Utshovঅধ্যায় 106
106.1
সংজয় উবাচ
অর্জুনস্তু রণে রাজন্দৃষ্ট্বা ভীষ্মস্য বিক্রমম্
শিখণ্ডিনমথোবাচ সমভ্যেহি পিতামহম্
106.2
ন চাপি ভীস্ত্বয়া কার্যা ভীষ্মাদদ্য কথংচন
অহমেনং শরৈস্তীক্ষ্ণৈঃ পাতয়িষ্যে রথোত্তমাৎ
106.3
এবমুক্তস্তু পার্থেন শিখণ্ডী ভরতর্ষভ
অভ্যদ্রবত গাঙ্গেয়ং শ্রুত্বা পার্থস্য ভাষিতম্
106.4
ধৃষ্টদ্যুম্নস্তথা রাজন্সৌভদ্রশ্চ মহারথঃ
হৃষ্টাবাদ্রবতাং ভীষ্মং শ্রুত্বা পার্থস্য ভাষিতম্
106.5
বিরাটদ্রুপদৌ বৃদ্ধৌ কুন্তিভোজশ্চ দংশিতঃ
অভ্যদ্রবত গাঙ্গেয়ং পুত্রস্য তব পশ্যতঃ
106.6
নকুলঃ সহদেবশ্চ ধর্মরাজশ্চ বীর্যবান্
তথেতরাণি সৈন্যানি সর্বাণ্যেব বিশাং পতে
সমাদ্রবন্ত গাঙ্গেয়ং শ্রুত্বা পার্থস্য ভাষিতম্
106.7
প্রত্যুদ্যয়ুস্তাবকাশ্চ সমেতাস্তান্মহারথান্
যথাশক্তি যথোত্সাহং তন্মে নিগদতঃ শৃণু
106.8
চিত্রসেনো মহারাজ চেকিতানং সমভ্যয়াৎ
ভীষ্মপ্রেপ্সুং রণে যান্তং বৃষং ব্যাঘ্রশিশুর্যথা
106.9
ধৃষ্টদ্যুম্নং মহারাজ ভীষ্মান্তিকমুপাগতম্
ত্বরমাণো রণে যত্তং কৃতবর্মা ন্যবারয়ৎ
106.10
ভীমসেনং সুসংক্রুদ্ধং গাঙ্গেয়স্য বধৈষিণম্
ত্বরমাণো মহারাজ সৌমদত্তির্ন্যবারয়ৎ
106.11
তথৈব নকুলং বীরং কিরন্তং সায়কান্বহূন্
বিকর্ণো বারয়ামাস ইচ্ছন্ভীষ্মস্য জীবিতম্
106.12
সহদেবং তথা যান্তং যত্তং ভীষ্মরথং প্রতি
বারয়ামাস সংক্রুদ্ধঃ কৃপঃ শারদ্বতো যুধি
106.13
রাক্ষসং ক্রূরকর্মাণং ভৈমসেনিং মহাবলম্
ভীষ্মস্য নিধনং প্রেপ্সুং দুর্মুখোঽভ্যদ্রবদ্বলী
106.14
সাত্যকিং সমরে ক্রুদ্ধমার্শ্যশৃঙ্গিরবারয়ৎ
অভিমন্যুং মহারাজ যান্তং ভীষ্মরথং প্রতি
সুদক্ষিণো মহারাজ কাম্বোজঃ প্রত্যবারয়ৎ
106.15
বিরাটদ্রুপদৌ বৃদ্ধৌ সমেতাবরিমর্দনৌ
অশ্বত্থামা ততঃ ক্রুদ্ধো বারয়ামাস ভারত
106.16
তথা পাণ্ডুসুতং জ্যেষ্ঠং ভীষ্মস্য বধকাঙ্ক্ষিণম্
ভারদ্বাজো রণে যত্তো ধর্মপুত্রমবারয়ৎ
106.17
অর্জুনং রভসং যুদ্ধে পুরস্কৃত্য শিখণ্ডিনম্
ভীষ্মপ্রেপ্সুং মহারাজ তাপয়ন্তং দিশো দশ
দুঃশাসনো মহেষ্বাসো বারয়ামাস সংয়ুগে
106.18
অন্যে চ তাবকা যোধাঃ পাণ্ডবানাং মহারথান্
ভীষ্মায়াভিমুখং যাতান্বারয়ামাসুরাহবে
106.19
ধৃষ্টদ্যুম্নস্তু সৈন্যানি প্রাক্রোশত পুনঃ পুনঃ
অভিদ্রবত সংরব্ধা ভীষ্মমেকং মহাবলম্
106.20
এষোঽর্জুনো রণে ভীষ্মং প্রয়াতি কুরুনন্দনঃ
অভিদ্রবত মা ভৈষ্ট ভীষ্মো ন প্রাপ্স্যতে হি বঃ
106.21
অর্জুনং সমরে যোদ্ধুং নোত্সহেতাপি বাসবঃ
কিমু ভীষ্মো রণে বীরা গতসত্ত্বোঽল্পজীবিতঃ
106.22
ইতি সেনাপতেঃ শ্রুত্বা পাণ্ডবানাং মহারথাঃ
অভ্যদ্রবন্ত সংহৃষ্টা গাঙ্গেয়স্য রথং প্রতি
106.23
আগচ্ছতস্তান্সমরে বার্যোঘান্প্রবলানিব
ন্যবারয়ন্ত সংহৃষ্টাস্তাবকাঃ পুরুষর্ষভাঃ
106.24
দুঃশাসনো মহারাজ ভয়ং ত্যক্ত্বা মহারথঃ
ভীষ্মস্য জীবিতাকাঙ্ক্ষী ধনংজয়মুপাদ্রবৎ
106.25
তথৈব পাণ্ডবাঃ শূরা গাঙ্গেয়স্য রথং প্রতি
অভ্যদ্রবন্ত সংগ্রামে তব পুত্রান্মহারথান্
106.26
তত্রাদ্ভুতমপশ্যাম চিত্ররূপং বিশাং পতে
দুঃশাসনরথং প্রাপ্তো যত্পার্থো নাত্যবর্তত
106.27
যথা বারয়তে বেলা ক্ষুভিতং বৈ মহার্ণবম্
তথৈব পাণ্ডবং ক্রুদ্ধং তব পুত্রো ন্যবারয়ৎ
106.28
উভৌ হি রথিনাং শ্রেষ্ঠাবুভৌ ভারত দুর্জয়ৌ
উভৌ চন্দ্রার্কসদৃশৌ কান্ত্যা দীপ্ত্যা চ ভারত
106.29
তৌ তথা জাতসংরম্ভাবন্যোন্যবধকাঙ্ক্ষিণৌ
সমীয়তুর্মহাসংখ্যে ময়শক্রৌ যথা পুরা
106.30
দুঃশাসনো মহারাজ পাণ্ডবং বিশিখৈস্ত্রিভিঃ
বাসুদেবং চ বিংশত্যা তাডয়ামাস সংয়ুগে
106.31
ততোঽর্জুনো জাতমন্যুর্বার্ষ্ণেয়ং বীক্ষ্য পীডিতম্
দুঃশাসনং শতেনাজৌ নারাচানাং সমার্পয়ৎ
তে তস্য কবচং ভিত্ত্বা পপুঃ শোণিতমাহবে
106.32
দুঃশাসনস্ততঃ ক্রুদ্ধঃ পার্থং বিব্যাধ পঞ্চভিঃ
ললাটে ভরতশ্রেষ্ঠ শরৈঃ সংনতপর্বভিঃ
106.33
ললাটস্থৈস্তু তৈর্বাণৈঃ শুশুভে পাণ্ডবোত্তমঃ
যথা মেরুর্মহারাজ শৃঙ্গৈরত্যর্থমুচ্ছ্রিতৈঃ
106.34
সোঽতিবিদ্ধো মহেষ্বাসঃ পুত্রেণ তব ধন্বিনা
ব্যরাজত রণে পার্থঃ কিংশুকঃ পুষ্পবানিব
106.35
দুঃশাসনং ততঃ ক্রুদ্ধঃ পীডয়ামাস পাণ্ডবঃ
পর্বণীব সুসংক্রুদ্ধো রাহুরুগ্রো নিশাকরম্
106.36
পীড্যমানো বলবতা পুত্রস্তব বিশাং পতে
বিব্যাধ সমরে পার্থং কঙ্কপত্রৈঃ শিলাশিতৈঃ
106.37
তস্য পার্থো ধনুশ্ছিত্ত্বা ত্বরমাণঃ পরাক্রমী
আজঘান ততঃ পশ্চাত্পুত্রং তে নবভিঃ শরৈঃ
106.38
সোঽন্যত্কার্মুকমাদায় ভীষ্মস্য প্রমুখে স্থিতঃ
অর্জুনং পঞ্চবিংশত্যা বাহ্বোরুরসি চার্পয়ৎ
106.39
তস্য ক্রুদ্ধো মহারাজ পাণ্ডবঃ শত্রুকর্শনঃ
অপ্রৈষীদ্বিশিখান্ঘোরান্যমদণ্ডোপমান্বহূন্
106.40
অপ্রাপ্তানেব তান্বাণাংশ্চিচ্ছেদ তনয়স্তব
যতমানস্য পার্থস্য তদদ্ভুতমিবাভবৎ
পার্থং চ নিশিতৈর্বাণৈরবিধ্যত্তনয়স্তব
106.41
ততঃ ক্রুদ্ধো রণে পার্থঃ শরান্সংধায় কার্মুকে
প্রেষয়ামাস সমরে স্বর্ণপুঙ্খাঞ্শিলাশিতান্
106.42
ন্যমজ্জংস্তে মহারাজ তস্য কায়ে মহাত্মনঃ
যথা হংসা মহারাজ তডাগং প্রাপ্য ভারত
106.43
পীডিতশ্চৈব পুত্রস্তে পাণ্ডবেন মহাত্মনা
হিত্বা পার্থং রণে তূর্ণং ভীষ্মস্য রথমাশ্রয়ৎ
অগাধে মজ্জতস্তস্য দ্বীপো ভীষ্মোঽভবত্তদা
106.44
প্রতিলভ্য ততঃ সংজ্ঞাং পুত্রস্তব বিশাং পতে
অবারয়ত্ততঃ শূরো ভূয় এব পরাক্রমী
106.45
শরৈঃ সুনিশিতৈঃ পার্থং যথা বৃত্রঃ পুরংদরম্
নির্বিভেদ মহাবীর্যো বিব্যথে নৈব চার্জুনাৎ