Utshovঅধ্যায় 111
111.1
ধৃতরাষ্ট্র উবাচ
কথং শাংতনবো ভীষ্মো দশমেঽহনি সংজয়
অয়ুধ্যত মহাবীর্যৈঃ পাণ্ডবৈঃ সহসৃঞ্জয়ৈঃ
111.2
কুরবশ্চ কথং যুদ্ধে পাণ্ডবান্প্রত্যবারয়ন্
আচক্ষ্ব মে মহায়ুদ্ধং ভীষ্মস্যাহবশোভিনঃ
111.3
সংজয় উবাচ
কুরবঃ পাণ্ডবৈঃ সার্ধং যথায়ুধ্যন্ত ভারত
যথা চ তদভূদ্যুদ্ধং তত্তে বক্ষ্যামি শৃণ্বতঃ
111.4
প্রেষিতাঃ পরলোকায় পরমাস্ত্রৈঃ কিরীটিনা
অহন্যহনি সংপ্রাপ্তাস্তাবকানাং রথব্রজাঃ
111.5
যথাপ্রতিজ্ঞং কৌরব্যঃ স চাপি সমিতিংজয়ঃ
পার্থানামকরোদ্ভীষ্মঃ সততং সমিতিক্ষয়ম্
111.6
কুরুভিঃ সহিতং ভীষ্মং যুধ্যমানং মহারথম্
অর্জুনং চ সপাঞ্চাল্যং দৃষ্ট্বা সংশয়িতা জনাঃ
111.7
দশমেঽহনি তস্মিংস্তু ভীষ্মার্জুনসমাগমে
অবর্তত মহারৌদ্রঃ সততং সমিতিক্ষয়ঃ
111.8
তস্মিন্নয়ুতশো রাজন্ভূয়শ্চ স পরংতপঃ
ভীষ্মঃ শাংতনবো যোধাঞ্জঘান পরমাস্ত্রবিৎ
111.9
যেষামজ্ঞাতকল্পানি নামগোত্রাণি পার্থিব
তে হতাস্তত্র ভীষ্মেণ শূরাঃ সর্বেঽনিবর্তিনঃ
111.10
দশাহানি ততস্তপ্ত্বা ভীষ্মঃ পাণ্ডববাহিনীম্
নিরবিদ্যত ধর্মাত্মা জীবিতেন পরংতপঃ
111.11
স ক্ষিপ্রং বধমন্বিচ্ছন্নাত্মনোঽভিমুখং রণে
ন হন্যাং মানবশ্রেষ্ঠান্সংগ্রামেঽভিমুখানিতি
111.12
চিন্তয়িত্বা মহাবাহুঃ পিতা দেবব্রতস্তব
অভ্যাশস্থং মহারাজ পাণ্ডবং বাক্যমব্রবীৎ
111.13
যুধিষ্ঠির মহাপ্রাজ্ঞ সর্বশাস্ত্রবিশারদ
শৃণু মে বচনং তাত ধর্ম্যং স্বর্গ্যং চ জল্পতঃ
111.14
নির্বিণ্ণোঽস্মি ভৃশং তাত দেহেনানেন ভারত
ঘ্নতশ্চ মে গতঃ কালঃ সুবহূন্প্রাণিনো রণে
111.15
তস্মাত্পার্থং পুরোধায় পাঞ্চালান্সৃঞ্জয়াংস্তথা
মদ্বধে ক্রিয়তাং যত্নো মম চেদিচ্ছসি প্রিয়ম্
111.16
তস্য তন্মতমাজ্ঞায় পাণ্ডবঃ সত্যদর্শনঃ
ভীষ্মং প্রতিয়য়ৌ যত্তঃ সংগ্রামে সহ সৃঞ্জয়ৈঃ
111.17
ধৃষ্টদ্যুম্নস্ততো রাজন্পাণ্ডবশ্চ যুধিষ্ঠিরঃ
শ্রুত্বা ভীষ্মস্য তাং বাচং চোদয়ামাসতুর্বলম্
111.18
অভিদ্রবত যুধ্যধ্বং ভীষ্মং জয়ত সংয়ুগে
রক্ষিতাঃ সত্যসংধেন জিষ্ণুনা রিপুজিষ্ণুনা
111.19
অয়ং চাপি মহেষ্বাসঃ পার্ষতো বাহিনীপতিঃ
ভীমসেনশ্চ সমরে পালয়িষ্যতি বো ধ্রুবম্
111.20
ন বৈ ভীষ্মাদ্ভয়ং কিংচিত্কর্তব্যং যুধি সৃঞ্জয়াঃ
ধ্রুবং ভীষ্মং বিজেষ্যামঃ পুরস্কৃত্য শিখণ্ডিনম্
111.21
তথা তু সময়ং কৃত্বা দশমেঽহনি পাণ্ডবাঃ
ব্রহ্মলোকপরা ভূত্বা সংজগ্মুঃ ক্রোধমূর্ছিতাঃ
111.22
শিখণ্ডিনং পুরস্কৃত্য পাণ্ডবং চ ধনংজয়ম্
ভীষ্মস্য পাতনে যত্নং পরমং তে সমাস্থিতাঃ
111.23
ততস্তব সুতাদিষ্টা নানাজনপদেশ্বরাঃ
দ্রোণেন সহপুত্রেণ সহসেনা মহাবলাঃ
111.24
দুঃশাসনশ্চ বলবান্সহ সর্বৈঃ সহোদরৈঃ
ভীষ্মং সমরমধ্যস্থং পালয়াং চক্রিরে তদা
111.25
ততস্তু তাবকাঃ শূরাঃ পুরস্কৃত্য যতব্রতম্
শিখণ্ডিপ্রমুখান্পার্থান্যোধয়ন্তি স্ম সংয়ুগে
111.26
চেদিভিশ্চ সপাঞ্চালৈঃ সহিতো বানরধ্বজঃ
যয়ৌ শাংতনবং ভীষ্মং পুরস্কৃত্য শিখণ্ডিনম্
111.27
দ্রোণপুত্রং শিনের্নপ্তা ধৃষ্টকেতুস্তু পৌরবম্
যুধামন্যুঃ সহামাত্যং দুর্যোধনময়োধয়ৎ
111.28
বিরাটস্তু সহানীকঃ সহসেনং জয়দ্রথম্
বৃদ্ধক্ষত্রস্য দায়াদমাসসাদ পরংতপঃ
111.29
মদ্ররাজং মহেষ্বাসং সহসৈন্যং যুধিষ্ঠিরঃ
ভীমসেনাভিগুপ্তশ্চ নাগানীকমুপাদ্রবৎ
111.30
অপ্রধৃষ্যমনাবার্যং সর্বশস্ত্রভৃতাং বরম্
দ্রোণং প্রতি যয়ৌ যত্তঃ পাঞ্চাল্যঃ সহ সোমকৈঃ
111.31
কর্ণিকারধ্বজং চাপি সিংহকেতুররিংদমঃ
প্রত্যুজ্জগাম সৌভদ্রং রাজপুত্রো বৃহদ্বলঃ
111.32
শিখণ্ডিনং চ পুত্রাস্তে পাণ্ডবং চ ধনংজয়ম্
রাজভিঃ সমরে সার্ধমভিপেতুর্জিঘাংসবঃ
111.33
তস্মিন্নতিমহাভীমে সেনয়োর্বৈ পরাক্রমে
সংপ্রধাবত্স্বনীকেষু মেদিনী সমকম্পত
111.34
তান্যনীকান্যনীকেষু সমসজ্জন্ত ভারত
তাবকানাং পরেষাং চ দৃষ্ট্বা শাংতনবং রণে
111.35
ততস্তেষাং প্রয়ততামন্যোন্যমভিধাবতাম্
প্রাদুরাসীন্মহাঞ্শব্দো দিক্ষু সর্বাসু ভারত
111.36
শঙ্খদুন্দুভিঘোষৈশ্চ বারণানাং চ বৃংহিতৈঃ
সিংহনাদৈশ্চ সৈন্যানাং দারুণঃ সমপদ্যত
111.37
সা চ সর্বনরেন্দ্রাণাং চন্দ্রার্কসদৃশী প্রভা
বীরাঙ্গদকিরীটেষু নিষ্প্রভা সমপদ্যত
111.38
রজোমেঘাশ্চ সংজজ্ঞুঃ শস্ত্রবিদ্যুদ্ভিরাবৃতাঃ
ধনুষাং চৈব নির্ঘোষো দারুণঃ সমপদ্যত
111.39
বাণশঙ্খপ্রণাদাশ্চ ভেরীণাং চ মহাস্বনাঃ
রথঘোষশ্চ সংজগ্মুঃ সেনয়োরুভয়োরপি
111.40
প্রাসশক্ত্যৃষ্টিসংঘৈশ্চ বাণৌঘৈশ্চ সমাকুলম্
নিষ্প্রকাশমিবাকাশং সেনয়োঃ সমপদ্যত
111.41
অন্যোন্যং রথিনঃ পেতুর্বাজিনশ্চ মহাহবে
কুঞ্জরাঃ কুঞ্জরাঞ্জঘ্নুঃ পদাতীংশ্চ পদাতয়ঃ
111.42
তদাসীত্সুমহদ্যুদ্ধং কুরূণাং পাণ্ডবৈঃ সহ
ভীষ্মহেতোর্নরব্যাঘ্র শ্যেনয়োরামিষে যথা
111.43
তয়োঃ সমাগমো ঘোরো বভূব যুধি ভারত
অন্যোন্যস্য বধার্থায় জিগীষূণাং রণাজিরে