Utshovঅধ্যায় 110
110.1
সংজয় উবাচ
অর্জুনস্তু রণে শল্যং যতমানং মহারথম্
ছাদয়ামাস সমরে শরৈঃ সংনতপর্বভিঃ
110.2
সুশর্মাণং কৃপং চৈব ত্রিভিস্ত্রিভিরবিধ্যত
প্রাগ্জ্যোতিষং চ সমরে সৈন্ধবং চ জয়দ্রথম্
110.3
চিত্রসেনং বিকর্ণং চ কৃতবর্মাণমেব চ
দুর্মর্ষণং চ রাজেন্দ্র আবন্ত্যৌ চ মহারথৌ
110.4
একৈকং ত্রিভিরানর্ছত্কঙ্কবর্হিণবাজিতৈঃ
শরৈরতিরথো যুদ্ধে পীডয়ন্বাহিনীং তব
110.5
জয়দ্রথো রণে পার্থং ভিত্ত্বা ভারত সায়কৈঃ
ভীমং বিব্যাধ তরসা চিত্রসেনরথে স্থিতঃ
110.6
শল্যশ্চ সমরে জিষ্ণুং কৃপশ্চ রথিনাং বরঃ
বিব্যধাতে মহাবাহুং বহুধা মর্মভেদিভিঃ
110.7
চিত্রসেনাদয়শ্চৈব পুত্রাস্তব বিশাং পতে
পঞ্চভিঃ পঞ্চভিস্তূর্ণং সংয়ুগে নিশিতৈঃ শরৈঃ
আজঘ্নুরর্জুনং সংখ্যে ভীমসেনং চ মারিষ
110.8
তৌ তত্র রথিনাং শ্রেষ্ঠৌ কৌন্তেয়ৌ ভরতর্ষভৌ
অপীডয়েতাং সমরে ত্রিগর্তানাং মহদ্বলম্
110.9
সুশর্মাপি রণে পার্থং বিদ্ধ্বা বহুভিরায়সৈঃ
ননাদ বলবন্নাদং নাদয়ন্বৈ নভস্তলম্
110.10
অন্যে চ রথিনঃ শূরা ভীমসেনধনংজয়ৌ
বিব্যধুর্নিশিতৈর্বাণৈ রুক্মপুঙ্খৈরজিহ্মগৈঃ
110.11
তেষাং তু রথিনাং মধ্যে কৌন্তেয়ৌ রথিনাং বরৌ
ক্রীডমানৌ রথোদারৌ চিত্ররূপৌ ব্যরোচতাম্
আমিষেপ্সূ গবাং মধ্যে সিংহাবিব বলোত্কটৌ
110.12
ছিত্ত্বা ধনূংষি বীরাণাং শরাংশ্চ বহুধা রণে
পাতয়ামাসতুর্বীরৌ শিরাংসি শতশো নৃণাম্
110.13
রথাশ্চ বহবো ভগ্না হয়াশ্চ শতশো হতাঃ
গজাশ্চ সগজারোহাঃ পেতুরুর্ব্যাং মহামৃধে
110.14
রথিনঃ সাদিনশ্চৈব তত্র তত্র নিসূদিতাঃ
দৃশ্যন্তে বহুধা রাজন্বেষ্টমানাঃ সমন্ততঃ
110.15
হতৈর্গজপদাত্যোঘৈর্বাজিভিশ্চ নিসূদিতৈঃ
রথৈশ্চ বহুধা ভগ্নৈঃ সমাস্তীর্যত মেদিনী
110.16
ছত্রৈশ্চ বহুধা ছিন্নৈর্ধ্বজৈশ্চ বিনিপাতিতৈঃ
অঙ্কুশৈরপবিদ্ধৈশ্চ পরিস্তোমৈশ্চ ভারত
110.17
কেয়ূরৈরঙ্গদৈর্হারৈ রাঙ্কবৈর্মৃদিতৈস্তথা
উষ্ণীষৈরপবিদ্ধৈশ্চ চামরব্যজনৈরপি
110.18
তত্র তত্রাপবিদ্ধৈশ্চ বাহুভিশ্চন্দনোক্ষিতৈঃ
ঊরুভিশ্চ নরেন্দ্রাণাং সমাস্তীর্যত মেদিনী
110.19
তত্রাদ্ভুতমপশ্যাম রণে পার্থস্য বিক্রমম্
শরৈঃ সংবার্য তান্বীরান্নিজঘান বলং তব
110.20
পুত্রস্তু তব তং দৃষ্ট্বা ভীমার্জুনসমাগমম্
গাঙ্গেয়স্য রথাভ্যাশমুপজগ্মে মহাভয়ে
110.21
কৃপশ্চ কৃতবর্মা চ সৈন্ধবশ্চ জয়দ্রথঃ
বিন্দানুবিন্দাবাবন্ত্যাবাজগ্মুঃ সংয়ুগং তদা
110.22
ততো ভীমো মহেষ্বাসঃ ফল্গুনশ্চ মহারথঃ
কৌরবাণাং চমূং ঘোরাং ভৃশং দুদ্রুবতূ রণে
110.23
ততো বর্হিণবাজানাময়ুতান্যর্বুদানি চ
ধনংজয়রথে তূর্ণং পাতয়ন্তি স্ম সংয়ুগে
110.24
ততস্তাঞ্শরজালেন সংনিবার্য মহারথান্
পার্থঃ সমন্তাত্সমরে প্রেষয়ামাস মৃত্যবে
110.25
শল্যস্তু সমরে জিষ্ণুং ক্রীডন্নিব মহারথঃ
আজঘানোরসি ক্রুদ্ধো ভল্লৈঃ সংনতপর্বভিঃ
110.26
তস্য পার্থো ধনুশ্ছিত্ত্বা হস্তাবাপং চ পঞ্চভিঃ
অথৈনং সায়কৈস্তীক্ষ্ণৈর্ভৃশং বিব্যাধ মর্মণি
110.27
অথান্যদ্ধনুরাদায় সমরে ভারসাধনম্
মদ্রেশ্বরো রণে জিষ্ণুং তাডয়ামাস রোষিতঃ
110.28
ত্রিভিঃ শরৈর্মহারাজ বাসুদেবং চ পঞ্চভিঃ
ভীমসেনং চ নবভির্বাহ্বোরুরসি চার্পয়ৎ
110.29
ততো দ্রোণো মহারাজ মাগধশ্চ মহারথঃ
দুর্যোধনসমাদিষ্টৌ তং দেশমুপজগ্মতুঃ
110.30
যত্র পার্থো মহারাজ ভীমসেনশ্চ পাণ্ডবঃ
কৌরব্যস্য মহাসেনাং জঘ্নতুস্তৌ মহারথৌ
110.31
জয়ত্সেনস্তু সমরে ভীমং ভীমায়ুধং যুবা
বিব্যাধ নিশিতৈর্বাণৈরষ্টভির্ভরতর্ষভ
110.32
তং ভীমো দশভির্বিদ্ধ্বা পুনর্বিব্যাধ সপ্তভিঃ
সারথিং চাস্য ভল্লেন রথনীডাদপাহরৎ
110.33
উদ্ভ্রান্তৈস্তুরগৈঃ সোঽথ দ্রবমাণৈঃ সমন্ততঃ
মাগধোঽপহৃতো রাজা সর্বসৈন্যস্য পশ্যতঃ
110.34
দ্রোণস্তু বিবরং লব্ধ্বা ভীমসেনং শিলীমুখৈঃ
বিব্যাধ বাণৈঃ সুশিতৈঃ পঞ্চষষ্ট্যা তমায়সৈঃ
110.35
তং ভীমঃ সমরশ্লাঘী গুরুং পিতৃসমং রণে
বিব্যাধ নবভির্ভল্লৈস্তথা ষষ্ট্যা চ ভারত
110.36
অর্জুনস্তু সুশর্মাণং বিদ্ধ্বা বহুভিরায়সৈঃ
ব্যধমত্তস্য তত্সৈন্যং মহাভ্রাণি যথানিলঃ
110.37
ততো ভীষ্মশ্চ রাজা চ সৌবলশ্চ বৃহদ্বলঃ
অভ্যদ্রবন্ত সংক্রুদ্ধা ভীমসেনধনংজয়ৌ
110.38
তথৈব পাণ্ডবাঃ শূরা ধৃষ্টদ্যুম্নশ্চ পার্ষতঃ
অভ্যদ্রবন্রণে ভীষ্মং ব্যাদিতাস্যমিবান্তকম্
110.39
শিখণ্ডী তু সমাসাদ্য ভারতানাং পিতামহম্
অভ্যদ্রবত সংহৃষ্টো ভয়ং ত্যক্ত্বা যতব্রতম্
110.40
যুধিষ্ঠিরমুখাঃ পার্থাঃ পুরস্কৃত্য শিখণ্ডিনম্
অয়োধয়ন্রণে ভীষ্মং সংহতাঃ সহ সৃঞ্জয়ৈঃ
110.41
তথৈব তাবকাঃ সর্বে পুরস্কৃত্য যতব্রতম্
শিখণ্ডিপ্রমুখান্পার্থান্যোধয়ন্তি স্ম সংয়ুগে
110.42
ততঃ প্রববৃতে যুদ্ধং কৌরবাণাং ভয়াবহম্
তত্র পাণ্ডুসুতৈঃ সার্ধং ভীষ্মস্য বিজয়ং প্রতি
110.43
তাবকানাং রণে ভীষ্মো গ্লহ আসীদ্বিশাং পতে
তত্র হি দ্যূতমায়াতং বিজয়ায়েতরায় বা
110.44
ধৃষ্টদ্যুম্নো মহারাজ সর্বসৈন্যান্যচোদয়ৎ
অভিদ্রবত গাঙ্গেয়ং মা ভৈষ্ট নরসত্তমাঃ
110.45
সেনাপতিবচঃ শ্রুত্বা পাণ্ডবানাং বরূথিনী
ভীষ্মমেবাভ্যয়াত্তূর্ণং প্রাণাংস্ত্যক্ত্বা মহাহবে
110.46
ভীষ্মোঽপি রথিনাং শ্রেষ্ঠঃ প্রতিজগ্রাহ তাং চমূম্
আপতন্তীং মহারাজ বেলামিব মহোদধিঃ