Utshovঅধ্যায় 108
108.1
সংজয় উবাচ
অথ বীরো মহেষ্বাসো মত্তবারণবিক্রমঃ
সমাদায় মহচ্চাপং মত্তবারণবারণম্
108.2
বিধুন্বানো ধনুঃ শ্রেষ্ঠং দ্রাবয়াণো মহারথান্
পৃতনাং পাণ্ডবেয়ানাং পাতয়ানো মহারথঃ
108.3
নিমিত্তানি নিমিত্তজ্ঞঃ সর্বতো বীক্ষ্য বীর্যবান্
প্রতপন্তমনীকানি দ্রোণঃ পুত্রমভাষত
108.4
অয়ং স দিবসস্তাত যত্র পার্থো মহারথঃ
জিঘাংসুঃ সমরে ভীষ্মং পরং যত্নং করিষ্যতি
108.5
উত্পতন্তি হি মে বাণা ধনুঃ প্রস্ফুরতীব মে
যোগমস্ত্রাণি গচ্ছন্তি ক্রূরে মে বর্ততে মতিঃ
108.6
দিক্ষু শান্তাসু ঘোরাণি ব্যাহরন্তি মৃগদ্বিজাঃ
নীচৈর্গৃধ্রা নিলীয়ন্তে ভারতানাং চমূং প্রতি
108.7
নষ্টপ্রভ ইবাদিত্যঃ সর্বতো লোহিতা দিশঃ
রসতে ব্যথতে ভূমিরনুষ্টনতি বাহনম্
108.8
কঙ্কা গৃধ্রা বলাকাশ্চ ব্যাহরন্তি মুহুর্মুহুঃ
শিবাশ্চাশিবনির্ঘোষা বেদয়ন্ত্যো মহদ্ভয়ম্
108.9
পপাত মহতী চোল্কা মধ্যেনাদিত্যমণ্ডলাৎ
সকবন্ধশ্চ পরিঘো ভানুমাবৃত্য তিষ্ঠতি
108.10
পরিবেষস্তথা ঘোরশ্চন্দ্রভাস্করয়োরভূৎ
বেদয়ানো ভয়ং ঘোরং রাজ্ঞাং দেহাবকর্তনম্
108.11
দেবতায়তনস্থাশ্চ কৌরবেন্দ্রস্য দেবতাঃ
কম্পন্তে চ হসন্তে চ নৃত্যন্তি চ রুদন্তি চ
108.12
অপসব্যং গ্রহাশ্চক্রুরলক্ষ্মাণং নিশাকরম্
অবাক্শিরাশ্চ ভগবানুদতিষ্ঠত চন্দ্রমাঃ
108.13
বপূংষি চ নরেন্দ্রাণাং বিগতানীব লক্ষয়ে
ধার্তরাষ্ট্রস্য সৈন্যেষু ন চ ভ্রাজন্তি দংশিতাঃ
108.14
সেনয়োরুভয়োশ্চৈব সমন্তাচ্ছ্রূয়তে মহান্
পাঞ্চজন্যস্য নির্ঘোষো গাণ্ডীবস্য চ নিস্বনঃ
108.15
ধ্রুবমাস্থায় বীভত্সুরুত্তমাস্ত্রাণি সংয়ুগে
অপাস্যান্যান্রণে যোধানভ্যস্যতি পিতামহম্
108.16
হৃষ্যন্তি রোমকূপানি সীদতীব চ মে মনঃ
চিন্তয়িত্বা মহাবাহো ভীষ্মার্জুনসমাগমম্
108.17
তং চৈব নিকৃতিপ্রজ্ঞং পাঞ্চাল্যং পাপচেতসম্
পুরস্কৃত্য রণে পার্থো ভীষ্মস্যায়োধনং গতঃ
108.18
অব্রবীচ্চ পুরা ভীষ্মো নাহং হন্যাং শিখণ্ডিনম্
স্ত্রী হ্যেষা বিহিতা ধাত্রা দৈবাচ্চ স পুনঃ পুমান্
108.19
অমঙ্গল্যধ্বজশ্চৈব যাজ্ঞসেনির্মহারথঃ
ন চামঙ্গলকেতোঃ স প্রহরেদাপগাসুতঃ
108.20
এতদ্বিচিন্তয়ানস্য প্রজ্ঞা সীদতি মে ভৃশম্
অদ্যৈব তু রণে পার্থঃ কুরুবৃদ্ধমুপাদ্রবৎ
108.21
যুধিষ্ঠিরস্য চ ক্রোধো ভীষ্মার্জুনসমাগমঃ
মম চাস্ত্রাভিসংরম্ভঃ প্রজানামশুভং ধ্রুবম্
108.22
মনস্বী বলবাঞ্শূরঃ কৃতাস্ত্রো দৃঢবিক্রমঃ
দূরপাতী দৃঢেষুশ্চ নিমিত্তজ্ঞশ্চ পাণ্ডবঃ
108.23
অজেয়ঃ সমরে চৈব দেবৈরপি সবাসবৈঃ
বলবান্বুদ্ধিমাংশ্চৈব জিতক্লেশো যুধাং বরঃ
108.24
বিজয়ী চ রণে নিত্যং ভৈরবাস্ত্রশ্চ পাণ্ডবঃ
তস্য মার্গং পরিহরন্দ্রুতং গচ্ছ যতব্রতম্
108.25
পশ্য চৈতন্মহাবাহো বৈশসং সমুপস্থিতম্
হেমচিত্রাণি শূরাণাং মহান্তি চ শুভানি চ
108.26
কবচান্যবদীর্যন্তে শরৈঃ সংনতপর্বভিঃ
ছিদ্যন্তে চ ধ্বজাগ্রাণি তোমরাণি ধনূংষি চ
108.27
প্রাসাশ্চ বিমলাস্তীক্ষ্ণাঃ শক্ত্যশ্চ কনকোজ্জ্বলাঃ
বৈজয়ন্ত্যশ্চ নাগানাং সংক্রুদ্ধেন কিরীটিনা
108.28
নায়ং সংরক্ষিতুং কালঃ প্রাণান্পুত্রোপজীবিভিঃ
যাহি স্বর্গং পুরস্কৃত্য যশসে বিজয়ায় চ
108.29
হয়নাগরথাবর্তাং মহাঘোরাং সুদুস্তরাম্
রথেন সংগ্রামনদীং তরত্যেষ কপিধ্বজঃ
108.30
ব্রহ্মণ্যতা দমো দানং তপশ্চ চরিতং মহৎ
ইহৈব দৃশ্যতে রাজ্ঞো ভ্রাতা যস্য ধনংজয়ঃ
108.31
ভীমসেনশ্চ বলবান্মাদ্রীপুত্রৌ চ পাণ্ডবৌ
বাসুদেবশ্চ বার্ষ্ণেয়ো যস্য নাথো ব্যবস্থিতঃ
108.32
তস্যৈষ মন্যুপ্রভবো ধার্তরাষ্ট্রস্য দুর্মতেঃ
তপোদগ্ধশরীরস্য কোপো দহতি ভারতান্
108.33
এষ সংদৃশ্যতে পার্থো বাসুদেবব্যপাশ্রয়ঃ
দারয়ন্সর্বসৈন্যানি ধার্তরাষ্ট্রাণি সর্বশঃ
108.34
এতদালোক্যতে সৈন্যং ক্ষোভ্যমাণং কিরীটিনা
মহোর্মিনদ্ধং সুমহত্তিমিনেব নদীমুখম্
108.35
হাহাকিলকিলাশব্দাঃ শ্রূয়ন্তে চ চমূমুখে
যাহি পাঞ্চালদায়াদমহং যাস্যে যুধিষ্ঠিরম্
108.36
দুর্লভং হ্যন্তরং রাজ্ঞো ব্যূহস্যামিততেজসঃ
সমুদ্রকুক্ষিপ্রতিমং সর্বতোঽতিরথৈঃ স্থিতৈঃ
108.37
সাত্যকিশ্চাভিমন্যুশ্চ ধৃষ্টদ্যুম্নবৃকোদরৌ
পরিরক্ষন্তি রাজানং যমৌ চ মনুজেশ্বরম্
108.38
উপেন্দ্রসদৃশঃ শ্যামো মহাশাল ইবোদ্গতঃ
এষ গচ্ছত্যনীকানি দ্বিতীয় ইব ফল্গুনঃ
108.39
উত্তমাস্ত্রাণি চাদত্স্ব গৃহীত্বান্যন্মহদ্ধনুঃ
পার্শ্বতো যাহি রাজানং যুধ্যস্ব চ বৃকোদরম্
108.40
কো হি নেচ্ছেত্প্রিয়ং পুত্রং জীবন্তং শাশ্বতীঃ সমাঃ
ক্ষত্রধর্মং পুরস্কৃত্য ততস্ত্বা বিনিয়ুজ্মহে
108.41
এষ চাপি রণে ভীষ্মো দহতে বৈ মহাচমূম্
যুদ্ধে সুসদৃশস্তাত যমস্য বরুণস্য চ