Utshovঅধ্যায় 107
107.1
সংজয় উবাচ
সাত্যকিং দংশিতং যুদ্ধে ভীষ্মায়াভ্যুদ্যতং তদা
আর্শ্যশৃঙ্গির্মহেষ্বাসো বারয়ামাস সংয়ুগে
107.2
মাধবস্তু সুসংক্রুদ্ধো রাক্ষসং নবভিঃ শরৈঃ
আজঘান রণে রাজন্প্রহসন্নিব ভারত
107.3
তথৈব রাক্ষসো রাজন্মাধবং নিশিতৈঃ শরৈঃ
অর্দয়ামাস রাজেন্দ্র সংক্রুদ্ধঃ শিনিপুংগবম্
107.4
শৈনেয়ঃ শরসংঘং তু প্রেষয়ামাস সংয়ুগে
রাক্ষসায় সুসংক্রুদ্ধো মাধবঃ পরবীরহা
107.5
ততো রক্ষো মহাবাহুং সাত্যকিং সত্যবিক্রমম্
বিব্যাধ বিশিখৈস্তীক্ষ্ণৈঃ সিংহনাদং ননাদ চ
107.6
মাধবস্তু ভৃশং বিদ্ধো রাক্ষসেন রণে তদা
ধৈর্যমালম্ব্য তেজস্বী জহাস চ ননাদ চ
107.7
ভগদত্তস্ততঃ ক্রুদ্ধো মাধবং নিশিতৈঃ শরৈঃ
তাডয়ামাস সমরে তোত্ত্রৈরিব মহাগজম্
107.8
বিহায় রাক্ষসং যুদ্ধে শৈনেয়ো রথিনাং বরঃ
প্রাগ্জ্যোতিষায় চিক্ষেপ শরান্সংনতপর্বণঃ
107.9
তস্য প্রাগ্জ্যোতিষো রাজা মাধবস্য মহদ্ধনুঃ
চিচ্ছেদ শিতধারেণ ভল্লেন কৃতহস্তবৎ
107.10
অথান্যদ্ধনুরাদায় বেগবত্পরবীরহা
ভগদত্তং রণে ক্রুদ্ধো বিব্যাধ নিশিতৈঃ শরৈঃ
107.11
সোঽতিবিদ্ধো মহেষ্বাসঃ সৃক্কিণী সংলিহন্মুহুঃ
শক্তিং কনকবৈডূর্যভূষিতামায়সীং দৃঢাম্
যমদণ্ডোপমাং ঘোরাং প্রাহিণোত্সাত্যকায় বৈ
107.12
তামাপতন্তীং সহসা তস্য বাহোর্বলেরিতাম্
সাত্যকিঃ সমরে রাজংস্ত্রিধা চিচ্ছেদ সায়কৈঃ
সা পপাত তদা ভূমৌ মহোল্কেব হতপ্রভা
107.13
শক্তিং বিনিহতাং দৃষ্ট্বা পুত্রস্তব বিশাং পতে
মহতা রথবংশেন বারয়ামাস মাধবম্
107.14
তথা পরিবৃতং দৃষ্ট্বা বার্ষ্ণেয়ানাং মহারথম্
দুর্যোধনো ভৃশং হৃষ্টো ভ্রাতৄন্সর্বানুবাচ হ
107.15
তথা কুরুত কৌরব্যা যথা বঃ সাত্যকো যুধি
ন জীবন্প্রতিনির্যাতি মহতোঽস্মাদ্রথব্রজাৎ
অস্মিন্হতে হতং মন্যে পাণ্ডবানাং মহদ্বলম্
107.16
তত্তথেতি বচস্তস্য পরিগৃহ্য মহারথাঃ
শৈনেয়ং যোধয়ামাসুর্ভীষ্মস্য প্রমুখে তদা
107.17
অভিমন্যুং তদায়ান্তং ভীষ্মায়াভ্যুদ্যতং মৃধে
কাম্বোজরাজো বলবান্বারয়ামাস সংয়ুগে
107.18
আর্জুনির্নৃপতিং বিদ্ধ্বা শরৈঃ সংনতপর্বভিঃ
পুনরেব চতুঃষষ্ট্যা রাজন্বিব্যাধ তং নৃপম্
107.19
সুদক্ষিণস্তু সমরে কার্ষ্ণিং বিব্যাধ পঞ্চভিঃ
সারথিং চাস্য নবভিরিচ্ছন্ভীষ্মস্য জীবিতম্
107.20
তদ্যুদ্ধমাসীত্সুমহত্তয়োস্তত্র পরাক্রমে
যদভ্যধাবদ্গাঙ্গেয়ং শিখণ্ডী শত্রুতাপনঃ
107.21
বিরাটদ্রুপদৌ বৃদ্ধৌ বারয়ন্তৌ মহাচমূম্
ভীষ্মং চ যুধি সংরব্ধাবাদ্রবন্তৌ মহারথৌ
107.22
অশ্বত্থামা ততঃ ক্রুদ্ধঃ সমায়াদ্রথসত্তমঃ
ততঃ প্রববৃতে যুদ্ধং তব তেষাং চ ভারত
107.23
বিরাটো দশভির্ভল্লৈরাজঘান পরংতপ
যতমানং মহেষ্বাসং দ্রৌণিমাহবশোভিনম্
107.24
দ্রুপদশ্চ ত্রিভির্বাণৈর্বিব্যাধ নিশিতৈস্তথা
গুরুপুত্রং সমাসাদ্য ভীষ্মস্য পুরতঃ স্থিতম্
107.25
অশ্বত্থামা ততস্তৌ তু বিব্যাধ দশভিঃ শরৈঃ
বিরাটদ্রুপদৌ বৃদ্ধৌ ভীষ্মং প্রতি সমুদ্যতৌ
107.26
তত্রাদ্ভুতমপশ্যাম বৃদ্ধয়োশ্চরিতং মহৎ
যদ্দ্রৌণেঃ সায়কান্ঘোরান্প্রত্যবারয়তাং যুধি
107.27
সহদেবং তথা যান্তং কৃপঃ শারদ্বতোঽভ্যয়াৎ
যথা নাগো বনে নাগং মত্তো মত্তমুপাদ্রবৎ
107.28
কৃপশ্চ সমরে রাজন্মাদ্রীপুত্রং মহারথম্
আজঘান শরৈস্তূর্ণং সপ্তত্যা রুক্মভূষণৈঃ
107.29
তস্য মাদ্রীসুতশ্চাপং দ্বিধা চিচ্ছেদ সায়কৈঃ
অথৈনং ছিন্নধন্বানং বিব্যাধ নবভিঃ শরৈঃ
107.30
সোঽন্যত্কার্মুকমাদায় সমরে ভারসাধনম্
মাদ্রীপুত্রং সুসংহৃষ্টো দশভির্নিশিতৈঃ শরৈঃ
আজঘানোরসি ক্রুদ্ধ ইচ্ছন্ভীষ্মস্য জীবিতম্
107.31
তথৈব পাণ্ডবো রাজঞ্শারদ্বতমমর্ষণম্
আজঘানোরসি ক্রুদ্ধো ভীষ্মস্য বধকাঙ্ক্ষয়া
তয়োর্যুদ্ধং সমভবদ্ঘোররূপং ভয়াবহম্
107.32
নকুলং তু রণে ক্রুদ্ধং বিকর্ণঃ শত্রুতাপনঃ
বিব্যাধ সায়কৈঃ ষষ্ট্যা রক্ষন্ভীষ্মস্য জীবিতম্
107.33
নকুলোঽপি ভৃশং বিদ্ধস্তব পুত্রেণ ধন্বিনা
বিকর্ণং সপ্তসপ্তত্যা নির্বিভেদ শিলীমুখৈঃ
107.34
তত্র তৌ নরশার্দূলৌ ভীষ্মহেতোঃ পরংতপৌ
অন্যোন্যং জঘ্নতুর্বীরৌ গোষ্ঠে গোবৃষভাবিব
107.35
ঘটোত্কচং রণে যত্তং নিঘ্নন্তং তব বাহিনীম্
দুর্মুখঃ সমরে প্রায়াদ্ভীষ্মহেতোঃ পরাক্রমী
107.36
হৈডিম্বস্তু ততো রাজন্দুর্মুখং শত্রুতাপনম্
আজঘানোরসি ক্রুদ্ধো নবত্যা নিশিতৈঃ শরৈঃ
107.37
ভীমসেনসুতং চাপি দুর্মুখঃ সুমুখৈঃ শরৈঃ
ষষ্ট্যা বীরো নদন্হৃষ্টো বিব্যাধ রণমূর্ধনি
107.38
ধৃষ্টদ্যুম্নং রণে যান্তং ভীষ্মস্য বধকাঙ্ক্ষিণম্
হার্দিক্যো বারয়ামাস রক্ষন্ভীষ্মস্য জীবিতম্
107.39
বার্ষ্ণেয়ঃ পার্ষতং শূরং বিদ্ধ্বা পঞ্চভিরায়সৈঃ
পুনঃ পঞ্চাশতা তূর্ণমাজঘান স্তনান্তরে
107.40
তথৈব পার্ষতো রাজন্হার্দিক্যং নবভিঃ শরৈঃ
বিব্যাধ নিশিতৈস্তীক্ষ্ণৈঃ কঙ্কপত্রপরিচ্ছদৈঃ
107.41
তয়োঃ সমভবদ্যুদ্ধং ভীষ্মহেতোর্মহারণে
অন্যোন্যাতিশয়ৈর্যুক্তং যথা বৃত্রমহেন্দ্রয়োঃ
107.42
ভীমসেনমথায়ান্তং ভীষ্মং প্রতি মহাবলম্
ভূরিশ্রবাভ্যয়াত্তূর্ণং তিষ্ঠ তিষ্ঠেতি চাব্রবীৎ
107.43
সৌমদত্তিরথো ভীমমাজঘান স্তনান্তরে
নারাচেন সুতীক্ষ্ণেন রুক্মপুঙ্খেন সংয়ুগে
107.44
উরঃস্থেন বভৌ তেন ভীমসেনঃ প্রতাপবান্
স্কন্দশক্ত্যা যথা ক্রৌঞ্চঃ পুরা নৃপতিসত্তম
107.45
তৌ শরান্সূর্যসংকাশান্কর্মারপরিমার্জিতান্
অন্যোন্যস্য রণে ক্রুদ্ধৌ চিক্ষিপাতে মুহুর্মুহুঃ
107.46
ভীমো ভীষ্মবধাকাঙ্ক্ষী সৌমদত্তিং মহারথম্
তথা ভীষ্মজয়ে গৃধ্নুঃ সৌমদত্তিশ্চ পাণ্ডবম্
কৃতপ্রতিকৃতে যত্তৌ যোধয়ামাসতূ রণে
107.47
যুধিষ্ঠিরং মহারাজ মহত্যা সেনয়া বৃতম্
ভীষ্মায়াভিমুখং যান্তং ভারদ্বাজো ন্যবারয়ৎ
107.48
দ্রোণস্য রথনির্ঘোষং পর্জন্যনিনদোপমম্
শ্রুত্বা প্রভদ্রকা রাজন্সমকম্পন্ত মারিষ
107.49
সা সেনা মহতী রাজন্পাণ্ডুপুত্রস্য সংয়ুগে
দ্রোণেন বারিতা যত্তা ন চচাল পদাত্পদম্
107.50
চেকিতানং রণে ক্রুদ্ধং ভীষ্মং প্রতি জনেশ্বর
চিত্রসেনস্তব সুতঃ ক্রুদ্ধরূপমবারয়ৎ
107.51
ভীষ্মহেতোঃ পরাক্রান্তশ্চিত্রসেনো মহারথঃ
চেকিতানং পরং শক্ত্যা যোধয়ামাস ভারত
107.52
তথৈব চেকিতানোঽপি চিত্রসেনময়োধয়ৎ
তদ্যুদ্ধমাসীত্সুমহত্তয়োস্তত্র পরাক্রমে
107.53
অর্জুনো বার্যমাণস্তু বহুশস্তনয়েন তে
বিমুখীকৃত্য পুত্রং তে তব সেনাং মমর্দ হ
107.54
দুঃশাসনোঽপি পরয়া শক্ত্যা পার্থমবারয়ৎ
কথং ভীষ্মং পরো হন্যাদিতি নিশ্চিত্য ভারত
107.55
সা বধ্যমানা সমরে পুত্রস্য তব বাহিনী
লোড্যতে রথিভিঃ শ্রেষ্ঠৈস্তত্র তত্রৈব ভারত