Utshovঅধ্যায় 112
112.1
সংজয় উবাচ
অভিমন্যুর্মহারাজ তব পুত্রময়োধয়ৎ
মহত্যা সেনয়া যুক্তো ভীষ্মহেতোঃ পরাক্রমী
112.2
দুর্যোধনো রণে কার্ষ্ণিং নবভির্নতপর্বভিঃ
আজঘান রণে ক্রুদ্ধঃ পুনশ্চৈনং ত্রিভিঃ শরৈঃ
112.3
তস্য শক্তিং রণে কার্ষ্ণির্মৃত্যোর্ঘোরামিব স্বসাম্
প্রেষয়ামাস সংক্রুদ্ধো দুর্যোধনরথং প্রতি
112.4
তামাপতন্তীং সহসা ঘোররূপাং বিশাং পতে
দ্বিধা চিচ্ছেদ তে পুত্রঃ ক্ষুরপ্রেণ মহারথঃ
112.5
তাং শক্তিং পতিতাং দৃষ্ট্বা কার্ষ্ণিঃ পরমকোপনঃ
দুর্যোধনং ত্রিভির্বাণৈর্বাহ্বোরুরসি চার্পয়ৎ
112.6
পুনশ্চৈনং শরৈর্ঘোরৈরাজঘান স্তনান্তরে
দশভির্ভরতশ্রেষ্ঠ দুর্যোধনমমর্ষণম্
112.7
তদ্যুদ্ধমভবদ্ঘোরং চিত্ররূপং চ ভারত
ঈক্ষিতৃপ্রীতিজননং সর্বপার্থিবপূজিতম্
112.8
ভীষ্মস্য নিধনার্থায় পার্থস্য বিজয়ায় চ
যুয়ুধাতে রণে বীরৌ সৌভদ্রকুরুপুংগবৌ
112.9
সাত্যকিং রভসং যুদ্ধে দ্রৌণির্ব্রাহ্মণপুংগবঃ
আজঘানোরসি ক্রুদ্ধো নারাচেন পরংতপঃ
112.10
শৈনেয়োঽপি গুরোঃ পুত্রং সর্বমর্মসু ভারত
অতাডয়দমেয়াত্মা নবভিঃ কঙ্কপত্রিভিঃ
112.11
অশ্বত্থামা তু সমরে সাত্যকিং নবভিঃ শরৈঃ
ত্রিংশতা চ পুনস্তূর্ণং বাহ্বোরুরসি চার্পয়ৎ
112.12
সোঽতিবিদ্ধো মহেষ্বাসো দ্রোণপুত্রেণ সাত্বতঃ
দ্রোণপুত্রং ত্রিভির্বাণৈরাজঘান মহায়শাঃ
112.13
পৌরবো ধৃষ্টকেতুং চ শরৈরাসাদ্য সংয়ুগে
বহুধা দারয়াং চক্রে মহেষ্বাসং মহারথম্
112.14
তথৈব পৌরবং যুদ্ধে ধৃষ্টকেতুর্মহারথঃ
ত্রিংশতা নিশিতৈর্বাণৈর্বিব্যাধ সুমহাবলঃ
112.15
পৌরবস্তু ধনুশ্ছিত্ত্বা ধৃষ্টকেতোর্মহারথঃ
ননাদ বলবন্নাদং বিব্যাধ দশভিঃ শরৈঃ
112.16
সোঽন্যত্কার্মুকমাদায় পৌরবং নিশিতৈঃ শরৈঃ
আজঘান মহারাজ ত্রিসপ্তত্যা শিলীমুখৈঃ
112.17
তৌ তু তত্র মহেষ্বাসৌ মহামাত্রৌ মহারথৌ
মহতা শরবর্ষেণ পরস্পরমবর্ষতাম্
112.18
অন্যোন্যস্য ধনুশ্ছিত্ত্বা হয়ান্হত্বা চ ভারত
বিরথাবসিয়ুদ্ধায় সংগতৌ তৌ মহারথৌ
112.19
আর্ষভে চর্মণী চিত্রে শতচন্দ্রপরিষ্কৃতে
তারকাশতচিত্রৌ চ নিস্ত্রিংশৌ সুমহাপ্রভৌ
112.20
প্রগৃহ্য বিমলৌ রাজংস্তাবন্যোন্যমভিদ্রুতৌ
বাশিতাসংগমে যত্তৌ সিংহাবিব মহাবনে
112.21
মণ্ডলানি বিচিত্রাণি গতপ্রত্যাগতানি চ
চেরতুর্দর্শয়ন্তৌ চ প্রার্থয়ন্তৌ পরস্পরম্
112.22
পৌরবো ধৃষ্টকেতুং তু শঙ্খদেশে মহাসিনা
তাডয়ামাস সংক্রুদ্ধস্তিষ্ঠ তিষ্ঠেতি চাব্রবীৎ
112.23
চেদিরাজোঽপি সমরে পৌরবং পুরুষর্ষভম্
আজঘান শিতাগ্রেণ জত্রুদেশে মহাসিনা
112.24
তাবন্যোন্যং মহারাজ সমাসাদ্য মহাহবে
অন্যোন্যবেগাভিহতৌ নিপেততুররিংদমৌ
112.25
ততঃ স্বরথমারোপ্য পৌরবং তনয়স্তব
জয়ত্সেনো রথে রাজন্নপোবাহ রণাজিরাৎ
112.26
ধৃষ্টকেতুং চ সমরে মাদ্রীপুত্রঃ পরংতপঃ
অপোবাহ রণে রাজন্সহদেবঃ প্রতাপবান্
112.27
চিত্রসেনঃ সুশর্মাণং বিদ্ধ্বা নবভিরাশুগৈঃ
পুনর্বিব্যাধ তং ষষ্ট্যা পুনশ্চ নবভিঃ শরৈঃ
112.28
সুশর্মা তু রণে ক্রুদ্ধস্তব পুত্রং বিশাং পতে
দশভির্দশভিশ্চৈব বিব্যাধ নিশিতৈঃ শরৈঃ
112.29
চিত্রসেনশ্চ তং রাজংস্ত্রিংশতা নতপর্বণাম্
আজঘান রণে ক্রুদ্ধঃ স চ তং প্রত্যবিধ্যত
ভীষ্মস্য সমরে রাজন্যশো মানং চ বর্ধয়ন্
112.30
সৌভদ্রো রাজপুত্রং তু বৃহদ্বলময়োধয়ৎ
আর্জুনিং কোসলেন্দ্রস্তু বিদ্ধ্বা পঞ্চভিরায়সৈঃ
পুনর্বিব্যাধ বিংশত্যা শরৈঃ সংনতপর্বভিঃ
112.31
বৃহদ্বলং চ সৌভদ্রো বিদ্ধ্বা নবভিরায়সৈঃ
নাকম্পয়ত সংগ্রামে বিব্যাধ চ পুনঃ পুনঃ
112.32
কৌসল্যস্য পুনশ্চাপি ধনুশ্চিচ্ছেদ ফাল্গুণিঃ
আজঘান শরৈশ্চৈব ত্রিংশতা কঙ্কপত্রিভিঃ
112.33
সোঽন্যত্কার্মুকমাদায় রাজপুত্রো বৃহদ্বলঃ
ফাল্গুনিং সমরে ক্রুদ্ধো বিব্যাধ বহুভিঃ শরৈঃ
112.34
তয়োর্যুদ্ধং সমভবদ্ভীষ্মহেতোঃ পরংতপ
সংরব্ধয়োর্মহারাজ সমরে চিত্রয়োধিনোঃ
যথা দেবাসুরে যুদ্ধে ময়বাসবয়োরভূৎ
112.35
ভীমসেনো গজানীকং যোধয়ন্বহ্বশোভত
যথা শক্রো বজ্রপাণির্দারয়ন্পর্বতোত্তমান্
112.36
তে বধ্যমানা ভীমেন মাতঙ্গা গিরিসংনিভাঃ
নিপেতুরুর্ব্যাং সহিতা নাদয়ন্তো বসুংধরাম্
112.37
গিরিমাত্রা হি তে নাগা ভিন্নাঞ্জনচয়োপমাঃ
বিরেজুর্বসুধাং প্রাপ্য বিকীর্ণা ইব পর্বতাঃ
112.38
যুধিষ্ঠিরো মহেষ্বাসো মদ্ররাজানমাহবে
মহত্যা সেনয়া গুপ্তং পীডয়ামাস সংগতঃ
112.39
মদ্রেশ্বরশ্চ সমরে ধর্মপুত্রং মহারথম্
পীডয়ামাস সংরব্ধো ভীষ্মহেতোঃ পরাক্রমী
112.40
বিরাটং সৈন্ধবো রাজা বিদ্ধ্বা সংনতপর্বভিঃ
নবভিঃ সায়কৈস্তীক্ষ্ণৈস্ত্রিংশতা পুনরর্দয়ৎ
112.41
বিরাটশ্চ মহারাজ সৈন্ধবং বাহিনীমুখে
ত্রিংশতা নিশিতৈর্বাণৈরাজঘান স্তনান্তরে
112.42
চিত্রকার্মুকনিস্ত্রিংশৌ চিত্রবর্মায়ুধধ্বজৌ
রেজতুশ্চিত্ররূপৌ তৌ সংগ্রামে মত্স্যসৈন্ধবৌ
112.43
দ্রোণঃ পাঞ্চালপুত্রেণ সমাগম্য মহারণে
মহাসমুদয়ং চক্রে শরৈঃ সংনতপর্বভিঃ
112.44
ততো দ্রোণো মহারাজ পার্ষতস্য মহদ্ধনুঃ
ছিত্ত্বা পঞ্চাশতেষূণাং পার্ষতং সমবিধ্যত
112.45
সোঽন্যত্কার্মুকমাদায় পার্ষতঃ পরবীরহা
দ্রোণস্য মিষতো যুদ্ধে প্রেষয়ামাস সায়কান্
112.46
তাঞ্শরাঞ্শরসংঘৈস্তু সংনিবার্য মহারথঃ
দ্রোণো দ্রুপদপুত্রায় প্রাহিণোত্পঞ্চ সায়কান্
112.47
তস্য ক্রুদ্ধো মহারাজ পার্ষতঃ পরবীরহা
দ্রোণায় চিক্ষেপ গদাং যমদণ্ডোপমাং রণে
112.48
তামাপতন্তীং সহসা হেমপট্টবিভূষিতাম্
শরৈঃ পঞ্চাশতা দ্রোণো বারয়ামাস সংয়ুগে
112.49
সা ছিন্না বহুধা রাজন্দ্রোণচাপচ্যুতৈঃ শরৈঃ
চূর্ণীকৃতা বিশীর্যন্তী পপাত বসুধাতলে
112.50
গদাং বিনিহতাং দৃষ্ট্বা পার্ষতঃ শত্রুসূদনঃ
দ্রোণায় শক্তিং চিক্ষেপ সর্বপারশবীং শুভাম্
112.51
তাং দ্রোণো নবভির্বাণৈশ্চিচ্ছেদ যুধি ভারত
পার্ষতং চ মহেষ্বাসং পীডয়ামাস সংয়ুগে
112.52
এবমেতন্মহদ্যুদ্ধং দ্রোণপার্ষতয়োরভূৎ
ভীষ্মং প্রতি মহারাজ ঘোররূপং ভয়ানকম্
112.53
অর্জুনঃ প্রাপ্য গাঙ্গেয়ং পীডয়ন্নিশিতৈঃ শরৈঃ
অভ্যদ্রবত সংয়ত্তং বনে মত্তমিব দ্বিপম্
112.54
প্রত্যুদ্যয়ৌ চ তং পার্থং ভগদত্তঃ প্রতাপবান্
ত্রিধা ভিন্নেন নাগেন মদান্ধেন মহাবলঃ
112.55
তমাপতন্তং সহসা মহেন্দ্রগজসংনিভম্
পরং যত্নং সমাস্থায় বীভত্সুঃ প্রত্যপদ্যত
112.56
ততো গজগতো রাজা ভগদত্তঃ প্রতাপবান্
অর্জুনং শরবর্ষেণ বারয়ামাস সংয়ুগে
112.57
অর্জুনস্তু রণে নাগমায়ান্তং রজতোপমম্
বিমলৈরায়সৈস্তীক্ষ্ণৈরবিধ্যত মহারণে
112.58
শিখণ্ডিনং চ কৌন্তেয়ো যাহি যাহীত্যচোদয়ৎ
ভীষ্মং প্রতি মহারাজ জহ্যেনমিতি চাব্রবীৎ
112.59
প্রাগ্জ্যোতিষস্ততো হিত্বা পাণ্ডবং পাণ্ডুপূর্বজ
প্রয়য়ৌ ত্বরিতো রাজন্দ্রুপদস্য রথং প্রতি
112.60
ততোঽর্জুনো মহারাজ ভীষ্মমভ্যদ্রবদ্দ্রুতম্
শিখণ্ডিনং পুরস্কৃত্য ততো যুদ্ধমবর্তত
112.61
ততস্তে তাবকাঃ শূরাঃ পাণ্ডবং রভসং রণে
সর্বেঽভ্যধাবন্ক্রোশন্তস্তদদ্ভুতমিবাভবৎ
112.62
নানাবিধান্যনীকানি পুত্রাণাং তে জনাধিপ
অর্জুনো ব্যধমত্কালে দিবীবাভ্রাণি মারুতঃ
112.63
শিখণ্ডী তু সমাসাদ্য ভরতানাং পিতামহম্
ইষুভিস্তূর্ণমব্যগ্রো বহুভিঃ স সমাচিনোৎ
112.64
সোমকাংশ্চ রণে ভীষ্মো জঘ্নে পার্থপদানুগান্
ন্যবারয়ত সৈন্যং চ পাণ্ডবানাং মহারথঃ
112.65
রথাগ্ন্যগারশ্চাপার্চিরসিশক্তিগদেন্ধনঃ
শরসংঘমহাজ্বালঃ ক্ষত্রিয়ান্সমরেঽদহৎ
112.66
যথা হি সুমহানগ্নিঃ কক্ষে চরতি সানিলঃ
তথা জজ্বাল ভীষ্মোঽপি দিব্যান্যস্ত্রাণ্যুদীরয়ন্
112.67
সুবর্ণপুঙ্খৈরিষুভিঃ শিতৈঃ সংনতপর্বভিঃ
নাদয়ন্স দিশো ভীষ্মঃ প্রদিশশ্চ মহায়শাঃ
112.68
পাতয়ন্রথিনো রাজন্গজাংশ্চ সহ সাদিভিঃ
মুণ্ডতালবনানীব চকার স রথব্রজান্
112.69
নির্মনুষ্যান্রথান্রাজন্গজানশ্বাংশ্চ সংয়ুগে
চকার স তদা ভীষ্মঃ সর্বশস্ত্রভৃতাং বরঃ
112.70
তস্য জ্যাতলনির্ঘোষং বিস্ফূর্জিতমিবাশনেঃ
নিশম্য সর্বতো রাজন্সমকম্পন্ত সৈনিকাঃ
112.71
অমোঘা হ্যপতন্বাণাঃ পিতুস্তে মনুজেশ্বর
নাসজ্জন্ত শরীরেষু ভীষ্মচাপচ্যুতাঃ শরাঃ
112.72
নির্মনুষ্যান্রথান্রাজন্সুয়ুক্তাঞ্জবনৈর্হয়ৈঃ
বাতায়মানান্পশ্যাম হ্রিয়মাণান্বিশাং পতে
112.73
চেদিকাশিকরূষাণাং সহস্রাণি চতুর্দশ
মহারথাঃ সমাখ্যাতাঃ কুলপুত্রাস্তনুত্যজঃ
112.74
অপরাবর্তিনঃ শূরাঃ সুবর্ণবিকৃতধ্বজাঃ
সংগ্রামে ভীষ্মমাসাদ্য সবাজিরথকুঞ্জরাঃ
জগ্মুস্তে পরলোকায় ব্যাদিতাস্যমিবান্তকম্
112.75
ন তত্রাসীন্মহারাজ সোমকানাং মহারথঃ
যঃ সংপ্রাপ্য রণে ভীষ্মং জীবিতে স্ম মনো দধে
112.76
তাংশ্চ সর্বান্রণে যোধান্প্রেতরাজপুরং প্রতি
নীতানমন্যন্ত জনা দৃষ্ট্বা ভীষ্মস্য বিক্রমম্
112.77
ন কশ্চিদেনং সমরে প্রত্যুদ্যাতি মহারথঃ
ঋতে পাণ্ডুসুতং বীরং শ্বেতাশ্বং কৃষ্ণসারথিম্
শিখণ্ডিনং চ সমরে পাঞ্চাল্যমমিতৌজসম্
112.78
শিখণ্ডী তু রণে ভীষ্মমাসাদ্য ভরতর্ষভ
দশভির্দশভির্বাণৈরাজঘান মহাহবে
112.79
শিখণ্ডিনং তু গাঙ্গেয়ঃ ক্রোধদীপ্তেন চক্ষুষা
অবৈক্ষত কটাক্ষেণ নির্দহন্নিব ভারত
112.80
স্ত্রীত্বং তত্সংস্মরন্রাজন্সর্বলোকস্য পশ্যতঃ
ন জঘান রণে ভীষ্মঃ স চ তং নাববুদ্ধবান্
112.81
অর্জুনস্তু মহারাজ শিখণ্ডিনমভাষত
অভিত্বরস্ব ত্বরিতো জহি চৈনং পিতামহম্
112.82
কিং তে বিবক্ষয়া বীর জহি ভীষ্মং মহারথম্
ন হ্যন্যমনুপশ্যামি কংচিদ্যৌধিষ্ঠিরে বলে
112.83
যঃ শক্তঃ সমরে ভীষ্মং যোধয়েত পিতামহম্
ঋতে ত্বাং পুরুষব্যাঘ্র সত্যমেতদ্ব্রবীমি তে
112.84
এবমুক্তস্তু পার্থেন শিখণ্ডী ভরতর্ষভ
শরৈর্নানাবিধৈস্তূর্ণং পিতামহমুপাদ্রবৎ
112.85
অচিন্তয়িত্বা তান্বাণান্পিতা দেবব্রতস্তব
অর্জুনং সমরে ক্রুদ্ধং বারয়ামাস সায়কৈঃ
112.86
তথৈব চ চমূং সর্বাং পাণ্ডবানাং মহারথঃ
অপ্রৈষীত্সমরে তীক্ষ্ণৈঃ পরলোকায় মারিষ
112.87
তথৈব পাণ্ডবা রাজন্সৈন্যেন মহতা বৃতাঃ
ভীষ্মং প্রচ্ছাদয়ামাসুর্মেঘা ইব দিবাকরম্
112.88
স সমন্তাত্পরিবৃতো ভারতো ভরতর্ষভ
নির্দদাহ রণে শূরান্বনং বহ্নিরিব জ্বলন্
112.89
তত্রাদ্ভুতমপশ্যাম তব পুত্রস্য পৌরুষম্
অয়োধয়ত যত্পার্থং জুগোপ চ যতব্রতম্
112.90
কর্মণা তেন সমরে তব পুত্রস্য ধন্বিনঃ
দুঃশাসনস্য তুতুষুঃ সর্বে লোকা মহাত্মনঃ
112.91
যদেকঃ সমরে পার্থান্সানুগান্সময়োধয়ৎ
ন চৈনং পাণ্ডবা যুদ্ধে বারয়ামাসুরুল্বণম্
112.92
দুঃশাসনেন সমরে রথিনো বিরথীকৃতাঃ
সাদিনশ্চ মহারাজ দন্তিনশ্চ মহাবলাঃ
112.93
বিনির্ভিন্নাঃ শরৈস্তীক্ষ্ণৈর্নিপেতুর্ধরণীতলে
শরাতুরাস্তথৈবান্যে দন্তিনো বিদ্রুতা দিশঃ
112.94
যথাগ্নিরিন্ধনং প্রাপ্য জ্বলেদ্দীপ্তার্চিরুল্বণঃ
তথা জজ্বাল পুত্রস্তে পাণ্ডবান্বৈ বিনির্দহন্
112.95
তং ভারতমহামাত্রং পাণ্ডবানাং মহারথঃ
জেতুং নোত্সহতে কশ্চিন্নাপ্যুদ্যাতুং কথংচন
ঋতে মহেন্দ্রতনয়ং শ্বেতাশ্বং কৃষ্ণসারথিম্
112.96
স হি তং সমরে রাজন্বিজিত্য বিজয়োঽর্জুনঃ
ভীষ্মমেবাভিদুদ্রাব সর্বসৈন্যস্য পশ্যতঃ
112.97
বিজিতস্তব পুত্রোঽপি ভীষ্মবাহুব্যপাশ্রয়ঃ
পুনঃ পুনঃ সমাশ্বস্য প্রায়ুধ্যত রণোত্কটঃ
অর্জুনং চ রণে রাজন্যোধয়ন্স ব্যরাজত
112.98
শিখণ্ডী তু রণে রাজন্বিব্যাধৈব পিতামহম্
শরৈরশনিসংস্পর্শৈস্তথা সর্পবিষোপমৈঃ
112.99
ন চ তেঽস্য রুজং চক্রুঃ পিতুস্তব জনেশ্বর
স্ময়মানশ্চ গাঙ্গেয়স্তান্বাণাঞ্জগৃহে তদা
112.100
উষ্ণার্তো হি নরো যদ্বজ্জলধারাঃ প্রতীচ্ছতি
তথা জগ্রাহ গাঙ্গেয়ঃ শরধারাঃ শিখণ্ডিনঃ
112.101
তং ক্ষত্রিয়া মহারাজ দদৃশুর্ঘোরমাহবে
ভীষ্মং দহন্তং সৈন্যানি পাণ্ডবানাং মহাত্মনাম্
112.102
ততোঽব্রবীত্তব সুতঃ সর্বসৈন্যানি মারিষ
অভিদ্রবত সংগ্রামে ফল্গুনং সর্বতো রথৈঃ
112.103
ভীষ্মো বঃ সমরে সর্বান্পালয়িষ্যতি ধর্মবিৎ
তে ভয়ং সুমহত্ত্যক্ত্বা পাণ্ডবান্প্রতিয়ুধ্যত
112.104
এষ তালেন দীপ্তেন ভীষ্মস্তিষ্ঠতি পালয়ন্
সর্বেষাং ধার্তরাষ্ট্রাণাং রণে শর্ম চ বর্ম চ
112.105
ত্রিদশাপি সমুদ্যুক্তা নালং ভীষ্মং সমাসিতুম্
কিমু পার্থা মহাত্মানং মর্ত্যভূতাস্তথাবলাঃ
তস্মাদ্দ্রবত হে যোধাঃ ফল্গুনং প্রাপ্য সংয়ুগে
112.106
অহমদ্য রণে যত্তো যোধয়িষ্যামি ফল্গুনম্
সহিতঃ সর্বতো যত্তৈর্ভবদ্ভির্বসুধাধিপাঃ
112.107
তচ্ছ্রুত্বা তু বচো রাজংস্তব পুত্রস্য ধন্বিনঃ
অর্জুনং প্রতি সংয়ত্তা বলবন্তো মহারথাঃ
112.108
তে বিদেহাঃ কলিঙ্গাশ্চ দাশেরকগণৈঃ সহ
অভিপেতুর্নিষাদাশ্চ সৌবীরাশ্চ মহারণে
112.109
বাহ্লিকা দরদাশ্চৈব প্রাচ্যোদীচ্যাশ্চ মালবাঃ
অভীষাহাঃ শূরসেনাঃ শিবয়োঽথ বসাতয়ঃ
112.110
শাল্বাশ্রয়াস্ত্রিগর্তাশ্চ অম্বষ্ঠাঃ কেকয়ৈঃ সহ
অভিপেতূ রণে পার্থং পতংগা ইব পাবকম্
112.111
স তান্সর্বান্সহানীকান্মহারাজ মহারথান্
দিব্যান্যস্ত্রাণি সংচিন্ত্য প্রসংধায় ধনংজয়ঃ
112.112
স তৈরস্ত্রৈর্মহাবেগৈর্দদাহাশু মহাবলঃ
শরপ্রতাপৈর্বীভত্সুঃ পতংগানিব পাবকঃ
112.113
তস্য বাণসহস্রাণি সৃজতো দৃঢধন্বিনঃ
দীপ্যমানমিবাকাশে গাণ্ডীবং সমদৃশ্যত
112.114
তে শরার্তা মহারাজ বিপ্রকীর্ণরথধ্বজাঃ
নাভ্যবর্তন্ত রাজানঃ সহিতা বানরধ্বজম্
112.115
সধ্বজা রথিনঃ পেতুর্হয়ারোহা হয়ৈঃ সহ
গজাঃ সহ গজারোহৈঃ কিরীটিশরতাডিতাঃ
112.116
ততোঽর্জুনভুজোত্সৃষ্টৈরাবৃতাসীদ্বসুংধরা
বিদ্রবদ্ভিশ্চ বহুধা বলৈ রাজ্ঞাং সমন্ততঃ
112.117
অথ পার্থো মহাবাহুর্দ্রাবয়িত্বা বরূথিনীম্
দুঃশাসনায় সমরে প্রেষয়ামাস সায়কান্
112.118
তে তু ভিত্ত্বা তব সুতং দুঃশাসনময়োমুখাঃ
ধরণীং বিবিশুঃ সর্বে বল্মীকমিব পন্নগাঃ
হয়াংশ্চাস্য ততো জঘ্নে সারথিং চ ন্যপাতয়ৎ
112.119
বিবিংশতিং চ বিংশত্যা বিরথং কৃতবান্প্রভো
আজঘান ভৃশং চৈব পঞ্চভির্নতপর্বভিঃ
112.120
কৃপং শল্যং বিকর্ণং চ বিদ্ধ্বা বহুভিরায়সৈঃ
চকার বিরথাংশ্চৈব কৌন্তেয়ঃ শ্বেতবাহনঃ
112.121
এবং তে বিরথাঃ পঞ্চ কৃপঃ শল্যশ্চ মারিষ
দুঃশাসনো বিকর্ণশ্চ তথৈব চ বিবিংশতিঃ
সংপ্রাদ্রবন্ত সমরে নির্জিতাঃ সব্যসাচিনা
112.122
পূর্বাহ্ণে তু তথা রাজন্পরাজিত্য মহারথান্
প্রজজ্বাল রণে পার্থো বিধূম ইব পাবকঃ
112.123
তথৈব শরবর্ষেণ ভাস্করো রশ্মিবানিব
অন্যানপি মহারাজ পাতয়ামাস পার্থিবান্
112.124
পরাঙ্মুখীকৃত্য তদা শরবর্ষৈর্মহারথান্
প্রাবর্তয়ত সংগ্রামে শোণিতোদাং মহানদীম্
মধ্যেন কুরুসৈন্যানাং পাণ্ডবানাং চ ভারত
112.125
গজাশ্চ রথসংঘাশ্চ বহুধা রথিভির্হতাঃ
রথাশ্চ নিহতা নাগৈর্নাগা হয়পদাতিভিঃ
112.126
অন্তরা ছিধ্যমানানি শরীরাণি শিরাংসি চ
নিপেতুর্দিক্ষু সর্বাসু গজাশ্বরথয়োধিনাম্
112.127
ছন্নমায়োধনং রেজে কুণ্ডলাঙ্গদধারিভিঃ
পতিতৈঃ পাত্যমানৈশ্চ রাজপুত্রৈর্মহারথৈঃ
112.128
রথনেমিনিকৃত্তাশ্চ গজৈশ্চৈবাবপোথিতাঃ
পাদাতাশ্চাপ্যদৃশ্যন্ত সাশ্বাঃ সহয়সাদিনঃ
112.129
গজাশ্বরথসংঘাশ্চ পরিপেতুঃ সমন্ততঃ
বিশীর্ণাশ্চ রথা ভূমৌ ভগ্নচক্রয়ুগধ্বজাঃ
112.130
তদ্গজাশ্বরথৌঘানাং রুধিরেণ সমুক্ষিতম্
ছন্নমায়োধনং রেজে রক্তাভ্রমিব শারদম্
112.131
শ্বানঃ কাকাশ্চ গৃধ্রাশ্চ বৃকা গোমায়ুভিঃ সহ
প্রণেদুর্ভক্ষ্যমাসাদ্য বিকৃতাশ্চ মৃগদ্বিজাঃ
112.132
ববুর্বহুবিধাশ্চৈব দিক্ষু সর্বাসু মারুতাঃ
দৃশ্যমানেষু রক্ষঃসু ভূতেষু বিনদত্সু চ
112.133
কাঞ্চনানি চ দামানি পতাকাশ্চ মহাধনাঃ
ধূমায়মানা দৃশ্যন্তে সহসা মারুতেরিতাঃ
112.134
শ্বেতচ্ছত্রসহস্রাণি সধ্বজাশ্চ মহারথাঃ
বিনিকীর্ণাঃ স্ম দৃশ্যন্তে শতশোঽথ সহস্রশঃ
সপতাকাশ্চ মাতঙ্গা দিশো জগ্মুঃ শরাতুরাঃ
112.135
ক্ষত্রিয়াশ্চ মনুষ্যেন্দ্র গদাশক্তিধনুর্ধরাঃ
সমন্ততো ব্যদৃশ্যন্ত পতিতা ধরণীতলে
112.136
ততো ভীষ্মো মহারাজ দিব্যমস্ত্রমুদীরয়ন্
অভ্যধাবত কৌন্তেয়ং মিষতাং সর্বধন্বিনাম্
112.137
তং শিখণ্ডী রণে যত্তমভ্যধাবত দংশিতঃ
সংজহার ততো ভীষ্মস্তদস্ত্রং পাবকোপমম্
112.138
এতস্মিন্নেব কালে তু কৌন্তেয়ঃ শ্বেতবাহনঃ
নিজঘ্নে তাবকং সৈন্যং মোহয়িত্বা পিতামহম্