Utshovঅধ্যায় 104
104.1
ধৃতরাষ্ট্র উবাচ
কথং শিখণ্ডী গাঙ্গেয়মভ্যবর্তত সংয়ুগে
পাণ্ডবাশ্চ তথা ভীষ্মং তন্মমাচক্ষ্ব সংজয়
104.2
সংজয় উবাচ
ততঃ প্রভাতে বিমলে সূর্যস্যোদয়নং প্রতি
বাদ্যমানাসু ভেরীষু মৃদঙ্গেষ্বানকেষু চ
104.3
ধ্মায়ত্সু দধিবর্ণেষু জলজেষু সমন্ততঃ
শিখণ্ডিনং পুরস্কৃত্য নির্যাতাঃ পাণ্ডবা যুধি
104.4
কৃত্বা ব্যূহং মহারাজ সর্বশত্রুনিবর্হণম্
শিখণ্ডী সর্বসৈন্যানামগ্র আসীদ্বিশাং পতে
104.5
চক্ররক্ষৌ ততস্তস্য ভীমসেনধনংজয়ৌ
পৃষ্ঠতো দ্রৌপদেয়াশ্চ সৌভদ্রশ্চৈব বীর্যবান্
104.6
সাত্যকিশ্চেকিতানশ্চ তেষাং গোপ্তা মহারথঃ
ধৃষ্টদ্যুম্নস্ততঃ পশ্চাত্পাঞ্চালৈরভিরক্ষিতঃ
104.7
ততো যুধিষ্ঠিরো রাজা যমাভ্যাং সহিতঃ প্রভুঃ
প্রয়য়ৌ সিংহনাদেন নাদয়ন্ভরতর্ষভ
104.8
বিরাটস্তু ততঃ পশ্চাত্স্বেন সৈন্যেন সংবৃতঃ
দ্রুপদশ্চ মহারাজ ততঃ পশ্চাদুপাদ্রবৎ
104.9
কেকয়া ভ্রাতরঃ পঞ্চ ধৃষ্টকেতুশ্চ বীর্যবান্
জঘনং পালয়ামাস পাণ্ডুসৈন্যস্য ভারত
104.10
এবং ব্যূহ্য মহত্সৈন্যং পাণ্ডবাস্তব বাহিনীম্
অভ্যদ্রবন্ত সংগ্রামে ত্যক্ত্বা জীবিতমাত্মনঃ
104.11
তথৈব কুরবো রাজন্ভীষ্মং কৃত্বা মহাবলম্
অগ্রতঃ সর্বসৈন্যানাং প্রয়য়ুঃ পাণ্ডবান্প্রতি
104.12
পুত্রৈস্তব দুরাধর্ষৈ রক্ষিতঃ সুমহাবলৈঃ
ততো দ্রোণো মহেষ্বাসঃ পুত্রশ্চাস্য মহারথঃ
104.13
ভগদত্তস্ততঃ পশ্চাদ্গজানীকেন সংবৃতঃ
কৃপশ্চ কৃতবর্মা চ ভগদত্তমনুব্রতৌ
104.14
কাম্বোজরাজো বলবাংস্ততঃ পশ্চাত্সুদক্ষিণঃ
মাগধশ্চ জয়ত্সেনঃ সৌবলশ্চ বৃহদ্বলঃ
104.15
তথেতরে মহেষ্বাসাঃ সুশর্মপ্রমুখা নৃপাঃ
জঘনং পালয়ামাসুস্তব সৈন্যস্য ভারত
104.16
দিবসে দিবসে প্রাপ্তে ভীষ্মঃ শাংতনবো যুধি
আসুরানকরোদ্ব্যূহান্পৈশাচানথ রাক্ষসান্
104.17
ততঃ প্রববৃতে যুদ্ধং তব তেষাং চ ভারত
অন্যোন্যং নিঘ্নতাং রাজন্যমরাষ্ট্রবিবর্ধনম্
104.18
অর্জুনপ্রমুখাঃ পার্থাঃ পুরস্কৃত্য শিখণ্ডিনম্
ভীষ্মং যুদ্ধেঽভ্যবর্তন্ত কিরন্তো বিবিধাঞ্শরান্
104.19
তত্র ভারত ভীমেন পীডিতাস্তাবকাঃ শরৈঃ
রুধিরৌঘপরিক্লিন্নাঃ পরলোকং যয়ুস্তদা
104.20
নকুলঃ সহদেবশ্চ সাত্যকিশ্চ মহারথঃ
তব সৈন্যং সমাসাদ্য পীডয়ামাসুরোজসা
104.21
তে বধ্যমানাঃ সমরে তাবকা ভরতর্ষভ
নাশক্নুবন্বারয়িতুং পাণ্ডবানাং মহদ্বলম্
104.22
ততস্তু তাবকং সৈন্যং বধ্যমানং সমন্ততঃ
সংপ্রাদ্রবদ্দিশো রাজন্কাল্যমানং মহারথৈঃ
104.23
ত্রাতারং নাধ্যগচ্ছন্ত তাবকা ভরতর্ষভ
বধ্যমানাঃ শিতৈর্বাণৈঃ পাণ্ডবৈঃ সহসৃঞ্জয়ৈঃ
104.24
ধৃতরাষ্ট্র উবাচ
পীড্যমানং বলং পার্থৈর্দৃষ্ট্বা ভীষ্মঃ পরাক্রমী
যদকার্ষীদ্রণে ক্রুদ্ধস্তন্মমাচক্ষ্ব সংজয়
104.25
কথং বা পাণ্ডবান্যুদ্ধে প্রত্যুদ্যাতঃ পরংতপঃ
বিনিঘ্নন্সোমকান্বীরাংস্তন্মমাচক্ষ্ব সংজয়
104.26
সংজয় উবাচ
আচক্ষে তে মহারাজ যদকার্ষীত্পিতামহঃ
পীডিতে তব পুত্রস্য সৈন্যে পাণ্ডবসৃঞ্জয়ৈঃ
104.27
প্রহৃষ্টমনসঃ শূরাঃ পাণ্ডবাঃ পাণ্ডুপূর্বজ
অভ্যবর্তন্ত নিঘ্নন্তস্তব পুত্রস্য বাহিনীম্
104.28
তং বিনাশং মনুষ্যেন্দ্র নরবারণবাজিনাম্
নামৃষ্যত তদা ভীষ্মঃ সৈন্যঘাতং রণে পরৈঃ
104.29
স পাণ্ডবান্মহেষ্বাসঃ পাঞ্চালাংশ্চ সসৃঞ্জয়ান্
অভ্যদ্রবত দুর্ধর্ষস্ত্যক্ত্বা জীবিতমাত্মনঃ
104.30
স পাণ্ডবানাং প্রবরান্পঞ্চ রাজন্মহারথান্
আত্তশস্ত্রান্রণে যত্তান্বারয়ামাস সায়কৈঃ
নারাচৈর্বত্সদন্তৈশ্চ শিতৈরঞ্জলিকৈস্তথা
104.31
নিজঘ্নে সমরে ক্রুদ্ধো হস্ত্যশ্বমমিতং বহু
রথিনোঽপাতয়দ্রাজন্রথেভ্যঃ পুরুষর্ষভঃ
104.32
সাদিনশ্চাশ্বপৃষ্ঠেভ্যঃ পদাতীংশ্চ সমাগতান্
গজারোহান্গজেভ্যশ্চ পরেষাং বিদধদ্ভয়ম্
104.33
তমেকং সমরে ভীষ্মং ত্বরমাণং মহারথম্
পাণ্ডবাঃ সমবর্তন্ত বজ্রপাণিমিবাসুরাঃ
104.34
শক্রাশনিসমস্পর্শান্বিমুঞ্চন্নিশিতাঞ্শরান্
দিক্ষ্বদৃশ্যত সর্বাসু ঘোরং সংধারয়ন্বপুঃ
104.35
মণ্ডলীকৃতমেবাস্য নিত্যং ধনুরদৃশ্যত
সংগ্রামে যুধ্যমানস্য শক্রচাপনিভং মহৎ
104.36
তদ্দৃষ্ট্বা সমরে কর্ম তব পুত্রা বিশাং পতে
বিস্ময়ং পরমং প্রাপ্তাঃ পিতামহমপূজয়ন্
104.37
পার্থা বিমনসো ভূত্বা প্রৈক্ষন্ত পিতরং তব
যুধ্যমানং রণে শূরং বিপ্রচিত্তিমিবামরাঃ
ন চৈনং বারয়ামাসুর্ব্যাত্তাননমিবান্তকম্
104.38
দশমেঽহনি সংপ্রাপ্তে রথানীকং শিখণ্ডিনঃ
অদহন্নিশিতৈর্বাণৈঃ কৃষ্ণবর্ত্মেব কাননম্
104.39
তং শিখণ্ডী ত্রিভির্বাণৈরভ্যবিধ্যত্স্তনান্তরে
আশীবিষমিব ক্রুদ্ধং কালসৃষ্টমিবান্তকম্
104.40
স তেনাতিভৃশং বিদ্ধঃ প্রেক্ষ্য ভীষ্মঃ শিখণ্ডিনম্
অনিচ্ছন্নপি সংক্রুদ্ধঃ প্রহসন্নিদমব্রবীৎ
104.41
কামমভ্যস বা মা বা ন ত্বাং যোত্স্যে কথংচন
যৈব হি ত্বং কৃতা ধাত্রা সৈব হি ত্বং শিখণ্ডিনী
104.42
তস্য তদ্বচনং শ্রুত্বা শিখণ্ডী ক্রোধমূর্ছিতঃ
উবাচ ভীষ্মং সমরে সৃক্কিণী পরিলেলিহন্
104.43
জানামি ত্বাং মহাবাহো ক্ষত্রিয়াণাং ক্ষয়ংকরম্
ময়া শ্রুতং চ তে যুদ্ধং জামদগ্ন্যেন বৈ সহ
104.44
দিব্যশ্চ তে প্রভাবোঽয়ং স ময়া বহুশঃ শ্রুতঃ
জানন্নপি প্রভাবং তে যোত্স্যেঽদ্যাহং ত্বয়া সহ
104.45
পাণ্ডবানাং প্রিয়ং কুর্বন্নাত্মনশ্চ নরোত্তম
অদ্য ত্বা যোধয়িষ্যামি রণে পুরুষসত্তম
104.46
ধ্রুবং চ ত্বা হনিষ্যামি শপে সত্যেন তেঽগ্রতঃ
এতচ্ছ্রুত্বা বচো মহ্যং যত্ক্ষমং তত্সমাচর
104.47
কামমভ্যস বা মা বা ন মে জীবন্বিমোক্ষ্যসে
সুদৃষ্টঃ ক্রিয়তাং ভীষ্ম লোকোঽয়ং সমিতিংজয়
104.48
এবমুক্ত্বা ততো ভীষ্মং পঞ্চভির্নতপর্বভিঃ
অবিধ্যত রণে রাজন্প্রণুন্নং বাক্যসায়কৈঃ
104.49
তস্য তদ্বচনং শ্রুত্বা সব্যসাচী পরংতপঃ
কালোঽয়মিতি সংচিন্ত্য শিখণ্ডিনমচোদয়ৎ
104.50
অহং ত্বামনুয়াস্যামি পরান্বিদ্রাবয়ঞ্শরৈঃ
অভিদ্রব সুসংরব্ধো ভীষ্মং ভীমপরাক্রমম্
104.51
ন হি তে সংয়ুগে পীডাং শক্তঃ কর্তুং মহাবলঃ
তস্মাদদ্য মহাবাহো বীর ভীষ্মমভিদ্রব
104.52
অহত্বা সমরে ভীষ্মং যদি যাস্যসি মারিষ
অবহাস্যোঽস্য লোকস্য ভবিষ্যসি ময়া সহ
104.53
নাবহাস্যা যথা বীর ভবেম পরমাহবে
তথা কুরু রণে যত্নং সাধয়স্ব পিতামহম্
104.54
অহং তে রক্ষণং যুদ্ধে করিষ্যামি পরংতপ
বারয়ন্রথিনঃ সর্বান্সাধয়স্ব পিতামহম্
104.55
দ্রোণং চ দ্রোণপুত্রং চ কৃপং চাথ সুয়োধনম্
চিত্রসেনং বিকর্ণং চ সৈন্ধবং চ জয়দ্রথম্
104.56
বিন্দানুবিন্দাবাবন্ত্যৌ কাম্বোজং চ সুদক্ষিণম্
ভগদত্তং তথা শূরং মাগধং চ মহারথম্
104.57
সৌমদত্তিং রণে শূরমার্শ্যশৃঙ্গিং চ রাক্ষসম্
ত্রিগর্তরাজং চ রণে সহ সর্বৈর্মহারথৈঃ
অহমাবারয়িষ্যামি বেলেব মকরালয়ম্
104.58
কুরূংশ্চ সহিতান্সর্বান্যে চৈষাং সৈনিকাঃ স্থিতাঃ
নিবারয়িষ্যামি রণে সাধয়স্ব পিতামহম্