হতে রাজঞ্জয়ং পশ্যসি পাণ্ডব
হন্তাস্ম্যেকরথেনাদ্য কুরুবৃদ্ধং পিতামহম্
103.31
পশ্য মে বিক্রমং রাজন্মহেন্দ্রস্যেব সংয়ুগে
বিমুঞ্চন্তং মহাস্ত্রাণি পাতয়িষ্যামি তং রথাৎ
103.32
যঃ শত্রুঃ পাণ্ডুপুত্রাণাং মচ্ছত্রুঃ স ন সংশয়ঃ
মদর্থা ভবদর্থা যে যে মদীয়াস্তবৈব তে
103.33
তব ভ্রাতা মম সখা সংবন্ধী শিষ্য এব চ
মাংসান্যুত্কৃত্য বৈ দদ্যামর্জুনার্থে মহীপতে
103.34
এষ চাপি নরব্যাঘ্রো মত্কৃতে জীবিতং ত্যজেৎ
এষ নঃ সময়স্তাত তারয়েম পরস্পরম্
স মাং নিয়ুঙ্ক্ষ্ব রাজেন্দ্র যাবদ্দ্বীপো ভবাম্যহম্
103.35
প্রতিজ্ঞাতমুপপ্লব্যে যত্তত্পার্থেন পূর্বতঃ
ঘাতয়িষ্যামি গাঙ্গেয়মিত্যুলূকস্য সংনিধৌ
103.36
পরিরক্ষ্যং চ মম তদ্বচঃ পার্থস্য ধীমতঃ
অনুজ্ঞাতং তু পার্থেন ময়া কার্যং ন সংশয়ঃ
103.37
অথ বা ফল্গুনস্যৈষ ভারঃ পরিমিতো রণে
নিহনিষ্যতি সংগ্রামে ভীষ্মং পরপুরংজয়ম্
103.38
অশক্যমপি কুর্যাদ্ধি রণে পার্থঃ সমুদ্যতঃ
ত্রিদশান্বা সমুদ্যুক্তান্সহিতান্দৈত্যদানবৈঃ
নিহন্যাদর্জুনঃ সংখ্যে কিমু ভীষ্মং নরাধিপ
103.39
বিপরীতো মহাবীর্যো গতসত্ত্বোঽল্পজীবিতঃ
ভীষ্মঃ শাংতনবো নূনং কর্তব্যং নাববুধ্যতে
103.40
যুধিষ্ঠির উবাচ
এবমেতন্মহাবাহো যথা বদসি মাধব
সর্বে হ্যেতে ন পর্যাপ্তাস্তব বেগনিবারণে
103.41
নিয়তং সমবাপ্স্যামি সর্বমেব যথেপ্সিতম্
যস্য মে পুরুষব্যাঘ্র ভবান্নাথো মহাবলঃ
103.42
সেন্দ্রানপি রণে দেবাঞ্জয়েয়ং জয়তাং বর
ত্বয়া নাথেন গোবিন্দ কিমু ভীষ্মং মহাহবে
103.43
ন তু ত্বামনৃতং কর্তুমুত্সহে স্বার্থগৌরবাৎ
অয়ুধ্যমানঃ সাহায্যং যথোক্তং কুরু মাধব
103.44
সময়স্তু কৃতঃ কশ্চিদ্ভীষ্মেণ মম মাধব
মন্ত্রয়িষ্যে তবার্থায় ন তু যোত্স্যে কথংচন
দুর্যোধনার্থে যোত্স্যামি সত্যমেতদিতি প্রভো
103.45
স হি রাজ্যস্য মে দাতা মন্ত্রস্যৈব চ মাধব
তস্মাদ্দেবব্রতং ভূয়ো বধোপায়ার্থমাত্মনঃ
ভবতা সহিতাঃ সর্বে পৃচ্ছামো মধুসূদন
103.46
তদ্বয়ং সহিতা গত্বা ভীষ্মমাশু নরোত্তমম্
রুচিতে তব বার্ষ্ণেয় মন্ত্রং পৃচ্ছাম কৌরবম্
103.47
স বক্ষ্যতি হিতং বাক্যং তথ্যং চৈব জনার্দন
যথা স বক্ষ্যতে কৃষ্ণ তথা কর্তাস্মি সংয়ুগে
103.48
স নো জয়স্য দাতা চ মন্ত্রস্য চ ধৃতব্রতঃ
বালাঃ পিত্রা বিহীনাশ্চ তেন সংবর্ধিতা বয়ম্
103.49
তং চেত্পিতামহং বৃদ্ধং হন্তুমিচ্ছামি মাধব
পিতুঃ পিতরমিষ্টং বৈ ধিগস্তু ক্ষত্রজীবিকাম্
103.50
সংজয় উবাচ
ততোঽব্রবীন্মহারাজ বার্ষ্ণেয়ঃ কুরুনন্দনম্
রোচতে মে মহাবাহো সততং তব ভাষিতম্
103.51
দেবব্রতঃ কৃতী ভীষ্মঃ প্রেক্ষিতেনাপি নির্দহেৎ
গম্যতাং স বধোপায়ং প্রষ্টুং সাগরগাসুতঃ
বক্তুমর্হতি সত্যং স ত্বয়া পৃষ্টো বিশেষতঃ
103.52
তে বয়ং তত্র গচ্ছামঃ প্রষ্টুং কুরুপিতামহম্
প্রণম্য শিরসা চৈনং মন্ত্রং পৃচ্ছাম মাধব
স নো দাস্যতি যং মন্ত্রং তেন যোত্স্যামহে পরান্
103.53
এবং সংমন্ত্র্য বৈ বীরাঃ পাণ্ডবাঃ পাণ্ডুপূর্বজ
জগ্মুস্তে সহিতাঃ সর্বে বাসুদেবশ্চ বীর্যবান্
বিমুক্তশস্ত্রকবচা ভীষ্মস্য সদনং প্রতি
103.54
প্রবিশ্য চ তদা ভীষ্মং শিরোভিঃ প্রতিপেদিরে
পূজয়ন্তো মহারাজ পাণ্ডবা ভরতর্ষভ
প্রণম্য শিরসা চৈনং ভীষ্মং শরণমন্বয়ুঃ
103.55
তানুবাচ মহাবাহুর্ভীষ্মঃ কুরুপিতামহঃ
স্বাগতং তব বার্ষ্ণেয় স্বাগতং তে ধনংজয়
স্বাগতং ধর্মপুত্রায় ভীমায় যময়োস্তথা
103.56
কিং কার্যং বঃ করোম্যদ্য যুষ্মত্প্রীতিবিবর্ধনম্
সর্বাত্মনা চ কর্তাস্মি যদ্যপি স্যাত্সুদুষ্করম্
103.57
তথা ব্রুবাণং গাঙ্গেয়ং প্রীতিয়ুক্তং পুনঃ পুনঃ
উবাচ বাক্যং দীনাত্মা ধর্মপুত্রো যুধিষ্ঠিরঃ
103.58
কথং জয়েম ধর্মজ্ঞ কথং রাজ্যং লভেমহি
প্রজানাং সংক্ষয়ো ন স্যাত্কথং তন্মে বদাভিভো
103.59
ভবান্হি নো বধোপায়ং ব্রবীতু স্বয়মাত্মনঃ
ভবন্তং সমরে রাজন্বিষহেম কথং বয়ম্
103.60
ন হি তে সূক্ষ্মমপ্যস্তি রন্ধ্রং কুরুপিতামহ
মণ্ডলেনৈব ধনুষা সদা দৃশ্যোঽসি সংয়ুগে
103.61
নাদদানং সংদধানং বিকর্ষন্তং ধনুর্ন চ
পশ্যামস্ত্বা মহাবাহো রথে সূর্যমিব স্থিতম্
103.62
নরাশ্বরথনাগানাং হন্তারং পরবীরহন্
ক ইবোত্সহতে হন্তুং ত্বাং পুমান্ভরতর্ষভ
103.63
বর্ষতা শরবর্ষাণি মহান্তি পুরুষোত্তম
ক্ষয়ং নীতা হি পৃতনা ভবতা মহতী মম
103.64
যথা যুধি জয়েয়ং ত্বাং যথা রাজ্যং ভবেন্মম
ভবেত্সৈন্যস্য বা শান্তিস্তন্মে ব্রূহি পিতামহ
103.65
ততোঽব্রবীচ্ছাংতনবঃ পাণ্ডবান্পাণ্ডুপূর্বজ
ন কথংচন কৌন্তেয় ময়ি জীবতি সংয়ুগে
যুষ্মাসু দৃশ্যতে বৃদ্ধিঃ সত্যমেতদ্ব্রবীমি বঃ
103.66
নির্জিতে ময়ি যুদ্ধে তু ধ্রুবং জেষ্যথ কৌরবান্
ক্ষিপ্রং ময়ি প্রহরত যদীচ্ছথ রণে জয়ম্
অনুজানামি বঃ পার্থাঃ প্রহরধ্বং যথাসুখম্
103.67
এবং হি সুকৃতং মন্যে ভবতাং বিদিতো হ্যহম্
হতে ময়ি হতং সর্বং তস্মাদেবং বিধীয়তাম্
103.68
যুধিষ্ঠির উবাচ
ব্রূহি তস্মাদুপায়ং নো যথা যুদ্ধে জয়েমহি
ভবন্তং সমরে ক্রুদ্ধং দণ্ডপাণিমিবান্তকম্
103.69
শক্যো বজ্রধরো জেতুং বরুণোঽথ যমস্তথা
ন ভবান্সমরে শক্যঃ সেন্দ্রৈরপি সুরাসুরৈঃ
103.70
ভীষ্ম উবাচ
সত্যমেতন্মহাবাহো যথা বদসি পাণ্ডব
নাহং শক্যো রণে জেতুং সেন্দ্রৈরপি সুরাসুরৈঃ
103.71
আত্তশস্ত্রো রণে যত্তো গৃহীতবরকার্মুকঃ
ন্যস্তশস্ত্রং তু মাং রাজন্হন্যুর্যুধি মহারথাঃ
103.72
নিক্ষিপ্তশস্ত্রে পতিতে বিমুক্তকবচধ্বজে
দ্রবমাণে চ ভীতে চ তবাস্মীতি চ বাদিনি
103.73
স্ত্রিয়াং স্ত্রীনামধেয়ে চ বিকলে চৈকপুত্রকে
অপ্রসূতে চ দুষ্প্রেক্ষ্যে ন যুদ্ধং রোচতে মম
103.74
ইমং চ শৃণু মে পার্থ সংকল্পং পূর্বচিন্তিতম্
অমঙ্গল্যধ্বজং দৃষ্ট্বা ন যুধ্যেয়ং কথংচন
103.75
য এষ দ্রৌপদো রাজংস্তব সৈন্যে মহারথঃ
শিখণ্ডী সমরাকাঙ্ক্ষী শূরশ্চ সমিতিংজয়ঃ
103.76
যথাভবচ্চ স্ত্রী পূর্বং পশ্চাত্পুংস্ত্বমুপাগতঃ
জানন্তি চ ভবন্তোঽপি সর্বমেতদ্যথাতথম্
103.77
অর্জুনঃ সমরে শূরঃ পুরস্কৃত্য শিখণ্ডিনম্
মামেব বিশিখৈস্তূর্ণমভিদ্রবতু দংশিতঃ
103.78
অমঙ্গল্যধ্বজে তস্মিন্স্ত্রীপূর্বে চ বিশেষতঃ
ন প্রহর্তুমভীপ্সামি গৃহীতেষুং কথংচন
103.79
তদন্তরং সমাসাদ্য পাণ্ডবো মাং ধনংজয়ঃ
শরৈর্ঘাতয়তু ক্ষিপ্রং সমন্তাদ্ভরতর্ষভ
103.80
ন তং পশ্যামি লোকেষু যো মাং হন্যাত্সমুদ্যতম্
ঋতে কৃষ্ণান্মহাভাগাত্পাণ্ডবাদ্বা ধনংজয়াৎ
103.81
এষ তস্মাত্পুরোধায় কংচিদন্যং মমাগ্রতঃ
মাং পাতয়তু বীভত্সুরেবং তে বিজয়ো ভবেৎ
103.82
এতত্কুরুষ্ব কৌন্তেয় যথোক্তং বচনং মম
ততো জেষ্যসি সংগ্রামে ধার্তরাষ্ট্রান্সমাগতান্
103.83
সংজয় উবাচ
তেঽনুজ্ঞাতাস্ততঃ পার্থা জগ্মুঃ স্বশিবিরং প্রতি
অভিবাদ্য মহাত্মানং ভীষ্মং কুরুপিতামহম্
103.84
তথোক্তবতি গাঙ্গেয়ে পরলোকায় দীক্ষিতে
অর্জুনো দুঃখসংতপ্তঃ সব্রীডমিদমব্রবীৎ
103.85
গুরুণা কুলবৃদ্ধেন কৃতপ্রজ্ঞেন ধীমতা
পিতামহেন সংগ্রামে কথং যোত্স্যামি মাধব
103.86
ক্রীডতা হি ময়া বাল্যে বাসুদেব মহামনাঃ
পাংসুরূষিতগাত্রেণ মহাত্মা পরুষীকৃতঃ
103.87
যস্যাহমধিরুহ্যাঙ্কং বালঃ কিল গদাগ্রজ
তাতেত্যবোচং পিতরং পিতুঃ পাণ্ডোর্মহাত্মনঃ
103.88
নাহং তাতস্তব পিতুস্তাতোঽস্মি তব ভারত
ইতি মামব্রবীদ্বাল্যে যঃ স বধ্যঃ কথং ময়া
103.89
কামং বধ্যতু মে সৈন্যং নাহং যোত্স্যে মহাত্মনা
জয়ো বাস্তু বধো বা মে কথং বা কৃষ্ণ মন্যসে
103.90
শ্রীকৃষ্ণ উবাচ
প্রতিজ্ঞায় বধং জিষ্ণো পুরা ভীষ্মস্য সংয়ুগে
ক্ষত্রধর্মে স্থিতঃ পার্থ কথং নৈনং হনিষ্যসি
103.91
পাতয়ৈনং রথাত্পার্থ বজ্রাহতমিব দ্রুমম্
নাহত্বা যুধি গাঙ্গেয়ং বিজয়স্তে ভবিষ্যতি
103.92
দিষ্টমেতত্পুরা দেবৈর্ভবিষ্যত্যবশস্য তে
হন্তা ভীষ্মস্য পূর্বেন্দ্র ইতি তন্ন তদন্যথা
103.93
ন হি ভীষ্মং দুরাধর্ষং ব্যাত্তাননমিবান্তকম্
ত্বদন্যঃ শক্নুয়াদ্ধন্তুমপি বজ্রধরঃ স্বয়ম্
103.94
জহি ভীষ্মং মহাবাহো শৃণু চেদং বচো মম
যথোবাচ পুরা শক্রং মহাবুদ্ধির্বৃহস্পতিঃ
103.95
জ্যায়াংসমপি চেচ্ছক্র গুণৈরপি সমন্বিতম্
আততায়িনমামন্ত্র্য হন্যাদ্ঘাতকমাগতম্
103.96
শাশ্বতোঽয়ং স্থিতো ধর্মঃ ক্ষত্রিয়াণাং ধনংজয়
যোদ্ধব্যং রক্ষিতব্যং চ যষ্টব্যং চানসূয়ুভিঃ
103.97
অর্জুন উবাচ
শিখণ্ডী নিধনং কৃষ্ণ ভীষ্মস্য ভবিতা ধ্রুবম্
দৃষ্ট্বৈব হি সদা ভীষ্মঃ পাঞ্চাল্যং বিনিবর্ততে
103.98
তে বয়ং প্রমুখে তস্য স্থাপয়িত্বা শিখণ্ডিনম্
গাঙ্গেয়ং পাতয়িষ্যাম উপায়েনেতি মে মতিঃ
103.99
অহমন্যান্মহেষ্বাসান্বারয়িষ্যামি সায়কৈঃ
শিখণ্ড্যপি যুধাং শ্রেষ্ঠো ভীষ্মমেবাভিয়াস্যতু
103.100
শ্রুতং তে কুরুমুখ্যস্য নাহং হন্যাং শিখণ্ডিনম্
কন্যা হ্যেষা পুরা জাতা পুরুষঃ সমপদ্যত
103.101
সংজয় উবাচ
ইত্যেবং নিশ্চয়ং কৃত্বা পাণ্ডবাঃ সহমাধবাঃ
শয়নানি যথাস্বানি ভেজিরে পুরুষর্ষভাঃ