Utshovঅধ্যায় 109
109.1
সংজয় উবাচ
ভগদত্তঃ কৃপঃ শল্যঃ কৃতবর্মা চ সাত্বতঃ
বিন্দানুবিন্দাবাবন্ত্যৌ সৈন্ধবশ্চ জয়দ্রথঃ
109.2
চিত্রসেনো বিকর্ণশ্চ তথা দুর্মর্ষণো যুবা
দশৈতে তাবকা যোধা ভীমসেনময়োধয়ন্
109.3
মহত্যা সেনয়া যুক্তা নানাদেশসমুত্থয়া
ভীষ্মস্য সমরে রাজন্প্রার্থয়ানা মহদ্যশঃ
109.4
শল্যস্তু নবভির্বাণৈর্ভীমসেনমতাডয়ৎ
কৃতবর্মা ত্রিভির্বাণৈঃ কৃপশ্চ নবভিঃ শরৈঃ
109.5
চিত্রসেনো বিকর্ণশ্চ ভগদত্তশ্চ মারিষ
দশভির্দশভির্ভল্লৈর্ভীমসেনমতাডয়ন্
109.6
সৈন্ধবশ্চ ত্রিভির্বাণৈর্জত্রুদেশেঽভ্যতাডয়ৎ
বিন্দানুবিন্দাবাবন্ত্যৌ পঞ্চভিঃ পঞ্চভিঃ শরৈঃ
দুর্মর্ষণশ্চ বিংশত্যা পাণ্ডবং নিশিতৈঃ শরৈঃ
109.7
স তান্সর্বান্মহারাজ ভ্রাজমানান্পৃথক্পৃথক্
প্রবীরান্সর্বলোকস্য ধার্তরাষ্ট্রান্মহারথান্
বিব্যাধ বহুভির্বাণৈর্ভীমসেনো মহাবলঃ
109.8
শল্যং পঞ্চাশতা বিদ্ধ্বা কৃতবর্মাণমষ্টভিঃ
কৃপস্য সশরং চাপং মধ্যে চিচ্ছেদ ভারত
অথৈনং ছিন্নধন্বানং পুনর্বিব্যাধ পঞ্চভিঃ
109.9
বিন্দানুবিন্দৌ চ তথা ত্রিভিস্ত্রিভিরতাডয়ৎ
দুর্মর্ষণং চ বিংশত্যা চিত্রসেনং চ পঞ্চভিঃ
109.10
বিকর্ণং দশভির্বাণৈঃ পঞ্চভিশ্চ জয়দ্রথম্
বিদ্ধ্বা ভীমোঽনদদ্ধৃষ্টঃ সৈন্ধবং চ পুনস্ত্রিভিঃ
109.11
অথান্যদ্ধনুরাদায় গৌতমো রথিনাং বরঃ
ভীমং বিব্যাধ সংরব্ধো দশভির্নিশিতৈঃ শরৈঃ
109.12
স বিদ্ধো বহুভির্বাণৈস্তোত্ত্রৈরিব মহাদ্বিপঃ
ততঃ ক্রুদ্ধো মহাবাহুর্ভীমসেনঃ প্রতাপবান্
গৌতমং তাডয়ামাস শরৈর্বহুভিরাহবে
109.13
সৈন্ধবস্য তথাশ্বাংশ্চ সারথিং চ ত্রিভিঃ শরৈঃ
প্রাহিণোন্মৃত্যুলোকায় কালান্তকসমদ্যুতিঃ
109.14
হতাশ্বাত্তু রথাত্তূর্ণমবপ্লুত্য মহারথঃ
শরাংশ্চিক্ষেপ নিশিতান্ভীমসেনস্য সংয়ুগে
109.15
তস্য ভীমো ধনুর্মধ্যে দ্বাভ্যাং চিচ্ছেদ ভারত
ভল্লাভ্যাং ভরতশ্রেষ্ঠ সৈন্ধবস্য মহাত্মনঃ
109.16
স চ্ছিন্নধন্বা বিরথো হতাশ্বো হতসারথিঃ
চিত্রসেনরথং রাজন্নারুরোহ ত্বরান্বিতঃ
109.17
অত্যদ্ভুতং রণে কর্ম কৃতবাংস্তত্র পাণ্ডবঃ
মহারথাঞ্শরৈর্বিদ্ধ্বা বারয়িত্বা মহারথঃ
বিরথং সৈন্ধবং চক্রে সর্বলোকস্য পশ্যতঃ
109.18
নাতীব মমৃষে শল্যো ভীমসেনস্য বিক্রমম্
স সংধায় শরাংস্তীক্ষ্ণান্কর্মারপরিমার্জিতান্
ভীমং বিব্যাধ সপ্তত্যা তিষ্ঠ তিষ্ঠেতি চাব্রবীৎ
109.19
কৃপশ্চ কৃতবর্মা চ ভগদত্তশ্চ মারিষ
বিন্দানুবিন্দাবাবন্ত্যৌ চিত্রসেনশ্চ সংয়ুগে
109.20
দুর্মর্ষণো বিকর্ণশ্চ সিন্ধুরাজশ্চ বীর্যবান্
ভীমং তে বিব্যধুস্তূর্ণং শল্যহেতোররিংদমাঃ
109.21
স তু তান্প্রতিবিব্যাধ পঞ্চভিঃ পঞ্চভিঃ শরৈঃ
শল্যং বিব্যাধ সপ্তত্যা পুনশ্চ দশভিঃ শরৈঃ
109.22
তং শল্যো নবভির্বিদ্ধ্বা পুনর্বিব্যাধ পঞ্চভিঃ
সারথিং চাস্য ভল্লেন গাঢং বিব্যাধ মর্মণি
109.23
বিশোকং বীক্ষ্য নির্ভিন্নং ভীমসেনঃ প্রতাপবান্
মদ্ররাজং ত্রিভির্বাণৈর্বাহ্বোরুরসি চার্পয়ৎ
109.24
তথেতরান্মহেষ্বাসাংস্ত্রিভিস্ত্রিভিরজিহ্মগৈঃ
তাডয়ামাস সমরে সিংহবচ্চ ননাদ চ
109.25
তে হি যত্তা মহেষ্বাসাঃ পাণ্ডবং যুদ্ধদুর্মদম্
ত্রিভিস্ত্রিভিরকুণ্ঠাগ্রৈর্ভৃশং মর্মস্বতাডয়ন্
109.26
সোঽতিবিদ্ধো মহেষ্বাসো ভীমসেনো ন বিব্যথে
পর্বতো বারিধারাভির্বর্ষমাণৈরিবাম্বুদৈঃ
109.27
শল্যং চ নবভির্বাণৈর্ভৃশং বিদ্ধ্বা মহায়শাঃ
প্রাগ্জ্যোতিষং শতেনাজৌ রাজন্বিব্যাধ বৈ দৃঢম্
109.28
ততস্তু সশরং চাপং সাত্বতস্য মহাত্মনঃ
ক্ষুরপ্রেণ সুতীক্ষ্ণেন চিচ্ছেদ কৃতহস্তবৎ
109.29
অথান্যদ্ধনুরাদায় কৃতবর্মা বৃকোদরম্
আজঘান ভ্রুবোর্মধ্যে নারাচেন পরংতপ
109.30
ভীমস্তু সমরে বিদ্ধ্বা শল্যং নবভিরায়সৈঃ
ভগদত্তং ত্রিভিশ্চৈব কৃতবর্মাণমষ্টভিঃ
109.31
দ্বাভ্যাং দ্বাভ্যাং চ বিব্যাধ গৌতমপ্রভৃতীন্রথান্
তে তু তং সমরে রাজন্বিব্যধুর্নিশিতৈঃ শরৈঃ
109.32
স তথা পীড্যমানোঽপি সর্বতস্তৈর্মহারথৈঃ
মত্বা তৃণেন তাংস্তুল্যান্বিচচার গতব্যথঃ
109.33
তে চাপি রথিনাং শ্রেষ্ঠা ভীমায় নিশিতাঞ্শরান্
প্রেষয়ামাসুরব্যগ্রাঃ শতশোঽথ সহস্রশঃ
109.34
তস্য শক্তিং মহাবেগাং ভগদত্তো মহারথঃ
চিক্ষেপ সমরে বীরঃ স্বর্ণদণ্ডাং মহাধনাম্
109.35
তোমরং সৈন্ধবো রাজা পট্টিশং চ মহাভুজঃ
শতঘ্নীং চ কৃপো রাজঞ্শরং শল্যশ্চ সংয়ুগে
109.36
অথেতরে মহেষ্বাসাঃ পঞ্চ পঞ্চ শিলীমুখান্
ভীমসেনং সমুদ্দিশ্য প্রেষয়ামাসুরোজসা
109.37
তোমরং স দ্বিধা চক্রে ক্ষুরপ্রেণানিলাত্মজঃ
পট্টিশং চ ত্রিভির্বাণৈশ্চিচ্ছেদ তিলকাণ্ডবৎ
109.38
স বিভেদ শতঘ্নীং চ নবভিঃ কঙ্কপত্রিভিঃ
মদ্ররাজপ্রয়ুক্তং চ শরং ছিত্ত্বা মহাবলঃ
109.39
শক্তিং চিচ্ছেদ সহসা ভগদত্তেরিতাং রণে
তথেতরাঞ্শরান্ঘোরাঞ্শরৈঃ সংনতপর্বভিঃ
109.40
ভীমসেনো রণশ্লাঘী ত্রিধৈকৈকং সমাচ্ছিনৎ
তাংশ্চ সর্বান্মহেষ্বাসাংস্ত্রিভিস্ত্রিভিরতাডয়ৎ
109.41
ততো ধনংজয়স্তত্র বর্তমানে মহারণে
জগাম স রথেনাজৌ ভীমং দৃষ্ট্বা মহারথম্
নিঘ্নন্তং সমরে শত্রূন্যোধয়ানং চ সায়কৈঃ
109.42
তৌ তু তত্র মহাত্মানৌ সমেতৌ বীক্ষ্য পাণ্ডবৌ
নাশশংসুর্জয়ং তত্র তাবকাঃ পুরুষর্ষভ
109.43
অথার্জুনো রণে ভীষ্মং যোধয়ন্বৈ মহারথম্
ভীষ্মস্য নিধনাকাঙ্ক্ষী পুরস্কৃত্য শিখণ্ডিনম্
109.44
আসসাদ রণে যোধাংস্তাবকান্দশ ভারত
যে স্ম ভীমং রণে রাজন্যোধয়ন্তো ব্যবস্থিতাঃ
বীভত্সুস্তানথাবিধ্যদ্ভীমস্য প্রিয়কাম্যয়া
109.45
ততো দুর্যোধনো রাজা সুশর্মাণমচোদয়ৎ
অর্জুনস্য বধার্থায় ভীমসেনস্য চোভয়োঃ
109.46
সুশর্মন্গচ্ছ শীঘ্রং ত্বং বলৌঘৈঃ পরিবারিতঃ
জহি পাণ্ডুসুতাবেতৌ ধনংজয়বৃকোদরৌ
109.47
তচ্ছ্রুত্বা শাসনং তস্য ত্রিগর্তঃ প্রস্থলাধিপঃ
অভিদ্রুত্য রণে ভীমমর্জুনং চৈব ধন্বিনৌ
109.48
রথৈরনেকসাহস্রৈঃ পরিবব্রে সমন্ততঃ
ততঃ প্রববৃতে যুদ্ধমর্জুনস্য পরৈঃ সহ