Utshovঅধ্যায় 105
105.1
ধৃতরাষ্ট্র উবাচ
কথং শিখণ্ডী গাঙ্গেয়মভ্যধাবত্পিতামহম্
পাঞ্চাল্যঃ সমরে ক্রুদ্ধো ধর্মাত্মানং যতব্রতম্
105.2
কেঽরক্ষন্পাণ্ডবানীকে শিখণ্ডিনমুদায়ুধম্
ত্বরমাণাস্ত্বরাকালে জিগীষন্তো মহারথাঃ
105.3
কথং শাংতনবো ভীষ্মঃ স তস্মিন্দশমেঽহনি
অয়ুধ্যত মহাবীর্যঃ পাণ্ডবৈঃ সহসৃঞ্জয়ৈঃ
105.4
ন মৃষ্যামি রণে ভীষ্মং প্রত্যুদ্যাতং শিখণ্ডিনম্
কচ্চিন্ন রথভঙ্গোঽস্য ধনুর্বাশীর্যতাস্যতঃ
105.5
সংজয় উবাচ
নাশীর্যত ধনুস্তস্য রথভঙ্গো ন চাপ্যভূৎ
যুধ্যমানস্য সংগ্রামে ভীষ্মস্য ভরতর্ষভ
নিঘ্নতঃ সমরে শত্রূঞ্শরৈঃ সংনতপর্বভিঃ
105.6
অনেকশতসাহস্রাস্তাবকানাং মহারথাঃ
রথদন্তিগণা রাজন্হয়াশ্চৈব সুসজ্জিতাঃ
অভ্যবর্তন্ত যুদ্ধায় পুরস্কৃত্য পিতামহম্
105.7
যথাপ্রতিজ্ঞং কৌরব্য স চাপি সমিতিংজয়ঃ
পার্থানামকরোদ্ভীষ্মঃ সততং সমিতিক্ষয়ম্
105.8
যুধ্যমানং মহেষ্বাসং বিনিঘ্নন্তং পরাঞ্শরৈঃ
পাঞ্চালাঃ পাণ্ডবৈঃ সার্ধং সর্ব এবাভ্যবারয়ন্
105.9
দশমেঽহনি সংপ্রাপ্তে ততাপ রিপুবাহিনীম্
কীর্যমাণাং শিতৈর্বাণৈঃ শতশোঽথ সহস্রশঃ
105.10
ন হি ভীষ্মং মহেষ্বাসং পাণ্ডবাঃ পাণ্ডুপূর্বজ
অশক্নুবন্রণে জেতুং পাশহস্তমিবান্তকম্
105.11
অথোপায়ান্মহারাজ সব্যসাচী পরংতপঃ
ত্রাসয়ন্রথিনঃ সর্বান্বীভত্সুরপরাজিতঃ
105.12
সিংহবদ্বিনদন্নুচ্চৈর্ধনুর্জ্যাং বিক্ষিপন্মুহুঃ
শরৌঘান্বিসৃজন্পার্থো ব্যচরত্কালবদ্রণে
105.13
তস্য শব্দেন বিত্রস্তাস্তাবকা ভরতর্ষভ
সিংহস্যেব মৃগা রাজন্ব্যদ্রবন্ত মহাভয়াৎ
105.14
জয়ন্তং পাণ্ডবং দৃষ্ট্বা ত্বত্সৈন্যং চাভিপীডিতম্
দুর্যোধনস্ততো ভীষ্মমব্রবীদ্ভৃশপীডিতঃ
105.15
এষ পাণ্ডুসুতস্তাত শ্বেতাশ্বঃ কৃষ্ণসারথিঃ
দহতে মামকান্সর্বান্কৃষ্ণবর্ত্মেব কাননম্
105.16
পশ্য সৈন্যানি গাঙ্গেয় দ্রবমাণানি সর্বশঃ
পাণ্ডবেন যুধাং শ্রেষ্ঠ কাল্যমানানি সংয়ুগে
105.17
যথা পশুগণান্পালঃ সংকালয়তি কাননে
তথেদং মামকং সৈন্যং কাল্যতে শত্রুতাপন
105.18
ধনংজয়শরৈর্ভগ্নং দ্রবমাণমিতস্ততঃ
ভীমো হ্যেষ দুরাধর্ষো বিদ্রাবয়তি মে বলম্
105.19
সাত্যকিশ্চেকিতানশ্চ মাদ্রীপুত্রৌ চ পাণ্ডবৌ
অভিমন্যুশ্চ বিক্রান্তো বাহিনীং দহতে মম
105.20
ধৃষ্টদ্যুম্নস্তথা শূরো রাক্ষসশ্চ ঘটোত্কচঃ
ব্যদ্রাবয়েতাং সহসা সৈন্যং মম মহাবলৌ
105.21
বধ্যমানস্য সৈন্যস্য সর্বৈরেতৈর্মহাবলৈঃ
নান্যাং গতিং প্রপশ্যামি স্থানে যুদ্ধে চ ভারত
105.22
ঋতে ত্বাং পুরুষব্যাঘ্র দেবতুল্যপরাক্রম
পর্যাপ্তশ্চ ভবান্ক্ষিপ্রং পীডিতানাং গতির্ভব
105.23
এবমুক্তো মহারাজ পিতা দেবব্রতস্তব
চিন্তয়িত্বা মুহূর্তং তু কৃত্বা নিশ্চয়মাত্মনঃ
তব সংধারয়ন্পুত্রমব্রবীচ্ছংতনোঃ সুতঃ
105.24
দুর্যোধন বিজানীহি স্থিরো ভব বিশাং পতে
পূর্বকালং তব ময়া প্রতিজ্ঞাতং মহাবল
105.25
হত্বা দশ সহস্রাণি ক্ষত্রিয়াণাং মহাত্মনাম্
সংগ্রামাদ্ব্যপয়াতব্যমেতত্কর্ম মমাহ্নিকম্
ইতি তত্কৃতবাংশ্চাহং যথোক্তং ভরতর্ষভ
105.26
অদ্য চাপি মহত্কর্ম প্রকরিষ্যে মহাহবে
অহং বা নিহতঃ শেষ্যে হনিষ্যে বাদ্য পাণ্ডবান্
105.27
অদ্য তে পুরুষব্যাঘ্র প্রতিমোক্ষ্যে ঋণং মহৎ
ভর্তৃপিণ্ডকৃতং রাজন্নিহতঃ পৃতনামুখে
105.28
ইত্যুক্ত্বা ভরতশ্রেষ্ঠঃ ক্ষত্রিয়ান্প্রতপঞ্শরৈঃ
আসসাদ দুরাধর্ষঃ পাণ্ডবানামনীকিনীম্
105.29
অনীকমধ্যে তিষ্ঠন্তং গাঙ্গেয়ং ভরতর্ষভ
আশীবিষমিব ক্রুদ্ধং পাণ্ডবাঃ পর্যবারয়ন্
105.30
দশমেঽহনি তস্মিংস্তু দর্শয়ঞ্শক্তিমাত্মনঃ
রাজঞ্শতসহস্রাণি সোঽবধীত্কুরুনন্দন
105.31
পঞ্চালানাং চ যে শ্রেষ্ঠা রাজপুত্রা মহাবলাঃ
তেষামাদত্ত তেজাংসি জলং সূর্য ইবাংশুভিঃ
105.32
হত্বা দশ সহস্রাণি কুঞ্জরাণাং তরস্বিনাম্
সারোহাণাং মহারাজ হয়ানাং চায়ুতং পুনঃ
105.33
পূর্ণে শতসহস্রে দ্বে পদাতীনাং নরোত্তমঃ
প্রজজ্বাল রণে ভীষ্মো বিধূম ইব পাবকঃ
105.34
ন চৈনং পাণ্ডবেয়ানাং কেচিচ্ছেকুর্নিরীক্ষিতুম্
উত্তরং মার্গমাস্থায় তপন্তমিব ভাস্করম্
105.35
তে পাণ্ডবেয়াঃ সংরব্ধা মহেষ্বাসেন পীডিতাঃ
বধায়াভ্যদ্রবন্ভীষ্মং সৃঞ্জয়াশ্চ মহারথাঃ
105.36
স যুধ্যমানো বহুভির্ভীষ্মঃ শাংতনবস্তদা
অবকীর্ণো মহাবাহুঃ শৈলো মেঘৈরিবাসিতৈঃ
105.37
পুত্রাস্তু তব গাঙ্গেয়ং সমন্তাত্পর্যবারয়ন্
মহত্যা সেনয়া সার্ধং ততো যুদ্ধমবর্তত