Utshovঅধ্যায় 113
113.1
সংজয় উবাচ
এবং ব্যূঢেষ্বনীকেষু ভূয়িষ্ঠমনুবর্তিষু
ব্রহ্মলোকপরাঃ সর্বে সমপদ্যন্ত ভারত
113.2
ন হ্যনীকমনীকেন সমসজ্জত সংকুলে
ন রথা রথিভিঃ সার্ধং ন পদাতাঃ পদাতিভিঃ
113.3
অশ্বা নাশ্বৈরয়ুধ্যন্ত ন গজা গজয়োধিভিঃ
মহান্ব্যতিকরো রৌদ্রঃ সেনয়োঃ সমপদ্যত
113.4
নরনাগরথেষ্বেবং ব্যবকীর্ণেষু সর্বশঃ
ক্ষয়ে তস্মিন্মহারৌদ্রে নির্বিশেষমজায়ত
113.5
ততঃ শল্যঃ কৃপশ্চৈব চিত্রসেনশ্চ ভারত
দুঃশাসনো বিকর্ণশ্চ রথানাস্থায় সত্বরাঃ
পাণ্ডবানাং রণে শূরা ধ্বজিনীং সমকম্পয়ন্
113.6
সা বধ্যমানা সমরে পাণ্ডুসেনা মহাত্মভিঃ
ত্রাতারং নাধ্যগচ্ছদ্বৈ মজ্জমানেব নৌর্জলে
113.7
যথা হি শৈশিরঃ কালো গবাং মর্মাণি কৃন্ততি
তথা পাণ্ডুসুতানাং বৈ ভীষ্মো মর্মাণ্যকৃন্তত
113.8
অতীব তব সৈন্যস্য পার্থেন চ মহাত্মনা
নগমেঘপ্রতীকাশাঃ পাতিতা বহুধা গজাঃ
113.9
মৃদ্যমানাশ্চ দৃশ্যন্তে পার্থেন নরয়ূথপাঃ
ইষুভিস্তাড্যমানাশ্চ নারাচৈশ্চ সহস্রশঃ
113.10
পেতুরার্তস্বরং কৃত্বা তত্র তত্র মহাগজাঃ
আবদ্ধাভরণৈঃ কায়ৈর্নিহতানাং মহাত্মনাম্
113.11
ছন্নমায়োধনং রেজে শিরোভিশ্চ সকুণ্ডলৈঃ
তস্মিন্নতিমহাভীমে রাজন্বীরবরক্ষয়ে
ভীষ্মে চ যুধি বিক্রান্তে পাণ্ডবে চ ধনংজয়ে
113.12
তে পরাক্রান্তমালোক্য রাজন্যুধি পিতামহম্
ন ন্যবর্তন্ত কৌরব্যা ব্রহ্মলোকপুরস্কৃতাঃ
113.13
ইচ্ছন্তো নিধনং যুদ্ধে স্বর্গং কৃত্বা পরায়ণম্
পাণ্ডবানভ্যবর্তন্ত তস্মিন্বীরবরক্ষয়ে
113.14
পাণ্ডবাপি মহারাজ স্মরন্তো বিবিধান্বহূন্
ক্লেশান্কৃতান্সপুত্রেণ ত্বয়া পূর্বং নরাধিপ
113.15
ভয়ং ত্যক্ত্বা রণে শূরা ব্রহ্মলোকপুরস্কৃতাঃ
তাবকাংস্তব পুত্রাংশ্চ যোধয়ন্তি স্ম হৃষ্টবৎ
113.16
সেনাপতিস্তু সমরে প্রাহ সেনাং মহারথঃ
অভিদ্রবত গাঙ্গেয়ং সোমকাঃ সৃঞ্জয়ৈঃ সহ
113.17
সেনাপতিবচঃ শ্রুত্বা সোমকাঃ সহ সৃঞ্জয়ৈঃ
অভ্যদ্রবন্ত গাঙ্গেয়ং শস্ত্রবৃষ্ট্যা সমন্ততঃ
113.18
বধ্যমানস্ততো রাজন্পিতা শাংতনবস্তব
অমর্ষবশমাপন্নো যোধয়ামাস সৃঞ্জয়ান্
113.19
তস্য কীর্তিমতস্তাত পুরা রামেণ ধীমতা
সংপ্রদত্তাস্ত্রশিক্ষা বৈ পরানীকবিনাশিনী
113.20
স তাং শিক্ষামধিষ্ঠায় কৃত্বা পরবলক্ষয়ম্
অহন্যহনি পার্থানাং বৃদ্ধঃ কুরুপিতামহঃ
ভীষ্মো দশ সহস্রাণি জঘান পরবীরহা
113.21
তস্মিংস্তু দিবসে প্রাপ্তে দশমে ভরতর্ষভ
ভীষ্মেণৈকেন মত্স্যেষু পাঞ্চালেষু চ সংয়ুগে
গজাশ্বমমিতং হত্বা হতাঃ সপ্ত মহারথাঃ
113.22
হত্বা পঞ্চ সহস্রাণি রথিনাং প্রপিতামহঃ
নরাণাং চ মহায়ুদ্ধে সহস্রাণি চতুর্দশ
113.23
তথা দন্তিসহস্রং চ হয়ানাময়ুতং পুনঃ
শিক্ষাবলেন নিহতং পিত্রা তব বিশাং পতে
113.24
ততঃ সর্বমহীপানাং ক্ষোভয়িত্বা বরূথিনীম্
বিরাটস্য প্রিয়ো ভ্রাতা শতানীকো নিপাতিতঃ
113.25
শতানীকং চ সমরে হত্বা ভীষ্মঃ প্রতাপবান্
সহস্রাণি মহারাজ রাজ্ঞাং ভল্লৈর্ন্যপাতয়ৎ
113.26
যে চ কেচন পার্থানামভিয়াতা ধনংজয়ম্
রাজানো ভীষ্মমাসাদ্য গতাস্তে যমসাদনম্
113.27
এবং দশ দিশো ভীষ্মঃ শরজালৈঃ সমন্ততঃ
অতীত্য সেনাং পার্থানামবতস্থে চমূমুখে
113.28
স কৃত্বা সুমহত্কর্ম তস্মিন্বৈ দশমেঽহনি
সেনয়োরন্তরে তিষ্ঠন্প্রগৃহীতশরাসনঃ
113.29
ন চৈনং পার্থিবা রাজঞ্শেকুঃ কেচিন্নিরীক্ষিতুম্
মধ্যং প্রাপ্তং যথা গ্রীষ্মে তপন্তং ভাস্করং দিবি
113.30
যথা দৈত্যচমূং শক্রস্তাপয়ামাস সংয়ুগে
তথা ভীষ্মঃ পাণ্ডবেয়াংস্তাপয়ামাস ভারত
113.31
তথা চ তং পরাক্রান্তমালোক্য মধুসূদনঃ
উবাচ দেবকীপুত্রঃ প্রীয়মাণো ধনংজয়ম্
113.32
এষ শাংতনবো ভীষ্মঃ সেনয়োরন্তরে স্থিতঃ
নানিহত্য বলাদেনং বিজয়স্তে ভবিষ্যতি
113.33
যত্তঃ সংস্তম্ভয়স্বৈনং যত্রৈষা ভিদ্যতে চমূঃ
ন হি ভীষ্মশরানন্যঃ সোঢুমুত্সহতে বিভো
113.34
ততস্তস্মিন্ক্ষণে রাজংশ্চোদিতো বানরধ্বজঃ
সধ্বজং সরথং সাশ্বং ভীষ্মমন্তর্দধে শরৈঃ
113.35
স চাপি কুরুমুখ্যানামৃষভঃ পাণ্ডবেরিতান্
শরব্রাতৈঃ শরব্রাতান্বহুধা বিদুধাব তান্
113.36
তেন পাঞ্চালরাজশ্চ ধৃষ্টকেতুশ্চ বীর্যবান্
পাণ্ডবো ভীমসেনশ্চ ধৃষ্টদ্যুম্নশ্চ পার্ষতঃ
113.37
যমৌ চ চেকিতানশ্চ কেকয়াঃ পঞ্চ চৈব হ
সাত্যকিশ্চ মহারাজ সৌভদ্রোঽথ ঘটোত্কচঃ
113.38
দ্রৌপদেয়াঃ শিখণ্ডী চ কুন্তিভোজশ্চ বীর্যবান্
সুশর্মা চ বিরাটশ্চ পাণ্ডবেয়া মহাবলাঃ
113.39
এতে চান্যে চ বহবঃ পীডিতা ভীষ্মসায়কৈঃ
সমুদ্ধৃতাঃ ফল্গুনেন নিমগ্নাঃ শোকসাগরে
113.40
ততঃ শিখণ্ডী বেগেন প্রগৃহ্য পরমায়ুধম্
ভীষ্মমেবাভিদুদ্রাব রক্ষ্যমাণঃ কিরীটিনা
113.41
ততোঽস্যানুচরান্হত্বা সর্বান্রণবিভাগবিৎ
ভীষ্মমেবাভিদুদ্রাব বীভত্সুরপরাজিতঃ
113.42
সাত্যকিশ্চেকিতানশ্চ ধৃষ্টদ্যুম্নশ্চ পার্ষতঃ
বিরাটো দ্রুপদশ্চৈব মাদ্রীপুত্রৌ চ পাণ্ডবৌ
দুদ্রুবুর্ভীষ্মমেবাজৌ রক্ষিতা দৃঢধন্বনা
113.43
অভিমন্যুশ্চ সমরে দ্রৌপদ্যাঃ পঞ্চ চাত্মজাঃ
দুদ্রুবুঃ সমরে ভীষ্মং সমুদ্যতমহায়ুধাঃ
113.44
তে সর্বে দৃঢধন্বানঃ সংয়ুগেষ্বপলায়িনঃ
বহুধা ভীষ্মমানর্ছন্মার্গণৈঃ কৃতমার্গণাঃ
113.45
বিধূয় তান্বাণগণান্যে মুক্তাঃ পার্থিবোত্তমৈঃ
পাণ্ডবানামদীনাত্মা ব্যগাহত বরূথিনীম্
কৃত্বা শরবিঘাতং চ ক্রীডন্নিব পিতামহঃ
113.46
নাভিসংধত্ত পাঞ্চাল্যং স্ময়মানো মুহুর্মুহুঃ
স্ত্রীত্বং তস্যানুসংস্মৃত্য ভীষ্মো বাণাঞ্শিখণ্ডিনঃ
জঘান দ্রুপদানীকে রথান্সপ্ত মহারথঃ
113.47
ততঃ কিলকিলাশব্দঃ ক্ষণেন সমপদ্যত
মত্স্যপাঞ্চালচেদীনাং তমেকমভিধাবতাম্
113.48
তে বরাশ্বরথব্রাতৈর্বারণৈঃ সপদাতিভিঃ
তমেকং ছাদয়ামাসুর্মেঘা ইব দিবাকরম্
ভীষ্মং ভাগীরথীপুত্রং প্রতপন্তং রণে রিপূন্
113.49
ততস্তস্য চ তেষাং চ যুদ্ধে দেবাসুরোপমে
কিরীটী ভীষ্মমানর্ছত্পুরস্কৃত্য শিখণ্ডিনম্